اللّه يعاقِب شعبه
1 يَا بَنِي إِسْرَائِيلْ، أَسْمَعَوْا كَلَامْ اللّٰهْ
الْقَالَهْ ضِدُّكُو،
ضِدُّكُو إِنْتُو الْقَبَايِلْ
الْمَرَقَاكُو مِنْ بَلَدْ مَصِرْ:
2 «أَنَا عَزَلْتُكُو إِنْتُو وِحَيْدكُو
مِنْ أُسُطْ كُلَّ قَبَايِلْ الْأَرْض.
وَ فِي شَانْ دَا، أَنَا نِعَاقِبْكُو
بِسَبَبْ كُلَّ خَطَايَاكُو.»
اللّه يبيِّن سِرّه للأنبياء
3 رُجَالْ إِتْنَيْن يَقْدَرَوْا يَمْشُوا سَوَا
كَنْ مَا أَسْتَفَقَوْا وَلَّا؟
4 الدُّودْ يَقْدَرْ يِكِرّ فِي الْغَابَةْ
كَنْ مَا كَتَلْ وَلَّا؟
وَلْد الدُّودْ حِسَّهْ يِنْسَمِعْ فِي نُقُرْتَهْ
كَنْ مَا لِقِي أَكِلْ وَلَّا؟
5 الطَّيْر يَقْدَرْ يَقَعْ فِي الشَّرَكْ
كَنْ مَا شَتَّتَوْا لَيَّهْ أَكِلْ وَلَّا؟
الشَّرَكْ يَقْدَرْ يَمْرُقْ مِنْ الْأَرْض
كَنْ مَا كَرَبْ صَيْدِتَهْ وَلَّا؟
6 كَنْ الْبُوقْ بَكَى فِي لُبّ الْحِلَّةْ،
سُكَّانْهَا مَا يِبَرْجُلُوا وَلَّا؟
كَنْ شَيّءْ فَسِلْ جَاءْ فِي الْحِلَّةْ،
مَا اللّٰهْ بَسْ جَعَلَهْ وَلَّا؟
7 وَ مِثِلْ دَا، اللّٰهْ الرَّبّ مَا يِسَوِّي أَيِّ شَيّءْ
كَنْ مَا بَيَّنْ سِرَّهْ لِعَبِيدَهْ الْأَنْبِيَاء.
8 الدُّودْ كَنْ كَرَّ،
يَاتُو الْمَا يَخَافْ؟
اللّٰهْ الرَّبّ كَنْ كَلَّمْ،
يَاتُو الْمَا يِبَلِّغْ كَلَامَهْ؟
قَرَار اللّه ضِدّ السَامِرَة
9 «عِيطُوا فِي قُصُورْ مَدِينَةْ أَشْدُودْ
وَ فِي قُصُورْ بَلَدْ مَصِرْ وَ قُولُوا:
‹لِمُّوا فِي جِبَالْ السَّامِرَةْ
وَ شِيفُوا الْبَرْجَالْ الْكَتِيرْ الْفِي لُبَّهَا
وَ الظُّلُمْ الْقَاعِدْ فَوْقهَا.›
10 وَ دَا كَلَامْ اللّٰهْ.شَعَبِي مَا يَعَرْفُوا يِسَوُّوا الْحَقّ
وَ يَخْزُنُوا فِي قُصُورْهُمْ كُلَّ شَيّءْ
الشَّالَوْا بِعُنُفْ وَ نَهِبْ.»
11 وَ فِي شَانْ دَا، دَاهُو اللّٰهْ الرَّبّ قَالْ:
«يَا السَّامِرَةْ، الْعَدُو يِحَاصِرْكِ
وَ يِدَمِّرْ قُدْرِتْكِ وَ يَنْهَبْ قُصُورْكِ.»
12 دَاهُو اللّٰهْ قَالْ:
«مِثِلْ الرَّاعِي يِخَلِّصْ
مِنْ خَشُمْ الدُّودْ
رِجِلَيْن أَوْ نُصّ أَدَانْ،
بِمِثِلْ دَا، يَخْلَصَوْا
بَنِي إِسْرَائِيلْ الْقَاعِدِينْ فِي السَّامِرَةْ،
الْمُرْتَاحِينْ فِي سَرَايِرْهُمْ
وَ الْجَالْسِينْ فِي بُسَاطَاتْهُمْ.
13 وَ دَا كَلَامْ اللّٰهْ الرَّبّ الْإِلٰـهْ الْقَادِرْ.أَسْمَعَوْا وَ حَذُّرُوا
ذُرِّيَّةْ يَعْقُوبْ!
14 يَوْم نِعَاقِبْ بَنِي إِسْرَائِيلْ بِذُنُوبْهُمْ،
نِعَاقِبْ مَدَابِحْ بَيْت إِيلْ
وَ نِكَسِّرْ قُرُونْ الْمَدْبَحْ
وَ نَرْمِيهُمْ فِي التُّرَابْ.
15 وَ نِدَمِّرْ بُيُوتْ الْغَنِيِّينْ
الْيِنْجَمَّوْا فَوْقهُمْ فِي الشِّتَاءْ وَ الصَّيْف.
وَ الْبُيُوتْ الْمُجَمَّلِينْ بِالْعَاجْ كُلَ، نِدَمِّرْهُمْ
وَ بُيُوتْ كَتِيرِينْ يَبْقَوْا مَا فِيهُمْ.»
وَ دَا كَلَامْ اللّٰهْ.
© La Bible en arabe tchadien © Alliance biblique du Tchad, 2019
