دَاوُد نظّم اللاوِيِّين
1 وَ وَكِتْ دَاوُدْ بِقِي شَايِبْ مَرَّةْ وَاحِدْ وَ شِبِعْ مِنْ الدُّنْيَا، دَرَّجْ وِلَيْدَهْ سُلَيْمَانْ مَلِكْ فِي إِسْرَائِيلْ. 2 وَ لَمَّ كُلَّ كُبَارَاتْ بَنِي إِسْرَائِيلْ وَ رُجَالْ الدِّينْ وَ اللَّاوِيِّينْ. 3 وَ حَسَبَوْا اللَّاوِيِّينْ الْعُمُرْهُمْ 30 سَنَةْ وَ فَوْق وَ عَدَدْهُمْ بِقِي 38 000 رَاجِلْ. 4 وَ دَاوُدْ خَطَّ مِنْهُمْ 24 000 لِيُقُودُوا الْخِدْمَةْ هَنَا بَيْت اللّٰهْ وَ 6 000 كَمَانْ مُرَاقِبِينْ وَ حُكَّامْ. 5 وَ خَطَّ 4 000 حَرَاسَةْ الْيَحَرْسُوا الْبِيبَانْ وَ 4 000 لِيَشْكُرُوا اللّٰهْ بِآلَاتْ الْمُسِيقَى الْهُو سَوَّاهُمْ لِيَشْكُرُوا بَيْهُمْ.
6 وَ دَاوُدْ قَسَّمْ اللَّاوِيِّينْ بِمَجْمُوعَاتْ عَلَيْ حَسَبْ عِيَالْ لَاوِي وَ هُمَّنْ قِرْشُونْ وَ قَهَاتْ وَ مَرَارِي.
7 وَ أَوْلَادْ قِرْشُونْ هُمَّنْ لَعْدَانْ وَ شِمْعِي.
8 وَ أَوْلَادْ لَعْدَانْ هُمَّنْ تَلَاتَةْ، الْكَبِيرْ يَحِيِيلْ وَ زِتَامْ وَ يُوِيلْ.9 وَ شِمْعِي كُلَ عِنْدَهْ تَلَاتَةْ أَوْلَادْ وَ هُمَّنْ شَلُومِتْ وَ حَزِيِيلْ وَ هَرَّانْ. هُمَّنْ دَوْل كُبَارَاتْ عَايِلَةْ لَعْدَانْ.10 وَ شِمْعِي عِنْدَهْ أَرْبَعَةْ أَوْلَادْ آخَرِينْ وَ هُمَّنْ يَحَتْ وَ زِينَةْ وَ يَعُوشْ وَ بَرِيعَا. 11 وَ يَحَتْ هُو بَسْ الْكَبِيرْ وَ زِيزَا التَّانِي. وَ لَاكِنْ يَعُوشْ وَ بَرِيعَا مَا جَابَوْا أَوْلَادْ كَتِيرْ وَ بَيْدَا، هُمَّنْ لَمَّوْا وَ بِقَوْا عَايِلَةْ وَاحِدَةْ أَشَانْ يِسَوُّوا خِدْمَةْ وَاحِدَةْ.12 وَ قَهَاتْ عِنْدَهْ أَرْبَعَةْ أَوْلَادْ وَ هُمَّنْ عَمْرَامْ وَ يِصْهَارْ وَ حَبْرُونْ وَ عُزِّيِيلْ.
13 وَ أَوْلَادْ عَمْرَامْ هُمَّنْ هَارُونْ وَ مُوسَى. وَ هَارُونْ عَزَلَوْه هُو وَ عِيَالَهْ لِيَبْقَوْا مُخَصَّصِينْ وَ يِسَوِّي خِدْمَةْ اللّٰهْ فِي الْبَكَانْ الْمُقَدَّسْ مَرَّةْ وَاحِدْ، إِلَى الْأَبَدْ. وَ يِحَرُّقُوا بَخُورْ قِدَّامْ اللّٰهْ وَ يِسَوُّوا خِدْمَةْ اللّٰهْ وَ يِبَارُكُوا النَّاسْ بِأُسُمْ اللّٰهْ إِلَى الْأَبَدْ.14 وَ مُوسَى هُو عَبْد اللّٰهْ، عِيَالَهْ حَسَبَوْهُمْ مَعَ قَبِيلَةْ لَاوِي. 15 وَ أَوْلَادْ مُوسَى هُمَّنْ قِرْشُومْ وَ أَلِعَازَرْ.16 وَ مِنْ أَوْلَادْ قِرْشُومْ، شَبُوِيلْ الْكَبِيرْ.17 وَ أَلِعَازَرْ وِلِدْ وِلَيْد وَاحِدْ بَسْ وَ هُو رَحَبْيَا وَ هُو مَسْؤُولْ. وَ رَحَبْيَا وِلِدْ عِيَالْ كَتِيرِينْ مَرَّةْ وَاحِدْ.18 وَ مِنْ أَوْلَادْ يِصْهَارْ، شَلُومِتْ الْكَبِيرْ.19 وَ أَوْلَادْ حَبْرُونْ هُمَّنْ يَرِيَّا الْكَبِيرْ وَ أَمَرْيَا التَّانِي وَ يَحَزِيِيلْ التَّالِتْ وَ يَقْمَعَامْ الرَّابِعْ.20 وَ أَوْلَادْ عُزِّيِيلْ هُمَّنْ مِيكَا الْكَبِيرْ وَ يِشِيَّا التَّانِي.21 وَ أَوْلَادْ مَرَارِي هُمَّنْ مَحْلِي وَ مُوشِي.
وَ أَوْلَادْ مَحْلِي هُمَّنْ أَلِعَازَرْ وَ قِيشْ.22 وَ أَلِعَازَرْ مَاتْ مَا عِنْدَهْ وِلَيْد. وَ لَاكِنْ عِنْدَهْ بَنَاتْ وَ أَخْوَانْهُمْ عِيَالْ عِمُّهُمْ قِيشْ أَخَدَوْهُمْ.23 وَ مُوشِي وِلِدْ أَوْلَادْ تَلَاتَةْ وَ هُمَّنْ مَحْلِي وَ عِدَرْ وَ يَرِمُوتْ.24 وَ كُلَّ النَّاسْ دَوْل مِنْ قَبِيلَةْ لَاوِي وَ أَيِّ وَاحِدْ كَبِيرْ فِي عَايِلْتَهْ. وَ حَسَبَوْهُمْ وَاحِدْ بِوَاحِدْ وَ أَسَامَيْهُمْ مَكْتُوبِينْ فِي الدَّفْتَرْ. وَ مِنْ عُمُرْ هَنَا 20 سَنَةْ وَ فَوْق، هُمَّنْ مُكَلَّفِينْ بِخِدْمَةْ بَيْت اللّٰهْ. 25 أَشَانْ دَاوُدْ قَالْ: «اللّٰهْ إِلٰـهْ بَنِي إِسْرَائِيلْ أَنْطَى الرَّاحَةْ لِشَعَبَهْ. وَ هَسَّعْ، هُو يَسْكُنْ إِلَى الْأَبَدْ فِي أُورُشَلِيمْ. 26 وَ بِمِثِلْ دَا، اللَّاوِيِّينْ مَا يَنْقُلُوا بَتَّانْ خَيْمَةْ الْعِبَادَةْ وَ كُلَّ مُعِدَّاتْ الْخِدْمَةْ.»
27 وَ حَسَبْ الْكَلَامْ الْآخِرْ هَنَا دَاوُدْ، اللَّاوِيِّينْ حَسَبَوْهُمْ مِنْ عُمُرْ 20 سَنَةْ وَ فَوْق. 28 وَ اللَّاوِيِّينْ قَاعِدِينْ تِحِتْ ذُرِّيَّةْ هَارُونْ فِي خِدْمَةْ بَيْت اللّٰهْ. وَ اللَّاوِيِّينْ هُمَّنْ مُكَلَّفِينْ بِالْفَضَايْ وَ الْغُرَفْ وَ طِهَارَةْ كُلَّ أَشْيَاءْ الْمُقَدَّسِينْ. وَ يَخْدُمُوا فِي خِدْمَةْ بَيْت اللّٰهْ. 29 وَ يِجَهُّزُوا الْخُبْزَةْ الْيِقَدُّمُوهَا لِلّٰهْ وَ الْهَدَايَا هَنَا الدَّقِيقْ وَ الْخُبْزَةْ بَلَا تَوَّارَةْ وَ الْكَعَكْ السَّلَّلَوْا بِدِهِنْ وَ كَعَكْ آخَرْ. وَ بَتَّانْ يِفَكُّرُوا فِي الْمِيزَانْ الْيِكِيلُوا وَ الْيِقَاوُسُوا بَيَّهْ. 30 وَ الْمُكَلَّفِينْ دَوْل يَحْضَرَوْا كُلِّ صَبَاحْ وَ كُلِّ عَشِيَّةْ لِيَحْمُدُوا وَ يَشْكُرُوا اللّٰهْ. 31 وَ يِقَدُّمُوا لِلّٰهْ كُلَّ الضَّحَايَا الْمُحَرَّقِينْ هَنَا كُلِّ يَوْم السَّبْت وَ أَوَّلْ يَوْم فِي كُلِّ شَهَرْ وَ كُلِّ عِيدْ. وَ دَا حَسَبْ الْعَدَدْ الْمُحَدَّدْ لَيْهُمْ فِي الشَّرِيعَةْ الْهُمَّنْ تَابْعِينْ لَيْهَا دَايْماً قِدَّامْ اللّٰهْ. 32 وَ يَحْفَضَوْا خَيْمَةْ الْإِجْتِمَاعْ وَ الْبَكَانْ الْمُقَدَّسْ وَ يِسَاعُدُوا أَخْوَانْهُمْ ذُرِّيَّةْ هَارُونْ فِي خِدْمَةْ بَيْت اللّٰهْ.
© La Bible en arabe tchadien © Alliance biblique du Tchad, 2019
