وكْت التعب
1 هَلْ حَيَاةْ بَنِي آدَم فِي الْأَرْض
مَا مِثِلْ حَيَاةْ عَسْكَرِي وَلَّا؟
وَ أَيَّامَهْ مَا مِثِلْ أَيَّامْ
الْمُؤَجَّرْ وَلَّا؟
2 وَ مِثِلْ الْعَبْد الْيِنَاهِجْ يِدَوْر الضُّلّ
وَ مِثِلْ الْخَدَّامْ الْيَرْجَى أُجُرْتَهْ،
3 مِثِلْ دَا، أَنَا قَعَدْت شُهُورْ فِي الْفَاضِي
وَ دَا بَسْ قِسْمِي.
وَ حَسَبَوْا لَيِّ
لَيَالِي هَنَا تَعَبْ.
4 وَ وَكِتْ نَرْقُدْ، نُقُولْ:
«نُقُمّ مَتَى؟»
اللَّيْل طَوِيلْ وَ أَنَا شِبِعْت
مِنْ قِلَّةْ النَّوْم لَحَدِّي فَجُرْ.
5 جِسْمِي أَنْكَسَى بِدُودْ وَ قَشَّرْ
وَ فَرْوَةْ جِلْدِي جَفَّتْ وَ أَلْقَطَّعَتْ.
6 وَ أَيَّامِي مَاشِينْ عَجَلَةْ مِنْ الْمُتْرَارَةْ
وَ يِكَمُّلُوا بِسُرْعَةْ
أَشَانْ عَشَمِي أَنْقَطَعْ.
7 يَا رَبّ، أَذَّكَّرْ
كَدَرْ حَيَاتِي مِثِلْ رِيحْ
وَ عُيُونِي بَتَّانْ مَا يِشِيفُوا الْخَيْر.
8 وَ عُيُونْ الْيِشِيفُونِي،
مَا يِشِيفُونِي بَتَّانْ.
وَ وَكِتْ عُيُونَكْ يِفَتُّشُونِي،
أَنَا مَا فِينِي.
9 الْإِنْسَانْ الْيَنْزِلْ فِي الْقَبُرْ مَا يِقَبِّلْ بَتَّانْ
مِثِلْ سَحَابَايْ الْمَرَّةْ وَ فَاتَتْ.
10 هُو مَا يِقَبِّلْ فِي مَسْكَنَهْ
وَ نَاسْ بَيْتَهْ كُلَ يَنْسَوْه.
11 وَ فِي شَانْ دَا،
أَنَا مَا نَلْزَمْ خَشْمِي.
نِحَجِّي بِضِيقَةْ رُوحِي
وَ نَشْكِي بِحِزِنْ نَفْسِي.
12 أَنَا مَا بَحَرْ وَ لَا غُولْ الْبَحَرْ
لَحَدِّي تُخُطّ لَيِّ حَرَاسَةْ.
13 نُقُولْ: «فِي سَرِيرِي، نَلْقَى رَاحْتِي
وَ فِي فُرَاشِي، نِهَدِّي شَكْوِتِي.»
14 وَ لَاكِنْ بِحِلِمْ،
إِنْتَ تِدِسّ لَيِّ الرُّعُبْ
وَ بِرُؤْيَةْ، تَبْهَتْنِي.
15 أَنَا عَزَلْ الشَّنَقَانْ
وَ الْمَوْت أَخَيْر لَيِّ مِنْ بِقِيتْ عُضَامْ!
16 خَلَاصْ، تَمَّانِي! مَا نِعِيشْ دَايْماً.
خَلِّينِي! أَيَّامِي زَايْلِينْ.
17 شُنُو الْإِنْسَانْ وَ مَالَا تِكَبِّرَهْ؟
مَالَا تِهِمّ بَيَّهْ؟
18 مَالَا تِرَاقِبَهْ أَيِّ صَبَاحْ
وَ تِجَرِّبَهْ كُلَّ وَكِتْ؟
19 يَا رَبّ! مَتَى تِوَقِّفْ نَظَرَكْ مِنِّي؟
وَ مَتَى تِخَلِّينِي نَزْرُطْ رِيقِي؟
20 يَا مُرَاقِبْ الْإِنْسَانْ،
كَنْ أَنَا أَذْنَبْت،
دَا يِسَوِّي لَيْك شُنُو؟
مَالَا خَطَّيْتنِي هَدَفْ؟
أَنَا بِقِيتْ لَيْك تَقِيلْ وَلَّا؟
21 وَ مَالَا مَا تَمْحَا عِصْيَانِي
وَ تِسَامِحْ خَطَايِ؟
أَشَانْ دَاهُونِي رَاقِدْ فِي التُّرَابْ
مِثِلْ مَيِّتْ
وَ وَكِتْ تِفَتِّشْنِي،
نَبْقَى مَا فِينِي.
© La Bible en arabe tchadien © Alliance biblique du Tchad, 2019
