إحْتِرام العلاقة الزَوْجيّة
1 وَ اللّٰهْ حَجَّى لِمُوسَى وَ قَالْ: 2 حَجِّي لِبَنِي إِسْرَائِيلْ وَ قُولْ لَيْهُمْ: «أَنَا بَسْ اللّٰهْ إِلٰـهْكُو. 3 مَا تِسَوُّوا عَمَلْ هَنَا نَاسْ بَلَدْ مَصِرْ الْبَكَانْ الْإِنْتُو سَكَنْتُوا فَوْقَهْ. وَ مَا تِسَوُّوا عَمَلْ هَنَا نَاسْ بَلَدْ كَنْعَانْ الْبَكَانْ النِّوَدِّيكُو لَيَّهْ. النَّاسْ دَوْل، مَا تِتَابُعُوا قَوَانِينْهُمْ. 4 وَ إِنْتُو طَبُّقُوا قَوَانِينِي وَ أَحْفَضَوْا شُرُوطِي وَ تَابُعُوهُمْ. وَ أَنَا بَسْ اللّٰهْ إِلٰـهْكُو. 5 وَ أَحْفَضَوْا شُرُوطِي وَ قَوَانِينِي. وَ النَّادُمْ الْيِطَبِّقْهُمْ يَحْيَى بِسَبَبْهُمْ. وَ أَنَا بَسْ اللّٰهْ.
6 «مَا وَاجِبْ أَيِّ نَادُمْ مِنْكُو يِقَرِّبْ لِوَاحِدَةْ مِنْ أَهَلَهْ لِيَرْقُدْ مَعَاهَا. وَ أَنَا بَسْ اللّٰهْ.
7 «مَا تَرْقُدْ مَعَ أَمَّكْ وَ تِعَيِّبْ أَبُوكْ. وَ دِي أَمَّكْ، مَا وَاجِبْ تَرْقُدْ مَعَاهَا.
8 «مَا تَرْقُدْ مَعَ مَرِةْ أَبُوكْ وَ تِعَيِّبْ أَبُوكْ ذَاتَهْ.
9 «مَا تَرْقُدْ مَعَ أَخْتَكْ كَنْ بِنْت أَمَّكْ وَلَّا بِنْت أَبُوكْ كُلَ. وَ كَنْ رَبَّوْهَا فِي الْبَيْت وَلَّا بَرَّا مِنَّهْ كُلَ، مَا وَاجِبْ تَرْقُدْ مَعَاهَا.
10 «مَا تَرْقُدْ مَعَ بِنْت وَلَدَكْ وَ لَا مَعَ بِنْت بِنْتَكْ أَشَانْ دَا يِعَيِّبَكْ إِنْتَ ذَاتَكْ.
11 «مَا تَرْقُدْ مَعَ بِنْت مَرِةْ أَبُوكْ هِي رَبِيبَةْ أَبُوكْ. هِي أَخْتَكْ مَا تَرْقُدْ مَعَاهَا.
12 «مَا تَرْقُدْ مَعَ أَخُتْ أَبُوكْ. هِي عِمِّتَكْ، أَخُتْ أَبُوكْ.
13 «مَا تَرْقُدْ مَعَ أَخُتْ أَمَّكْ. هِي خَالْتَكْ، أَخُتْ أَمَّكْ.
14 «مَا تَرْقُدْ مَعَ مَرِةْ عِمَّكْ وَ تِعَيِّبَهْ. هِي عِمِّتَكْ.
15 «مَا تَرْقُدْ مَعَ مَرِةْ وَلَدَكْ. هِي مَرِةْ وَلَدَكْ، مَا وَاجِبْ تَرْقُدْ مَعَاهَا.
16 «مَا تَرْقُدْ مَعَ مَرِةْ أَخُوكْ وَ تِعَيِّبَهْ هُو ذَاتَهْ.
17 «مَا تَرْقُدْ مَعَ الْأَمّ وَ بِنْتَهَا. وَ مَا تَاخُدْ بِنْت وَلَدْهَا وَ لَا بِنْت بِنْتَهَا وَ تِعَيِّبْ جِدِّتْهَا. أَشَانْ هُمَّنْ قَرِيبِينْ وَ دَا فِعِلْ شَيْن.
18 «مَا تَاخُدْ أَخُتْ مَرْتَكْ وَ لَا تِسَوِّيهَا ضَرِّتْهَا وَ لَا تَرْقُدْ مَعَاهَا وَكِتْ مَرْتَكْ حَيَّةْ.
19 «مَا تِقَرِّبْ لِمَرَةْ عِنْدَهَا حَيْض. مَا تَرْقُدْ مَعَاهَا، هِي مَا طَاهِرَةْ.
20 «مَا تَرْقُدْ مَعَ مَرِةْ أَخُوكْ وَ تِنَّجَّسْ مَعَاهَا.
21 «مَا تَنْطِي وَاحِدْ مِنْ عِيَالَكْ لِيِقَدُّمُوهْ فِي النَّارْ لِصَنَمْ مُولَكْ وَ بِمِثِلْ دَا، مَا تِحْتَرِمْ أُسُمْ اللّٰهْ إِلٰـهَكْ. وَ أَنَا بَسْ اللّٰهْ.
22 «مَا تَرْقُدْ مَعَ رَاجِلْ مِثِلْ تَرْقُدْ مَعَ مَرَةْ. دَا فِعِلْ مُحَرَّمْ.
23 «مَا تَرْقُدْ مَعَ أَيِّ بَهِيمَةْ وَ تِنَجِّسْ نَفْسَكْ مَعَاهَا. وَ الْمَرَةْ كُلَ مَا وَاجِبْ تِقَرِّبْ لِحَيْوَانْ وَ تَرْقُدْ مَعَايَهْ. وَ دَا شَيّءْ مَكْرُوهْ مَرَّةْ وَاحِدْ.
24 «مَا تِنَجُّسُوا نُفُوسْكُو بِأَيِّ وَاحِدْ مِنْ الْأَفْعَالْ دَوْل أَشَانْ بِالْأَفْعَالْ دَوْل أَنَّجَّسَوْا الْأُمَمْ الْأَنَا نَطْرُدْهُمْ قِدَّامْكُو. 25 الْبَلَدْ أَنَّجَّسَتْ وَ أَنَا عَاقَبْتَهَا بِخَطَاهَا وَ هِي طَرَدَتْ سُكَّانْهَا.
26 «وَ كَنْ لَيْكُو إِنْتُو، أَحْفَضَوْا شُرُوطِي وَ قَوَانِينِي وَ مَا تِسَوُّوا وَاحِدْ مِنْ كُلَّ الْمُحَرَّمَاتْ دَوْل، وَ لَا الْمُوَاطِنْ الْمِنْ بَنِي إِسْرَائِيلْ وَ لَا الْأَجْنَبِي السَّاكِنْ مَعَاكُو. 27 وَ كُلَّ الْمُحَرَّمَاتْ دَوْل النَّاسْ السَّكَنَوْا الْبَلَدْ قَبُلْكُو سَوَّوْهُمْ وَ الْبَلَدْ أَنَّجَّسَتْ بَيْهُمْ. 28 وَ بَيْدَا، إِنْتُو مَا تِنَجُّسُوا الْبَلَدْ أَشَانْ هِي مَا تَطْرُدْكُو مِثِلْ هِي طَرَدَتْ الْأُمَمْ الْقَبُلْكُو. 29 وَ أَيِّ وَاحِدْ الْيِسَوِّي وَاحِدَةْ مِنْ الْمُحَرَّمَاتْ دَوْل، وَاجِبْ يَفْصُلُوهْ مِنْ شَعَبَهْ.
30 «وَ خَلَاصْ، أَحْفَضَوْا وَصِيَّاتِي أَشَانْ مَا تِطَبُّقُوا الْعَادَاتْ الْمُحَرَّمِينْ الطَّبَّقَوْهُمْ النَّاسْ الْقَبُلْكُو وَ مَا تِنَّجَّسَوْا بَيْهُمْ. أَنَا بَسْ اللّٰهْ إِلٰـهْكُو.»
© La Bible en arabe tchadien © Alliance biblique du Tchad, 2019
