السبعة كيسان
1 وَ فِي الْبَكَانْ دَا، سِمِعْت حِسّ شَدِيدْ مَرَقْ مِنْ لُبّ بَيْت الْعِبَادَةْ وَ هُو حَجَّى لِلسَّبْعَةْ مَلَائِكَةْ وَ قَالْ: «أَمْشُوا بِالسَّبْعَةْ كِيسَانْ هَنَا غَضَبْ اللّٰهْ وَ دَفُّقُوهُمْ فِي الْأَرْض.»
2 وَ الْمَلَكْ الْأَوَّلَانِي قَمَّ وَ دَفَّقْ كَاسَهْ فِي الْأَرْض. وَ بَيْدَا، الْعَذَابْ جَاءْ فِي كُلَّ النَّاسْ الْقِبْلَوْا وَسِمْ الْحَيْوَانْ الْفَسِلْ وَ سَجَدَوْا لِصَنَمَهْ. وَ عَوَاوِيرْ شَيْنِينْ وَ عَفْنِينْ مَرَقَوْا فِي جِلِدْهُمْ.
3 وَ الْمَلَكْ التَّانِي دَفَّقْ كَاسَهْ فِي الْبَحَرْ الْمَالِحْ وَ بَيْدَا، الْأَلْمِي بِقِي مِثِلْ دَمّ هَنَا نَادُمْ مَيِّتْ وَ كُلَّ الْحَيْوَانَاتْ الْفِي الْبَحَرْ مَاتَوْا.
4 وَ الْمَلَكْ التَّالِتْ دَفَّقْ كَاسَهْ فِي الْوُدْيَانْ وَ الْبِيَارْ وَ بَيْدَا، أَلْمِيهُمْ كُلَّ كَيْ بِقِي دَمّ. 5 وَ سِمِعْت كَلَامْ هَنَا الْمَلَكْ الْمَسْؤُولْ فِي الْأَلْمِي قَالْ:
«يَا اللّٰهْ الْقُدُّوسْ
الْقَاعِدْ فِي الْوَكِتْ الْفَاتْ
وَ فِي الْوَكِتْ الْحَاضِرْ،
إِنْتَ عَادِلْ
وَ حُكْمَكْ فَوْقهُمْ حَقّ.
6 أَشَانْ أَوَّلْ النَّاسْ دَفَّقَوْا دَمّ
الْأَنْبِيَاء وَ الصَّالِحِينْ
وَ خَلَاصْ إِنْتَ أَنْطَيْتهُمْ دَمّ يَشَرْبَوْه
وَ دَا وَاجِبْ لَيْهُمْ.»
7 وَ أَنَا سِمِعْت حِسّ جَايِ مِنْ الْمَدْبَحْ وَ قَالْ:
«يَا رَبِّنَا اللّٰهْ الْقَادِرْ،
حُكْمَكْ فَوْقهُمْ حَقّ وَ عَادِلْ.»
8 وَ الْمَلَكْ الرَّابِعْ دَفَّقْ كَاسَهْ فِي الْحَرَّايْ أَشَانْ الْحَرَّايْ تُطُقّ النَّاسْ بِحَرَارِتْهَا. 9 وَ حَرَارَةْ الْحَرَّايْ الشَّدِيدَةْ طَقَّتْ النَّاسْ وَ بَيْدَا، هُمَّنْ قَالَوْا كَلَامْ فَسِلْ فِي أُسُمْ اللّٰهْ أَشَانْ عِرْفَوْا اللّٰهْ عِنْدَهْ قُدْرَةْ فِي أَيِّ وَبَاءْ. وَ مَا تَابَوْا مِنْ ذُنُوبْهُمْ وَ مَا مَجَّدَوْه.
10 وَ الْمَلَكْ الْخَامِسْ دَفَّقْ كَاسَهْ فِي كُرْسِي الْحَيْوَانْ الْفَسِلْ وَ بَيْدَا، مَمْلَكَتَهْ بِقَتْ ضَلْمَةْ مَرَّةْ وَاحِدْ. وَ التَّعَبْ بِقِي شَدِيدْ لَحَدِّي لَوْن النَّاسْ غَيَّرْ. 11 وَ عَيَّرَوْا اللّٰهْ رَبّ السَّمَاوَاتْ بِسَبَبْ وَجَعْهُمْ وَ عَوَاوِيرْهُمْ. وَ مَا تَابَوْا مِنْ ذُنُوبْهُمْ.
12 وَ الْمَلَكْ السَّادِسْ دَفَّقْ كَاسَهْ فِي بَحَرْ الْفُرَاتْ. وَ الْبَحَرْ يِبِسْ. وَ مِثِلْ دَا، الدَّرِبْ بِقِي فَاتِحْ لِلْمُلُوكْ الْجَايِينْ مِنْ صَبَاحْ. 13 وَ شِفْت تَلَاتَةْ شَوَاطِينْ وَ الْوَاحِدْ مَرَقْ مِنْ خَشُمْ الْغُولْ وَ الْوَاحِدْ مِنْ خَشُمْ الْحَيْوَانْ الْفَسِلْ وَ الْوَاحِدْ مِنْ خَشُمْ الْكَدَّابْ السَّوَّى نَفْسَهْ نَبِي. وَ التَّلَاتَةْ شَوَاطِينْ دَوْل شَيْنِينْ وَ يِشَابُهُوا مِثِلْ الضِّفْدَعْ. 14 وَ هُمَّنْ الشَّوَاطِينْ الْبِسَوُّوا عَجَايِبْ وَ يَمْشُوا لِكُلَّ مُلُوكْ الدُّنْيَا أَشَانْ يِنَادُوهُمْ يِلِمُّوا لِلْحَرِبْ فِي الْيَوْم الْعَظِيمْ الْاللّٰهْ الْقَادِرْ قَطَعَهْ.
15 وَ عِيسَى يُقُولْ: «دَاهُو أَنَا نَجِي بِغَفْلَةْ مِثِلْ جَيَّةْ السَّرَّاقْ. وَ مَبْرُوكْ لِلنَّادُمْ الْوَاعِي بِاللَّيْل وَ خَطَّ لُبَاسَهْ جَاهِزْ جَنْبَهْ أَشَانْ مَا يَمْرُقْ عَرْيَانْ وَ الْعَيْب مَا يِسَوِّيهْ.»
16 وَ الشَّوَاطِينْ جَابَوْا الْمُلُوكْ فِي بَكَانْ وَاحِدْ وَ الْبَكَانْ دَا أُسْمَهْ بِكَلَامْ عِبْرَانِي هَرْمَقَدُونْ.
17 وَ الْمَلَكْ السَّابِعْ دَفَّقْ كَاسَهْ فِي الْهَوَاءْ. وَ حِسّ شَدِيدْ أَنْسَمَعْ وَ الْحِسّ دَا جَايِ مِنْ الْعَرْش فِي لُبّ بَيْت الْعِبَادَةْ وَ قَالْ: «خَلَاصْ كَمَّلْ.»
18 وَ بَعَدْ دَا، بَرَّاقَةْ شَلَعَتْ وَ حَرَكَةْ شَدِيدَةْ وَ رَعَدْ أَنْسَمَعَوْا وَ بِقِي زِلْزَالْ شَدِيدْ مَرَّةْ وَاحِدْ. وَ زِلْزَالْ شَدِيدْ مِثِلْ دَا أَبَداً النَّاسْ مَا شَافَوْه يَوْم وَاحِدْ فِي الْأَرْض. دَا بَسْ الزِّلْزَالْ الْأَكْبَرْ. 19 وَ الْمَدِينَةْ الْكَبِيرَةْ أَنْشَقَّتْ عَلَيْ تَلَاتَةْ بَكَانْ. وَ كُلَّ مُدُنْ الْأُمَمْ أَدَّمَّرَوْا مَرَّةْ وَاحِدْ وَ مِثِلْ دَا اللّٰهْ عَاقَبْ مَدِينَةْ بَابِلْ الْكَبِيرَةْ بِذُنُوبْهَا. وَ اللّٰهْ جَبَرَاهَا تَشْرَبْ خَمَرْ مِنْ كَاسَهْ وَ الْخَمَرْ دَا يِمَثِّلْ غَضَبَهْ الشَّدِيدْ بِلْحَيْن. 20 وَ أَيِّ جَزِيرَةْ عَرَّدَتْ وَ أَيِّ حَجَرْ طَوِيلْ بِقِي مَا فِيهْ. 21 وَ بَرَدْ دَفَّقْ فِي النَّاسْ وَ أَيِّ حَبَّةْ تَقِيلَةْ لَحَدِّي تَوْزِنْ 50 كِيلَوْ وَ النَّاسْ عَيَّرَوْا اللّٰهْ أَشَانْ الْوَبَاءْ بِقِي شَدِيدْ مَرَّةْ وَاحِدْ.
© La Bible en arabe tchadien © Alliance biblique du Tchad, 2019
