الصيام اليرْضى بيه اللّه
1 «نَادِي بِطُولْ حِسَّكْ! مَا تَسْكُتْ!
أَرْفَعْ حِسَّكْ مِثِلْ الْبُوقْ!
وَ خَبِّرْ شَعَبِي بِعِصْيَانْهُمْ
أَيْوَى، خَبِّرْ ذُرِّيَّةْ يَعْقُوبْ بِذُنُوبْهُمْ!
2 لَاكِنْ كُلِّ يَوْم
هُمَّنْ يِفَتُّشُونِي أَنَا
وَ يِدَوْرُوا يَعَرْفُوا دُرُوبِي
مِثِلْ أُمَّةْ التِّطَبِّقْ الْعَدَالَةْ
وَ مَا خَلَّتْ شَرِيعَةْ إِلٰـهَّا
وَ مِثِلْ يِدَوْرُوا مِنِّي شَرِيعَةْ عَادِلَةْ
وَ يِرِيدُوا يِقَرُّبُوا لَيِّ.
3 وَ لَاكِنْ يُقُولُوا لَيِّ:
‹مَالَا كَنْ نُصُومُوا،
إِنْتَ مَا تِشِيفْ صِيَامْنَا؟
وَ كَنْ نِمَسْكُنُوا نُفُوسْنَا،
إِنْتَ مَا تِهْتَمَّا بَيَّهْ؟›
أَشَانْ فِي يَوْم صِيَامْكُو،
إِنْتُو تِفَتُّشُوا فَايْدِتْكُو
وَ تِضَايُقُوا كُلَّ خَدَّامِينْكُو!
4 وَ دَاهُو الشَّيّءْ
الْإِنْتُو قَاعِدِينْ تِسَوُّوهْ فِي صِيَامْكُو.
إِنْتُو تِهَارُجُوا وَ تِسَوُّوا مَشَاكِلْ
وَ تَضُرْبُوا أَمْ دَرْدُومْ بِظُلُمْ.
وَ فِي يَوْم هَنَا صِيَامْ مِثِلْ دَا،
صَلَاتْكُو دِي، أَنَا مَا نَسْمَعْهَا.
5 وَ الصِّيَامْ الْأَنَا نَرْضَى بَيَّهْ،
هُو مِثِلْ دَا وَلَّا؟
إِلَّا يَوْم وَاحِدْ بَسْ، الْفَوْقَهْ
الْإِنْسَانْ يِمَسْكِنْ نَفْسَهْ وَلَّا؟
وَ يَرْخِي رَاسَهْ مِثِلْ عَقَيْقَايْ الْمَرْضَانَةْ
وَ يَلْبَسْ خَلَقْ التَّوْبَةْ
وَ يَرْقُدْ فِي رُمَادْ وَلَّا؟
دَا بَسْ تِنَادُوهْ صِيَامْ وَلَّا؟
وَ يَوْم صِيَامْ مِثِلْ دَا،
أَنَا اللّٰهْ نَرْضَى بَيَّهْ وَلَّا؟
6 «وَ لَاكِنْ دَاهُو الصِّيَامْ
الْأَنَا نَرْضَى بَيَّهْ.
فُكُّوا الْمَسَاجِينْ السَّجَنَوْهُمْ بِظُلُمْ
وَ دَلُّوا التَّقَلَةْ مِنْ رِقَابْهُمْ.
وَ خَلُّوا الْمَظْلُومِينْ يَمْشُوا حُرِّينْ
وَ أَرْفَعَوْا مِنْهُمْ كُلَّ التَّقَلَةْ.
7 وَ وَاجِبْ تِقَسِّمْ أَكْلَكْ مَعَ الْجِيعَانْ
وَ تِسَكِّنْ الْمِسْكِينْ الْمَا عِنْدَهْ بَيْت.
وَ الْعَرْيَانْ، تَكْسِيهْ
وَ مِنْ دَمَّكْ وَ لَحَمَكْ، مَا تِلَّبَّدْ.»
8 «وَ بَيْدَا، نُورَكْ يِبِينْ مِثِلْ ضَيّ الصَّبَاحْ
وَ شِفَاكْ يَبْقَى عَجَلَةْ!
وَ عَدَالْتَكْ تُقُودَكْ
وَ مَجْد اللّٰهْ يَحْفَضَكْ.
9 وَ خَلَاصْ وَكِتْ تِنَادِي،
اللّٰهْ يُرُدّ لَيْك.
وَ وَكِتْ تِكَوْرِكْ لِلْفَزَعْ،
هُو يُقُولْ لَيْك: ‹دَاهُونِي.›
وَ كَنْ تِخَلِّي مِنَّكْ الْمُضَايَقَةْ
وَ الْوَرْوَرَانْ وَ الْكَلَامْ الْفَسِلْ،
10 وَ كَنْ تَنْطِي أَكْلَكْ لِلْجِيعَانْ
وَ تَمْلَا بَطُنْ التَّعْبَانْ،
خَلَاصْ نُورَكْ يِبِينْ فِي الضَّلَامْ
وَ الضَّلَامْ يَبْقَى لَيْك مِثِلْ ضَيّ الْقَايْلَةْ.
11 وَ دَايْماً اللّٰهْ يُقُودَكْ
وَ يَشْبِعَكْ فِي الْأَرْض الْجَفَافْ وَ يِقَوِّيكْ.
وَ إِنْتَ تَبْقَى مِثِلْ جِنَيْنَةْ الْمَزْقِيَّةْ
وَ مِثِلْ عَيْن أَلْمِي الدَّايْماً جَارِيَةْ.
12 وَ بِسَبَبَكْ إِنْتَ،
النَّاسْ يَبْنُوا الْمُهَدَّمْ مِنْ زَمَانْ.
وَ إِنْتَ تَبْنِي بَتَّانْ
فِي الْأَسَاسْ هَنَا الذُّرِّيَّاتْ الْفَاتَوْا.
النَّاسْ يِنَادُوكْ سَدَّادْ الْخُرَمْ
وَ عَدَّالْ شَوَارِعْ الْمَدِينَةْ لِيَسْكُنُوهَا.»
يوم السبْت للّه
13 «كَنْ إِنْتَ مَا تَخْدِمْ فِي يَوْم السَّبْت
وَ مَا تِسَوِّي شَيّءْ لِمَصْلَحَتَكْ فِي الْيَوْم الْمُخَصَّصْ،
وَ كَنْ تِنَادِي السَّبْت يَوْم هَنَا فَرَحْ
وَ تَجْعَلْ يَوْم اللّٰهْ يَوْم مُخَصَّصْ،
وَ كَنْ تِكَرِّمَهْ وَ مَا تِسَوِّي أَيِّ شَيّءْ حَسَبْ نِيّتَكْ
وَ مَا تِفَتِّشْ مَصْلَحَتَكْ وَ لَا تِكَلِّمْ كَلَامْ فَسِلْ،
14 خَلَاصْ، مَعَايِ أَنَا اللّٰهْ،
تَلْقَى الْفَرَحْ
وَ نِوَدِّيكْ بِالنَّصُرْ
فِي الْبَكَانَاتْ الْعَالِيِينْ هَنَا الْبَلَدْ.
نَنْطِيكْ مَعَاشْ
مِنْ أَرْض وَرَثَةْ جِدَّكْ يَعْقُوبْ.»
وَ دَا كَلَامْ اللّٰهْ الْقَالَهْ.
© La Bible en arabe tchadien © Alliance biblique du Tchad, 2019
