بُولُس في مدينة كُرُنْتُس
1 وَ بَعَدْ دَا، بُولُسْ مَرَقْ مِنْ مَدِينَةْ أَتِينَا وَ مَشَى فِي مَدِينَةْ كُرُنْتُسْ. 2 وَ هِنَاكْ لِقِي نَادُمْ يَهُودِي أُسْمَهْ أَكِيلَا مِنْ بَلَدْ بُنْطُسْ. وَ هُو دَهَابَهْ جَاءْ فِي كُرُنْتُسْ مَعَ مَرْتَهْ أُسُمْهَا بِرِسْكِيلَةْ. جَوْا مِنْ مَدِينَةْ رَوْمَا الْفِي إِيطَالِيَا أَشَانْ السُّلْطَانْ كُلُودِي أَنْطَى أَمُرْ وَ قَالْ كُلَّ الْيَهُودْ يَمُرْقُوا مِنْ رَوْمَا. وَ بُولُسْ مَشَى سَلَّمَاهُمْ. 3 وَ هُو قَعَدْ فِي بَيْتهُمْ وَ بَدَا يَخْدِمْ مَعَاهُمْ أَشَانْ بُولُسْ كُلَ أُسْطَى فِي نَفْس الْخِدْمَةْ مِثِلْهُمْ. خِدْمِتْهُمْ يِسَوُّوا الْخِيَمْ. 4 وَ كُلَّ يَوْم السَّبْت، هُو يَمْشِي فِي بَيْت الصَّلَاةْ وَ يِنَاقِشْ مَعَ الْيَهُودْ وَ الْيُونَانِيِّينْ أَشَانْ يِجِيبْهُمْ فِي الدَّرِبْ. 5 وَ وَكِتْ سِيلَا وَ تِمُوتَاوُسْ جَوْا مِنْ بَلَدْ مَقِدُونِيَةْ، بُولُسْ خَلَّى خِدِمْتَهْ وَ قَمَّ يِبَلِّغْ الْبِشَارَةْ كُلَّ يَوْم. وَ يِحَجِّي لِلْيَهُودْ وَ يَشْهَدْ كَدَرْ عِيسَى بَسْ الْمَسِيحْ. 6 لَاكِنْ الْيَهُودْ أَبَوْا مَا دَوَّرَوْا شَهَادْتَهْ وَ بَدَوْا يِعَيُّرُوهْ. وَ بُولُسْ حَتَّ خَلَقَهْ مِنْهُمْ وَ قَالْ: «إِنْتُو مَسْؤُولِينْ مِنْ الْيَجِي فَوْقكُو. أَنَا بَرِي مِنْكُو. مِنْ الْيَوْم نِبَلِّغْ الْبِشَارَةْ لِلنَّاسْ الْمَا يَهُودْ.»
7 وَ خَلَاصْ، بُولُسْ خَلَّى بَيْت الصَّلَاةْ وَ بَدَا يِعَلِّمْ فِي بَيْت هَنَا نَادُمْ أُسْمَهْ تِيطُسْ يُسْتُسْ. هُو يَعَبُدْ اللّٰهْ لَاكِنْ هُو مَا يَهُودِي. وَ بَيْتَهْ قَاعِدْ جَنْب بَيْت الصَّلَاةْ هَنَا الْيَهُودْ. 8 وَ مَسْؤُولْ هَنَا بَيْت الصَّلَاةْ دَا، أُسْمَهْ كِرِيسْبُسْ. وَ هُو وَ كُلَّ نَاسْ بَيْتَهْ آمَنَوْا بِالرَّبّ عِيسَى. وَ نَاسْ كَتِيرِينْ فِي كُرُنْتُسْ سِمْعَوْا كَلَامْ بُولُسْ وَ آمَنَوْا بِالْبِشَارَةْ وَ غَطَّسَوْهُمْ.
9 وَ يَوْم وَاحِدْ بِاللَّيْل، الرَّبّ عِيسَى جَاءْ لِبُولُسْ فِي رُؤْيَةْ وَ قَالْ لَيَّهْ: «مَا تَخَافْ. كَلِّمْ وَ مَا تَسْكُتْ. 10 أَنَا قَاعِدْ مَعَاكْ. وَ مَا فِي نَادُمْ يَقْدَرْ يِسَوِّي لَيْك شَيّءْ فَسِلْ أَشَانْ عِنْدِي نَاسْ كَتِيرِينْ فِي الْحِلَّةْ دِي.» 11 وَ بُولُسْ قَعَدْ فِي كُرُنْتُسْ سَنَةْ وَ نُصّ وَ قَاعِدْ يِعَلِّمْ كَلَامْ اللّٰهْ لِلنَّاسْ.
بُولُس قِدّام الحاكِم غَالِيُون
12 وَ وَكِتْ غَالِيُونْ بِقِي حَاكِمْ فِي بَلَدْ أَخَايَةْ، الْيَهُودْ أَسْتَفَقَوْا أَمْبَيْنَاتْهُمْ أَشَانْ يِخَالُفُوا بُولُسْ. وَ قَمَّوْا وَدَّوْا بُولُسْ فِي الْمَحْكَمَةْ. 13 وَ قَالَوْا: «الرَّاجِلْ دَا قَاعِدْ يِحَرِّشْ النَّاسْ أَشَانْ يَعَبُدُوا اللّٰهْ بِعِبَادَةْ التِّخَالِفْ الْقَانُونْ.»
14 وَ بُولُسْ قَمَّ أَشَانْ يِحَجِّي وَ لَاكِنْ غَالِيُونْ حَجَّى لِلْيَهُودْ وَ قَالْ: «يَا الْيَهُودْ، كَنْ كَلَامْكُو فِي النَّادُمْ دَا تُهْمَةْ هَنَا جَرِيمَةْ وَلَّا ظُلُمْ، وَاجِبْ نَصْبُرْ وَ نَسْمَعْ كَلَامْكُو. 15 لَاكِنْ تِحَجُّوا فِي تَفْسِيرْ هَنَا كَلِمَاتْ وَ أَسَامَيْ بَسْ وَ فِي كَلَامْ هَنَا شَرِيعِتْكُو. وَ وَاجِبْ إِنْتُو تِحِلُّوا الْمُشْكِلَةْ دِي أَمْبَيْنَاتْكُو. فِي الْكَلَامْ الْمِثِلْ دَا، أَنَا مَا نِدَوْر نَقْطَعْ شَرِيعَةْ.»
16 وَ خَلَاصْ طَرَدَاهُمْ مِنْ الْمَحْكَمَةْ. 17 وَ كُلَّ النَّاسْ كَرَبَوْا سُوسْتَانْ مَسْؤُولْ بَيْت الصَّلَاةْ وَ قَمَّوْا دَقَّوْه قِدَّامْ الْمَحْكَمَةْ وَ لَاكِنْ غَالِيُونْ قَاعِدْ سَاكِتْ، مَا حَجَّى شَيّءْ.
بُولُس مشى يشيف مدينة أفَسُس
18 وَ بُولُسْ قَعَدْ فِي كُرُنْتُسْ مُدَّةْ طَوِيلَةْ. وَ بَعَدْ دَا، هُو سَلَّمْ الْأَخْوَانْ أَشَانْ يِدَوْر يِسَافِرْ. دَوَّرْ يَمْشِي فِي سُورِيَا بِسَفِينَةْ. وَ بِرِسْكِيلَةْ وَ أَكِيلَا كُلَ مَشَوْا مَعَايَهْ. وَ فِي حِلَّةْ كَنْخِرِيَّةْ قُبَّالْ مَا يَرْكَبْ فِي السَّفِينَةْ، بُولُسْ زَيَّنْ رَاسَهْ أَشَانْ سَوَّى نَذِرْ قِدَّامْ اللّٰهْ. 19 وَ وَكِتْ وِصْلَوْا فِي مَدِينَةْ أَفَسُسْ، بُولُسْ خَلَّى بِرِسْكِيلَةْ وَ أَكِيلَا. وَ مَشَى دَخَلْ فِي بَيْت الصَّلَاةْ هَنَا الْيَهُودْ وَ نَاقَشْ مَعَاهُمْ. 20 وَ الْيَهُودْ طَلَبَوْا مِنَّهْ أَشَانْ يَقْعُدْ مَعَاهُمْ شِيَّةْ. وَ لَاكِنْ هُو أَبَى 21 وَ مَشَى خَلَّاهُمْ وَ قَالْ: «إِنْ شَاءْ اللّٰهْ، نِقَبِّلْ لَيْكُو يَوْم آخَرْ.»
وَ مَرَقْ مِنْ أَفَسُسْ وَ رِكِبْ فِي سَفِينَةْ وَ سَافَرْ. 22 وَ نَزَلْ فِي خَشُمْ الْبَحَرْ هَنَا قَيْصَرِيَّةْ وَ مَشَى فِي مَدِينَةْ الْقُدُسْ وَ سَلَّمْ جَمَاعَةْ الْمُؤمِنِينْ وَ بَعَدْ دَا، مَشَى فِي حِلَّةْ أَنْطَاكِيَةْ. 23 وَ قَعَدْ هِنَاكْ أَيَّامْ. وَ بَعَدْ دَا، قَمَّ فَاتْ فِي بُلْدَانْ غَلَاطِيَةْ وَ فِرِقِيَّةْ رَايِغْ مِنْ حِلَّةْ لِحِلَّةْ. وَ بُولُسْ قَاعِدْ يِشَجِّعْ كُلَّ التَّلَامِيذ أَشَانْ يَقْعُدُوا ثَابْتِينْ فِي الْإِيمَانْ.
أَبُلُوس في مُدُن أفَسُس و كُرُنْتُس
24 وَ فِي الْوَكِتْ دَا، يَهُودِي وَاحِدْ أُسْمَهْ أَبُلُوسْ جَاءْ فِي مَدِينَةْ أَفَسُسْ. هُو مِنْ الْإِسْكَنْدَرِيَّةْ وَ يَعَرِفْ يِعَلِّمْ عَدِيلْ وَ هُو عَالِمْ شَدِيدْ فِي الْكِتَابْ. 25 وَ قُبَّالْ مَا يَجِي فِي أَفَسُسْ، أَبُلُوسْ عَلَّمَوْه دَرِبْ الرَّبّ عِيسَى. وَ قَمَّ كَلَّمْ بِشِدَّةْ وَ قَاعِدْ يِعَلِّمْ النَّاسْ بِكَلَامْ صَحِيحْ بِالْأَشْيَاءْ الْبُخُصُّوا عِيسَى. وَ لَاكِنْ هُو عِرِفْ غَطِّسِينْ يَحْيَى بَسْ. 26 وَ قَمَّ يِكَلِّمْ فِي بَيْت الصَّلَاةْ بَلَا خَوْف. وَ وَكِتْ بِرِسْكِيلَةْ وَ أَكِيلَا سِمْعَوْا كَلَامَهْ، وَدَّوْه فِي بَيْتهُمْ وَ فَسَّرَوْا لَيَّهْ دَرِبْ اللّٰهْ بِزِيَادَةْ.
27 وَ أَبُلُوسْ دَوَّرْ يِسَافِرْ فِي بَلَدْ أَخَايَةْ وَ الْأَخْوَانْ شَجَّعَوْه وَ كَتَبَوْا جَوَابْ لِلتَّلَامِيذ الْقَاعِدِينْ هِنَاكْ أَشَانْ يَكُرْبُوهْ عَدِيلْ. وَ وَكِتْ هُو وِصِلْ هِنَاكْ، هُو قَمَّ يِعَلِّمْ النَّاسْ. وَ بِمِثِلْ دَا، عَاوَنَاهُمْ بِلْحَيْن لِلنَّاسْ الْآمَنَوْا بِالْمَسِيحْ بِرَحْمَةْ اللّٰهْ. 28 وَ أَبُلُوسْ قَاعِدْ يِخَالِفْ الْيَهُودْ قِدَّامْ نَاسْ الْحِلَّةْ بِكَلَامْ قَوِي. وَ فَسَّرْ لَيْهُمْ مِنْ الْكِتَابْ وَ أَكَّدْ كَدَرْ عِيسَى بَسْ الْمَسِيحْ.
© La Bible en arabe tchadien © Alliance biblique du Tchad, 2019
