يُوسُف بيّن نفْسه لأخْوانه
1 وَ فِي الْبَكَانْ دَا، يُوسُفْ مَا قِدِرْ ثَبَّتْ نَفْسَهْ قِدَّامْ النَّاسْ الْقَاعِدِينْ مَعَايَهْ. وَ قَالْ لَيْهُمْ: «أَمُرْقُوا!» وَ كُلَّ النَّاسْ مَرَقَوْا. نَادُمْ وَاحِدْ كُلَ مَا فَضَّلْ، إِلَّا هُو وَ أَخْوَانَهْ. وَ بَيَّنْ لَيْهُمْ نَفْسَهْ. 2 وَ يُوسُفْ قَمَّ يَبْكِي بَكِي شَدِيدْ لَحَدِّي الْمَصْرِيِّينْ وَ النَّاسْ فِي قَصِرْ الْمَلِكْ فِرْعَوْن كُلَ سِمْعَوْه.
3 وَ يُوسُفْ قَالْ لِأَخْوَانَهْ: «أَنَا بَسْ يُوسُفْ! صَحِيحْ أَبُويِ لِسَّاعْ قَاعِدْ حَيّ وَلَّا؟» لَاكِنْ أَخْوَانَهْ مِنْ الْخَوْف قِدَّامَهْ مَا قِدْرَوْا رَدَّوْا لَيَّهْ. 4 وَ يُوسُفْ قَالْ لَيْهُمْ: «تَعَالُوا لَيِّ قَرِيبْ.» وَ هُمَّنْ قَرَّبَوْا لَيَّهْ وَ قَالْ لَيْهُمْ: «أَنَا يُوسُفْ، أَخُوكُو. إِنْتُو بِعْتُونِي مِثِلْ عَبِدْ وَ جَابَوْنِي هِنِي فِي مَصِرْ. 5 إِنْتُو بِعْتُونِي وَ جَابَوْنِي هِنِي. وَ فِي شَانْ دَا، مَا تَخَافَوْا وَ لَا تِبَرْجُلُوا. أَشَانْ الرَّبّ بَسْ رَسَّلَانِي هِنِي قُبَّالْكُو لِيِنَجِّي حَيَاتْكُو. 6 دَاهُو الْجُوعْ سَوَّى سَنْتَيْن فِي الْبَلَدْ وَ فَضَّلْ بَتَّانْ خَمْسَةْ سَنَةْ. النَّاسْ مَا بَقْدَرَوْا بِتَيْرُبُوا وَ لَا بَحَرْتُوا. 7 وَ الرَّبّ رَسَّلَانِي هِنِي قُبَّالْكُو أَشَانْ إِنْتُو تِفَضُّلُوا فِي الْأَرْض وَ يِنَجِّي حَيَاتْكُو نَجَاةْ كَامِلَةْ. 8 مَا إِنْتُو يَا جِبْتُونِي هِنِي لَاكِنْ الرَّبّ بَسْ جَابَانِي. وَ هُو سَوَّانِي الْوَزِيرْ الْكَبِيرْ سِيدْ الْأَمَانْ هَنَا الْمَلِكْ فِرْعَوْن وَ مَسْؤُولْ هَنَا بَيْتَهْ وَ حَاكِمْ فِي كُلَّ بَلَدْ مَصِرْ.
9 «هَسَّعْ دَا، أَمْشُوا عَجَلَةْ لِأَبُويِ وَ قُولُوا لَيَّهْ: ‹دَاهُو وِلَيْدَكْ يُوسُفْ بُقُولْ كَيْ: ”الرَّبّ سَوَّانِي حَاكِمْ فِي كُلَّ بَلَدْ مَصِرْ. تَعَالْ لَيِّ بَلَا تَأخِيرْ. 10 وَ تَقْعُدْ جَنْبِي فِي تُرَابْ قَوْشَنْ، إِنْتَ وَ عِيَالَكْ وَ عِيَالْ عِيَالَكْ وَ بَقَرَكْ وَ غَنَمَكْ وَ كُلَّ مَالَكْ. 11 وَ فِي الْبَكَانْ دَا، نَنْطِيكْ مَعَاشْ لَيْك وَ لِعَايِلْتَكْ وَ لِبَهَايْمَكْ لِمَا تَتْعَبَوْا. أَشَانْ فَضَّلْ خَمْسَةْ سَنَةْ هَنَا جُوعْ.“›»
12 وَ يُوسُفْ قَالْ لَيْهُمْ بَتَّانْ: «إِنْتُو كُلُّكُو وَ بَنْيَامِينْ ذَاتَهْ قَاعِدِينْ تِشِيفُونِي أَنَا بَسْ قَاعِدْ نِكَلِّمْ لَيْكُو. 13 وَ أَمْشُوا أَوْرُوا أَبُويِ بِالدَّرَجَةْ الْعِنْدِي فِي مَصِرْ وَ بِكُلَّ شَيّءْ الْقَاعِدِينْ تِشِيفُوهْ. وَ أَمْشُوا جِيبُوهْ عَجَلَةْ كَيْ هِنِي.» 14 وَ يُوسُفْ قَمَّ حَضَنْ أَخُوهْ بَنْيَامِينْ وَ بَدَا يَبْكِي وَ بَنْيَامِينْ كُلَ حَضَنَهْ وَ بَكَى. 15 يُوسُفْ قَاعِدْ يَبْكِي وَ يِحِبّ أَخْوَانَهْ الْآخَرِينْ كُلَ وَ فِي الْبَكَانْ دَا، هُمَّنْ قِدْرَوْا حَجَّوْا لَيَّهْ.
16 وَ فِي قَصِرْ الْمَلِكْ فِرْعَوْن، سِمْعَوْا كَدَرْ أَخْوَانْ يُوسُفْ جَوْا فِي مَصِرْ وَ فِرْعَوْن مَعَ مَسَائِيلَهْ كُلُّهُمْ فِرْحَوْا بِالْخَبَرْ دَا. 17 وَ الْمَلِكْ قَالْ لِيُوسُفْ: «قُولْ لِأَخْوَانَكْ خَلِّي يِشِدُّوا حَمِيرْهُمْ وَ يِقَبُّلُوا فِي بَلَدْ كَنْعَانْ. 18 يَمْشُوا يِجِيبُوا أَبُوهُمْ وَ عَايِلَاتْهُمْ وَ نُخُطُّهُمْ فِي أَفْضَلْ بَكَانْ فِي مَصِرْ، بَكَانْ الْيَلْقَوْا فَوْقَهْ سَرْحَةْ سَمْحَةْ لِمَالْهُمْ. 19 وَ قُولْ لِأَخْوَانَكْ خَلِّي يِشِيلُوا مِنْ هِنِي عَرَبَاتْ أَشَانْ يِجِيبُوا فَوْقهُمْ عَوِينْهُمْ وَ عِيَالْهُمْ وَ أَبُوهُمْ كُلَ. 20 وَ خَلِّي مَا يَنْدَمَوْا لِأَيِّ شَيّءْ الْيِخَلُّوا هِنَاكْ أَشَانْ يَجُوا يَسْكُنُوا فِي أَفْضَلْ بَكَانْ فِي مَصِرْ.»
أوْلاد يَعْقُوب قبّلوا في كَنْعَان
21 وَ خَلَاصْ، أَوْلَادْ يَعْقُوبْ سَوَّوْا الشَّيّءْ الْقَالَوْه لَيْهُمْ. يُوسُفْ أَنْطَاهُمْ الْعَرَبَاتْ بِإِذِنْ الْمَلِكْ فِرْعَوْن وَ أَنْطَاهُمْ زَادْ كُلَ. 22 وَ أَنْطَاهُمْ هَدِيَّةْ هَنَا خُلْقَانْ وَ لِبَنْيَامِينْ أَنْطَاهْ خَمْسَةْ خُلْقَانْ وَ 300 حَجَرْ فُضَّةْ. 23 وَ دَاهُو الْخُمَامْ الرَّسَّلَهْ لِأَبُوهْ، عَشَرَةْ حَمِيرْ شَايْلِينْ أَشْيَاءْ سَمْحِينْ هَنَا مَصِرْ وَ عَشَرَةْ حَمِيرْ أَنَاتِي شَايْلِينْ قَمَحْ وَ خُبْزَةْ وَ زَادْ لِأَبُوهْ فِي الدَّرِبْ. 24 وَ طَلَبْ مِنْ أَخْوَانَهْ أَشَانْ مَا يِهَارُجُوا فِي الدَّرِبْ وَ خَلَّاهُمْ مَشَوْا.
25 وَ خَلَاصْ هُمَّنْ قَمَّوْا مَرَقَوْا مِنْ مَصِرْ وَ بَعَدَيْن وَصَّلَوْا فِي بَلَدْ كَنْعَانْ بَكَانْ أَبُوهُمْ يَعْقُوبْ. 26 وَ قَمَّوْا قَالَوْا لَيَّهْ: «يُوسُفْ قَاعِدْ حَيّ وَ هُو بَسْ حَاكِمْ فِي مَصِرْ.» وَ يَعْقُوبْ قَلْبَهْ أَنْقَطَعْ مِنْ الْفَرْحَةْ وَ بَيْدَا كُلَ، هُو مَا صَدَّقْ كَلَامْهُمْ. 27 وَ لَاكِنْ هُمَّنْ حَجَّوْا لَيَّهْ بِكُلَّ شَيّءْ الْيُوسُفْ قَالَهْ لَيْهُمْ. وَ وَصَّفَوْه الْعَرَبَاتْ الْيُوسُفْ رَسَّلَاهُمْ لِيِسَافِرْ بَيْهُمْ. خَلَاصْ يَعْقُوبْ قَلْبَهْ رَقَدْ. 28 وَ بَعَدْ شِيَّةْ كَيْ، يَعْقُوبْ قَالْ: «وِلَيْدِي يُوسُفْ قَاعِدْ حَيّ! أَنَا بَتَّانْ نَقْدَرْ نُقُولْ شُنُو؟ نَمْشِي نِشِيفَهْ قُبَّالْ أَنَا مَا نُمُوتْ!»
© La Bible en arabe tchadien © Alliance biblique du Tchad, 2019
