يُوشِيَّا بِقي ملك في يَهُوذَا
1 وَ يُوشِيَّا عِنْدَهْ 8 سَنَةْ وَكِتْ بِقِي مَلِكْ وَ حَكَمْ 31 سَنَةْ فِي مَدِينَةْ الْقُدُسْ. 2 وَ هُو سَوَّى الْعَدِيلْ قِدَّامْ اللّٰهْ. هُو تَابَعْ الدَّرِبْ الْعَدِيلْ هَنَا جِدَّهْ دَاوُدْ وَ مَا بَارَى مِنَّهْ وَ لَا عَلَيْ الزَّيْنَةْ وَ لَا عَلَيْ الْإِسْرَةْ.
3 وَ فِي السَّنَةْ التَّامْنَةْ هَنَا حُكْمَهْ وَكِتْ هُو لِسَّاعْ صَبِي، بَدَا يِتَابِعْ اللّٰهْ رَبّ جِدَّهْ دَاوُدْ. وَ فِي السَّنَةْ 12 هَنَا حُكْمَهْ، قَمَّ يِطَهِّرْ بَلَدْ يَهُوذَا وَ مَدِينَةْ الْقُدُسْ مِنْ الْبَكَانَاتْ الْعَالِيِينْ هَنَا الْعِبَادَةْ وَ مِنْ الْعِيدَانْ الْغَزَّوْهُمْ لِعِبَادَةْ أَشِيرَةْ وَ الْأَصْنَامْ وَ التَّمَاثِيلْ هَنَا حَدِيدْ. 4 وَ فِي قِدَّامَهْ بَسْ، هَدَّمَوْا الْمَدَابِحْ هَنَا إِلٰـهْ بَعَلْ وَ الْمَخَابِرْ الْيِحَرُّقُوا فَوْقهُمْ الْبَخُورْ الْقَاعِدِينْ بِفَوْق الْمَدَابِحْ. وَ قَطَعْ الْعِيدَانْ الْغَزَّوْهُمْ لِعِبَادَةْ أَشِيرَةْ وَ كَسَّرْ الْأَصْنَامْ وَ التَّمَاثِيلْ هَنَا حَدِيدْ وَ رِحِكَاهُمْ دَقِيقْ وَ شَتَّتْ الدَّقِيقْ دَا فِي الْقُبُورْ هَنَا النَّاسْ الْقَدَّمَوْا لَيْهُمْ ضَحَايَا. 5 وَ هُو حَرَّقْ عُضَامْ رُجَالْ الدِّينْ هَنَا الْأَصْنَامْ فِي رَاسْ مَدَابِحْهُمْ لِيِنَجِّسْهُمْ. وَ بِمِثِلْ دَا، هُو طَهَّرْ بَلَدْ يَهُوذَا وَ مَدِينَةْ الْقُدُسْ. 6 وَ بَعَدْ دَا، هُو مَشَى فِي الْمُنْشَاقْ فِي حِلَّالْ قَبَايِلْ مَنَسَّى وَ أَفْرَايِمْ وَ شِمْعُونْ وَ لَحَدِّي حِلَّالْ قَبِيلَةْ نَفْتَالِي وَ الْمَنَاطِقْ الْمُجَاوِرِينْهُمْ. 7 وَ هُو هَدَّمْ الْمَدَابِحْ وَ قَطَعْ الْعِيدَانْ الْغَزَّوْهُمْ لِعِبَادَةْ أَشِيرَةْ وَ كَسَّرْ الصَّنَمْ وَ رِحِكَاهُمْ دَقِيقْ وَ كَسَّرْ كُلَّ الْمَخَابِرْ الْفِي كُلَّ بَلَدْ إِسْرَائِيلْ. وَ بَعَدْ دَا، قَبَّلْ مَدِينَةْ الْقُدُسْ.
راجِل الدين لِقي كتاب التَوْراة
8 وَ فِي سَنِةْ 18 هَنَا حُكْمَهْ بَعَدْ طَهَّرْ الْبَلَدْ وَ بَيْت اللّٰهْ، الْمَلِكْ يُوشِيَّا رَسَّلْ تَلَاتَةْ نَاسْ لِيِعَدُّلُوا بَيْت اللّٰهْ إِلٰـهَهْ. وَ هُمَّنْ شَافَانْ وِلَيْد أَصَلْيَا وَ مَعَسِيَّا حَاكِمْ الْمَدِينَةْ وَ يُوَاخْ وِلَيْد يُوَاحَزْ الْكَاتِبْ الْيِذَكِّرْ الْمَلِكْ. 9 وَ هُمَّنْ مَشَوْا لِحِلْقِيَّا كَبِيرْ رُجَالْ الدِّينْ. وَ جَابَوْا فِي بَيْت اللّٰهْ الْفُضَّةْ اللَّمَّوْهَا اللَّاوِيِّينْ حُرَّاسْ مَدَخَلْ بَيْت اللّٰهْ مِنْ نَاسْ قَبَايِلْ مَنَسَّى وَ أَفْرَايِمْ وَ مِنْ كُلَّ نَاسْ مَمْلَكَةْ إِسْرَائِيلْ الْفَضَّلَوْا وَ مِنْ كُلَّ نَاسْ قَبَايِلْ يَهُوذَا وَ بَنْيَامِينْ وَ كُلَّ سُكَّانْ مَدِينَةْ الْقُدُسْ. 10 وَ الْفُضَّةْ دِي، أَنْطَوْهَا لِلنَّاسْ الْمُكَلَّفِينْ بِخِدْمَةْ عَدِيلِينْ بَيْت اللّٰهْ. وَ كَفَّوْا بَيْهَا الْخَدَّامِينْ الْيَخْدُمُوا فِي بَيْت اللّٰهْ لِيِعَدُّلُوا وَ يِقَوُّوا الْبَيْت دَا. 11 وَ أَنْطَوْا مِنْ الْفُضَّةْ دِي لِلْخَشَّابِينْ وَ الْبَنَّايِينْ أَشَانْ يَشْرُوا بَيْهَا الْحُجَارْ الْمَقْطُوعِينْ وَ الْمَرَادِيسْ الْيِثَبُّتُوا بَيْهُمْ الْبُيُوتْ أَشَانْ أَوَّلْ مُلُوكْ مَمْلَكَةْ يَهُوذَا خَلَّوْهُمْ يِلْهَدَّمَوْا. 12 وَ النَّاسْ دَوْل خَدَمَوْا بِأَمَانْ. وَ كَلَّفَوْا فَوْقهُمْ مُرَاقِبِينْ مِنْ اللَّاوِيِّينْ وَ هُمَّنْ يَحَتْ وَ عُبَدْيَا مِنْ ذُرِّيَّةْ مَرَارِي وَ زَكَرِيَّا وَ مَشُلَّامْ مِنْ ذُرِّيَّةْ قَهَاتْ. وَ اللَّاوِيِّينْ الْيَعَرْفُوا ضَرِبِينْ آلَاتْ الْمُسِيقَى 13 مُكَلَّفِينْ فَوْق النَّقَّالِينْ وَ يِرَاقُبُوا فِي كُلَّ الْخَدَّامِينْ الْيِسَوُّوا أَيِّ خِدْمَةْ. وَ وَاحِدِينْ مِنْ اللَّاوِيِّينْ كُتَّابْ وَ وَاحِدِينْ مُرَاقِبِينْ وَ وَاحِدِينْ حُرَّاسْ بِيبَانْ.
14 وَ وَكِتْ مَرَقَوْا الْفُضَّةْ الْجَابَوْهَا فِي بَيْت اللّٰهْ، حِلْقِيَّا رَاجِلْ الدِّينْ لِقِي كِتَابْ التَّوْرَاةْ الْاللّٰهْ أَمَرَاهُمْ بِوَاسِطَةْ مُوسَى. 15 وَ حِلْقِيَّا قَالْ لِشَافَانْ الْكَاتِبْ: «أَنَا لِقِيتْ كِتَابْ التَّوْرَاةْ فِي بَيْت اللّٰهْ.» وَ حِلْقِيَّا أَنْطَى الْكِتَابْ دَا لِشَافَانْ.
16 وَ شَافَانْ جَابْ الْكِتَابْ دَا لِلْمَلِكْ وَ حَجَّى لَيَّهْ وَ قَالْ: «مَسَائِيلَكْ سَوَّوْا كُلَّ شَيّءْ الْأَمَرَوْهُمْ بَيَّهْ. 17 هُمَّنْ سَلَّمَوْا الْفُضَّةْ اللِّقَوْهَا فِي بَيْت اللّٰهْ لِلْمُكَلَّفِينْ وَ الْخَدَّامِينْ.» 18 وَ شَافَانْ الْكَاتِبْ قَالْ بَتَّانْ لِلْمَلِكْ: «وَ حِلْقِيَّا رَاجِلْ الدِّينْ أَنْطَانِي كِتَابْ وَاحِدْ.» وَ هُو قَرَى الْكِتَابْ دَا لِلْمَلِكْ.
يُوشِيَّا مشى للنبيّة حُلْدَة
19 وَ وَكِتْ الْمَلِكْ سِمِعْ كَلَامْ التَّوْرَاةْ دَا، شَرَّطْ خُلْقَانَهْ مِنْ الْحِزِنْ. 20 وَ بَعَدْ دَا، الْمَلِكْ أَمَرْ حِلْقِيَّا وَ أَخِقَامْ وِلَيْد شَافَانْ وَ عَبْدُونْ وِلَيْد مِيكَا وَ شَافَانْ الْكَاتِبْ وَ عَسَايَا وَاحِدْ مِنْ مَسَائِيلْ الْمَلِكْ وَ قَالْ لَيْهُمْ: 21 «أَمْشُوا أَسْأَلَوْا اللّٰهْ لَيِّ أَنَا وَ لِنَاسْ مَمْلَكَةْ إِسْرَائِيلْ الْفَضَّلَوْا وَ لِنَاسْ مَمْلَكَةْ يَهُوذَا بِسَبَبْ الْكَلَامْ الْمَكْتُوبْ فِي الْكِتَابْ اللِّقَوْه. أَشَانْ غَضَبْ اللّٰهْ شَدِيدْ بِلْحَيْن ضِدِّنَا أَشَانْ جُدُودْنَا مَا كَرَّمَوْا كَلَامْ اللّٰهْ وَ مَا طَبَّقَوْا الْكَلَامْ الْمَكْتُوبْ فِي الْكِتَابْ دَا.»
22 وَ خَلَاصْ، حِلْقِيَّا وَ مُرَسَّلِينْ الْمَلِكْ مَشَوْا بَكَانْ حُلْدَةْ النَّبِيَّةْ مَرِةْ الْحَارِسْ هَنَا خُلْقَانْ رُجَالْ الدِّينْ الْأُسْمَهْ شَلُّومْ وِلَيْد تُقَهَاتْ وِلَيْد حَسْرَا. وَ هِي سَاكْنَةْ فِي الْحَارَةْ الْجَدِيدَةْ هَنَا مَدِينَةْ الْقُدُسْ. وَ وَكِتْ هُمَّنْ وَصَّلَوْا، حَجَّوْا لَيْهَا بِالْكَلَامْ دَا.
23 وَ حُلْدَةْ النَّبِيَّةْ قَالَتْ لَيْهُمْ: «دَاهُو اللّٰهْ إِلٰـهْ بَنِي إِسْرَائِيلْ قَالْ تَمْشُوا تُقُولُوا لِلرَّاجِلْ الرَّسَّلَاكُو لَيِّ: 24 ‹دَاهُو اللّٰهْ قَالْ: ”أَكِيدْ أَنَا نِجِيبْ مَصِيبَةْ فِي مَدِينَةْ الْقُدُسْ وَ فِي سُكَّانْهَا. وَ دَا يِحَقِّقْ كُلَّ كَلَامْ اللَّعَنَةْ الْمَكْتُوبْ فِي الْكِتَابْ الْقَرَوْه لِمَلِكْ مَمْلَكَةْ يَهُوذَا. 25 وَ دَا فِي شَانْ شَعَبِي أَبَوْنِي وَ حَرَّقَوْا بَخُورْ لِإِلٰـهَاتْ آخَرِينْ وَ غَضَّبَوْنِي بِكُلَّ عَمَلْهُمْ السَّوَّوْه. وَ غَضَبِي يَنْزِلْ فِي الْمَدِينَةْ دِي وَ أَنَا مَا نِوَقِّفَهْ.“›
26 «وَ هَسَّعْ دَا، أَمْشُوا قُولُوا الْكَلَامْ دَا لِمَلِكْ مَمْلَكَةْ يَهُوذَا الرَّسَّلَاكُو تَسْأَلَوْا لَيَّهْ اللّٰهْ. وَ قُولُوا لَيَّهْ: ‹دَاهُو اللّٰهْ إِلٰـهْ بَنِي إِسْرَائِيلْ قَالْ: ”إِنْتَ سِمِعْت كَلَامْ الْكِتَابْ دَا 27 وَ قَلْبَكْ خَافْ وَ إِنْتَ أَلْمَسْكَنْت قِدَّامِي أَنَا الرَّبّ وَكِتْ إِنْتَ سِمِعْت الْكَلَامْ الْأَنَا قُلْتَهْ ضِدّ مَدِينَةْ الْقُدُسْ وَ سُكَّانْهَا. وَ إِنْتَ مَسْكَنْت نَفْسَكْ قِدَّامِي وَ شَرَّطْت خُلْقَانَكْ مِنْ الْحِزِنْ وَ بَكَيْت قِدَّامِي. وَ أَنَا كُلَ سِمِعْتَكْ. وَ دَا كَلَامْ اللّٰهْ. 28 وَ بِسَبَبْ دَا، نِخَلِّيكْ تَلْحَقْ أَبَّهَاتَكْ بِالسَّلَامَةْ وَ يَدْفُنُوكْ فِي قَبُرَكْ وَ إِنْتَ مَا تِشِيفْ الْمَصِيبَةْ الْأَنَا نِنَزِّلْهَا فِي مَدِينَةْ الْقُدُسْ وَ سُكَّانْهَا.“›»
وَ خَلَاصْ، الْمُرَسَّلِينْ مَشَوْا وَ كَلَّمَوْا الْكَلَامْ دَا لِلْمَلِكْ.
يُوشِيَّا يجدِّد المُعاهدة
29 وَ طَوَّالِي، مَلِكْ يُوشِيَّا نَادَى كُلَّ شُيُوخْ بَلَدْ يَهُوذَا وَ شُيُوخْ مَدِينَةْ الْقُدُسْ لِيِلِمُّوا. 30 وَ بَعَدْ دَا، الْمَلِكْ مَشَى بَيْت اللّٰهْ مَعَ كُلَّ نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ وَ رُجَالْ الدِّينْ وَ اللَّاوِيِّينْ وَ كُلَّ الشَّعَبْ مِنْ الْكُبَارْ لَحَدِّي الدُّقَاقْ. وَ هُو قَرَى لَيْهُمْ كُلَّ الْكَلَامْ الْفِي كِتَابْ الْمُعَاهَدَةْ اللِّقَوْه فِي بَيْت اللّٰهْ. 31 وَ الْمَلِكْ وَقَفْ فِي بَكَانَهْ وَ جَدَّدْ الْمُعَاهَدَةْ مَعَ اللّٰهْ. وَاجِبْ أَيِّ وَاحِدْ يِتَابِعْ اللّٰهْ وَ يَحْفَضْ وَصِيَّاتَهْ وَ تَعْلِيمَهْ وَ شُرُوطَهْ بِكُلَّ قَلْبَهْ وَ بِكُلَّ فِكْرَهْ وَ يِطَبِّقْ كَلَامْ الْمُعَاهَدَةْ الْمَكْتُوبْ فِي الْكِتَابْ دَا. 32 وَ الْمَلِكْ سَوَّى الْمُعَاهَدَةْ دِي لِكُلَّ سُكَّانْ مَدِينَةْ الْقُدُسْ وَ شَعَبْ بَنْيَامِينْ. وَ كُلَّ سُكَّانْ مَدِينَةْ الْقُدُسْ طَبَّقَوْا الْمُعَاهَدَةْ السَّوَّاهَا اللّٰهْ رَبّ جُدُودْهُمْ.
33 وَ يُوشِيَّا مَرَقْ كُلَّ الْمُحَرَّمَاتْ الْفِي كُلَّ بَلَدْ بَنِي إِسْرَائِيلْ وَ أَمَرْ كُلَّ النَّاسْ السَّاكْنِينْ فِي بَلَدْ إِسْرَائِيلْ يَعَبُدُوا اللّٰهْ إِلٰـهُّمْ. وَ بِمِثِلْ دَا، هُمَّنْ مَا طَرَّفَوْا مِنْ دَرِبْ اللّٰهْ رَبّ جُدُودْهُمْ فِي كُلَّ مُدَّةْ حَيَاةْ يُوشِيَّا.
© La Bible en arabe tchadien © Alliance biblique du Tchad, 2019
