المسيح شفى نادم في يوم السبْت
1 وَ عِيسَى دَخَلْ بَتَّانْ فِي بَيْت الصَّلَاةْ. وَ نَادُمْ وَاحِدْ إِيدَهْ مَيْتَةْ قَاعِدْ دَاخَلْ. 2 وَ نَاسْ وَاحِدِينْ خَطَّوْا بَالْهُمْ فِي عِيسَى أَشَانْ يِدَوْرُوا يِشِيفُوا كَنْ هُو يَشْفِيهْ وَلَّا لَا. فِي فِكِرْهُمْ، كَنْ هُو يَشْفِي نَادُمْ فِي يَوْم السَّبْت، دَا يَبْقَى لَيْهُمْ فُرْصَةْ أَشَانْ يُخُطُّوا فَوْقَهْ تُهْمَةْ.
3 وَ خَلَاصْ عِيسَى حَجَّى لِلرَّاجِلْ الْإِيدَهْ مَيْتَةْ وَ قَالْ: «قُمّ فَوْق قِدَّامْ النَّاسْ». 4 وَ عِيسَى سَأَلَاهُمْ وَ قَالْ: «شُنُو الْحَلَالْ فِي يَوْم السَّبْت؟ الْخَيْر وَلَّا الشَّرّ؟ حَلَالْ لَيْنَا نِنَجُّوا النَّاسْ وَلَّا نَكْتُلُوهُمْ؟»
وَ هُمَّنْ مَا رَدَّوْا لَيَّهْ شَيّءْ. 5 وَ هُو أَلَّفَّتْ فِي أُسُطْهُمْ بِغَضَبْ وَ حِزِنْ أَشَانْ رُوسَيْهُمْ قَوِيِّينْ. وَ حَجَّى لِلرَّاجِلْ وَ قَالْ: «مِدّ إِيدَكْ». وَ الرَّاجِلْ مَدَّاهَا وَ خَلَاصْ إِيدَهْ أَشَّافَتْ مَرَّةْ وَاحِدْ. 6 وَ الْفَرِيزِيِّينْ مَرَقَوْا وَ طَوَّالِي أَشَّاوَرَوْا مَعَ نَاسْ هَنَا حِزِبْ هِرُودُسْ فِي شَانْ كِكَّيْف يَكْتُلُوا عِيسَى.
ناس كتيرين تابعوا عِيسَى
7 وَ عِيسَى قَمَّ مَعَ تَلَامِيذَهْ وَ مَشَى فِي خَشُمْ الْبَحَرْ. وَ نَاسْ كَتِيرِينْ مَرَّةْ وَاحِدْ مِنْ دَارْ الْجَلِيلْ تَابَعَوْه. وَ فِي نَاسْ مِنْ دَارْ الْيَهُودِيَّةْ كُلَ 8 وَ مِنْ مَدِينَةْ الْقُدُسْ وَ دَارْ أَدَوْم وَ الْبُلْدَانْ الْغَادِي لِبَحَرْ الْأُرْدُنْ وَ مِنْ تُرَابْ هَنَا صُورْ وَ صَيْدَا. وَ النَّاسْ دَوْل جَوْا لَيَّهْ أَشَانْ سِمْعَوْا خَبَرْ هَنَا الشَّيّءْ الْعِيسَى قَاعِدْ يِسَوِّيهْ. وَ عَدَدْ النَّاسْ بِقِي كَتِيرْ مَرَّةْ وَاحِدْ.
9 وَ عِيسَى أَمَرْ تَلَامِيذَهْ يِجَهُّزُوا لَيَّهْ مَرْكَبَةْ أَشَانْ يَمْرُقْ مِنْ الْمُعَاصَرَةْ. 10 وَ عِيسَى شَفَى نَاسْ مَرْضَانِينْ كَتِيرِينْ وَ فِي شَانْ دَا، كُلَّ النَّاسْ الْمَرْضَانِينْ قَاعِدِينْ يِلْعَاصَرَوْا وَ يِدَوْرُوا يَلْحَقَوْه وَ يَلْمَسَوْه. 11 وَ أَيِّ نَادُمْ الْعِنْدَهْ شَيْطَانْ سَجَدْ قِدَّامْ عِيسَى وَكِتْ شَافَهْ. وَ كُلَّ الشَّوَاطِينْ عَاطَوْا وَ قَالَوْا: «إِنْتَ بَسْ إِبْن اللّٰهْ.» 12 وَ عِيسَى أَمَرَاهُمْ بِشِدَّةْ أَشَانْ مَا يِأَوْرُوا النَّاسْ هُو يَاتُو.
المسيح عزل الرُسُل الأتنا عشر
13 وَ عِيسَى طَلَعْ فِي الْحَجَرْ وَ نَادَى النَّاسْ الْهُو يِدَوْرهُمْ وَ هُمَّنْ مَشَوْا لَيَّهْ. 14 وَ عَزَلْ مِنْهُمْ 12 رَاجِلْ وَ سَمَّاهُمْ رُسُلْ لِيَقْعُدُوا مَعَايَهْ وَ لِيِرَسِّلْهُمْ لِيِبَلُّغُوا الْبِشَارَةْ. 15 وَ لِيَنْطِيهُمْ قُدْرَةْ أَشَانْ يَطُرْدُوا الشَّوَاطِينْ. 16 وَ الْأَتْنَا عَشَرْ دَوْل هُمَّنْ سِمْعَانْ الْعِيسَى سَمَّاهْ بُطْرُسْ 17 وَ يَعْقُوبْ وِلَيْد زَبَدِي وَ يُوحَنَّا أَخُو يَعْقُوبْ وَ عِيسَى سَمَّى أَوْلَادْ زَبَدِي دَوْل بُوَانْ أَرْجِسْ مَعَنَاتَهْ أَوْلَادْ الدَّقْدَاقْ. 18 وَ عَزَلْ أَنْدَرَيَّسْ وَ فِلِبُّسْ وَ بَرْتُلْمَا وَ مَتَّى وَ تُومَا وَ يَعْقُوبْ وِلَيْد حَلْفَا وَ تَدَّايَا وَ سِمْعَانْ الثَّوْرِي 19 وَ يَهُوذَا الْإِسْخَرِيَوْطِي هُو النَّادُمْ الْيُخُونْ عِيسَى.
قالوا قُدُرْته من إِبْلِيس
20 وَ عِيسَى مَشَى الْبَيْت. وَ بَتَّانْ نَاسْ كَتِيرِينْ مَرَّةْ وَاحِدْ مَشَوْا لَيَّهْ لَحَدِّي عِيسَى وَ تَلَامِيذَهْ مَا لِقَوْا فُرْصَةْ حَتَّى لِيَاكُلُوا كُلَ. 21 وَ أَخْوَانْ عِيسَى سِمْعَوْا بِالْخَبَرْ دَا وَ قَمَّوْا لِيَكُرْبُوهْ. وَ قَالَوْا: «هُو رَاسَهْ لَفَّ خَلَاصْ.» 22 وَ الْعُلَمَاءْ الْجَوْا مِنْ مَدِينَةْ الْقُدُسْ قَالَوْا: «إِبْلِيسْ كَرَبَهْ. هُو يَطْرُدْ الشَّوَاطِينْ بِقُدْرَةْ كَبِيرْ الشَّوَاطِينْ».
23 وَ عِيسَى نَادَاهُمْ وَ حَجَّى لَيْهُمْ بِأَمْثَالْ وَ قَالْ: «كِكَّيْف شَيْطَانْ يَطْرُدْ شَيْطَانْ؟ 24 كَنْ نَاسْ هَنَا مَمْلَكَةْ يِدَّاوَسَوْا أَمْبَيْنَاتْهُمْ، الْمَمْلَكَةْ دِي مَا تَقْعُدْ ثَابْتَةْ. 25 وَ كَنْ نَاسْ هَنَا بَيْت وَاحِدْ وَ يِدَّاوَسَوْا أَمْبَيْنَاتْهُمْ، الْبَيْت دَا، مَا يَقْعُدْ ثَابِتْ. 26 وَ بِمِثِلْ دَا، كَنْ الشَّيْطَانْ يِدَاوِسْ نَفْسَهْ، هُو يِنْفَرِقْ وَ مَا يَقْعُدْ ثَابِتْ بَتَّانْ وَ خَلَاصْ تِنْتَهِي مَرَّةْ وَاحِدْ. 27 وَ لَاكِنْ مَا فِي نَادُمْ الْيَدْخُلْ فِي بَيْت رَاجِلْ قَوِي وَ يَنْهَبْ خُمَامَهْ إِلَّا كَنْ أَوَّلْ رَبَطْ الرَّاجِلْ الْقَوِي دَا. وَ كَنْ رَبَطَهْ خَلَاصْ، أَكِيدْ يَقْدَرْ يَنْهَبْ كُلَ خُمَامَهْ.
28 «وَ نُقُولْ لَيْكُو الْحَقّ. اللّٰهْ يَغْفِرْ لِلنَّاسْ كُلَّ ذُنُوبْهُمْ وَ كُلَّ كَلَامْ الْكُفُرْ الْيُقُولُوهْ 29 لَاكِنْ كَنْ أَيِّ نَادُمْ يِحَجِّي كَلَامْ كُفُرْ فِي الرُّوحْ الْقُدُّوسْ، الذَّنِبْ دَا أَبَداً مَا يِنْغَفِرْ. هُو بِقِي خَاطِي بِذَنِبْ الْيَقْعُدْ فِي رَاسَهْ إِلَى الْأَبَدْ». 30 وَ عِيسَى قَالْ الْكَلَامْ دَا أَشَانْ قَالَوْا هُو عِنْدَهْ شَيْطَانْ.
أمّ المسيح و أخْوانه
31 وَ أَمّ عِيسَى وَ أَخْوَانَهْ مَشَوْا لَيَّهْ. وَ وَقَفَوْا بَرَّا مِنْ الْبَيْت. وَ رَسَّلَوْا نَادُمْ أَشَانْ يِنَادِيهْ لَيْهُمْ. 32 وَ نَاسْ كَتِيرِينْ قَاعِدِينْ مَعَ عِيسَى وَ هُو قَاعِدْ فِي أُسُطْهُمْ. وَ قَالَوْا لَيَّهْ: «أَمَّكْ وَ أَخْوَانَكْ وَ أَخْوَاتَكْ قَاعِدِينْ بَرَّا يِنَادُوكْ».
33 وَ هُو رَدَّ لَيْهُمْ وَ قَالْ: «أَمِّي يَاتِي؟ وَ أَخْوَانِي يَاتُو هُمَّنْ؟» 34 وَ أَنْلَفَتْ لِلنَّاسْ الْقَاعِدِينْ مَعَايَهْ وَ قَالْ: «شِيفُوا. دَوْل بَسْ هُمَّنْ أَمِّي وَ أَخْوَانِي. 35 وَ أَيِّ نَادُمْ الْيِسَوِّي حَسَبْ الْاللّٰهْ يِدَوْرَهْ، هُو دَا بَسْ أَخُويِ أَوْ أَخْتِي أَوْ أَمِّي.»
© La Bible en arabe tchadien © Alliance biblique du Tchad, 2019
