المُعاهدة الجديدة
1 أَكُونْ تُقُولُوا أَنِحْنَ بَدَيْنَا بَتَّانْ نَشْكُرُوا نُفُوسْنَا. لَا، مَا كَيْ. أَكِيدْ نَاسْ وَاحِدِينْ وَاجِبْ لَيْهُمْ جَوَابْ الْيَشْهَدْ لَيْهُمْ، كَنْ جَوَابْ لَيْكُو أَوْ جَوَابْ مِنْكُو. وَ لَاكِنْ دَا مَا وَاجِبْ لَيْنَا أَنِحْنَ. 2 إِنْتُو بَسْ جَوَابْنَا. إِنْتُو مَكْتُوبِينْ فِي قُلُوبْنَا. وَ كُلَّ النَّاسْ يَعَرْفُوهْ وَ يَقْرُوهْ. 3 أَيْوَى، إِنْتُو بَسْ جَوَابْ الْمَسِيحْ وَ هُو رَسَّلَهْ بِوَاسِطَتْنَا وَ دَا وَاضِحْ لِأَيِّ نَادُمْ. وَ الْجَوَابْ دَا مَا مَكْتُوبْ بِقَلَمْ لَاكِنْ بِرُوحْ اللّٰهْ الْحَيّ. وَ هُو مَا مَكْتُوبْ فِي لَوْح هَنَا حَجَرْ لَاكِنْ مَكْتُوبْ فِي قُلُوبْ النَّاسْ.
4 وَ قُلْنَا الْكَلَامْ دَا أَشَانْ عَشَمْنَا فِي اللّٰهْ قَوِي بِالْمَسِيحْ. 5 أَنِحْنَ بِنُفُوسْنَا مَا عِنْدِنَا الْقُدْرَةْ الْوَاجْبَةْ لِنِسَوُّوا الْخِدْمَةْ دِي. نَقْدَرَوْا نِسَوُّوا الْخِدْمَةْ دِي إِلَّا كَنْ اللّٰهْ أَنْطَانَا الْقُدْرَةْ الْوَاجْبَةْ. 6 أَيْوَى، هُو أَنْطَانَا الْقُدْرَةْ لِنَبْقَوْا خَدَّامِينْ وَ نَخْدُمُوا لِلّٰهْ فِي الْمُعَاهَدَةْ الْجَدِيدَةْ. وَ الْمُعَاهَدَةْ الْجَدِيدَةْ دِي مَا هَنَا شُرُوطْ مَكْتُوبِينْ وَ لَاكِنْ هَنَا رُوحْ اللّٰهْ. أَشَانْ مُعَاهَدَةْ الشُّرُوطْ الْمَكْتُوبِينْ تِجِيبْ الْمَوْت وَ لَاكِنْ رُوحْ اللّٰهْ يِجِيبْ الْحَيَاةْ.
7 شُرُوطْ التَّوْرَاةْ كَتَبَوْهُمْ فِي لِيحَانْ هَنَا حَجَرْ وَ نُورْ اللّٰهْ الْمَجِيدْ بَانْ وَكِتْ هُو نَزَّلَاهُمْ. وَ النُّورْ الْمَجِيدْ دَا شَدِيدْ لَحَدِّي بَنِي إِسْرَائِيلْ مَا قِدْرَوْا يِشِيفُوا النُّورْ الْقَاعِدْ فِي وِجِهْ مُوسَى. وَ النُّورْ دَا مَا طَوَّلْ. وَ كَنْ كَلَامْ اللّٰهْ الْحَكَمْ النَّاسْ بِالْمَوْت دَا نَزَلْ بِنُورْ مَجِيدْ، 8 أَكِيدْ كَلَامْ اللّٰهْ الْيَنْطِي لَيْنَا الرُّوحْ الْقُدُّوسْ يَجِي بِنُورْ مَجِيدْ زِيَادَةْ. 9 نَعَرْفُوا كَدَرْ خِدْمَةْ الْمُعَاهَدَةْ الْجَعَلَتْ النَّاسْ خَاطِيِّينْ قِدَّامْ اللّٰهْ، عِنْدَهَا نُورْ مَجِيدْ. وَ مِثِلْ دَا، نَعَرْفُوا كَدَرْ خِدْمَةْ الْمُعَاهَدَةْ التَّجْعَلْ النَّاسْ صَالِحِينْ عِنْدَهَا نُورْ مَجِيدْ زِيَادَةْ مَرَّةْ وَاحِدْ. 10 وَ صَحِيحْ، أَوَّلْ فِي نُورْ مَجِيدْ وَ حَالِيّاً جَاءْ نُورْ مَجِيدْ آخَرْ زِيَادَةْ مِنَّهْ وَ وَدَّرَهْ. 11 وَ كَنْ الشَّيّءْ الْمَا طَوَّلْ جَاءْ بِنُورْ مَجِيدْ، أَكِيدْ الْيَقْعُدْ إِلَى الْأَبَدْ يَجِي بِنُورْ شَدِيدْ زِيَادَةْ مِنَّهْ.
المِنْديل أنْرفع
12 وَ بِمِثِلْ دَا، عِنْدِنَا عَشَمْ قَوِي وَ أَشَانْ دَا نَخْدُمُوا بِشَجَاعَةْ شَدِيدَةْ. 13 أَنِحْنَ مَا نِسَوُّوا مِثِلْ مُوسَى. هُو غَطَّى وِجْهَهْ بِمِنْدِيلْ أَشَانْ بَنِي إِسْرَائِيلْ مَا يِشِيفُوا النُّورْ الْقَاعِدْ يُفُوتْ. 14 لَاكِنْ هُمَّنْ دَوْل فِكِرْهُمْ أَنْطَمَسْ. وَ لَحَدِّي الْيَوْم كَنْ يَقْرُوا لَيْهُمْ شُرُوطْ التَّوْرَاةْ الْهِي الْمُعَاهَدَةْ الْقَدِيمَةْ، خَلَاصْ نَفْس الْمِنْدِيلْ قَاعِدْ يِغَطِّي فِكِرْهُمْ وَ مَا يِخَلِّيهُمْ يَفْهَمَوْا الْكَلَامْ عَدِيلْ. وَ الْمِنْدِيلْ دَا مَا يِنْرَفِعْ مِنْهُمْ إِلَّا كَنْ يِآمُنُوا بِالْمَسِيحْ. 15 أَيْوَى، لَحَدِّي الْيَوْم كَنْ كَلَامْ مُوسَى يَقْرُوهْ لَيْهُمْ، الْمِنْدِيلْ قَاعِدْ يِغَطِّي قُلُوبْهُمْ.
16 لَاكِنْ كَنْ نَادُمْ يِشِيلْ دَرِبْ الرَّبّ، الْمِنْدِيلْ يِنْرَفِعْ وَ هُو يَفْهَمْ عَدِيلْ. 17 وَ فِي الْكَلَامْ دَا، الرَّبّ هُو الرُّوحْ الْقُدُّوسْ. وَ أَيِّ بَكَانْ الرُّوحْ الْقُدُّوسْ هَنَا الرَّبّ قَاعِدْ فَوْقَهْ، الْحُرِّيَّةْ كُلَ قَاعِدَةْ فَوْقَهْ. 18 وَ أَنِحْنَ مَا عِنْدِنَا مِنْدِيلْ الْيِغَطِّي وُجُوهْنَا. وَ كُلِّنَا قَاعِدِينْ نِشِيفُوا نُورْ اللّٰهْ الْمَجِيدْ. وَ النُّورْ دَا يِبِينْ فَوْقنَا وَاضِحْ. وَ النُّورْ الْمَجِيدْ دَا يَجِي مِنْ رُوحْ اللّٰهْ الْقَاعِدْ يِغَيِّرْنَا زِيَادَةْ لَحَدِّي صُورِتْنَا تَبْقَى مِثِلْ صُورَةْ اللّٰهْ الْمَجِيدَةْ.
© La Bible en arabe tchadien © Alliance biblique du Tchad, 2019
