المكتوب و الحمل
1 وَ أَنَا شِفْت مَكْتُوبْ مَلْفُوفْ فِي الْإِيدْ الزَّيْنَةْ هَنَا الْقَاعِدْ فِي الْعَرْش وَ الْمَكْتُوبْ دَا عِنْدَهْ كِتَابَةْ مِنْ دَاخَلْ وَ مِنْ بَرَّا. وَ الْمَكْتُوبْ مَخْتُومْ بِسَبْعَةْ خِتِمْ. 2 وَ شِفْت مَلَكْ قَادِرْ كَلَّمْ بِحِسّ شَدِيدْ وَ قَالْ: «يَاتُو الْوَاجِبْ لَيَّهْ يُفُكّ الْخِتِمْ وَ يَفْتَحْ الْمَكْتُوبْ؟»
3 وَ فِي السَّمَاوَاتْ وَ فِي الْأَرْض وَ تِحِتْ الْأَرْض، مَا فِي نَادُمْ الْقِدِرْ يِشِيلْ الْمَكْتُوبْ وَ يَفْتَحَهْ وَ يَقْرِي الْكَلَامْ الْقَاعِدْ فَوْقَهْ. 4 وَ أَنَا بَكَيْت بَكِي شَدِيدْ أَشَانْ مَا لِقَوْا نَادُمْ الْعِنْدَهْ حَقّ يَفْتَحْ الْمَكْتُوبْ وَ يَقْرِي الْكَلَامْ الْقَاعِدْ فَوْقَهْ.
5 وَ فِي الْبَكَانْ دَا، وَاحِدْ مِنْ الشُّيُوخْ حَجَّى لَيِّ وَ قَالْ: «مَا تَبْكِي. شِيفْ! النَّادُمْ الْأُسْمَهْ دُودْ هَنَا قَبِيلَةْ يَهُوذَا، هُو قَاعِدْ. وَ هُو الْمَلِكْ الْمِنْ ذُرِّيَّةْ دَاوُدْ وَ هُو بَسْ الْأَنَّصَرْ. وَ بَيْدَا، هُو يَقْدَرْ يُفُكّ السَّبْعَةْ خِتِمْ وَ يَفْتَحْ الْمَكْتُوبْ.»
6 وَ فِي الْبَكَانْ دَا، أَنَا شِفْت حَمَلْ وَاقِفْ أُسْط الْعَرْش أَمْبَيْن الْأَرْبَعَةْ مَخْلُوقِينْ قِدَّامْ الشُّيُوخْ. وَ الْحَمَلْ يِشَابِهْ مِثِلْ أَوَّلْ دَبَحَوْه. وَ عِنْدَهْ سَبْعَةْ قُرُونْ وَ سَبْعَةْ عُيُونْ وَ هُمَّنْ الْأَرْوَاحْ السَّبْعَةْ الْاللّٰهْ رَسَّلَاهُمْ فِي كُلَّ الْأَرْض. 7 وَ الْحَمَلْ مَشَى لِلْقَاعِدْ فِي الْعَرْش وَ شَالْ الْمَكْتُوبْ مِنْ إِيدَهْ الزَّيْنَةْ.
8 وَ وَكِتْ الْحَمَلْ شَالْ الْمَكْتُوبْ، الْأَرْبَعَةْ مَخْلُوقِينْ وَ الْأَرْبَعَةْ وَ عِشْرِينْ شُيُوخْ سَجَدَوْا قِدَّامَهْ. وَ أَيِّ وَاحِدْ عِنْدَهْ جِقِنْدِيَّةْ وَ مُخْبَرْ هَنَا دَهَبْ الْفَوْقَهْ بَخُورْ. وَ الْبَخُورْ دَا يِمَثِّلْ صَلَاوَاتْ الصَّالِحِينْ. 9 وَ غَنَّوْا غِنَيْ جَدِيدْ وَ دَاهُو غِنَيْهُمْ.
«إِنْتَ بَسْ الْوَاجِبْ تِشِيلْ الْمَكْتُوبْ
وَ تُفُكّ خِتْمَهْ
أَشَانْ إِنْتَ دَبَحَوْك
وَ بِدَمَّكْ، فَدَيْت النَّاسْ
وَ قَدَّمْتُهُمْ لِلّٰهْ
مِنْ أَيِّ قَبِيلَةْ وَ أَيِّ لُغَّةْ
وَ مِنْ أَيِّ شَعَبْ وَ أَيِّ أُمَّةْ.
10 وَ إِنْتَ كَوَّنْتُهُمْ مَمْلَكَةْ
وَ سَوَّيْتهُمْ رُجَالْ دِينْ
أَشَانْ يَعَبُدُوا اللّٰهْ
وَ يَحْكُمُوا فِي الْأَرْض.»
11 وَ بَتَّانْ أَنَا شِفْت وَ سِمِعْت حِسّ هَنَا مَلَائِكَةْ كَتِيرِينْ بِلْحَيْن الْمُحَوِّقِينْ الْعَرْش وَ الْمَخْلُوقِينْ السَّمَاوِيِّينْ وَ الشُّيُوخْ. وَ عَدَدْهُمْ أُلُوفْ وَ مَلَايِينْ وَ زِيَادَةْ مِنْ دَا مَرَّةْ وَاحِدْ. 12 وَ كَلَّمَوْا بِحِسّ شَدِيدْ وَ قَالَوْا:
«الْحَمَلْ الدَّبَحَوْه وَاجِبْ لَيَّهْ هُو بَسْ
الْقُدْرَةْ وَ الْمَالْ
وَ الْعِلِمْ وَ الْقُوَّةْ
وَ الْإِكْرَامْ وَ الْمَجْد وَ الشُّكُرْ.»
13 وَ أَنَا سِمِعْت حِسّ هَنَا كُلَّ الْمَخْلُوقِينْ الْعَايْشِينْ فِي السَّمَاوَاتْ وَ فِي الْأَرْض وَ تِحِتْ الْأَرْض وَ فِي الْبَحَرْ. وَ كُلُّهُمْ قَالَوْا:
«لِلْقَاعِدْ فِي الْعَرْش وَ لِلْحَمَلْ
يَبْقَوْا الشُّكُرْ وَ الْإِكْرَامْ
وَ الْمَجْد وَ الْمُلُكْ
دَايْماً وَ إِلَى الْأَبَدْ.»
14 وَ الْأَرْبَعَةْ مَخْلُوقِينْ قَالَوْا: «آمِينْ!» وَ الشُّيُوخْ سَجَدَوْا وَ عَبَدَوْا.
© La Bible en arabe tchadien © Alliance biblique du Tchad, 2019
