فرْحة في دمار بَابِل
1 وَ بَعَدْ دَا، أَنَا سِمِعْت حَرَكَةْ شَدِيدَةْ فِي السَّمَاوَاتْ مِثِلْ حَرَكَةْ هَنَا نَاسْ كَتِيرِينْ بِلْحَيْن. وَ قَالَوْا:
«هَلَّيْلُويَا!
الْحَمْدُ للّٰهْ!
رَبِّنَا اللّٰهْ هُو الْقَادِرْ وَ الْمَجِيدْ
وَ النَّجَاةْ تَجِي مِنَّهْ هُو بَسْ.
2 حِسَابَهْ حَقّ وَ عَادِلْ.
هُو حَاسَبْ الشَّرْمُوطَةْ الْكَبِيرَةْ
الْفَسَدَتْ نَاسْ الْأَرْض بِزِنَاهَا.
هِي دَفَّقَتْ دَمّ عَبِيدْ اللّٰهْ
وَ اللّٰهْ شَالْ لَيْهُمْ التَّارْ فَوْقهَا.»
3 وَ بَتَّانْ عَاطَوْا:
«هَلَّيْلُويَا!
الْحَمْدُ للّٰهْ!
دُخَّانْ هَنَا النَّارْ الْأَكَلَتْهَا
يَطْلَعْ إِلَى الْأَبَدْ.»
4 وَ الْأَرْبَعَةْ وَ عِشْرِينْ شُيُوخْ وَ الْأَرْبَعَةْ مَخْلُوقِينْ السَّمَاوِيِّينْ سَجَدَوْا قِدَّامْ اللّٰهْ الْقَاعِدْ فِي الْعَرْش وَ قَالَوْا:
«آمِينْ. هَلَّيْلُويَا!
الْحَمْدُ للّٰهْ!»
5 وَ حِسّ مِنْ بَكَانْ الْعَرْش أَنْسَمَعْ وَ قَالْ:
«يَا عَبِيدْ اللّٰهْ،
أَشْكُرُوا رَبِّنَا اللّٰهْ.
أَيِّ نَادُمْ الْخَايِفْ مِنْ اللّٰهْ
مِنْ الصُّغَارْ لَحَدِّي الْكُبَارْ
خَلِّي يَشْكُرَهْ.»
عِرِس الحمل
6 وَ فِي الْبَكَانْ دَا، سِمِعْت حَرَكَةْ مِثِلْ حِسّ هَنَا نَاسْ كَتِيرِينْ مَرَّةْ وَاحِدْ. وَ حِسُّهُمْ مِثِلْ حَرَكَةْ هَنَا مَطَرَةْ شَدِيدَةْ بِلْحَيْن وَ مِثِلْ رَعَدْ شَدِيدْ وَ قَالَوْا:
«هَلَّيْلُويَا!
الْحَمْدُ للّٰهْ!
رَبِّنَا اللّٰهْ الْقَادِرْ قَاعِدْ يَمْلُكْ.
7 خَلِّي نَفْرَحَوْا وَ نِعَيُّدُوا
وَ نِمَجُّدُوا اللّٰهْ
أَشَانْ يَوْم هَنَا عِرِسْ الْحَمَلْ تَمَّ
وَ الْعَرُوسْ جَهَّزَتْ نَفِسْهَا.
8 وَ بِإِذِنْ اللّٰهْ، هِي لِبْسَتْ خَلَقْ
هَنَا كَتَّانْ أَصْلِي الْبِرَارِي.»
وَ الْكَتَّانْ دَا يِمَثِّلْ حَسَنَاتْ الصَّالِحِينْ.
9 وَ الْمَلَكْ حَجَّى لَيِّ وَ قَالْ: «أَكْتِبْ: ‹عِرِسْ هَنَا الْحَمَلْ جَاءْ وَ مَبْرُوكْ لِكُلَّ الْمَعْزُومِينْ.›» وَ بَتَّانْ، حَجَّى لَيِّ وَ قَالْ: «صَحِيحْ، دَا كَلَامْ اللّٰهْ.»
10 وَ عَجَلَةْ كَيْ، أَنَا سَجَدْت قِدَّامْ رِجِلَيْنَهْ أَشَانْ نَعَبُدَهْ لِلْمَلَكْ وَ لَاكِنْ هُو قَالْ: «لَا، مَا تَسْجُدْ لَيِّ أَنَا. أَعَبُدْ اللّٰهْ. أَنَا عَبِدْ مِثْلَكْ إِنْتَ وَ مِثِلْ أَخْوَانَكْ الْيِتَابُعُوا شَهَادَةْ عِيسَى. أَشَانْ شَهَادَةْ عِيسَى، هِي الْكَلَامْ الْيِنَزِّلَهْ الرُّوحْ الْقُدُّوسْ فِي الْأَنْبِيَاء.»
الراكِب في الجواد الأبْيض
11 وَ فِي الْبَكَانْ دَا، أَنَا شِفْت السَّمَاءْ فَاتِحْ. وَ شِفْت جُوَادْ أَبْيَضْ. وَ الرَّاكِبْ فَوْقَهْ أُسْمَهْ الْأَمِينْ وَ الصَّادِقْ وَ هُو يِحَارِبْ عَدُوهْ وَ يَحْكِمْ النَّاسْ بِحَالْ صَالْحَةْ. 12 وَ عُيُونَهْ مِثِلْ نَارْ مُقَرْقِرَةْ وَ فِي رَاسَهْ عِنْدَهْ تِيجَانْ كَتِيرِينْ. وَ أُسُمْ وَاحِدْ مَكْتُوبْ فَوْقَهْ وَ الْأُسُمْ دَا، مَا فِي نَادُمْ يَعَرْفَهْ إِلَّا هُو بَسْ. 13 وَ هُو لَابِسْ خَلَقْ مَلَانْ بِالدَّمّ وَ الْأُسُمْ الْبِنَادُوهْ بَيَّهْ، هُو كَلِمَةْ اللّٰهْ. 14 وَ جُنُودْ السَّمَاوَاتْ تَابَعَوْه. وَ هُمَّنْ لَابْسِينْ كَتَّانْ أَصْلِي الْأَبْيَضْ كَرّ وَ رَاكْبِينْ فِي خَيْل بُيُضْ. 15 وَ سَيْف مُطَرَّقْ مَارِقْ مِنْ خَشْمَهْ وَ يَضْرُبْ بَيَّهْ الْأُمَمْ. وَ هُو يَحْكِمْ فَوْقهُمْ بِعَصَاةْ هَنَا حَدِيدْ. هُو بَسْ الْيِفَجِّقْ الْعِنَبْ فِي الْعَصَّارَةْ وَ مَعَنَاتَهْ هُو مَسْؤُولْ مِنْ غَضَبْ اللّٰهْ الْقَادِرْ. 16 وَ عِنْدَهْ أُسُمْ مَكْتُوبْ فِي خَلَقَهْ وَ فِي دَارِجْتَهْ وَ الْأُسُمْ دَا، هُو مَلِكْ الْمُلُوكْ وَ رَبّ الْأَرْبَابْ.
17 وَ فِي الْبَكَانْ دَا، شِفْت مَلَكْ وَاحِدْ وَاقِفْ فِي الْحَرَّايْ. وَ هُو نَادَى بِحِسّ شَدِيدْ لِكُلَّ الطُّيُورْ الطَّايْرِينْ فِي السَّمَاءْ وَ قَالْ: «تَعَالُوا، لِمُّوا وَ آكُلُوا الْعَشَاءْ الْاللّٰهْ جَهَّزَهْ لَيْكُو. 18 آكُلُوا لَحَمْ الْمُلُوكْ وَ لَحَمْ كُبَارَاتْ الْعَسْكَرْ وَ لَحَمْ النَّاسْ الْقَادْرِينْ وَ لَحَمْ الْخَيْل وَ الرَّاكْبِينْ فَوْقهُمْ. أَيْوَى، آكُلُوا لَحَمْ هَنَا كُلَّ النَّاسْ مِنْ الْحُرِّينْ وَ الْعَبِيدْ وَ الصُّغَارْ وَ الْكُبَارْ.»
19 وَ شِفْت الْحَيْوَانْ الْفَسِلْ وَ مُلُوكْ الْأَرْض مَعَ عَسْكَرْهُمْ لَامِّينْ أَشَانْ يِحَارُبُوا الرَّاكِبْ فِي الْجُوَادْ الْأَبْيَضْ وَ عَسْكَرَهْ. 20 وَ الْحَيْوَانْ غَلَبَوْه وَ كَرَبَوْه. وَ كَرَبَوْا مَعَايَهْ الْكَدَّابْ السَّوَّى نَفْسَهْ نَبِي الْأَوَّلْ سَوَّى عَجَايِبْ فِي قِدَّامَهْ. وَ الْعَجَايِبْ دَوْل، هُو سَوَّاهُمْ أَشَانْ يُغُشّ بَيْهُمْ النَّاسْ الْقِبْلَوْا وَسِمْ الْحَيْوَانْ الْفَسِلْ وَ سَجَدَوْا لِصَنَمَهْ. وَ رَمَوْا الْحَيْوَانْ الْفَسِلْ وَ الْكَدَّابْ حَيِّينْ فِي بَحَرْ النَّارْ الْمُأَوْقِدَةْ بِكِبْرِيتْ أَصْفَرْ. 21 وَ عَسْكَرْهُمْ كُلَ مَاتَوْا بِالْسَّيْف هَنَا النَّادُمْ الرَّاكِبْ فِي الْجُوَادْ وَ دَا السَّيْف الْمَارِقْ مِنْ خَشْمَهْ. وَ كُلَّ الطُّيُورْ شِبْعَوْا مِنْ لَحَمْ الْمَيْتِينْ دَوْل.
© La Bible en arabe tchadien © Alliance biblique du Tchad, 2019
