مَصِر ملْجأ الما مضْمون
1 دَاهُو كَلَامْ اللّٰهْ.
«الْعَذَابْ لِلْعِيَالْ الْحَرَامِيِّينْ!
هُمَّنْ سَوَّوْا شَوْرَةْ
الْمَا جَايَةْ مِنِّي.
وَ سَوَّوْا عَلَاقَةْ الْأَنَا مَا أَمَرْت بَيْهَا
وَ بَيْدَا، زَادَوْا ذَنِبْ فِي ذَنِبْ.
2 وَ هُمَّنْ نَزَلَوْا فِي مَصِرْ
بَلَا مَا يَسْأَلَوْنِي.
وَ دَا لِيِفَتُّشُوا حِمَايَةْ مِنْ فِرْعَوْن،
أَيْوَى، لِيَلْقَوْا مَلْجَأْ فِي مَصِرْ.
3 وَ لَاكِنْ حِمَايَةْ فِرْعَوْن
تِجِيبْ لَيْكُو الْعَيْب.
وَ الْمَلْجَأْ فِي مَصِرْ
يِجِيبْ لَيْكُو الْإِهَانَةْ.
4 وَ مَسَائِيلْكُو مَشَوْا حِلَّةْ صُعَانْ
وَ سُفَرَاكُو وَصَّلَوْا لَحَدِّي مَدِينَةْ حَانِيسْ.
5 وَ لَاكِنْ الْعَيْب يَجِي لِكُلَّ النَّاسْ
فِي شَانْ الشَّعَبْ الْمَا يِسَاعِدْهُمْ.
الْمَصْرِيِّينْ مَا جِيبُوا
وَ لَا فَزَعْ وَ لَا مُسَاعَدَةْ
وَ لَاكِنْ يِجِيبُوا لَيْهُمْ
الْعَيْب وَ الْإِهَانَةْ.»
6 مُحَاكَمَةْ بَهَايِمْ بَلَدْ النَّقَبْ.
«الْمُرَسَّلِينْ شَقَّوْا بَلَدْ الضِّيقَةْ وَ التَّعَبْ
فِي أُسْط الدِّيدَانْ دُكُورْ وَ أَنَاتِي
وَ أَمْبَيْن أَمْ شِدَيْقَاتْ وَ الدَّابِي الْيِطِيرْ.
هُمَّنْ يَنْقُلُوا غُنَاهُمْ
فِي ضُهُورْ الْحَمِيرْ
وَ يِشِدُّوا مَالْهُمْ
فِي ضُهُورْ الْجُمَالْ.
وَ يِوَدُّوهُمْ لِشَعَبْ
الْمَا يِسَاعُدُوهُمْ.
7 أَشَانْ فَزَعْ مَصِرْ
مِثِلْ الرِّيحْ الْمَا عِنْدَهَا فَايْدَةْ
وَ فِي شَانْ دَا، أَنَا نَادَيْتهَا
رَهَبْ الْغُولْ الْمَا خَطِيرْ.»
الشعب أبوا وصايا اللّه
8 وَ اللّٰهْ قَالْ لَيِّ:
«هَسَّعْ أَمْشِي
وَ أَكْتِبْ الْكَلَامْ دَا قِدَّامْهُمْ فِي لَوْح
وَ سَجِّلَهْ فِي كِتَابْ.
أَشَانْ يَبْقَى شَاهِدْ دَايِمْ
فِي الْمُسْتَقْبَلْ.
9 أَشَانْ الشَّعَبْ دَوْل عَاصِيِينْ
وَ عِيَالْ غَشَّاشِينْ!
أَيْوَى، مَا يِدَوْرُوا يَسْمَعَوْنِي،
مَا يَسْمَعَوْا شُرُوطْ تَوْرَاةْ اللّٰهْ.
10 هُمَّنْ يُقُولُوا لِلْأَنْبِيَاء:
‹مَا تِتْنَبَّأَوْا!›
وَ يُقُولُوا لِلْيِشِيفُوا رُؤْيَةْ:
‹مَا تِحَجُّوا لَيْنَا بِرُؤْيَةْ صَحِيحَةْ!
كَلُّمُوا لَيْنَا بِكِدِبْ
وَ أَتْنَبَّأَوْا بِغَشّ.
11 بَعُّدُوا مِنْ الدَّرِبْ
وَ أَمْشُوا طَرَفْ مِنْ الطَّرِيقْ!
وَ قُدُّوسْ إِسْرَائِيلْ،
بَعُّدُوهْ مِنِّنَا!›»
12 وَ فِي شَانْ دَا، دَاهُو كَلَامْ قُدُّوسْ إِسْرَائِيلْ:
«إِنْتُو أَبَيْتُوا الْكَلَامْ دَا
وَ أَتْوَكَّلْتُوا عَلَيْ الْمُضَايِقْ وَ الْمُفْسِدْ
وَ أَرَّكَّزْتُوا فَوْقَهْ.
13 وَ خَلَاصْ، الْخَطَا دَا يَبْقَى لَيْكُو
مِثِلْ خُرْمَةْ فِي دُرْدُرْ طَوِيلْ التِّسَوِّيهْ أَعْوَجْ
وَ فِي رَمْشَةْ عَيْن، يَقَعْ!
14 وَ يِلْكَسَّرْ مَرَّةْ وَاحِدْ
مِثِلْ كَسِّرِينْ الْجَرّ الْمَا بِلْعَدَّلْ.
مَا تِفَضِّلْ مِنَّهْ شِقْفَةْ
الْيَقْدَرَوْا يِشِيلُوا فَوْقهَا نَارْ
وَ لَا يِجِيبُوا بَيْهَا أَلْمِي مِنْ الرَّهَدْ.»
الإيمان باللّه ينْطي قُدْرة
15 أَشَانْ دَاهُو اللّٰهْ الرَّبّ قُدُّوسْ إِسْرَائِيلْ قَالْ:
«كَنْ تُبْتُوا وَ أَنْجَمَّيْتُوا،
تَلْقَوْا النَّجَاةْ
وَ كَنْ قَعَدْتُوا بِهُدُوءْ وَ آمَنْتُوا،
تَلْقَوْا الْقُدْرَةْ.
وَ لَاكِنْ إِنْتُو أَبَيْتُوا
16 وَ قُلْتُوا:
‹لَا! أَنِحْنَ نِعَرُّدُوا بِخَيْل.›
خَلَاصْ، عَرُّدُوا!
وَ قُلْتُوا بَتَّانْ:
‹فِي الْجَرَّايِينْ، نَرْكَبَوْا.›
خَلَاصْ، الْيِطَارُدُوكُو كُلَ
يَبْقَوْا جَرَّايِينْ!
17 أَلِفْ نَاسْ يِعَرُّدُوا مِنْ عَدُو وَاحِدْ
وَ مِنْ خَمْسَةْ، كُلُّكُو تِعَرُّدُوا
لَحَدِّي تِنْهَزْمُوا وَ تَبْقَوْا شِيَّةْ
مِثِلْ عَلَامَةْ فِي رَاسْ الْحَجَرْ
وَ مِثِلْ رَايَةْ فِي رَاسْ الْجَبَلْ.»
اللّه يحِنّ في شعبه و يفْزعهم
18 وَ فِي شَانْ دَا، اللّٰهْ يَرْجَى الْوَكِتْ الْمُنَاسِبْ
لِيِحِنّ فَوْقكُو وَ يَرْحَمْكُو
أَشَانْ اللّٰهْ الرَّبّ هُو عَادِلْ.
مَبْرُوكْ لِكُلَّ النَّاسْ
الْيُخُطُّوا عَشَمْهُمْ فَوْقَهْ!
19 أَيْوَى، يَا شَعَبْ صَهْيُون
السَّاكْنِينْ فِي مَدِينَةْ الْقُدُسْ،
إِنْتُو أَبَداً مَا تَبْكُوا بَتَّانْ.
وَ وَكِتْ تَصْرَخَوْا،
هُو يِحِنّ فَوْقكُو!
وَ مِنْ يَسْمَعْكُو،
طَوَّالِي يُرُدّ لَيْكُو.
20 وَ كَنْ هُو يَنْطِيكُو الضِّيقَةْ مِثِلْ أَكِلْ
وَ التَّعَبْ مِثِلْ أَلْمِي كُلَ،
هُو بَسْ سَيِّدْكُو مَا يِطَرِّفْ مِنْكُو
وَ بِعُيُونْكُو تِشِيفُوهْ.
21 وَكِتْ تَمْشُوا عَلَيْ زَيْنَةْ أَوْ إِسْرَةْ،
أُدْنَيْكُو يَسْمَعَوْا حِسّ وَرَاكُو
الْيُقُولْ لَيْكُو:
«دَاهُو الدَّرِبْ الْوَاجِبْ تِشِيلُوهْ!»
22 وَ تَجْعَلَوْا مِثِلْ نِجِسْ
الْفُضَّةْ الْمَسَحْتُوا بَيْهَا أَصْنَامْكُو
وَ الدَّهَبْ الْمَسَحْتُوا بَيَّهْ تَمَاثِيلْكُو الْمَصْبُوبِينْ.
وَ تِدَفُّقُوهُمْ مِثِلْ نَجَاسَةْ وَ تُقُولُوا:
«يَلَّا! بَرَّا مِنْ هِنِي!»
23 وَ هُو يِنَزِّلْ مَطَرَةْ
فِي الْحَبّ الْإِنْتُو تِتَيْرُبُوهْ.
وَ الْمَعَاشْ التَّنْتِجَهْ الْأَرْض
يَبْقَى كَتِيرْ وَ حَلُو.
وَ فِي الْيَوْم دَا،
بَهَايِمْكُو يَسْرَحَوْا فِي مَرْعَى وَسِيعْ.
24 وَ التِّيرَانْ وَ الْحَمِيرْ
الْيَحَرْتُوا الْأَرْض
يَاكُلُوا عَلْفَةْ الْعِنْدَهَا مِلِحْ
الْيِشَتُّتُوهَا بِعَصَاةْ أَوْ بِشِعْبَةْ.
25 وَ فِي يَوْم الْمَوْت الْكَتِيرْ
وَكِتْ الْخَنَادِقْ يَقَعَوْا،
وُدْيَانْ أَلْمِي يَجْرُوا بِكَتَرَةْ
فِي أَيِّ جَبَلْ عَالِي وَ أَيِّ حَجَرْ طَوِيلْ.
26 وَ نُورْ الْقَمَرْ
يَبْقَى مِثِلْ نُورْ الْحَرَّايْ.
وَ نُورْ الْحَرَّايْ
يَبْقَى سَبْعَةْ مَرَّاتْ زِيَادَةْ
مِثِلْ نُورْ هَنَا سَبْعَةْ يَوْم.
وَ دَا الْيَوْم الْفَوْقَهْ
اللّٰهْ يِعَالِجْ جُرُوحْ شَعَبَهْ
وَ يِدَاوِي عَوَاوِيرْ ضَرِبِينْهُمْ.
نار اللّه تاكُل بلد أَشُور
27 دَاهُو اللّٰهْ جَايِ مِنْ بَعِيدْ
وَ غَضَبَهْ يَحْرِقْ
وَ دَا تَقِيلْ مَا بِنْحَمِلْ.
وَ خَشْمَهْ يِحَجِّي بِغَضَبْ
وَ لِسَانَهْ مِثِلْ نَارْ التَّحْرِقْ.
28 وَ نَفْخَتَهْ مِثِلْ سَيْل الشَّدِيدْ
الْيَطْلَعْ لَحَدِّي يَلْحَقْ الرَّقَبَةْ.
وَ هُو يِغَرْبِلْ
الْأُمَمْ غَرْبِلِينْ الدَّمَارْ
وَ يِلَجِّمْ
الشُّعُوبْ لِيِوَدِّرْهُمْ.
29 يَا سُكَّانْ مَدِينَةْ الْقُدُسْ،
إِنْتُو تِغَنُّوا
مِثِلْ فِي لَيْلَةْ خَاصَّةْ لِلْعِيدْ.
وَ الْفَرَحْ يَمْلَا قُلُوبْكُو
مِثِلْ الْيَمْشِي مَعَ حِسّ الصُّفَّارَةْ
عَلَيْ جَبَلْ اللّٰهْ،
عَلَيَّهْ هُو، حَجَرْ بَنِي إِسْرَائِيلْ.
30 وَ اللّٰهْ يِسَمِّعْ حِسَّهْ الْمَجِيدْ
وَ يِوَصِّفْ دُرَاعَهْ الْمَرْفُوعْ
بِشِدَّةْ زَعَلَهْ
وَ أَمْ بَلْبَالَةْ التَّحْرِقْ
وَ مَطَرْ شَدِيدْ وَ بَرَدْ.
31 وَ بَلَدْ أَشُورْ تَرْجِفْ مِنْ حِسّ اللّٰهْ
الْيَضْرُبْهَا بِعَصَاةْ.
32 وَ أَيِّ ضَرْبَةْ الْيِعَاقِبْهَا بَيْهَا اللّٰهْ
يِنْسَمِعْ مَعَاهَا حِسّ هَنَا تَنَابِلْ وَ جِقِنْدِيَّةْ
وَكِتْ يَرْفَعْ إِيدَهْ لِيِحَارِبْهَا.
33 وَ مِنْ وَكِتْ طَوِيلْ،
نُقْرَةْ النَّارْ جَاهِزَةْ
أَيْوَى، هِي جَاهِزَةْ لِمَلِكْ أَشُورْ!
وَ النُّقْرَةْ دِي طَوِيلَةْ وَ وَسِيعَةْ
وَ دَفَّقَوْا فَوْقهَا حَطَبْ كَتِيرْ.
وَ بِنَفْخَةْ اللّٰهْ
الْمِثِلْ سَيْل شَدِيدْ هَنَا كِبْرِيتْ،
هُو يِقَبِّضْهَا نَارْ.
© La Bible en arabe tchadien © Alliance biblique du Tchad, 2019
