الكلام ضِدّ دِمَشْق
1 مُحَاكَمَةْ مَدِينَةْ دِمَشْق.
دِمَشْق بَتَّانْ
مَا تُكُونْ مَدِينَةْ.
هِي تِلْهَدَّمْ
وَ تَبْقَى كَوْم هَنَا تُرَابْ.
2 وَ مُدُنْ عَرُوعِرْ يَخْرَبَوْا
وَ يَبْقَوْا بَكَانْ لِلْبَهَايِمْ.
الْبَهَايِمْ يَرُقْدُوا فَوْقهُمْ
وَ مَا فِي نَادُمْ يِبَشْتِنْهُمْ.
3 الْمُدُنْ الْقَوِيِّينْ فِي أَفْرَايِمْ يِدَّمَّرَوْا
وَ مُلُكْ دِمَشْق كُلَ يَقِيفْ.
الْفَضَّلَوْا مِنْ بَلَدْ أَرَامْ،
شَرَفْهُمْ يَبْقَى مَا فِيهْ
مِثِلْ شَرَفْ بَنِي إِسْرَائِيلْ.
وَ دَا كَلَامْ اللّٰهْ الْقَادِرْ.
4 وَ فِي الْيَوْم دَا،
شَرَفْ ذُرِّيَّةْ يَعْقُوبْ يَنْقُصْ
مِثِلْ نَادُمْ اللَّحَمْ جِلْدَهْ
وَ شَحَمَهْ دَفَّقْ.
5 وَ هُمَّنْ يَبْقَوْا
مِثِلْ الزَّرَعْ بَعَدْ الْقَطِعْ
وَكِتْ الْقَطِعِينْ
لَمَّوْا الْقَمَحْ بِكَتَرَةْ.
وَ دَا مِثِلْ وَكِتْ يِكَشُّبُوا الْقَنَادِيلْ
فِي وَادِي رَفَايِينْ.
6 الْيِفَضِّلْ مِنْهُمْ يَبْقَى شِيَّةْ
مِثِلْ الْكِشَّيْب
أَوْ مِثِلْ الْفَضَّلْ
بَعَدْ حَتَّوْا شَدَرْ الزَّيْتُونْ.
وَاحِدْ أَوْ تِنَيْن يِفَضُّلُوا فَوْق فِي رَاسْ الشَّدَرَةْ
وَ أَرْبَعَةْ أَوْ خَمْسَةْ فِي الْفُرُوعْ.
وَ دَا كَلَامْ اللّٰهْ إِلٰـهْ بَنِي إِسْرَائِيلْ.
7 وَ فِي الْيَوْم دَا، الْإِنْسَانْ يِتْوَكَّلْ عَلَيْ إِلٰـهَهْ الْخَلَقَهْ وَ يِوَجِّهْ بِأَمَانْ عَلَيْ قُدُّوسْ إِسْرَائِيلْ. 8 وَ بَتَّانْ مَا يِنْتَكِلْ عَلَيْ الْمَدَابِحْ السَّوَّتْهُمْ إِيدَهْ وَ مَا يِوَجِّهْ بِأَمَانْ فِي السَّوَّاهْ بِأَصَابْعَهْ. وَ دَوْل الْعِيدَانْ الْغَزَّاهُمْ لِعِبَادَةْ أَشِيرَةْ وَ الْمَخَابِرْ هَنَا الْبَخُورْ.
9 وَ فِي الْيَوْم دَا،
الْمُدُنْ الْقَوِيِّينْ يِخَلُّوهُمْ
مِثِلْ خَلَّوْا الْغَابَةْ وَ رُوسَيْ الْجِبَالْ
وَكِتْ بَنِي إِسْرَائِيلْ جَوْا شَالَوْا الْبَلَدْ،
كُلَّ الْبَلَدْ تَخْرَبْ.
10 أَشَانْ إِنْتُو نِسِيتُوا إِلٰـهْكُو النَّجَّاكُو
وَ مَا فَكَّرْتُوا فَوْقَهْ هُو، جَبَلْ مَلْجَئْكُو.
وَ فِي شَانْ دَا، مَقَّنْتُوا شَدَرْ لَذِيذْ
وَ تَيْرَبْتُوا تَيْرَابْ أَجْنَبِي.
11 وَ يَوْم مَقَّنْتُوهُمْ،
إِنْتُو شِفْتُوهُمْ كِبْرَوْا
وَ أَمْبَاكِرْ فَجُرْ،
شِفْتُوا نُوَّارْهُمْ.
وَ لَاكِنْ فِي وَكْت الْقَطِعْ، مَا لِقِيتُوا إِنْتَاجْ
وَ وَجَعْكُو مَا عِنْدَهْ عِلَاجْ.
المُهاجِمين طردوهم بلَيْل
12 الْعَذَابْ! دَاهُو الْحِسّ الشَّدِيدْ
هَنَا شُعُوبْ الْمَا عِنْدُهُمْ عَدَدْ.
حَرَكَتْهُمْ شَدِيدَةْ
مِثِلْ حَرَكَةْ الْبَحَرْ
وَ حِسُّهُمْ شَدِيدْ
مِثِلْ حِسّ أَلْمِي السَّيْل.
13 وَ حَرَكَةْ الشُّعُوبْ
مِثِلْ حَرَكَةْ أَلْمِي الْكَتِيرْ.
وَكِتْ الرَّبّ يُقُمّ ضِدُّهُمْ،
هُمَّنْ يِعَرُّدُوا بَعِيدْ،
مَطْرُودِينْ مِثِلْ أُتَّابْ
قِدَّامْ رِيحْ مِنْ الْجِبَالْ
وَ مِثِلْ حَسْكَنِيتْ
قِدَّامْ أَمْ زَوْبَعَانَةْ.
14 وَ فِي الْعَشِيَّةْ، رُعُبْ!
وَ قَبُلْ الْفَجُرْ، مَا فَضَّلْ شَيّءْ!
دَا بَسْ قِسِمْ النَّاسْ الْيَنْهَبَوْنَا
وَ مُكَافَاةْ النَّاسْ الْيَكْسَبَوْنَا.
© La Bible en arabe tchadien © Alliance biblique du Tchad, 2019
