عَزْرا الكاتِب
1 وَ بَعَدْ دَا، فِي وَكِتْ حُكُمْ أَرْتَحَشْتَا مَلِكْ بَلَدْ فَارِسْ، فِيَّهْ رَاجِلْ وَاحِدْ أُسْمَهْ عَزْرَا. وَ عَزْرَا دَا، هُو وِلَيْد سَرَايَا وِلَيْد عَزَرْيَا وِلَيْد حِلْقِيَّا 2 وِلَيْد شَلُّومْ وِلَيْد صَدُوقْ وِلَيْد أَخِطُوبْ 3 وِلَيْد أَمَرْيَا وِلَيْد عَزَرْيَا وِلَيْد مَرَيُوتْ 4 وِلَيْد زَرَحْيَا وِلَيْد عُزِّي وِلَيْد بُقِي 5 وِلَيْد أَبِشُوعْ وِلَيْد فِينْحَاسْ وِلَيْد أَلِعَازَرْ وِلَيْد هَارُونْ. وَ هَارُونْ دَا، هُو رَاجِلْ الدِّينْ الْأَوَّلْ. 6 وَ عَزْرَا كَاتِبْ وَ عَالِمْ كَبِيرْ فِي تَوْرَاةْ مُوسَى الْأَنْطَاهَا اللّٰهْ إِلٰـهْ بَنِي إِسْرَائِيلْ. وَ أَشَانْ قُدْرَةْ اللّٰهْ قَاعِدَةْ فِي عَزْرَا، الْمَلِكْ أَنْطَاهْ كُلَّ شَيّءْ الْهُو طَلَبَهْ.
وَ عَزْرَا قَمَّ مِنْ مَدِينَةْ بَابِلْ 7 مَعَ نَاسْ وَاحِدِينْ مِنْ بَنِي إِسْرَائِيلْ. وَ النَّاسْ دَوْل هُمَّنْ رُجَالْ الدِّينْ وَ اللَّاوِيِّينْ وَ الْغَنَّايِينْ وَ الْحُرَّاسْ هَنَا بِيبَانْ بَيْت اللّٰهْ وَ الْخَدَّامِينْ هَنَا بَيْت اللّٰهْ. وَ كُلُّهُمْ مَشَوْا فِي مَدِينَةْ الْقُدُسْ فِي السَّنَةْ السَّابْعَةْ هَنَا حُكُمْ الْمَلِكْ أَرْتَحَشْتَا. 8-9 وَ عَزْرَا دَوَّرْ يُقُمّ مِنْ مَدِينَةْ بَابِلْ فِي الْيَوْم الْأَوَّلْ هَنَا الشَّهَرْ الْأَوَّلْ. وَ بَعَدْ أَيَّامْ، قَمَّ وَ وِصِلْ فِي مَدِينَةْ الْقُدُسْ فِي الْيَوْم الْأَوَّلْ هَنَا الشَّهَرْ الْخَامِسْ أَشَانْ قُدْرَةْ الرَّبّ قَاعِدَةْ فَوْقَهْ.
10 وَ عَزْرَا شَالْ نِيَّةْ مُخْلِصَةْ أَشَانْ يَقْرِي تَوْرَاةْ اللّٰهْ وَ يِطَبِّقَهْ فِي نَفْسَهْ وَ يِعَلِّمْ قَوَانِينَهْ وَ شُرُوطَهْ لِبَنِي إِسْرَائِيلْ.
جواب الملك أَرْتَحَشْتَا لعَزْرا
11 دَاهُو كَلَامْ الْجَوَابْ الْكَتَبَهْ الْمَلِكْ أَرْتَحَشْتَا لِعَزْرَا رَاجِلْ الدِّينْ الْكَاتِبْ وَ عَالِمْ فِي وَصَايَا اللّٰهْ وَ الشُّرُوطْ الْأَنْطَاهُمْ لِبَنِي إِسْرَائِيلْ:
12 دَاهُو أَمُرْ مِنِّي أَنَا أَرْتَحَشْتَا مَلِكْ الْمُلُوكْ لِعَزْرَا رَاجِلْ الدِّينْ وَ كَاتِبْ هَنَا تَوْرَاةْ رَبّ السَّمَاوَاتْ.13 أَنَا أَنْطَيْت إِذِنْ لِبَنِي إِسْرَائِيلْ وَ لِرُجَالْ الدِّينْ وَ اللَّاوِيِّينْ الْقَاعِدِينْ هِنِي فِي مَمْلَكَتِي وَ قُلْت أَيِّ وَاحِدْ الْعِنْدَهْ نِيَّةْ لِيِقَبِّلْ فِي مَدِينَةْ الْقُدُسْ، خَلِّي يِقَبِّلْ مَعَاكْ. 14 أَنَا الْمَلِكْ وَ مُسْتَشَارِينِي السَّبْعَةْ نِرَسُّلُوكْ فِي بَلَدْ يَهُوذَا وَ فِي مَدِينَةْ الْقُدُسْ أَشَانْ تِشِيفْ النَّاسْ، كَنْ قَاعِدِينْ يَخْدُمُوا حَسَبْ تَوْرَاةْ إِلٰـهَكْ الْفِي إِيدَيْنَكْ وَلَّا لَا. 15 وَ نِرَسُّلُوكْ أَشَانْ تِوَدِّي مَعَاكْ الْفُضَّةْ وَ الدَّهَبْ الْأَنَا الْمَلِكْ وَ مُسْتَشَارِينِي أَنْطَيْنَاهُمْ بِنِيِّتْنَا لِلّٰهْ إِلٰـهْ بَنِي إِسْرَائِيلْ السَّاكِنْ فِي مَدِينَةْ الْقُدُسْ.16 وَ بَتَّانْ تِوَدِّي مَعَاكْ الْفُضَّةْ وَ الدَّهَبْ التَّلْقَاهْ مِنْ كُلَّ بَلَدْ بَابِلْ وَ الْهَدَايَا الْأَنْطَوْهُمْ الشَّعَبْ وَ رُجَالْ الدِّينْ بِنِيِّتْهُمْ لِخِدْمَةْ بَيْت إِلٰـهُّمْ فِي مَدِينَةْ الْقُدُسْ. 17 أَبْقَى نَادُمْ أَمِينْ أَشَانْ بِالْمَالْ دَا، تَشْرِي تِيرَانْ وَ كُبْشَانْ وَ حُمْلَانْ وَ هَدِيَّةْ دَقِيقْ وَ هَدِيَّةْ شَرَابْ أَشَانْ تِقَدِّمْهُمْ فِي الْمَدْبَحْ هَنَا بَيْت إِلٰـهْكُو فِي مَدِينَةْ الْقُدُسْ. 18 وَ كَنْ لِلدَّهَبْ وَ الْفُضَّةْ الْيِفَضُّلُوا كَمَانْ، إِنْتَ وَ أَخْوَانَكْ سَوُّوا بَيْهُمْ الشَّيّءْ التِّشِيفُوهْ عَدِيلْ حَسَبْ الْيِدَوْرَهْ إِلٰـهْكُو.19 وَ كَنْ لِلْمُعِدَّاتْ الْأَنْطَوْك أَشَانْ تَخْدِمْ بَيْهُمْ خِدْمَةْ بَيْت إِلٰـهَكْ، دَوْل كَمَانْ خُطُّهُمْ فِي بَيْتَهْ فِي مَدِينَةْ الْقُدُسْ. 20 وَ كَنْ تِدَوْر أَيِّ شَيّءْ آخَرْ لِبَيْت إِلٰـهَكْ كُلَ، شِيلَهْ مِنْ مَخَازْنِي أَنَا الْمَلِكْ.21 وَ إِنْتُو كُلُّكُو أَمِينِينْ الْمَخَازِنْ هَنَا الْمَلِكْ الْفِي الْمَنْطَقَةْ الْغَرِبْ لِبَحَرْ الْفُرَاتْ، أَنَا الْمَلِكْ أَرْتَحَشْتَا أَنْطَيْتكُو إِذِنْ أَشَانْ تَنْطُوا عَجَلَةْ لِعَزْرَا رَاجِلْ الدِّينْ وَ كَاتِبْ هَنَا تَوْرَاةْ رَبّ السَّمَاوَاتْ كُلَّ شَيّءْ الْهُو يَسْأَلْكُو. 22 وَ تَنْطُوهْ لَحَدِّي 3 000 كِيلَوْ هَنَا فُضَّةْ وَ 300 شُوَالْ هَنَا قَمَحْ وَ 20 بِرْمِيلْ هَنَا خَمَرْ وَ 20 بِرْمِيلْ هَنَا دِهِنْ وَ مِلِحْ كَمَانْ بَلَا عَدَدْ. 23 وَ كُلَّ شَيّءْ الْأَمَرَاكُو رَبّ السَّمَاوَاتْ لِتِسَوُّوهْ لِبَيْتَهْ، سَوُّوهْ عَدِيلْ أَشَانْ اللّٰهْ مَا يَغْضَبْ لِمَمْلَكَتِي وَ لِذُرِّيّتِي. 24 وَ زِيَادَةْ مِنْ دَا، نِخَبُّرُوكُو كَدَرْ مَا وَاجِبْ تِشِيلُوا مِيرِي أَوْ زَكَاةْ أَوْ أَيِّ شَيّءْ الْوَاجِبْ يِكَفُّوهْ لِلْمَلِكْ مِنْ رُجَالْ الدِّينْ وَ اللَّاوِيِّينْ وَ الْغَنَّايِينْ وَ الْحُرَّاسْ هَنَا بِيبَانْ بَيْت اللّٰهْ وَ الْخَدَّامِينْ هَنَا بَيْت اللّٰهْ وَ الْعَبِيدْ الْآخَرِينْ هَنَا بَيْت اللّٰهْ.25 وَ إِنْتَ، يَا عَزْرَا، عَلَيْ حَسَبْ الْحِكْمَةْ الرَّبَّكْ أَنْطَاكْ، خُطّ قُضْيَاءْ وَ حُكَّامْ فِي الْمَنْطَقَةْ الْغَرِبْ لِبَحَرْ الْفُرَاتْ. وَ هُمَّنْ يَحْكُمُوا بِالْعَدِلْ فِي كُلَّ الشَّعَبْ الْيَعَرْفُوا تَوْرَاةْ إِلٰـهْكُو. وَ لِلنَّاسْ الْمَا يَعَرْفُوهَا كَمَانْ، عَلِّمْهُمْ. 26 وَ أَيِّ نَادُمْ الْمَا يِطَبِّقْ تَوْرَاةْ إِلٰـهَكْ وَ قَوَانِينْ الْمَلِكْ سَوَا سَوَا، خَلِّي يَحْكُمُوا لَيَّهْ بِالْمَوْت أَوْ يَطُرْدُوهْ مِنْ أُسْط الشَّعَبْ أَوْ يَحْكُمُوهْ أَوْ يَسْجُنُوهْ.عَزْرا يبارِك الربّ
27 وَ أَنَا عَزْرَا قُلْت: بَارَكْ اللّٰهْ رَبّ جُدُودْنَا الدَّسَّ نِيَّةْ فِي قَلِبْ الْمَلِكْ أَشَانْ يِعَظِّمْ بَيْت اللّٰهْ الْفِي مَدِينَةْ الْقُدُسْ!
28 وَ لَيِّ أَنَا عَزْرَا، اللّٰهْ أَنْطَانِي رَحْمَةْ قِدَّامْ الْمَلِكْ وَ مُسْتَشَارِينَهْ وَ كُلَّ كُبَارَاتَهْ الْفُرَّاسْ. وَ اللّٰهْ إِلٰـهِي أَنْطَانِي قُدْرَةْ قِدِرْت لَمَّيْت وَاحِدِينْ مِنْ كُبَارَاتْ بَنِي إِسْرَائِيلْ أَشَانْ يِقَبُّلُوا مَعَايِ فِي مَدِينَةْ الْقُدُسْ.
© La Bible en arabe tchadien © Alliance biblique du Tchad, 2019
