الجِسِم السماوي
1 وَ الْجِسِمْ الْعِنْدِنَا وَكِتْ قَاعِدِينْ فِي الْأَرْض، هُو مِثِلْ خَيْمَةْ بَسْ. وَ نَعَرْفُوا كَدَرْ وَكِتْ جِسِمْنَا دَا يُمُوتْ، عِنْدِنَا جِسِمْ آخَرْ الْقَاعِدْ فِي السَّمَاوَاتْ. وَ الْجِسِمْ دَا مِثِلْ بَيْت قَوِي الْاللّٰهْ بَسْ بَنَاهْ. وَ يَقْعُدْ إِلَى الْأَبَدْ وَ مَا مِثِلْ بَيْت الْبَنَوْه النَّاسْ. 2 وَ حَالِيّاً دَا، أَنِحْنَ قَاعِدِينْ نَقُنْتُوا أَشَانْ قَرْمَانِينْ بِلْحَيْن لِبَيْتنَا السَّمَاوِي الْاللّٰهْ يَنْطِيهْ لَيْنَا لِنِعِيشُوا فَوْقَهْ. 3 وَ مِثِلْ دَا، كَنْ لِبِسْنَا الْجِسِمْ الْجَدِيدْ دَا، بَتَّانْ مَا نَبْقَوْا عَرْيَانِينْ بَلَا جِسِمْ. 4 وَ وَكِتْ أَنِحْنَ قَاعِدِينْ فِي الْخَيْمَةْ الْأَرْضِيَّةْ دِي، نَقُنْتُوا مِنْ الْحِمِلْ التَّقِيلْ. وَ دَاهُو الشَّيّءْ النِّدَوْرُوهْ وَ هُو، مَا نَبْقَوْا عَرْيَانِينْ مِنْ الْجِسِمْ الْأَرْضِي لَاكِنْ نِدَوْرُوا نَلْبَسَوْا الْجِسِمْ الْجَدِيدْ. وَ فِي الْبَكَانْ دَا، الْحَيَاةْ الْأَبَدِيَّةْ دِي تَاكُلْ مَرَّةْ وَاحِدْ الْجِسِمْ الْيُمُوتْ. 5 اللّٰهْ ذَاتَهْ جَهَّزَانَا لِلْحَيَاةْ دِي وَ هُو نَزَّلْ فَوْقنَا الرُّوحْ الْقُدُّوسْ أَشَانْ يَبْقَى الْعَلَامَةْ التِّوَصِّفْ كَدَرْ اللّٰهْ يِسَوِّي كُلَّ شَيّءْ الْجَهَّزَهْ لَيْنَا.
6 وَ أَشَانْ دَا، عَشَمْنَا دَايْماً قَوِي. صَحِيحْ نَعَرْفُوا كَدَرْ وَكِتْ أَنِحْنَ سَاكْنِينْ فِي الْجِسِمْ الْأَرْضِي، أَنِحْنَ لِسَّاعْ مَا سَاكْنِينْ فِي بَيْتنَا الصَّحِيحْ الْقَاعِدْ مَعَ رَبِّنَا الْمَسِيحْ. 7 لَاكِنْ نِعِيشُوا حَسَبْ الشَّيّءْ الْأَنِحْنَ مُؤمِنِينْ بَيَّهْ وَ مَا حَسَبْ النِّشِيفُوهْ بِعَيْنَّا. 8 أَيْوَى، عَشَمْنَا قَوِي وَ أَخَيْر لَيْنَا نِخَلُّوا الْجِسِمْ الْأَرْضِي دَا أَشَانْ نَسْكُنُوا مَعَ رَبِّنَا. 9 وَ خَلَاصْ، زِيَادَةْ مِنْ كُلَّ شَيّءْ آخَرْ، نِدَوْرُوا نِسَوُّوا الشَّيّءْ الْيَرْضَى بَيَّهْ رَبِّنَا، كَنْ أَنِحْنَ نَسْكُنُوا فِي الْجِسِمْ الْأَرْضِي وَلَّا نِخَلُّوهْ. 10 أَشَانْ لَابُدَّ أَيِّ وَاحِدْ مِنِّنَا يَقِيفْ قِدَّامْ كُرْسِي مَحْكَمَةْ الْمَسِيحْ. وَ فِي الْبَكَانْ دَا، أَيِّ نَادُمْ يَلْقَى الشَّيّءْ الْوَاجِبْ لَيَّهْ حَسَبْ الْعَمَلْ السَّوَّاهْ وَكِتْ هُو عَايِشْ بِجِسْمَهْ الْأَرْضِي، كَنْ عَمَلَهْ هَنَا خَيْر أَوْ هَنَا شَرّ.
الصُلُح بالمسيح
11 وَ نَعَرْفُوا الْخَوْف مِنْ رَبِّنَا وَ أَشَانْ دَا، نِدَوْرُوا نِجِيبُوا النَّاسْ فِي الدَّرِبْ. اللّٰهْ يَعَرِفْ حَالْنَا مَرَّةْ وَاحِدْ وَ نِتْمَنَّى كَدَرْ إِنْتُو كُلَ تَعَرْفُوهَا فِي قُلُوبْكُو. 12 وَ بَتَّانْ مَا نِدَوْرُوا نِفَاشُرُوا. أَنِحْنَ نِدَوْرُوا نَنْطُوكُو فُرْصَةْ أَشَانْ تِحَجُّوا بَيْنَا رَاسْكُو مَرْفُوعْ وَ تُرُدُّوا لِلنَّاسْ الْقَاعِدِينْ يَرْفَعَوْا رُوسَيْهُمْ بِالشَّيّءْ الْبِنْشَافْ بَسْ وَ مَا بِالشَّيّءْ الْقَاعِدْ فِي الْقَلِبْ. 13 كَنْ صَحِيحْ عَقُلْنَا لَفَّ، دَا فِي شَانْ اللّٰهْ. وَ كَنْ عَقُلْنَا عَافَيْ، دَا لِفَايْدِتْكُو. 14 وَ مَحَبَّةْ الْمَسِيحْ لَيْنَا تَجْبُرْنَا أَشَانْ أَنِحْنَ مُؤَكِّدِينْ كَدَرْ هُو الْوَاحِدْ الْمَاتْ فِي شَانْ كُلَّ النَّاسْ وَ بَيَّهْ هُو بَسْ، كُلُّهُمْ مَاتَوْا. 15 وَ هُو مَاتْ لِكُلَّ النَّاسْ أَشَانْ النَّاسْ الْحَيِّينْ مَا يِعِيشُوا بَتَّانْ لِنُفُوسْهُمْ لَاكِنْ يِعِيشُوا لِلْمَسِيحْ الْمَاتْ وَ بَعَثْ فِي شَانْهُمْ.
16 أَشَانْ دَا، مِنْ الْيَوْم لِقِدَّامْ مَا نِفَكُّرُوا فِي أَيِّ نَادُمْ مِثِلْ النَّاسْ يِفَكُّرُوا فَوْقَهْ. أَوَّلْ أَنِحْنَ فَكَّرْنَا فِي الْمَسِيحْ مِثِلْ النَّاسْ. لَاكِنْ أَبَداً مَا نِفَكُّرُوا فَوْقَهْ بَتَّانْ مِثِلْ دَا. 17 وَ كَنْ أَيِّ نَادُمْ عِنْدَهْ عَلَاقَةْ مَعَ الْمَسِيحْ، هُو بِقِي خَلِيقَةْ جَدِيدَةْ. حَيَاتَهْ الْقَدِيمَةْ فَاتَتْ وَ حَيَاتَهْ الْجَدِيدَةْ بَدَتْ خَلَاصْ.
18 وَ دَا كُلَّ كَيْ، جَايِ مِنْ اللّٰهْ. هُو بَسْ سَوَّى الصُّلُحْ مَعَانَا بِالْمَسِيحْ. وَ الْخِدْمَةْ الْاللّٰهْ كَلَّفَانَا بَيْهَا، هِي بَلِّغِينْ خَبَرْ الصُّلُحْ. 19 وَ مَعَنَاتَهْ اللّٰهْ سَوَّى الصُّلُحْ بِوَاسِطَةْ الْمَسِيحْ. وَ هُو شَالْ نِيَّةْ أَشَانْ مَا يِحَاسِبْ نَاسْ الدُّنْيَا حَسَبْ خَطَايَاهُمْ. وَ كَلَّفَانَا بِبَلِّغِينْ بِشَارَةْ الصُّلُحْ. 20 وَ بِمِثِلْ دَا، أَنَا وَ أَخْوَانِي بِقِينَا سُفَرَاء لِلْمَسِيحْ وَ اللّٰهْ قَاعِدْ يِنَادِيكُو بِلِسَانَّا. وَ خَلَاصْ، نَطُلْبُوا مِنْكُو بِأُسُمْ الْمَسِيحْ، أَصَّالَحَوْا مَعَ اللّٰهْ. 21 وَ الْمَسِيحْ الْأَبَداً مَا أَذْنَبْ، اللّٰهْ جَعَلَهْ ضَحِيَّةْ فِي شَانْ ذُنُوبْنَا أَشَانْ أَنِحْنَ نَبْقَوْا بَيَّهْ شَعَبْ اللّٰهْ الصَّالِحِينْ.
© La Bible en arabe tchadien © Alliance biblique du Tchad, 2019
