خدّامين اللّه
1 يَا أَخْوَانِي، وَكِتْ أَنَا مَعَاكُو مَا قِدِرْت نِحَجِّي لَيْكُو مِثِلْ إِنْتُو نَاسْ الْعِنْدُهُمْ الرُّوحْ الْقُدُّوسْ. لَاكِنْ إِنْتُو عِنْدُكُو فِكِرْ هَنَا نَاسْ الدُّنْيَا. وَ فِي دَرِبْ الْمَسِيحْ إِنْتُو مِثِلْ أَطْفَالْ. 2 أَشَانْ دَا بَسْ، أَنَا عَلَّمْتُكُو بِتَعْلِيمْ هَيِّنْ مِثِلْ رِضَاعَةْ اللَّبَنْ وَ مَا بِتَعْلِيمْ قَوِي مِثِلْ مَضِغِينْ الْعَصَبْ أَشَانْ إِنْتُو مَا قِدِرْتُوا تَقْبَلَوْا تَعْلِيمْ قَوِي. يَا هَسَّعْ، إِنْتُو مَا تَقْدَرَوْا. 3 إِنْتُو قَاعِدِينْ تِتَابُعُوا فِكِرْ هَنَا نَاسْ الدُّنْيَا وَ مَا فِكِرْ اللّٰهْ. إِنْتُو قَاعِدِينْ تِلْحَاسَدَوْا وَ تِهَارُجُوا أَمْبَيْنَاتْكُو. وَ بَيْدَا، فِكِرْكُو بِقِي فِكِرْ هَنَا نَاسْ الدُّنْيَا وَ حَالْكُو مِثِلْ حَالْ النَّاسْ! 4 أَشَانْ نَادُمْ وَاحِدْ بُقُولْ: «أَنَا هَنَا بُولُسْ» وَ نَادُمْ آخَرْ بُقُولْ: «أَنَا هَنَا أَبُلُوسْ.» وَ كَنْ تِحَجُّوا مِثِلْ كَيْ خَلَاصْ، إِنْتُو مِثِلْ نَاسْ الدُّنْيَا.
5 وَ أَبُلُوسْ هُو يَاتُو؟ وَ أَنَا بُولُسْ كُلَ يَاتُو؟ أَنِحْنَ خَدَّامِينْ بَسْ وَ بِسَبَبْ كَلَامْنَا إِنْتُو آمَنْتُوا. أَيِّ وَاحِدْ مِنِّنَا سَوَّى الْخِدْمَةْ الرَّبِّنَا كَلَّفَهْ بَيْهَا. 6 إِنْتُو مِثِلْ جِنَيْنَةْ وَ أَنَا تَيْرَبْت فَوْقهَا كَلَامْ اللّٰهْ وَ أَبُلُوسْ زَقَاهَا لَاكِنْ اللّٰهْ بَسْ قَوَّمْ الْبِذْرَةْ. 7 وَ بَيْدَا، الْيِتَيْرِبْ مَا مُهِمّ وَ الْيَزْقِي مَا مُهِمّ إِلَّا اللّٰهْ الْيِقَوِّمْ الْبِذْرَةْ بَسْ مُهِمّ. 8 وَ الْيِتَيْرِبْ وَ الْيَزْقِي هُمَّنْ سَوَا سَوَا وَ أَيِّ وَاحِدْ يَلْقَى أُجُرْتَهْ حَسَبْ خِدِمْتَهْ. 9 وَ خَلَاصْ، أَنِحْنَ أَخْوَانْ فِي خِدْمَةْ اللّٰهْ وَ إِنْتُو بِقِيتُوا جِنَيْنَةْ هَنَا اللّٰهْ. أَوْ بِمَثَلْ آخَرْ، إِنْتُو بِقِيتُوا الْبَيْت الْاللّٰهْ قَاعِدْ يَبْنِيهْ.
مَثَل اليبْني في الأساس
10 وَ أَنَا مِثِلْ بَنَّايْ الْيَعَرِفْ خِدِمْتَهْ وَ بِالرَّحْمَةْ الْاللّٰهْ أَنْطَانِي، أَنَا خَطَّيْت أَسَاسْ الْبَيْت وَ نَادُمْ آخَرْ جَاءْ بَنَى فَوْقَهْ. وَ أَيِّ نَادُمْ الْيَبْنِي فَوْقَهْ وَاجِبْ يُخُطّ بَالَهْ فِي خِدِمْتَهْ. 11 نَادُمْ مَا يَقْدَرْ يُخُطّ أَسَاسْ آخَرْ مِنْ الْأَسَاسْ الْقَاعِدْ خَلَاصْ وَ الْأَسَاسْ دَا هُو عِيسَى الْمَسِيحْ.
12 وَ هَسَّعْ أَيِّ نَادُمْ يَبْنِي فَوْق الْأَسَاسْ دَا. وَ وَاحِدِينْ يَبْنُوا فَوْقَهْ بِدَهَبْ وَلَّا بِفُضَّةْ وَلَّا بِحَجَرْ غَالِي وَ وَاحِدِينْ يَبْنُوا بِحَطَبْ وَلَّا بِقَشّ وَلَّا بِعَقَيْق. 13 وَ الْخِدْمَةْ الْأَيِّ نَادُمْ خَدَمْهَا تِنْعَرِفْ أَشَانْ يَوْم الْحِسَابْ يِوَصِّفْهَا بِنَارْ. وَ النَّارْ تِجَرِّبْ خِدْمَةْ أَيِّ نَادُمْ كَنْ عَدِيلَةْ وَلَّا مَا عَدِيلَةْ. 14 وَ كَنْ نَادُمْ بَنَى فَوْق الْأَسَاسْ وَ النَّارْ مَا أَكَلَتْ خِدِمْتَهْ، النَّادُمْ دَا يَلْقَى أَجُرْ. 15 وَ كَنْ نَادُمْ بَنَى فَوْق الْأَسَاسْ وَ النَّارْ أَكَلَتْ خِدِمْتَهْ، خَلَاصْ خِدِمْتَهْ طَلَعَتْ خَسَارَةْ لَاكِنْ هُو ذَاتَهْ يَنْجَى. وَ هُو يَنْجَى مِثِلْ نَادُمْ الْفَزَعَوْه مِنْ أُسْط النَّارْ.
16 إِنْتُو نِسِيتُوا وَلَّا؟ إِنْتُو ذَاتْكُو بَيْت اللّٰهْ. رُوحْ اللّٰهْ سَاكِنْ فَوْقكُو. 17 كَنْ نَادُمْ يِدَمِّرْ بَيْت اللّٰهْ، النَّادُمْ دَا اللّٰهْ يِدَمِّرَهْ. أَشَانْ بَيْت اللّٰهْ هُو مُقَدَّسْ. وَ إِنْتُو بَسْ الْبَيْت دَا.
18 خَلِّي نَادُمْ مَا يُغُشّ نَفْسَهْ. أَيِّ نَادُمْ مِنْكُو الْيُقُولْ هُو عِنْدَهْ حِكْمَةْ عَدِيلَةْ وَ حِكْمَتَهْ هِي حِكْمَةْ نَاسْ الدُّنْيَا، خَلِّي يَبْقَى جَاهِلْ أَشَانْ يَلْقَى الْحِكْمَةْ الصَّحِيحَةْ. 19 أَشَانْ حِكْمَةْ نَاسْ الدُّنْيَا بَاطْلَةْ قِدَّامْ اللّٰهْ. وَ مَكْتُوبْ فِي الْكِتَابْ: <اللّٰهْ يَرْمِي الْحَكِيمِينْ فِي شَرَكْ نَجَاضِتْهُمْ.> 20 وَ مَكْتُوبْ بَتَّانْ: <اللّٰهْ يَعَرِفْ كَدَرْ أَفْكَارْ الْحَكِيمِينْ مَا عِنْدُهُمْ فَايْدَةْ.>
21 أَشَانْ دَا، مَا تِسْتَكْبَرَوْا فِي أَيِّ إِنْسَانْ. أَشَانْ كُلَّ شَيّءْ هَنَاكُو. 22 أَيْوَى، بُولُسْ وَ أَبُلُوسْ وَ بُطْرُسْ كُلُّهُمْ هِنَيْكُو إِنْتُو. وَ الدُّنْيَا وَ الْحَيَاةْ وَ الْمَوْت وَ الْوَكِتْ الْحَالِي وَ الْوَكِتْ الْجَايِ، كُلُّهُمْ هِنَيْكُو. 23 وَ إِنْتُو هَنَا الْمَسِيحْ وَ الْمَسِيحْ هُو هَنَا اللّٰهْ.
© La Bible en arabe tchadien © Alliance biblique du Tchad, 2019
