رسّلوا بَرْنَابَا و شَاوُول
1 وَ فِي جَمَاعَةْ الْمُؤمِنِينْ الْقَاعِدِينْ فِي حِلَّةْ أَنْطَاكِيَةْ، فِي أَنْبِيَاء وَ مُعَلِّمِينْ. وَ هُمَّنْ بَرْنَابَا وَ سِمْعَانْ الْبِنَادُوهْ أَزْرَقْ وَ لُوكِيُسْ الْمِنْ حِلَّةْ الْقَيْرَوَانْ وَ مَنَايِنْ الرَّبَّوْه مَعَ هِرُودُسْ مُحَافِظْ دَارْ الْجَلِيلْ وَ شَاوُولْ. 2 وَ يَوْم وَاحِدْ، هُمَّنْ قَاعِدِينْ يَعَبُدُوا الرَّبّ وَ يُصُومُوا، الرُّوحْ الْقُدُّوسْ كَلَّمْ لَيْهُمْ وَ قَالْ: «خَصُّصُوا لَيِّ بَرْنَابَا وَ شَاوُولْ أَشَانْ يِسَوُّوا لَيِّ الْخِدْمَةْ النَّادَيْتهُمْ لَيْهَا.»
3 وَ خَلَاصْ بَعَدْ صَامَوْا وَ صَلَّوْا، خَطَّوْا إِيدَيْهُمْ فَوْقهُمْ وَ رَسَّلَوْهُمْ.
في قُبْرُص
4 بِمِثِلْ دَا، الرُّوحْ الْقُدُّوسْ رَسَّلْ بَرْنَابَا وَ شَاوُولْ. وَ خَلَاصْ، هُمَّنْ مَشَوْا لِحِلَّةْ سَلُوكِيَةْ فِي خَشُمْ الْبَحَرْ وَ رِكْبَوْا فِي سَفِينَةْ وَ مَشَوْا لِجَزِيرَةْ قُبْرُصْ.
5 وَ وَكِتْ لِحْقَوْا قُبْرُصْ، نَزَلَوْا فِي حِلَّةْ سَلَامِسْ وَ بَدَوْا يِبَلُّغُوا كَلَامْ اللّٰهْ فِي بُيُوتْ الصَّلَاةْ هَنَا الْيَهُودْ. وَ يُوحَنَّا مَرْخُوسْ مَشَى مَعَاهُمْ أَشَانْ يِعَاوِنْهُمْ. 6 وَ شَقَّوْا الْجَزِيرَةْ كُلَّهَا لَحَدِّي وِصْلَوْا فِي حِلَّةْ بَافُوسْ. وَ هِنَاكْ لِقَوْا سَحَّارِي يَهُودِي السَّوَّى نَفْسَهْ نَبِي وَ أُسْمَهْ بَارْ يَشُوعْ. 7 وَ هُو رَفِيقْ سَرْجِيُسْ بُولُسْ حَاكِمْ هَنَا قُبْرُصْ. وَ الْحَاكِمْ هُو نَادُمْ فَاهِمْ وَ نَادَى بَرْنَابَا وَ شَاوُولْ أَشَانْ يِدَوْر يَسْمَعْ مِنْهُمْ كَلَامْ اللّٰهْ. 8 وَ السَّحَّارِي دَا أُسْمَهْ عَلِيمْ بِكَلَامْ يُونَانِي. وَ هُو خَالَفْ بَرْنَابَا وَ شَاوُولْ وَ مَا دَوَّرْ الْحَاكِمْ يِآمِنْ.
9 وَ شَاوُولْ الْكُلَ مَعْرُوفْ بِبُولُسْ أَنْمَلَى بِالرُّوحْ الْقُدُّوسْ وَ شَافْ السَّحَّارِي فِي عَيْنَهْ وَ قَالْ: 10 «يَا نَادُمْ الْقَلْبَكْ مَلَانْ بِالْغَشّ وَ الْفَسَالَةْ! يَا وِلَيْد إِبْلِيسْ! كُلَّ شَيّءْ صَالِحْ، إِنْتَ عَدُو لَيَّهْ. إِنْتَ دَايْماً تِدَوْر تِتَلِّفْ الدُّرُوبْ الْعَدِيلِينْ هَنَا اللّٰهْ. 11 هَسَّعْ اللّٰهْ يَضُرْبَكْ وَ تَبْقَى عَمْيَانْ وَ مَا تِشِيفْ النُّورْ أَيَّامْ.» وَ طَوَّالِي، عُيُونَهْ مَا شَافَوْا شَيّءْ إِلَّا الضَّلَامْ. وَ قَمَّ دَوَّرْ نَادُمْ يُقُودَهْ مِنْ إِيدَيْنَهْ. 12 وَ وَكِتْ الْحَاكِمْ شَافْ الشَّيّءْ الْبِقِي دَا، خَلَاصْ آمَنْ وَ أَلْعَجَّبْ بِلْحَيْن مِنْ كَلَامْ الرَّبّ عِيسَى.
في أَنْطَاكِيَة هنا بلد بِسِيدِيَة
13 وَ بُولُسْ وَ النَّاسْ الْمَعَايَهْ رِكْبَوْا فِي سَفِينَةْ مِنْ حِلَّةْ بَافُوسْ وَ شَقَّوْا الْبَحَرْ وَ وِصْلَوْا فِي حِلَّةْ بَرْقَةْ فِي بَلَدْ بَمْفِيلِيَةْ. وَ هِنَاكْ يُوحَنَّا مَرْخُوسْ خَلَّى بُولُسْ وَ بَرْنَابَا وَ قَبَّلْ فِي مَدِينَةْ الْقُدُسْ. 14 لَاكِنْ هُمَّنْ خَطَرَوْا مِنْ بَرْقَةْ وَ مَشَوْا لِحِلَّةْ أَنْطَاكِيَةْ بِسِيدِيَةْ. وَ يَوْم السَّبْت، دَخَلَوْا فِي بَيْت الصَّلَاةْ وَ قَعَدَوْا تِحِتْ. 15 وَ بَعَدْ قَرَوْا مِنْ التَّوْرَاةْ وَ مِنْ كِتَابْ الْأَنْبِيَاء، مَسَائِيلْ هَنَا بَيْت الصَّلَاةْ رَسَّلَوْا لَيْهُمْ وَ قَالَوْا: «يَا الْأَخْوَانْ، كَنْ عِنْدُكُو كَلَامْ التِّشَجُّعُوا بَيَّهْ النَّاسْ، خَلَاصْ حَجُّوهْ.»
16 وَ بُولُسْ قَمَّ فَوْق وَ سَوَّى إِشَارَةْ بِإِيدَهْ وَ قَالْ: «يَا بَنِي إِسْرَائِيلْ وَ كُلَّ النَّاسْ الْخَايْفِينْ مِنْ اللّٰهْ، أَسْمَعَوْا كَلَامِي! 17 اللّٰهْ إِلٰـهْ بَنِي إِسْرَائِيلْ عَزَلْ جُدُودْنَا وَ كَتَّرْ الشَّعَبْ وَكِتْ هُمَّنْ سَاكْنِينْ أَجَانِبْ فِي بَلَدْ مَصِرْ. وَ مَرَقَاهُمْ مِنْهَا بِقُدُرْتَهْ الْعَظِيمَةْ. 18 وَ اللّٰهْ عَيَّشَاهُمْ فِي الصَّحَرَاءْ قَرِيبْ 40 سَنَةْ. 19 وَ بَعَدْ دَا، دَمَّرْ الْأُمَمْ السَّبْعَةْ الْأَوَّلْ قَاعِدِينْ فِي بَلَدْ كَنْعَانْ. وَ أَنْطَى بَلَدْهُمْ لِبَنِي إِسْرَائِيلْ أَشَانْ تَبْقَى وَرَثَتْهُمْ. 20 وَ دَا لِمُدَّةْ 450 سَنَةْ.
«وَ بَعَدْ دَا، أَنْطَاهُمْ قُضْيَاءْ أَشَانْ يُقُودُوهُمْ وَ الْقَاضِي الْأَخِيرْ هُو النَّبِي صَمُوِيلْ. 21 وَ بَنِي إِسْرَائِيلْ سَأَلَوْا صَمُوِيلْ أَشَانْ يُخُطّ لَيْهُمْ مَلِكْ وَ اللّٰهْ عَزَلْ شَاوُولْ وِلَيْد قِيشْ مِنْ قَبِيلَةْ بَنْيَامِينْ وَ بِقِي لَيْهُمْ مَلِكْ مُدَّةْ 40 سَنَةْ. 22 وَ بَعَدْ دَا، اللّٰهْ مَرَقَهْ وَ خَطَّ لَيْهُمْ دَاوُدْ مَلِكْ فِي بَدَلَهْ. وَ اللّٰهْ شَهَدْ لِدَاوُدْ وَ قَالْ: <أَنَا شِفْت دَاوُدْ وِلَيْد يَسَّى الْأَنَا رَضْيَانْ بَيَّهْ. هُو يِسَوِّي كُلَّ شَيّءْ النِّدَوْرَهْ.>
23 «وَ خَلَاصْ، مِنْ ذُرِّيَّةْ دَاوُدْ، اللّٰهْ رَسَّلْ عِيسَى لِبَنِي إِسْرَائِيلْ أَشَانْ يِنَجِّيهُمْ. وَ مِثِلْ دَا، اللّٰهْ تَمَّ الْوَعَدْ الْأَنْطَاهْ لِدَاوُدْ. 24 وَ قُبَّالْ عِيسَى مَا يَجِي، يَحْيَى جَاءْ وَ نَادَى كُلَّ بَنِي إِسْرَائِيلْ أَشَانْ يُتُوبُوا مِنْ ذُنُوبْهُمْ وَ هُو يِغَطِّسْهُمْ فِي الْأَلْمِي. 25 وَ وَكِتْ خِدْمَةْ يَحْيَى قَرِيبْ تِكَمِّلْ، هُو حَجَّى لِلنَّاسْ وَ قَالْ: ‹تُقُولُوا أَنَا يَاتُو؟ أَنَا مَا النَّادُمْ الْجَايِ لَاكِنْ هُو يَجِي وَرَايِ وَ أَنَا مَا تَمَّيْت لَيَّهْ خَدَّامْ كُلَ.›»
26 وَ بُولُسْ قَالْ: «يَا الْأَخْوَانْ، يَا عِيَالْ جِدِّنَا إِبْرَاهِيمْ وَ كُلَّ النَّاسْ اللَّامِّينْ مَعَانَا وَ خَايْفِينْ مِنْ اللّٰهْ، هُو رَسَّلْ خَبَرْ النَّجَاةْ دِي لَيْنَا كُلِّنَا. 27 سُكَّانْ مَدِينَةْ الْقُدُسْ وَ كُبَارَاتْهُمْ مَا عِرْفَوْا كَدَرْ عِيسَى بَسْ الْمَسِيحْ الْيِنَجِّيهُمْ. هُمَّنْ مَا فِهْمَوْا كَلَامْ الْأَنْبِيَاء الْقَاعِدِينْ يَقْرُوهْ كُلَّ يَوْم السَّبْت وَ خَلَاصْ حَكَمَوْا لَيَّهْ بِالْمَوْت. وَ بَيْدَا، سَوَّوْا الشَّيّءْ الْمَكْتُوبْ لَيَّهْ فِي الْكِتَابْ. 28 مَا لِقَوْا فَوْقَهْ أَيِّ شَيّءْ فَسِلْ الْبِسَبَبَهْ وَاجِبْ لَيَّهْ الْمَوْت، لَاكِنْ سَأَلَوْا بِلَاطُسْ الْوَالِي أَشَانْ يَكْتُلَهْ.
29 «وَ وَكِتْ سَوَّوْا كُلَّ شَيّءْ الْمَكْتُوبْ لَيَّهْ فِي الْكِتَابْ خَلَاصْ، نَزَّلَوْه مِنْ الْحَطَبْ وَ دَفَنَوْه فِي قَبُرْ. 30 وَ لَاكِنْ اللّٰهْ بَعَثَهْ مِنْ أُسْط الْمَيْتِينْ. 31 وَ مُدَّةْ أَيَّامْ كَتِيرِينْ، عِيسَى قَاعِدْ يِبِينْ لِلنَّاسْ الرَّاغَوْا مَعَايَهْ مِنْ دَارْ الْجَلِيلْ لِمَدِينَةْ الْقُدُسْ. وَ هَسَّعْ هُمَّنْ قَاعِدِينْ يَشْهَدَوْا لَيَّهْ قِدَّامْ النَّاسْ.
32 «وَ هَسَّعْ أَنِحْنَ نِبَلُّغُوا لَيْكُو الْبِشَارَةْ. الشَّيّءْ الْاللّٰهْ وَاعَدْ بَيَّهْ جُدُودْنَا، 33 هَسَّعْ هُو سَوَّاهْ لَيْنَا أَنِحْنَ عِيَالْهُمْ. اللّٰهْ بَعَثْ عِيسَى مِنْ أُسْط الْمَيْتِينْ مِثِلْ الْكَلَامْ الْمَكْتُوبْ فِي الزَّبُورْ فِي الْفَصُلْ التَّانِي. مَكْتُوبْ: <إِنْتَ إِبْنِي وَ الْيَوْم، أَنَا بِقِيتْ أَبُوكْ.> 34 وَ أَكِيدْ اللّٰهْ بَعَثْ عِيسَى مِنْ أُسْط الْمَيْتِينْ أَشَانْ جِلْدَهْ أَبَداً مَا يَبْقَى تُرَابْ وَ اللّٰهْ أَوَّلْ حَجَّى بَيَّهْ فِي الْكَلَامْ الْبُقُولْ: <نَنْطِيكُو الْبَرَكَةْ الْمُقَدَّسَةْ وَ الْمُؤَكَّدَةْ الْوَاعَدْت بَيْهَا دَاوُدْ.> 35 وَ فِي فَصُلْ آخَرْ هَنَا الزَّبُورْ، بُقُولْ: <إِنْتَ مَا تِخَلِّي جَنَازَةْ عَبْدَكْ الْقُدُّوسْ تَبْقَى تُرَابْ.> 36 وَ دَاوُدْ سَوَّى كُلَّ شَيّءْ الْاللّٰهْ دَوَّرَهْ فِي وَكْتَهْ وَ بَعَدْ دَا، هُو مَاتْ وَ لِحِقْ جُدُودَهْ وَ جَنَازْتَهْ بِقَتْ تُرَابْ. 37 وَ لَاكِنْ جَنَازَةْ النَّادُمْ الْاللّٰهْ قَوَّمَهْ، أَبَداً مَا بِقَتْ تُرَابْ.
38 «وَ أَشَانْ دَا، يَا الْأَخْوَانْ، خَلِّي تَعَرْفُوا كَدَرْ اللّٰهْ رَسَّلَانَا لِنِبَلُّغُوا لَيْكُو بِغُفْرَانْ الذُّنُوبْ. تَوْرَاةْ مُوسَى مَا قِدِرْ حَرَّرَاكُو مِنْ ذُنُوبْكُو، 39 وَ لَاكِنْ كُلَّ النَّاسْ الْيِآمُنُوا بِعِيسَى، اللّٰهْ يِحَرِّرْهُمْ مِنْ ذُنُوبْهُمْ. 40 أَنْقَرْعُوا أَشَانْ الْكَلَامْ الْقَاعِدْ فِي كِتَابْ الْأَنْبِيَاء مَا يَبْقَى فَوْقكُو. 41 الْكِتَابْ بُقُولْ:
<يَا الشَّمَّاتِينْ، شِيفُوا.
أَلْعَجَّبَوْا وَ أَهْلَكَوْا مَرَّةْ وَاحِدْ.
أَشَانْ فِي وَكِتْكُو دَا،
أَنَا نِسَوِّي شَيّءْ
وَ كَنْ حَجَّوْكُو بَيَّهْ،
مَا تِصَدُّقُوهْ.>»
42 وَ وَكِتْ النَّاسْ مَارْقِينْ مِنْ بَيْت الصَّلَاةْ، طَلَبَوْا بِشِدَّةْ مِنْ بُولُسْ وَ بَرْنَابَا أَشَانْ يِقَبُّلُوا يَوْم السَّبْت الْجَايِ وَ يِحَجُّوا لَيْهُمْ بَتَّانْ بِالْكَلَامْ دَا. 43 وَ بَعَدْ الْمَلَمَّةْ، نَاسْ كَتِيرِينْ تَابَعَوْا بُولُسْ وَ بَرْنَابَا. وَ النَّاسْ دَوْل مِنْ الْيَهُودْ وَ مِنْ النَّاسْ الدَّخَلَوْا فِي دِينْ الْيَهُودْ. وَ بُولُسْ وَ بَرْنَابَا كَلَّمَوْهُمْ كَلَامْ كَتِيرْ وَ شَجَّعَوْهُمْ أَشَانْ يَقْعُدُوا ثَابْتِينْ فِي الْبِشَارَةْ هَنَا رَحْمَةْ اللّٰهْ.
44 وَ يَوْم السَّبْت التَّانِي، قَرِيبْ كُلَّ سُكَّانْ الْحِلَّةْ لَمَّوْا مَعَاهُمْ أَشَانْ يَسْمَعَوْا كَلَامْ الرَّبّ. 45 وَ الْيَهُودْ شَافَوْا نَاسْ كَتِيرِينْ جَايِينْ وَ حَسَدَوْا بُولُسْ وَ بَرْنَابَا. وَ أَشَانْ دَا، قَمَّوْا خَالَفَوْا كَلَامْ بُولُسْ وَ عَيَّرَوْه. 46 وَ بُولُسْ وَ بَرْنَابَا حَجَّوْا لِلْيَهُودْ بَلَا خَوْف وَ قَالَوْا: «وَاجِبْ نِبَلُّغُوا لَيْكُو إِنْتُو كَلَامْ اللّٰهْ قُبَّالْ مَا نِبَلُّغُوهْ لِلنَّاسْ الْآخَرِينْ. لَاكِنْ إِنْتُو أَبَيْتُوهْ مَا دَوَّرْتُوهْ. وَ إِنْتُو جَعَلْتُوا الْحَيَاةْ الْأَبَدِيَّةْ مَا وَاجْبَةْ لَيْكُو. وَ خَلَاصْ نِخَلُّوكُو وَ نِبَلُّغُوهْ لِلنَّاسْ الْمَا يَهُودْ. 47 أَشَانْ رَبِّنَا أَمَرَانَا وَ قَالْ: <أَنَا جَعَلْتَكْ نُورْ لِلْأُمَمْ أَشَانْ نَجَاتِي تَلْحَقْ لَحَدِّي طَرَفْ الْأَرْض.>»
48 وَ النَّاسْ الْمَا يَهُودْ سِمْعَوْا الْكَلَامْ دَا وَ فِرْحَوْا فَرْحَةْ شَدِيدَةْ وَ مَجَّدَوْا الرَّبّ أَشَانْ الْبِشَارَةْ. وَ كُلَّ النَّاسْ الْاللّٰهْ عَزَلَاهُمْ أَشَانْ يَدْخُلُوا فِي الْحَيَاةْ الْأَبَدِيَّةْ، آمَنَوْا. 49 بِمِثِلْ دَا، كُلَّ النَّاسْ الْفِي الْبَلَدْ دِي سِمْعَوْا كَلَامْ الرَّبّ.
50 وَ لَاكِنْ الْيَهُودْ حَرَّشَوْا كُبَارَاتْ الْحِلَّةْ وَ الْعَوِينْ الْعَابِدَاتْ اللّٰهْ أَشَانْ يِتَعُّبُوا بُولُسْ وَ بَرْنَابَا. وَ طَرَدَوْهُمْ مِنْ الْبَلَدْ. 51 وَ خَلَاصْ، بُولُسْ وَ بَرْنَابَا مَرَقَوْا مِنْ الْحِلَّةْ وَ حَتَّوْا الْعَجَاجْ مِنْ رِجْلَيْهُمْ. وَ شَالَوْا دَرِبْ حِلَّةْ إِقُونِيَةْ. 52 وَ لَاكِنْ التَّلَامِيذ الْقَعَدَوْا فِي الْحِلَّةْ، مَلَانِينْ بِالرُّوحْ الْقُدُّوسْ وَ فَرْحَانِينْ فَرْحَةْ شَدِيدَةْ.
© La Bible en arabe tchadien © Alliance biblique du Tchad, 2019
