مُساعدة نَحَمْيا للناس
1 وَ فِي الْوَكِتْ دَاكْ، نَاسْ وَاحِدِينْ وَ عَوِينْهُمْ قَدَّمَوْا شَكْوَةْ ضِدّ أَخْوَانْهُمْ الْيَهُودْ. 2 وَ وَاحِدِينْ مِنْهُمْ قَالَوْا: «أَنِحْنَ وَ أَوْلَادْنَا وَ بَنَاتْنَا كَتِيرِينْ. نِدَوْرُوا قَمَحْ أَشَانْ نِعِيشُوا.» 3 وَ وَاحِدِينْ قَالَوْا: «زِرَاعِتْنَا وَ جِنَيْنَاتْنَا هَنَا الْعِنَبْ وَ بُيُوتْنَا بِقَوْا ضَمَانَةْ لِلْقَمَحْ الشِّلْنَاهْ أَشَانْ نِعِيشُوا بَيَّهْ فِي وَكْت الْجُوعْ دَا.» 4 وَ آخَرِينْ كَمَانْ قَالَوْا: «أَنِحْنَ شِلْنَا دَيْن أَشَانْ نَنْطُوا لِلْمَلِكْ الْمِيرِي الْوَاجِبْ نِكَفُّوهْ لِزِرَاعِتْنَا وَ جِنَيْنَاتْنَا هَنَا الْعِنَبْ. 5 لَاكِنْ أَنِحْنَ كُلَ مِثِلْ أَخْوَانَّا الْآخَرِينْ، عِيَالْنَا كُلَ مِثِلْ عِيَالْهُمْ. الْقُوءْ بَسْ خَلَّانَا نِبِيعُوا أَوْلَادْنَا وَ بَنَاتْنَا أَشَانْ يِسَوُّوهُمْ عَبِيدْ. وَ وَاحِدَاتْ مِنْ بَنَاتْنَا هَسَّعْ كُلَ قَاعِدَاتْ خَدِيمْ وَ مَا نَقْدَرَوْا نِسَوُّوا شَيّءْ أَشَانْ زِرَاعِتْنَا وَ جِنَيْنَاتْنَا بِعْنَاهُمْ خَلَاصْ.»
6 وَ وَكِتْ أَنَا سِمِعْت شَكْوِتْهُمْ دِي، زِعِلْت مَرَّةْ وَاحِدْ. 7 أَنَا فَكَّرْت فِي كَلَامْهُمْ دَا بِزِيَادَةْ وَ هَرَجْت الْكُبَارَاتْ وَ الْمَسْؤُولِينْ وَ قُلْت لَيْهُمْ: «إِنْتُو قَاعِدِينْ تَظُلْمُوا أَخْوَانْكُو وَ تِشِيلُوا مِنْهُمْ رِبَا بِزِيَادَةْ!»
وَ بَعَدْ دَا، أَنَا نَادَيْتهُمْ فِي مَلَمَّةْ كَبِيرَةْ 8 وَ قُلْت لَيْهُمْ: «أَنِحْنَ بِقُدْرِتْنَا قِدِرْنَا فَدَيْنَا أَخْوَانَّا الْيَهُودْ الْبَاعَوْهُمْ عَبِيدْ لِلْأُمَمْ الْآخَرِينْ. وَ هَسَّعْ، إِنْتُو ذَاتْكُو قَاعِدِينْ تِبِيعُوا أَخْوَانْكُو عَبِيدْ لِقَبِيلِتْنَا!» وَ هُمَّنْ سَكَتَوْا وَ مَا قِدْرَوْا قَالَوْا شَيّءْ وَاحِدْ كُلَ. 9 وَ أَنَا بَتَّانْ قُلْت لَيْهُمْ: «السَّوَّيْتُوهْ دَا مَا عَدِيلْ مَرَّةْ وَاحِدْ. مَا أَخَيْر تُرُوغُوا بِخَوْف هَنَا إِلٰـهْنَا فِي قُلُوبْكُو وَلَّا؟ بَيْدَا، عُدْوَانَّا الْمِنْ أُمَمْ آخَرِينْ مَا يِشَّمَّتَوْا لَيْنَا. 10 أَنَا وَ أَخْوَانِي وَ الرُّجَالْ الْقَاعِدِينْ مَعَايِ، أَنِحْنَ كُلَ دَيَّنَّاهُمْ قُرُسْ وَ قَمَحْ. هَسَّعْ دَا، الدَّيْن خَلِّي نِخَلُّوهْ لَيْهُمْ. 11 الْيَوْم بَسْ، إِنْتُو كُلَ قَبُّلُوا لَيْهُمْ زِرَاعِتْهُمْ وَ جِنَيْنَاتْهُمْ هَنَا الْعِنَبْ وَ الزَّيْتُونْ وَ بُيُوتْهُمْ كُلَ. وَ بَتَّانْ كَنْ دَيَّنْتُوهُمْ قُرُسْ أَوْ قَمَحْ أَوْ خَمَرْ هَنَا عِنَبْ أَوْ دِهِنْ، كَنْ الرِّبِحْ التِّشِيلُوهْ مِنْهُمْ وَاحِدْ فِي الْمِيَةْ دَا كُلَ، سَامُحُوهْ لَيْهُمْ.» 12 وَ هُمَّنْ قَالَوْا: «تَمَامْ، نِقَبُّلُوهْ لَيْهُمْ وَ مَا نِشِيلُوا مِنْهُمْ شَيّءْ وَاحِدْ كُلَ بَتَّانْ وَ نِسَوُّوا مِثِلْ إِنْتَ قُلْتَهْ.»
وَ مِثِلْ دَا، أَنَا نَادَيْت كُبَارَاتْ رُجَالْ الدِّينْ لِنَحَلِّفْ قِدَّامْهُمْ النَّاسْ الْأَنْطَوْا دَيْن أَشَانْ يِطَبُّقُوا كَلَامْهُمْ الْقَالَوْه. 13 وَ حَتَّيْت خَلَقِي وَ قُلْت: «مِثِلْ أَنَا حَتَّيْت خَلَقِي، خَلِّي الرَّبّ كُلَ يَطْرُدْ النَّادُمْ الْمَا يِطَبِّقْ كَلَامَهْ. هُو يَطُرْدَهْ مِنْ بَيْتَهْ وَ مِنْ مَالَهْ وَ النَّادُمْ دَا يَبْقَى مَطْرُودْ مَرَّةْ وَاحِدْ وَ يَقْعُدْ تَعْبَانْ.» وَ كُلَّ النَّاسْ الْقَاعِدِينْ قَالَوْا آمِينْ وَ حَمَدَوْا اللّٰهْ. وَ خَلَاصْ، طَبَّقَوْا كَلَامْهُمْ الْقَالَوْه.
14 وَ مِنْ يَوْم الْمَلِكْ أَرْتَحَشْتَا خَطَّانِي حَاكِمْ فِي بَلَدْ يَهُوذَا، عِنْدِي 12 سَنَةْ. وَ دَا مِنْ سَنِةْ 20 هَنَا مُلْكَهْ لَحَدِّي سَنِةْ 32. وَ فِي الْوَكِتْ دَا، وَ لَا أَنَا وَ لَا أَخْوَانِي، الشَّيّءْ الْوَاجِبْ لِلْحَاكِمْ كُلَ، أَنِحْنَ مَا شِلْنَاهْ. 15 لَاكِنْ الْحُكَّامْ الْحَكَمَوْا قُبَّالِي، هُمَّنْ سَوَّوْا حُكُمْهُمْ تَقِيلْ لِلشَّعَبْ. شَالَوْا مِنْ أَيِّ وَاحِدْ أَكِلْ وَ خَمَرْ هَنَا عِنَبْ وَ 40 حَجَرْ فُضَّةْ. وَ الْمُسَاعِدِينْ هَنَا الْحُكَّامْ دَوْل كُلَ ضَايَقَوْا الشَّعَبْ. أَنَا كَمَانْ مَا سَوَّيْت مِثِلْ دَا أَشَانْ نَخَافْ الرَّبّ. 16 وَ بَيْدَا، مَا شَرَيْت تُرَابْ لِنَفْسِي وَ سَوَّيْت خِدِمْتِي هَنَا بُنَى الدُّرْدُرْ وَ نَاسِي كُلُّهُمْ قَاعِدِينْ يَخْدُمُوا مَعَايِ. 17 كُبَارَاتْ الْيَهُودْ الْقَاعِدِينْ يَاكُلُوا فِي بَكَانِي، هُمَّنْ 150 وَ بَتَّانْ مِنْ الْأُمَمْ الْآخَرِينْ الْقَاعِدِينْ جَنْبِنَا كُلَ، فِي نَاسْ بَجُونَا. 18 كُلَّ يَوْم، بَدْبَحَوْا لَيْنَا تَوْر وَ سِتَّةْ كُبْشَانْ سُمَانْ وَ جِدَادْ. وَ كُلَّ مَا عَشَرَةْ يَوْم، بِجِيبُوا خَمَرْ هَنَا عِنَبْ كَتِيرْ. لَاكِنْ بَيْدَا كُلَ، أَنَا مَا دَوَّرْت الْوَاجِبْ لِلْحَاكِمْ مِنْ الشَّعَبْ أَشَانْ بَلَا دَا كُلَ، تَعَبْ الْخِدْمَةْ بِقِي لَيْهُمْ تَقِيلْ.
19 هَسَّعْ دَا، يَا إِلٰـهِي، فَكِّرْ فِي كُلَّ شَيّءْ سَمَحْ الْأَنَا سَوَّيْتَهْ لِلشَّعَبْ وَ سَوِّي لَيِّ الْخَيْر.
© La Bible en arabe tchadien © Alliance biblique du Tchad, 2019
