الفساد في الزمن الأخير
1 وَاجِبْ تَعَرِفْ كَدَرْ الزَّمَنْ الْأَخِيرْ يَبْقَى زَمَنْ قَاسِي بِلْحَيْن. 2 وَ فِي الزَّمَنْ دَا، النَّاسْ يِحِبُّوا نُفُوسْهُمْ بِزِيَادَةْ وَ يِحِبُّوا الْقُرُسْ بِلْحَيْن. وَ يَبْقَوْا فَشَّارِينْ وَ مُسْتَكْبِرِينْ وَ يِكَلُّمُوا كَلَامْ كُفُرْ وَ يَبْقَوْا عَايْقِينْ وَالْدَيْنهُمْ وَ نَسَّايِينْ الْخَيْر وَ فَاسْدِينْ. 3 وَ مَا عِنْدُهُمْ مَحَنَّةْ وَ يَابَوْا مَا يِسَامُحُوا. وَ يَبْقَوْا قَطَّاعِينْ وَ مَا قَادْرِينْ يِثَبُّتُوا نُفُوسْهُمْ وَ يَبْقَوْا كَشْرَانِينْ وَ يَكْرَهَوْا الْخَيْر. 4 وَ يَبْقَوْا خَايْنِينْ وَ مُتَعَمِّدِينْ وَ فَشَّارِينْ. وَ يِحِبُّوا حَلَاتْ الدُّنْيَا زِيَادَةْ مِنْ اللّٰهْ. 5 وَ يِنْكَرْبُوا فِي الشُّغُلْ الْيِوَصِّفْ التَّقْوَى لَاكِنْ فِي قُلُوبْهُمْ يَابَوْا مَا يِتَابُعُوا التَّقْوَى.
أَنْقَرِعْ مِنْ النَّاسْ الْمِثِلْ دَوْل. 6 وَاحِدِينْ مِنْهُمْ يِنْدَسَّوْا فِي بُيُوتْ النَّاسْ بِنَجَاضَةْ. وَ يَكُرْبُوا بِغَشّ عَوِينْ الْفِكِرْهِنْ مَا ثَابِتْ الْمَلَانَاتْ بِذُنُوبْ وَ قَاعِدَاتْ يِتَابِعَنْ كُلَّ نَفَرْ هَنَا شَهْوَاتْ. 7 الْعَوِينْ الْمِثِلْ دَيْل يَسْمَعَنْ تَعْلِيمْ كَتِيرْ وَ أَبَداً مَا يَقْدَرَنْ يَفْهَمَنْ الْحَقّ. 8 وَ الْغَشَّاشِينْ دَوْل قَاعِدِينْ يِخَالُفُوا الْحَقّ مِثِلْ يَنِيسْ وَ يَمْبَارِسْ الْخَالَفَوْا مُوسَى. فِكِرْهُمْ تَلْفَانْ وَ إِيمَانْهُمْ بَاطِلْ. 9 لَاكِنْ مَا يَنْجَحَوْا أَشَانْ بَعَدْ شِيَّةْ، يَبْقَى وَاضِحْ لِكُلَّ النَّاسْ كَدَرْ كَلَامْهُمْ بَاطِلْ. وَ يَبْقَى لَيْهُمْ مِثِلْ الشَّيّءْ الْبِقِي لِيَنِيسْ وَ يَمْبَارِسْ.
أقْعُد ثابِت
10 لَاكِنْ إِنْتَ رَافَقْتِنِي وَ تَعَرِفْنِي. شِفْتِنِي وَكِتْ أَنَا قَاعِدْ نِعَلِّمْ النَّاسْ وَ تَعَرِفْ حَالِي وَ نِيّتِي فِي كُلِّ شَيّءْ. تَعَرِفْ إِيمَانِي وَ صَبْرِي وَ مَحَبِّتِي وَ قَلْبِي الثَّابِتْ. 11 إِنْتَ شِفْتِنِي وَكِتْ النَّاسْ قَاعِدِينْ يِتَعُّبُونِي وَ وَكِتْ تَعَبْ شَدِيدْ جَاءْ فَوْقِي. وَ شِفْتِنِي فِي كُلِّ شَيّءْ الْقَاسِي الْبِقِي فَوْقِي فِي حِلَّالْ أَنْطَاكِيَةْ وَ إِقُونِيَةْ وَ لِسْتَرَةْ. حِمِلْت فَوْقهُمْ تَعَبْ شَدِيدْ مَرَّةْ وَاحِدْ. لَاكِنْ رَبِّنَا فَزَعْنِي وَ نَجَّانِي مِنْ التَّعَبْ دَا كُلَّ كَيْ. 12 وَ أَكِيدْ أَيِّ نَادُمْ الْيِدَوْر يِنْكَرِبْ فِي التَّقْوَى فِي دَرِبْ الْمَسِيحْ عِيسَى، يِتَعُّبُوهْ. 13 وَ لَاكِنْ النَّاسْ الْفَسْلِينْ وَ الْكَدَّابِينْ، فَسَالِتْهُمْ تِزِيدْ بِزِيَادَةْ وَ يَبْقَوْا غَشَّاشِينْ وَ مَغْشُوشِينْ.
14 لَاكِنْ إِنْتَ، أَقْعُدْ ثَابِتْ فِي كُلِّ شَيّءْ الْعَلَّمْتَهْ وَ آمَنْت بَيَّهْ بِإِيمَانْ قَوِي. تَعَرِفْ كَدَرْ النَّاسْ الْعَلَّمَوْك لَيَّهْ أَمِينِينْ. 15 مِنْ إِنْتَ صَغَيَّرْ، عِرِفْت كِتَابْ اللّٰهْ الْأَنْطَاكْ الْعِلِمْ الْيِوَدِّيكْ لِلنَّجَاةْ بِالْإِيمَانْ بِالْمَسِيحْ عِيسَى. 16 الْكِتَابْ كُلَّ كَيْ هُو كَلَامْ اللّٰهْ النَّزَّلَهْ وَ عِنْدَهْ فَايْدَةْ أَشَانْ يِعَلِّمْ الْحَقّ وَ يِوَصِّفْ النَّاسْ خَطَاهُمْ وَ يِقَبِّلْهُمْ فِي الدَّرِبْ الْعَدِيلْ وَ يِدَرِّبْهُمْ فِي الْحَالْ الصَّالْحَةْ. 17 وَ بَيَّهْ خَدَّامْ اللّٰهْ يَبْقَى قَادِرْ وَ جَاهِزْ أَشَانْ يِسَوِّي أَيِّ عَمَلْ هَنَا خَيْر.
© La Bible en arabe tchadien © Alliance biblique du Tchad, 2019
