1 وَ أَنَا شِلْت نِيَّةْ أَشَانْ مَا نُزُورْكُو بَتَّانْ لِنِسَبِّبْ لَيْكُو حِزِنْ. 2 أَشَانْ كَنْ أَنَا بِقِيتْ لَيْكُو سَبَبْ هَنَا حِزِنْ، يَاتُو الْيِفَرِّحْنِي بَلَاكُو؟ إِلَّا إِنْتُو الْأَنَا سَبَّبْت لَيْكُو الْحِزِنْ.
3 وَ الْكَلَامْ الْكَتَبْتَهْ يَوْم دَاكْ فِي الْجَوَابْ، كَتَبْتَهْ أَشَانْ وَكِتْ نَجِيكُو، إِنْتُو النَّاسْ الْوَاجِبْ يِفَرُّحُونِي مَا تَبْقَوْا لَيِّ سَبَبْ هَنَا حِزِنْ. أَشَانْ أَنَا مُؤَكِّدْ كَدَرْ كَنْ أَنَا نَبْقَى فَرْحَانْ، إِنْتُو كُلَ تَبْقَوْا فَرْحَانِينْ. 4 وَ كَتَبْتَهْ لَيْكُو بِقَلِبْ حَزْنَانْ شَدِيدْ وَ مُدَيِّقْ وَ أَنَا قَاعِدْ نَبْكِي كَتِيرْ. وَ مَا دَوَّرْت نِسَبِّبْ لَيْكُو حِزِنْ لَاكِنْ دَوَّرْت نِوَصِّفْ كَدَرْ عِنْدِي مَحَبَّةْ شَدِيدَةْ لَيْكُو.
المُسامحة
5 أَنَا مَا نِدَوْر نِكَبِّرْ الْكَلَامْ. وَ النَّادُمْ مَا سَبَّبْ الْمُشْكِلَةْ دِي لَيِّ أَنَا بَسْ لَاكِنْ هُو سَبَّبْهَا لَيْكُو إِنْتُو كُلُّكُو. 6 كَتِيرِينْ مِنْكُو هَرَجَوْه وَ خَلَاصْ، دَا يَكْفِي لَيَّهْ. 7 وَ هَسَّعْ دَا، وَاجِبْ تِسَامُحُوهْ وَ تِشَجُّعُوهْ أَشَانْ الْحِزِنْ مَا يِفَشِّلَهْ مَرَّةْ وَاحِدْ. 8 أَشَانْ دَا، نِوَصِّيكُو بَتَّانْ وَصُّفُوا لَيَّهْ مَحَبِّتْكُو.
9 وَ أَوَّلْ كُلَ، أَنَا كَتَبْت لَيْكُو جَوَابْ أَشَانْ نِجَرِّبْكُو وَ أَشَانْ نَعَرِفْ كَنْ تِتَابُعُوا كَلَامْ اللّٰهْ فِي كُلِّ شَيّءْ. 10 وَ أَيِّ نَادُمْ الْإِنْتُو تِسَامُحُوهْ، أَنَا كُلَ نِسَامِحَهْ. وَ أَيِّ خَطَا الْأَنَا سَامَحْتَهْ لِأَيِّ نَادُمْ، كَنْ صَحِيحْ خَطَا فِي وَ وَاجِبْ لَيَّهْ الْمُسَامَحَةْ، أَنَا سَامَحْتَهْ فِي شَانْكُو قِدَّامْ الْمَسِيحْ. 11 وَ سَامَحْتَهْ أَشَانْ إِبْلِيسْ مَا يِنَّصِرْ فَوْقنَا. أَشَانْ أَنِحْنَ نَعَرْفُوا نِيَّةْ إِبْلِيسْ.
النصُر بالمسيح
12 وَ مَشَيْت فِي حِلَّةْ تُرُوَاسْ أَشَانْ نِبَلِّغْ بِشَارَةْ الْمَسِيحْ. وَ وَكِتْ وِصِلْت، رَبِّنَا فَتَحْ لَيِّ الْبَابْ أَشَانْ نِبَشِّرْ. 13 لَاكِنْ قَلْبِي مُعَلَّقْ بِلْحَيْن أَشَانْ أَخُويِ تِيطُسْ الْوَاجِبْ يَجِي قِدَّامِي مِنْ بَكَانْكُو، أَنَا مَا شِفْتَهْ. وَ أَشَانْ دَا بَسْ، قَمَّيْت مِنْ الْأَخْوَانْ الْفِي تُرُوَاسْ وَ مَشَيْت لِمَقِدُونِيَةْ.
14 وَ الْحَمْدُ للّٰهْ! اللّٰهْ قَاعِدْ دَايْماً يُقُودْنَا فِي مَجْمُوعَةْ التَّفْرَحْ بِالنَّصُرْ هَنَا الْمَسِيحْ. وَ فِي أَيِّ بَكَانْ، هُو يِوَزِّعْ بَيْنَا عِرْفَةْ اللّٰهْ الْمِثِلْ رِيحَةْ حَلُوَّةْ. 15 وَ أَنِحْنَ مِثِلْ الْبَخُورْ الْقَاعِدْ يِقَدِّمَهْ الْمَسِيحْ لِلّٰهْ. وَ النَّاسْ الْقَاعِدِينْ يَنْجَوْا يُشُمُّوا رِيحْتَهْ وَ النَّاسْ الْقَاعِدِينْ يَهْلَكَوْا كُلَ يُشُمُّوا رِيحْتَهْ. 16 وَ لِلنَّاسْ الْيَهْلَكَوْا، هِي رِيحَةْ الْمَوْت التِّوَدِّيهُمْ لِلْمَوْت. وَ لِلنَّاسْ الْيَنْجَوْا، هِي رِيحَةْ الْحَيَاةْ التِّوَدِّيهُمْ فِي الْحَيَاةْ. وَ مَا فِي إِنْسَانْ يَقْدَرْ لِلْخِدْمَةْ الْمِثِلْ دِي.
17 نَاسْ كَتِيرِينْ قَاعِدِينْ يِخَلْبُطُوا كَلَامْ اللّٰهْ وَ يِتَاجُرُوا بَيَّهْ وَ أَنِحْنَ مَا مِثِلْهُمْ. أَنِحْنَ نِكَلُّمُوا بِنِيَّةْ مُخْلِصَةْ. أَنِحْنَ نَاسْ الْمَسِيحْ وَ اللّٰهْ رَسَّلَانَا وَ قِدَّامْ اللّٰهْ نِكَلُّمُوا لِلنَّاسْ.
© La Bible en arabe tchadien © Alliance biblique du Tchad, 2019
