النادم الما يفْرح بخَيْره
1 فِيَّهْ فَسَالَةْ أَنَا شِفْتَهَا فِي الْأَرْض،
التِّتَعِّبْ بَنِي آدَم.
2 الْفَسَالَةْ دِي، هِي رَاجِلْ الرَّبّ أَنْطَاهْ
مَالْ وَ غُنَى وَ شَرَفْ
وَ شَيّءْ قَصَّرْ لَيَّهْ مَا فِيهْ
مِنْ الْيِتْمَنَّاهْ.
لَاكِنْ الرَّبّ مَا خَلَّاهْ
يِتْمَتَّعْ بِمَالَهْ دَا،
إِلَّا الْأَجْنَبِي بَسْ يِتْمَتَّعْ بَيَّهْ.
وَ دَا كُلَ زَايِلْ سَاكِتْ
وَ دِي فَسَالَةْ التَّجْرَحْ الْقَلِبْ.
3 أَكُونْ نَادُمْ وِلِدْ مِيَةْ عِيَالْ
وَ عَاشْ عُمُرْ طَوِيلْ
وَ سِنِينَهْ بِقَوْا كَتِيرِينْ
لَاكِنْ مَا فِرِحْ بِخَيْرَهْ
لَحَدِّي مَا لِقِي دَفِنْ عَدِيلْ.
خَلَاصْ، أَنَا نُقُولْ كَدَرْ النَّادُمْ دَا،
صَغِيرْ الرُّمَايَةْ كُلَ أَخَيْر مِنَّهْ!
4 أَشَانْ الرُّمَايَةْ تَجِي
فِي وَكِتْ الْمَا وَكِتْهَا.
هِي زَايْلَةْ سَاكِتْ وَ تَمْشِي فِي الضَّلَامْ
وَ مَا فِي الْيِذَّكَّرْهَا.
5 الرُّمَايَةْ مَا شَافَتْ
وَ لَا عِرْفَتْ شَيّءْ فِي الْأَرْض.
وَ لَاكِنْ هِي عِنْدَهَا رَاحَةْ زِيَادَةْ
مِنْ النَّادُمْ دَا!
6 وَ كَنْ النَّادُمْ دَا يِعِيشْ أَلِفْ سَنَةْ
وَ بَتَّانْ أَلِفْ سَنَةْ آخَرِينْ كُلَ
وَ مَا شَافْ الْخَيْر،
خَلَاصْ هُو وَ الرُّمَايَةْ دِي،
بَكَانْهُمْ يَبْقَى وَاحِدْ.
نفْس الإنْسان ما تشْبع
7 أَيِّ خِدْمَةْ الْيِسَوِّيهَا الْإِنْسَانْ،
دَا لِعِيشْتَهْ بَسْ
وَ لَاكِنْ بَيْدَا كُلَ،
هُو مَا يَشْبَعْ.
8 الْفَايْدَةْ الْيَلْقَاهَا الْحَكِيمْ مَا زِيَادَةْ
مِنْ الْفَايْدَةْ الْيَلْقَاهَا الْمَطْمُوسْ.
وَ الْفَقْرِي كُلَ مَا يَلْقَى فَايْدَةْ
حَتَّى كَانْ يِعَدِّلْ حَالَهْ قِدَّامْ النَّاسْ.
9 أَخَيْر تَفْرَحْ بِالْعِنْدَكْ
مِنْ تِفَكِّرْ فِي شَيّءْ الْمَا يِلْحَقَّقْ.
وَ دَا كُلَ زَايِلْ سَاكِتْ
مِثِلْ الْجَرِي وَرَاءْ الرِّيحْ.
10 كُلَّ شَيّءْ الْقَاعِدْ فِي الْأَرْض
مَعْرُوفْ مِنْ زَمَانْ
وَ نَعَرْفُوا شُنُو الْإِنْسَانْ.
هُو مَا يَقْدَرْ يِهَارِجْ
مَعَ الْقَادِرْ مِنَّهْ.
11 الْكَلَامْ كَنْ كَتِيرْ كُلَ،
زَايِلْ سَاكِتْ.
وَ الْإِنْسَانْ، شُنُو الْفَايْدَةْ
الْيَلْقَاهَا مِنَّهْ؟
12 خَلَاصْ، يَاتُو الْيَعَرِفْ الشَّيّءْ الْعَدِيلْ
لِلْإِنْسَانْ فِي مُدَّةْ حَيَاتَهْ؟
أَيْوَى، شُنُو عَدِيلْ فِي مُدَّةْ أَيَّامْ حَيَاتَهْ
الزَّايْلَةْ سَاكِتْ مِثِلْ الضُّلّ؟
وَ يَاتُو يِخَبِّرْ الْإِنْسَانْ
بِالْيُكُونْ بَعَدَهْ فِي الْأَرْض؟
© La Bible en arabe tchadien © Alliance biblique du Tchad, 2019
