فحاليّة يُونَتَان
1 وَ يَوْم وَاحِدْ، يُونَتَانْ وِلَيْد شَاوُولْ قَالْ لِلصَّبِي الشَّايِلْ لَيَّهْ سِلَاحَهْ: «تَعَالْ، نَمْشُوا لِلْمُعَسْكَرْ هَنَا الْفِلِسْطِيِّينْ الْقَاعِدْ فِي النُّصّ الْهِنَاكْ.» وَ لَاكِنْ يُونَتَانْ مَا خَبَّرْ أَبُوهْ. 2 وَ شَاوُولْ قَاعِدْ فِي طَرَفْ حِلَّةْ قِبَيْعَةْ فِي قَعَرْ شَدَرَةْ الرُّمَّانْ فِي تُرَابْ مِقْرُونْ وَ مَعَايَهْ حَوَالَيْ 600 رَاجِلْ.
3 وَ فِيَّهْ رَاجِلْ وَاحِدْ أُسْمَهْ أَخِيَّا وِلَيْد أَخِطُوبْ أَخُو إِكَبُودْ وِلَيْد فِينْحَاسْ وِلَيْد عَالِي الْهُو رَاجِلْ الدِّينْ هَنَا اللّٰهْ فِي حِلَّةْ شِيلَوْه. وَ أَخِيَّا دَا، هُو بَسْ كَبِيرْ رُجَالْ الدِّينْ وَ لَابِسْ الْفَرْمَلَةْ. وَ كُلَّ الْعَسْكَرْ مَا عِرْفَوْا كَدَرْ يُونَتَانْ مَا فِيهْ.
4 وَ الدَّرِبْ الْيُونَتَانْ يِدَوْر يَمْشِي بَيَّهْ وَ يَهْجِمْ مُعَسْكَرْ الْفِلِسْطِيِّينْ عِنْدَهْ حُجَارْ إِتْنَيْن. الْوَاحِدْ بِهِنِي أُسْمَهْ بُصِيصْ وَ الْآخَرْ بِهِنَاكْ أُسْمَهْ سَنَّةْ. 5 وَ الْحَجَرْ الْوَاحِدْ قَاعِدْ بِمُنْشَاقْ مُقَابِلْ مِكْمَاشْ وَ الْحَجَرْ الْآخَرْ كَمَانْ قَاعِدْ وَطِي مُقَابِلْ قَبَعْ. 6 وَ يُونَتَانْ قَالْ لِلصَّبِي الشَّايِلْ لَيَّهْ سِلَاحَهْ: «تَعَالْ! نَمْشُوا لِلْمُعَسْكَرْ هَنَا النَّاسْ الْمَا مُطَهَّرِينْ دَوْل. أَكُونْ اللّٰهْ يِسَاعِدْنَا وَ نِنَّصُرُوا فَوْقهُمْ أَشَانْ اللّٰهْ قَادِرْ، يَنْطِي النَّصُرْ لِنَاسْ كَتِيرِينْ أَوْ لِنَاسْ شِيَّةْ كُلَ.» 7 وَ خَدَّامَهْ قَالْ لَيَّهْ: «سَوِّي كُلَّ شَيّءْ التِّدَوْرَهْ! أَمْشِي وَ أَنَا وَرَاكْ!» 8 وَ يُونَتَانْ قَالْ: «يَلَّا! خَلِّي نَمْشُوا لَيْهُمْ لَحَدِّي يِشِيفُونَا. 9 وَ كَنْ يُقُولُوا لَيْنَا: ‹أَقِيفُوا فِي بَكَانْكُو لَحَدِّي نَجُوكُو›، خَلَاصْ نَقِيفُوا وَ مَا نَطْلَعَوْا لَيْهُمْ. 10 وَ لَاكِنْ كَنْ يُقُولُوا لَيْنَا: ‹أَطْلَعَوْا›، نَطْلَعَوْا لَيْهُمْ. أَشَانْ دِي بَسْ عَلَامَةْ النَّصُرْ وَ اللّٰهْ يَنْصُرْنَا فَوْقهُمْ.»
11 وَ خَلَاصْ، الْفِلِسْطِيِّينْ شَافَوْهُمْ تِنَيْنِتْهُمْ وَ قَالَوْا: «شِيفُوا! الْعِبْرَانِيِّينْ مَارْقِينْ مِنْ النُّقَارْ الْهُمَّنْ أَلَّبَّدَوْا فَوْقهُمْ!» 12 وَ الْحُرَّاسْ قَالَوْا لِيُونَتَانْ وَ خَدَّامَهْ: «أَطْلَعَوْا لَيْنَا جَايْ! نِأَوْرُوكُو كَلَامْ وَاحِدْ!» وَ يُونَتَانْ قَالْ لِخَدَّامَهْ: «أَطْلَعْ وَرَايِ أَشَانْ الْيَوْم اللّٰهْ دَسَّاهُمْ فِي إِيدَيْن بَنِي إِسْرَائِيلْ!» 13 وَ يُونَتَانْ طَلَعْ فِي الْحَجَرْ وَ خَدَّامَهْ طَلَعْ وَرَايَهْ. وَ هُو كَتَلْ الْفِلِسْطِيِّينْ. وَ خَلَاصْ، الْفِلِسْطِيِّينْ أَنْهَزَمَوْا قِدَّامْ يُونَتَانْ. وَ خَدَّامَهْ كُلَ قَاعِدْ يَكْتُلْهُمْ وَرَايَهْ. 14 وَ فِي الدُّوَاسْ الْأَوَّلْ دَا، يُونَتَانْ وَ خَدَّامَهْ كَتَلَوْا حَوَالَيْ 20 رَاجِلْ فِي مَسَافَةْ قَرِيبَةْ بَسْ.
15 وَ خَلَاصْ، خَوْف شَدِيدْ وَقَعْ فِي كُلَّ دَيْش الْفِلِسْطِيِّينْ وَ فِي كُلَّ سُكَّانْ الْمَنْطَقَةْ وَ الْقَاعِدِينْ فِي الْمُعَسْكَرْ. وَ الْحُرَّاسْ وَ الْمُخَرِّبِينْ كُلُّهُمْ بَرْجَلَوْا. وَ الْأَرْض كُلَ رَجَفَتْ أَشَانْ الرَّبّ بَسْ نَزَّلْ فَوْقهُمْ الْبَرْجَالْ دَا.
16 وَ حُرَّاسْ شَاوُولْ الْقَاعِدِينْ فِي قِبَيْعَةْ أَرْض بَنْيَامِينْ قَاعِدِينْ بِشِيفُوا الْفِلِسْطِيِّينْ بَرْجَلَوْا وَ جَارِيِينْ فِي أَيِّ بَكَانْ. 17 وَ شَاوُولْ قَالْ لِلرُّجَالْ الْمَعَايَهْ: «عَجَلَةْ أَحْسُبُوا النَّاسْ الْقَاعِدِينْ وَ شِيفُوا يَاتُو الْمَا فِيهْ!» وَ هُمَّنْ حَسَبَوْا النَّاسْ وَ لِقَوْا يُونَتَانْ وَ خَدَّامَهْ مَا فِيهُمْ.
18 وَ شَاوُولْ قَالْ لِأَخِيَّا: «جِيبْ صَنْدُوقْ اللّٰهْ!» أَشَانْ فِي الْوَكِتْ دَاكْ، صَنْدُوقْ الرَّبّ قَاعِدْ فِي بَكَانْ بَنِي إِسْرَائِيلْ. 19 وَ وَكِتْ شَاوُولْ قَاعِدْ يِكَلِّمْ مَعَ أَخِيَّا رَاجِلْ الدِّينْ، الْكُرَوْرَاكْ قَاعِدْ يِزِيدْ فِي مُعَسْكَرْ الْفِلِسْطِيِّينْ وَ طَوَّالِي شَاوُولْ قَالْ لِرَاجِلْ الدِّينْ: «أَقِيفْ! خَلَاصْ خَلِّيهْ!»
20 وَ شَاوُولْ لَمَّ كُلَّ الرُّجَالْ الْمَعَايَهْ وَ دَخَلَوْا فِي الْحَرِبْ. وَ هُمَّنْ لِقَوْا الْفِلِسْطِيِّينْ قَاعِدِينْ يِلْكَاتَلَوْا أَمْبَيْنَاتْهُمْ. وَ الْبَرْجَلَةْ دِي بِقَتْ شَدِيدَةْ. 21 وَ فِي عِبْرَانِيِّينْ وَاحِدِينْ طَوَّلَوْا مَعَ الْفِلِسْطِيِّينْ وَ قَاعِدِينْ يِحَارُبُوا مَعَاهُمْ. وَ فِي الْيَوْم دَا، هُمَّنْ لَمَّوْا مَعَ أَخْوَانْهُمْ بَنِي إِسْرَائِيلْ التَّابْعِينْ لِشَاوُولْ وَ يُونَتَانْ. 22 وَ وَكِتْ سِمْعَوْا الْفِلِسْطِيِّينْ عَرَّدَوْا، كُلَّ رُجَالْ بَنِي إِسْرَائِيلْ الْمُلَّبِّدِينْ فِي جِبَالْ أَفْرَايِمْ، هُمَّنْ كُلَ دَخَلَوْا فِي الْحَرِبْ لِيِطَارُدُوا الْفِلِسْطِيِّينْ. 23 وَ فِي الْيَوْم دَا، اللّٰهْ نَجَّى بَنِي إِسْرَائِيلْ. وَ الْحَرِبْ لِحِقْ لَحَدِّي غَادِي لِحِلَّةْ بَيْت آوَنْ.
24 وَ رُجَالْ بَنِي إِسْرَائِيلْ تِعِبَوْا فِي الْيَوْم دَا أَشَانْ شَاوُولْ حَلَّفَاهُمْ وَ قَالْ: «مَلْعُونْ النَّادُمْ الْيَاكُلْ قُبَّالْ الْعَشِيَّةْ، قَبُلْ مَا نِنَّصِرْ فِي عَدُويِ!» وَ فِي الْيَوْم دَا، كُلَّ رُجَالْ بَنِي إِسْرَائِيلْ مَا أَكَلَوْا شَيّءْ. 25 وَ كُلَّ الدَّيْش دَخَلْ فِي الْغَابَةْ وَ هِنَاكْ فِيَّهْ عَسَلْ قَاعِدْ يِسِيلْ فِي الْأَرْض. 26 وَ وَكِتْ دَخَلَوْا فِي الْغَابَةْ، شَافَوْا الْعَسَلْ الْقَاعِدْ يِسِيلْ فِي الْأَرْض لَاكِنْ نَادُمْ مَا أَكَلْ مِنَّهْ أَشَانْ خَافَوْا مِنْ الْحَلِيفَةْ.
27 وَ يُونَتَانْ مَا سِمِعْ كَدَرْ أَبُوهْ حَلَّفْ الْعَسْكَرْ وَ قَمَّ مَدَّ عَصَاتَهْ الْفِي إِيدَهْ وَ شَكَّ رَاسْهَا فِي الْعَسَلْ وَ أَكَلَهْ. وَ طَوَّالِي كَيْ، جِلْدَهْ بِقِي نَشِيطْ. 28 وَ وَاحِدْ مِنْ الْعَسْكَرْ قَالْ لَيَّهْ: «أَبُوكْ حَلَّفْ الْعَسْكَرْ وَ قَالْ: ‹مَلْعُونْ النَّادُمْ الْيَاكُلْ فِي الْيَوْم دَا.› وَ أَشَانْ دَا بَسْ، كُلَّ الدَّيْش بِقِي عَيَّانْ.» 29 وَ يُونَتَانْ قَالْ: «أَبُويِ سَبَّبْ بَرْجَالْ لِكُلَّ الْعَسْكَرْ. شِيفُونِي أَنَا، كِكَّيْف بِقِيتْ نَشِيطْ وَكِتْ دُقْت الْعَسَلْ دَا. 30 وَ كَنْ الْيَوْم الْعَسْكَرْ أَكَلَوْا مِنْ الْغَنِيمَةْ الشَّالَوْهَا مِنْ عَدُوهُمْ دِي، أَكِيدْ هَزِيمَةْ الْفِلِسْطِيِّينْ تَبْقَى أَكْبَرْ مِنْ دَا.»
31 وَ فِي الْيَوْم دَا، بَنِي إِسْرَائِيلْ أَنَّصَرَوْا فِي الْفِلِسْطِيِّينْ وَ كَتَلَوْهُمْ مِنْ مِكْمَاشْ لَحَدِّي حِلَّةْ أَيَّلُونْ. وَ عَسْكَرْ بَنِي إِسْرَائِيلْ عِيَوْا مَرَّةْ وَاحِدْ. 32 وَ وَقَعَوْا فِي الْغَنِيمَةْ وَ شَالَوْا الْغَنَمْ وَ الْبَقَرْ وَ الْعَجَّالْ وَ كَتَلَوْهُمْ وَ أَكَلَوْا اللَّحَمْ بِدَمَّهْ فِي نَفْس الْبَكَانْ. 33 وَ نَاسْ وَاحِدِينْ جَوْا خَبَّرَوْا شَاوُولْ كَدَرْ الْعَسْكَرْ أَذْنَبَوْا وَ عِصَوْا اللّٰهْ أَشَانْ أَكَلَوْا اللَّحَمْ بِدَمَّهْ. وَ شَاوُولْ قَالْ: «إِنْتُو خَايْنِينْ. هَسَّعْ دَا، دَرْقُسُوا حَجَرْ كَبِيرْ وَ جِيبُوهْ لَيِّ هِنِي.» 34 وَ شَاوُولْ قَالْ: «أَمْشُوا أَمْبَيْن الْعَسْكَرْ وَ قُولُوا لَيْهُمْ: ‹خَلِّي أَيِّ وَاحِدْ يِجِيبْ لَيِّ غَنَمَايْتَهْ أَوْ تَوْرَهْ وَ يَدْبَحَوْهُمْ هِنِي وَ يَاكُلُوهُمْ. أَشَانْ مَا تَاكُلُوا لَحَمْ بِدَمَّهْ وَ تِسَوُّوا ذَنِبْ وَ تَعَصَوْا اللّٰهْ.›»
وَ خَلَاصْ فِي اللَّيْلَةْ دِي، أَيِّ وَاحِدْ مِنْ الْعَسْكَرْ جَابْ تَوْرَهْ وَ دَبَحَهْ فِي الْبَكَانْ دَا. 35 وَ شَاوُولْ بَنَى مَدْبَحْ لِلّٰهْ وَ دَا أَوَّلْ مَدْبَحْ الْهُو بَنَى لِلّٰهْ. 36 وَ شَاوُولْ قَالْ: «خَلِّي اللَّيْلَةْ دِي نَمْشُوا وَرَاءْ الْفِلِسْطِيِّينْ وَ نَقْلَعَوْا خُمَامْهُمْ لَحَدِّي الْفَجُرْ. وَ مَا نِخَلُّوا وَاحِدْ كُلَ مِنْهُمْ يِفَضِّلْ.» وَ الْعَسْكَرْ رَدَّوْا لَيَّهْ وَ قَالَوْا: «سَوِّي كُلَّ شَيّءْ التِّدَوْرَهْ.»
وَ لَاكِنْ رَاجِلْ الدِّينْ قَالْ: «خَلِّي هِنِي بَسْ نَسْأَلَوْا الرَّبّ.» 37 وَ شَاوُولْ سَأَلْ الرَّبّ وَ قَالْ: «نَمْشِي وَرَاءْ الْفِلِسْطِيِّينْ وَلَّا؟ تِسَلِّمْهُمْ فِي إِيدَيْن بَنِي إِسْرَائِيلْ وَلَّا؟» وَ لَاكِنْ الرَّبّ مَا رَدَّ لَيَّهْ فِي الْيَوْم دَا. 38 وَ شَاوُولْ قَالْ لِكُلَّ كُبَارَاتْ الدَّيْش: «لِمُّوا وَ تَعَالُوا. خَلِّي الْيَوْم نِشِيفُوا وَ نَعَرْفُوا شُنُو السَّبَبْ هَنَا الذَّنِبْ دَا. 39 وَ نَحْلِفْ بِاللّٰهْ الْحَيّ النَّجَّى بَنِي إِسْرَائِيلْ، النَّادُمْ السَّوَّى الْخَطَا دَا كَنْ وِلَيْدِي يُونَتَانْ كُلَ، الْيَوْم يُمُوتْ.» وَ نَادُمْ مِنْ الدَّيْش رَدَّ لَيَّهْ مَا فِيهْ.
40 وَ هُو قَالْ لِكُلَّ بَنِي إِسْرَائِيلْ: «أَقِيفُوا إِنْتُو بِهِنَاكْ وَ أَنَا وَ وِلَيْدِي يُونَتَانْ نَقِيفُوا بِهِنِي.» وَ الْعَسْكَرْ قَالَوْا لِشَاوُولْ: «سَوِّي كُلَّ شَيّءْ التِّدَوْرَهْ.»
41 وَ شَاوُولْ قَالْ لِلّٰهْ إِلٰـهْ بَنِي إِسْرَائِيلْ: «وَصِّفْنَا الْحَقّ!» وَ سَوَّوْا أَمْ عِيَيْدَاتْ. وَ خَلَاصْ، وَقَعَتْ فِي رَاسْ يُونَتَانْ وَ شَاوُولْ وَ الْعَسْكَرْ بِقَوْا بَرِيِّينْ. 42 وَ شَاوُولْ قَالْ: «سَوُّوا أَمْ عِيَيْدَاتْ بَيْنِي وَ بَيْن وِلَيْدِي يُونَتَانْ!» وَ خَلَاصْ، وَقَعَتْ فِي يُونَتَانْ.
43 وَ شَاوُولْ قَالْ لِيُونَتَانْ: «أَوْرِينِي الشَّيّءْ الْإِنْتَ سَوَّيْتَهْ.» وَ يُونَتَانْ حَجَّى لَيَّهْ وَ قَالْ: «أَنَا دُقْت الْعَسَلْ بِرَاسْ الْعَصَاةْ الْفِي إِيدِي. وَ دَاهُونِي لِلْمَوْت.» 44 وَ شَاوُولْ قَالْ: «خَلِّي الرَّبّ يِعَاقِبْنِي عِقَابْ شَدِيدْ كَنْ إِنْتَ مَا مُتّْ، يَا يُونَتَانْ!»
45 وَ الْعَسْكَرْ قَالَوْا لِشَاوُولْ: «يُونَتَانْ الْجَابْ النَّصُرْ الْكَبِيرْ لِإِسْرَائِيلْ دَا، يُمُوتْ؟ دَا مَا صَحِيحْ! نَحَلْفُوا بِاللّٰهْ الْحَيّ، صُوفَايْ وَاحِدَةْ كُلَ مِنْ رَاسَهْ مَا تَقَعْ فِي الْأَرْض! أَشَانْ فِي الْيَوْم دَا، هُو نَجَّى بَنِي إِسْرَائِيلْ بِقُدْرَةْ اللّٰهْ. لَا! يُونَتَانْ مَا يُمُوتْ.»
وَ بَيْدَا، الْعَسْكَرْ نَجَّوْا يُونَتَانْ مِنْ الْمَوْت. 46 وَ بَعَدْ شَاوُولْ خَلَّى مُطَارَدَتْهُمْ، الْفِلِسْطِيِّينْ قَبَّلَوْا فِي بَلَدْهُمْ.
شَاوُول أنّصر في عُدْوان آخرين
47 وَ وَكِتْ شَاوُولْ شَالْ الْمُلُكْ فِي إِسْرَائِيلْ، هُو حَارَبْ كُلَّ عُدْوَانَهْ الْمُجَاوِرِينَهْ مِثِلْ نَاسْ مُوَابْ وَ بَنِي عَمُّونْ وَ نَاسْ أَدَوْم وَ مُلُكْ صُوبَةْ وَ الْفِلِسْطِيِّينْ. وَ فِي أَيِّ بَكَانْ يِوَجِّهْ، هُو يِنَّصِرْ. 48 وَ هُو وَصَّفْ فَرَاسِيّتَهْ وَكِتْ هَزَمْ الْعَمَالِقْ وَ نَجَّى بَنِي إِسْرَائِيلْ مِنْ النَّاسْ الْيَنْهَبَوْهُمْ.
49 وَ أَوْلَادْ شَاوُولْ هُمَّنْ يُونَتَانْ وَ يِشْوِي وَ مَلْكِشُوعْ. وَ بَنَاتَهْ كَمَانْ إِتْنَيْن الْكَبِيرَةْ أُسُمْهَا مِيرَبْ وَ الصَّغَيْرَةْ أُسُمْهَا مِكَالْ. 50 وَ مَرِةْ شَاوُولْ أُسُمْهَا أَخِنُوعَمُ بِنَيَّةْ أَخِمَاعَصْ. وَ قَايِدْ عَسْكَرَهْ أُسْمَهْ أَبْنِيرْ وِلَيْد نِيرْ. وَ نِيرْ دَا، هُو عِمَّهْ لِشَاوُولْ. 51 نِيرْ أَبُو أَبْنِيرْ وَ قِيشْ أَبُو شَاوُولْ، هُمَّنْ كُلُّهُمْ عِيَالْ أَبِيِيلْ. 52 فِي وَكِتْ شَاوُولْ، الْحَرِبْ ضِدّ الْفِلِسْطِيِّينْ بِقِي شَدِيدْ بِلْحَيْن. وَ شَاوُولْ قَاعِدْ يِجَنِّدْ كُلَّ الرُّجَالْ الْفَحَلِينْ وَ الْقَادْرِينْ.
© La Bible en arabe tchadien © Alliance biblique du Tchad, 2019
