يَحَاز بِقي ملك في يَهُوذَا
1 وَ شَعَبْ الْبَلَدْ شَالَوْه لِيَحَازْ وِلَيْد يُوشِيَّا وَ دَرَّجَوْه مَلِكْ فِي مَدِينَةْ الْقُدُسْ فِي بَدَلْ أَبُوهْ. 2 وَ يَحَازْ عِنْدَهْ 23 سَنَةْ وَكِتْ بِقِي مَلِكْ وَ حَكَمْ تَلَاتَةْ شَهَرْ فِي مَدِينَةْ الْقُدُسْ. 3 وَ نَكُو مَلِكْ مَصِرْ نَزَّلَهْ مِنْ حُكْمَهْ فِي مَدِينَةْ الْقُدُسْ. وَ زِيَادَةْ مِنْ دَا، هُو جَبَرَاهُمْ لِنَاسْ مَمْلَكَةْ يَهُوذَا يِكَفُّوا لَيَّهْ مِيرِي هَنَا 3 400 كِيلَوْ هَنَا فُضَّةْ وَ 3 400 كِيلَوْ هَنَا دَهَبْ. 4 وَ الْمَلِكْ نَكُو دَرَّجْ أَلِيَاقِيمْ أَخُو يَحَازْ مَلِكْ فِي بَلَدْ يَهُوذَا وَ مَدِينَةْ الْقُدُسْ وَ غَيَّرْ أُسْمَهْ وَ سَمَّاهْ يَهُويَقِمْ. وَ كَنْ لِيَحَازْ الْمَسْجُونْ كَمَانْ، الْمَلِكْ نَكُو شَالَهْ وَ وَدَّاهْ مَصِرْ.
يَهُويَقِم بِقي ملك في يَهُوذَا
5 وَ يَهُويَقِمْ عِنْدَهْ 25 سَنَةْ وَكِتْ بِقِي مَلِكْ وَ حَكَمْ 11 سَنَةْ فِي مَدِينَةْ الْقُدُسْ. وَ هُو سَوَّى الْفَسَالَةْ قِدَّامْ اللّٰهْ إِلٰـهَهْ. 6 وَ فِي وَكِتْ حُكْمَهْ، نَبُوخَدْنَصَرْ مَلِكْ بَابِلْ جَاءْ هَجَمَهْ لِيَهُويَقِمْ وَ كَرَبَهْ وَ جَنْزَرَهْ بِجِنْزِيرْ هَنَا نَحَاسْ مَطْبُوقْ وَ وَدَّاهْ بَابِلْ. 7 وَ نَبُوخَدْنَصَرْ وَدَّى فِي بَابِلْ مُعِدَّاتْ وَاحِدِينْ مِنْ بَيْت اللّٰهْ وَ خَطَّاهُمْ فِي قَصْرَهْ فِي بَابِلْ. 8 وَ الْبَاقِي مِنْ عَمَلْ يَهُويَقِمْ وَ كُلَّ الْمُحَرَّمَاتْ السَّوَّاهُمْ وَ كُلَّ الشَّيّءْ الْكَانْ لَيَّهْ، كُلَّ الشَّيّءْ دَا مَكْتُوبْ فِي كِتَابْ مُلُوكْ بَنِي إِسْرَائِيلْ وَ بَنِي يَهُوذَا. وَ وِلَيْدَهْ يُيَكِينْ حَكَمْ فِي بَدَلَهْ.
يُيَكِين بِقي ملك في يَهُوذَا
9 وَ يُيَكِينْ عِنْدَهْ 8 سَنَةْ وَكِتْ بِقِي مَلِكْ وَ حَكَمْ تَلَاتَةْ شَهَرْ وَ عَشَرَةْ يَوْم فِي مَدِينَةْ الْقُدُسْ. وَ هُو سَوَّى الْفَسَالَةْ قِدَّامْ اللّٰهْ. 10 وَ فِي السَّنَةْ الْجَدِيدَةْ، الْمَلِكْ نَبُوخَدْنَصَرْ رَسَّلْ نَاسْ وَ شَالَوْا يُيَكِينْ وَ خُمَامْ غَالِيِّينْ مِنْ بَيْت اللّٰهْ وَ وَدَّوْهُمْ بَابِلْ. وَ دَرَّجْ صِدْقِيَّا قَرِيبَهْ لِيُيَكِينْ مَلِكْ فِي بَلَدْ يَهُوذَا وَ مَدِينَةْ الْقُدُسْ.
صِدْقِيَّا آخِر ملك في يَهُوذَا
11 وَ صِدْقِيَّا عِنْدَهْ 21 سَنَةْ وَكِتْ بِقِي مَلِكْ وَ حَكَمْ 11 سَنَةْ فِي مَدِينَةْ الْقُدُسْ. 12 وَ هُو سَوَّى الْفَسَالَةْ قِدَّامْ اللّٰهْ إِلٰـهَهْ. وَ أَبَى مَا يِمَسْكِنْ نَفْسَهْ قِدَّامْ النَّبِي إِرْمِيَا وَكِتْ هُو قَاعِدْ يِحَجِّي لَيَّهْ بِكَلَامْ جَايِ مِنْ اللّٰهْ. 13 وَ الْمَلِكْ نَبُوخَدْنَصَرْ حَلَّفَهْ بِسَمَاءْ وَ بَيْدَا كُلَ، صِدْقِيَّا قَمَّ أَتْمَرَّدْ ضِدَّهْ. وَ قَوَّى رَاسَهْ وَ أَبَى مَا يَسْمَعْ وَ لَا يِقَبِّلْ لِلّٰهْ إِلٰـهْ بَنِي إِسْرَائِيلْ.
14 وَ زِيَادَةْ مِنْ دَا، كُلَّ كُبَارَاتْ رُجَالْ الدِّينْ وَ كُبَارَاتْ الشَّعَبْ عِصَوْا مَرَّةْ وَاحِدْ. سَوَّوْا نَفْس الْمُحَرَّمَاتْ السَّوَّوْهُمْ الْأُمَمْ الْآخَرِينْ وَ نَجَّسَوْا بَيْت اللّٰهْ الْهُو قَدَّسَهْ فِي مَدِينَةْ الْقُدُسْ. 15 وَ اللّٰهْ رَبّ جُدُودْهُمْ رَسَّلْ لَيْهُمْ تَحْذِيرْ دَايْماً بِخُشُومْ الْمُرَسَّلِينْ أَشَانْ هُو حَنَّ فِي شَعَبَهْ وَ فِي مَسْكَنَهْ. 16 وَ لَاكِنْ شَعَبَهْ قَاعِدِينْ يِشَّمَّتَوْا لِمُرَسَّلِينْ الرَّبّ وَ يَنْكُرُوا كَلَامَهْ وَ يَضْحَكَوْا فِي الْأَنْبِيَاء دَوْل لَحَدِّي غَضَبْ اللّٰهْ نَزَلْ فَوْقهُمْ وَ لِحِقَاهُمْ وَ مَا نِجَوْا مِنَّهْ.
نِهاية مملكة يَهُوذَا
17 وَ خَلَاصْ، نَبُوخَدْنَصَرْ مَلِكْ بَابِلْ جَاءْ وَ كَتَلْ صُبْيَانْهُمْ فِي لُبّ الْبَيْت الْمُقَدَّسْ. وَ مَا حَنَّ فِي نَادُمْ وَ لَا فِي صَبِي وَ لَا فِي صَبِيَّةْ وَ لَا فِي كَبِيرْ وَ لَا شَايِبْ. كُلُّهُمْ كَيْ اللّٰهْ سَلَّمَاهُمْ لَيَّهْ. 18 وَ نَبُوخَدْنَصَرْ شَالْ كُلَّ الْمُعِدَّاتْ هَنَا بَيْت اللّٰهْ، كُبَارْ وَ دُقَاقْ، وَ كُلَّ الْكَنْز مِنْ بَيْت اللّٰهْ وَ مِنْ قَصِرْ الْمَلِكْ وَ مِنْ بُيُوتْ كُبَارَاتَهْ. وَ وَدَّى كُلَّ الْخُمَامْ دَا فِي بَابِلْ. 19 وَ حَرَّقَوْا بَيْت اللّٰهْ وَ هَدَّمَوْا دُرْدُرْ مَدِينَةْ الْقُدُسْ وَ تَشَّوْا كُلَّ قُصُورْهَا وَ دَمَّرَوْا كُلَّ الْخُمَامْ الْغَالِيِّينْ. 20 وَ بَعَدْ دَا، وَدَّى فِي الْغُرْبَةْ فِي بَابِلْ كُلَّ النَّاسْ الْفَضَّلَوْا مِنْ الْكَتِلْ. وَ هُو سَوَّاهُمْ عَبِيدْ لَيَّهْ هُو وَ لِعِيَالَهْ لَحَدِّي مُلُوكْ بَلَدْ فَارِسْ جَوْا شَالَوْا مِنْهُمْ الْحُكُمْ.
21 وَ بِمِثِلْ دَا، كَلَامْ اللّٰهْ أَلْحَقَّقْ مِثِلْ قَالَهْ بِخَشُمْ النَّبِي إِرْمِيَا. هُو قَالْ: «الْبَلَدْ يِخَلُّوهَا لِمُدَّةْ 70 سَنَةْ لَحَدِّي يِتِمُّوا الْأَيَّامْ الْهِي تِنْجَمَّ فَوْقهُمْ. وَ بَيْدَا، يِكَفُّوا كُلَّ أَيَّامْ السَّبْت الْهُمَّنْ مَا أَحْتَرَمَوْهُمْ.»
كُورَش قبّل ناس يَهُوذَا
22 وَ فِي السَّنَةْ الْأَوَّلْ هَنَا حُكُمْ كُورَشْ مَلِكْ بَلَدْ فَارِسْ، اللّٰهْ قَمَّ لِيِحَقِّقْ كَلَامَهْ الْأَوَّلْ قَالَهْ بِخَشُمْ النَّبِي إِرْمِيَا. وَ اللّٰهْ أَنْطَى فِكِرْ لِكُورَشْ مَلِكْ بَلَدْ فَارِسْ. وَ بَيْدَا، كُورَشْ قَرَّرْ فِي كُلَّ مَمْلَكَتَهْ وَ كَتَبْ مَكْتُوبْ وَ قَالْ: 23 «دَاهُو كَلَامِي أَنَا كُورَشْ مَلِكْ بَلَدْ فَارِسْ. نُقُولْ لَيْكُو: ‹اللّٰهْ رَبّ السَّمَاوَاتْ أَنْطَانِي كُلَّ مَمَالِكْ الْأَرْض وَ كَلَّفَانِي أَشَانْ نَبْنِي لَيَّهْ بَيْت فِي مَدِينَةْ الْقُدُسْ فِي بَلَدْ يَهُوذَا. خَلِّي أَيِّ نَادُمْ مِنْ شَعَبَهْ يِقَبِّلْ بَلَدَهْ. وَ اللّٰهْ إِلٰـهَهْ يُكُونْ مَعَايَهْ.›»
© La Bible en arabe tchadien © Alliance biblique du Tchad, 2019
