زواج البنات العِنْدِهن ورثة
1 وَ كُبَارَاتْ الْعَايِلَاتْ هَنَا خَشُمْ بَيْت قِلْعَادْ وِلَيْد مَكِيرْ وِلَيْد مَنَسَّى مِنْ خُشُومْ بُيُوتْ ذُرِّيَّةْ يُوسُفْ جَوْا قِدَّامْ مُوسَى وَ كُبَارَاتْ الْعَايِلَاتْ هَنَا بَنِي إِسْرَائِيلْ. 2 وَ قَالَوْا: «اللّٰهْ أَمَرَكْ إِنْتَ سَيِّدْنَا مُوسَى تِقَسِّمْ الْبَلَدْ لِبَنِي إِسْرَائِيلْ بِأَمْ عِيَيْدَاتْ. وَ هُو أَمَرَكْ إِنْتَ تَنْطِي وَرَثَةْ أَخُونَا صَلُوفْحَدْ لِبَنَاتَهْ. 3 وَ لَاكِنْ كَنْ الْبَنَاتْ دَيْل يَاخُدَنْ رُجَالْ مِنْ قَبِيلَةْ آخَرَةْ مِنْ قَبَايِلْ بَنِي إِسْرَائِيلْ، وَرَثَتْنَا تَنْقُصْ وَ وَرَثَةْ الْقَبِيلَةْ الْآخَرَةْ تِزِيدْ. وَ بَيْدَا، وَرَثَتْنَا النَّلْقَوْهَا بِأَمْ عِيَيْدَاتْ تَنْقُصْ. 4 وَ فِي سَنِةْ الْحُرِّيَّةْ هَنَا بَنِي إِسْرَائِيلْ، وَرَثَتْهِنْ تِزِيدْ فِي وَرَثَةْ الْقَبِيلَةْ الْهِنَّ مُتَزَوِّجَاتْ فَوْقهَا. وَ بَيْدَا، وَرَثَةْ قَبِيلِتْنَا تَنْقُصْ.»
5 وَ بِأَمُرْ مِنْ اللّٰهْ، مُوسَى قَالْ لِبَنِي إِسْرَائِيلْ: «نَاسْ ذُرِّيَّةْ يُوسُفْ عِنْدُهُمْ حَقّ. 6 وَ دَاهُو كَلَامْ اللّٰهْ فِي سَبَبْ بَنَاتْ صَلُوفْحَدْ. هُو قَالْ: ‹هِنَّ يَاخُدَنْ أَيِّ رَاجِلْ الْيِدَوْرَنَّهْ وَ لَاكِنْ مَا يُكُونْ بَرَّا مِنْ خُشُومْ بُيُوتْ قَبِيلَةْ أَبُوهِنْ. 7 وَ بِمِثِلْ دَا، أَيِّ قَبِيلَةْ مِنْ بَنِي إِسْرَائِيلْ مَا تِشِيلْ وَرَثَةْ هَنَا قَبِيلَةْ آخَرَةْ. وَ أَيِّ نَادُمْ يَكْرُبْ قَوِي وَرَثَةْ قَبِيلَةْ أَبَّهَاتَهْ. 8 أَيِّ بِنَيَّةْ التَّلْقَى وَرَثَةْ فِي وَاحِدَةْ مِنْ قَبَايِلْ بَنِي إِسْرَائِيلْ، مَا تَاخُدْ إِلَّا فِي دَاخَلْ خُشُومْ بُيُوتْ قَبِيلَةْ أَبُوهَا. وَ بَيْدَا، بَنِي إِسْرَائِيلْ يَقْدَرَوْا يَحْفَضَوْا وَرَثَةْ أَبَّهَاتْهُمْ. أَيِّ وَاحِدْ يَحْفَضْ حَقَّهْ. 9 وَ بَيْدَا، الْوَرَثَةْ هَنَا قَبِيلَةْ وَاحِدَةْ مَا يَنْطُوهَا لِقَبِيلَةْ آخَرَةْ وَ لَاكِنْ قَبَايِلْ بَنِي إِسْرَائِيلْ، أَيِّ وَاحِدَةْ تِتْمَسَّكْ بِوَرَثَتْهَا.›»
10 وَ بَنَاتْ صَلُوفْحَدْ سَوَّنْ مِثِلْ اللّٰهْ أَمَرْ بَيَّهْ مُوسَى. 11 وَ بَنَاتْ صَلُوفْحَدْ هِنَّ مَحْلَةْ وَ تِرْصَةْ وَ حُقْلَةْ وَ مِلْكَةْ وَ نُوعَةْ، أَخَدَنْ عِيَالْ عَمَامَيْهِنْ. 12 هِنَّ أَخَدَنْ رُجَالْ مِنْ عَايِلَاتْ مَنَسَّى مِنْ ذُرِّيَّةْ يُوسُفْ. وَ وَرَثَتْهِنْ قَعَدَتْ فِي خَشُمْ بَيْت قَبِيلَةْ أَبُوهِنْ.
13 وَ دَوْل الْوَصَايَا وَ الشُّرُوطْ الْاللّٰهْ أَمَرْ بَيْهُمْ بَنِي إِسْرَائِيلْ بِوَاسِطَةْ مُوسَى فِي كَدَادَةْ مُوَابْ فِي خَشُمْ بَحَرْ الْأُرْدُنْ مُقَابِلْ أَرِيحَا.
© La Bible en arabe tchadien © Alliance biblique du Tchad, 2019
