ناس البلد دحروا بُنى بيت اللّه
1 وَ عُدْوَانْ قَبَايِلْ يَهُوذَا وَ بَنْيَامِينْ سِمْعَوْا كَدَرْ النَّاسْ الْقَبَّلَوْا مِنْ الْغُرْبَةْ قَاعِدِينْ يَبْنُوا بَيْت لِلّٰهْ إِلٰـهْ بَنِي إِسْرَائِيلْ. 2 وَ الْعُدْوَانْ دَوْل مَشَوْا لِزَرُبَابِلْ وَ كُبَارَاتْ عَايِلَاتْ بَنِي إِسْرَائِيلْ وَ قَابَلَوْهُمْ وَ قَالَوْا: «خَلُّونَا نَبْنُوا مَعَاكُو أَشَانْ أَنِحْنَ كُلَ مِثِلْكُو قَاعِدِينْ نَعَبُدُوا إِلٰـهْكُو وَ نِقَدُّمُوا لَيَّهْ ضَحَايَا. وَ دَا مِنْ وَكِتْ أَسَرْ حَدُّونْ مَلِكْ بَلَدْ أَشُورْ جَابَانَا هِنِي.» 3 وَ لَاكِنْ زَرُبَابِلْ وَ يَشُوعْ وَ كُبَارَاتْ آخَرِينْ هَنَا عَايِلَاتْ بَنِي إِسْرَائِيلْ رَدَّوْا لَيْهُمْ وَ قَالَوْا: «أَبَداً مَا تِشَارُكُوا مَعَانَا فِي بُنَى بَيْت إِلٰـهْنَا. أَنِحْنَ وِحَيْدنَا بَسْ نَبْنُوا بَيْت لِلّٰهْ إِلٰـهْ بَنِي إِسْرَائِيلْ مِثِلْ كُورَشْ مَلِكْ بَلَدْ فَارِسْ أَمَرَانَا.»
4 وَ مِثِلْ دَا، نَاسْ الْبَلَدْ قَاعِدِينْ يِكَسُّلُوهُمْ لِشَعَبْ بَنِي يَهُوذَا وَ يِخَوُّفُوهُمْ لِيَدْحَرَوْهُمْ مِنْ الْبُنَى. 5 وَ بَتَّانْ أَجَّرَوْا مُسْتَشَارِينْ ضِدُّهُمْ أَشَانْ يِفَشُّلُوا بَرْنَامِجْهُمْ هَنَا الْبُنَى. وَ دَا مِنْ وَكِتْ حُكُمْ كُورَشْ مَلِكْ بَلَدْ فَارِسْ لَحَدِّي وَكِتْ حُكُمْ دَارِيُوسْ مَلِكْ بَلَدْ فَارِسْ.
جوابات الشكْوة
6 وَ فِي بِدَايَةْ حُكُمْ الْمَلِكْ أَشَوِرُوشْ، عُدْوَانْ الْيَهُودْ كَتَبَوْا لَيَّهْ جَوَابْ شَكْوَةْ ضِدّ نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ. 7 وَ بَتَّانْ فِي أَيَّامْ أَرْتَحَشْتَا مَلِكْ بَلَدْ فَارِسْ، بِشْلَامْ وَ مِتْرَدَاتْ وَ طَبِيلْ وَ رُفْقَانْهُمْ الْآخَرِينْ كُلَ كَتَبَوْا لِلْمَلِكْ جَوَابْ بِاللُّغَّةْ الْأَرَامِيَّةْ وَ تَرْجَمَوْه لَيَّهْ. 8 وَ بَتَّانْ كُلَ، رَحُومْ الْوَالِي وَ شِمْشَايْ كَاتِبْ الْوَالِي كَتَبَوْا جَوَابْ لِلْمَلِكْ أَرْتَحَشْتَا ضِدّ سُكَّانْ مَدِينَةْ الْقُدُسْ وَ قَالَوْا:
9 دَاهُو جَوَابْ هَنَا رَحُومْ الْوَالِي وَ شِمْشَايْ كَاتِبْ الْوَالِي وَ رُفْقَانْهُمْ الْآخَرِينْ الْهُمَّنْ كُبَارَاتْ مَدِينَةْ دِينْ وَ مَدِينَةْ أَفَرْسِتْكَةْ وَ مَدِينَةْ طَرْفِلْ وَ مَدِينَةْ أَفَرْسَةْ وَ مَدِينَةْ أَرَكْ وَ مَدِينَةْ بَابِلْ وَ مَدِينَةْ شُوشَةْ وَ مَدِينَةْ دِيهَةْ وَ مَدِينَةْ عِلَامْ 10 وَ شُعُوبْ آخَرِينْ الْوَدَّاهُمْ الْمَلِكْ أَسْنَفَّرْ الْمَشْهُورْ وَ عَظِيمْ فِي حِلَّالْ بَلَدْ سَامِرَةْ وَ فِي الْمَنْطَقَةْ الْغَرِبْ لِبَحَرْ الْفُرَاتْ.11 وَ دَاهُو الْكَلَامْ النُّقُولُوا لِلْمَلِكْ أَرْتَحَشْتَا. أَنِحْنَ عَبِيدَكْ الْقَاعِدِينْ فِي الْمَنْطَقَةْ الْغَرِبْ لِبَحَرْ الْفُرَاتْ نِخَبُّرُوكْ بِالْكَلَامْ دَا. 12 الْيَهُودْ الْقَبَّلَوْا مِنَّكْ وَ جَوْا لَيْنَا فِي مَدِينَةْ الْقُدُسْ دَوْل قَاعِدِينْ يَبْنُوا بَتَّانْ مَدِينِتْهُمْ الْأَوَّلْ مَعْرُوفَةْ بِسُكَّانْهَا الْمُعَارِضِينْ وَ فَسْلِينْ. هُمَّنْ قَاعِدِينْ يِعَدُّلُوا أَسَاسْ الدُّرْدُرْ الْمُحَوِّقْ الْمَدِينَةْ وَ يِكَمُّلُوهْ. الْخَبَرْ دَا، خَلِّي الْمَلِكْ يَسْمَعَهْ. 13 خَلِّي الْمَلِكْ يُخُطّ فِي عَقْلَهْ كَدَرْ الْمَدِينَةْ دِي كَنْ أَنْبَنَتْ وَ دُرْدُرْهَا كَمَّلَوْه، سُكَّانْ الْمَدِينَةْ دِي بَتَّانْ مَا يِكَفُّوا مِيرِي وَ لَا زَكَاةْ وَ لَا أَيِّ شَيّءْ الْوَاجِبْ يِكَفُّوهْ لِلْمَلِكْ. وَ دَا يِجِيبْ ضَرَرْ فِي صَنْدُوقْ الْمَلِكْ.14 مِنْ أَكَلْنَا وَ شِرِبْنَا مَعَ الْمَلِكْ، أَنِحْنَ مَا نَرْضَوْا لَيَّهْ ضَرَرْ وَ بَيْدَا، مَا نِقَصُّدُوا شَيّءْ فَسِلْ يَجِي لِلْمَلِكْ. وَ فِي شَانْ دَا بَسْ، أَنِحْنَ نَنْطُوكْ الْخَبَرْ دَا 15 أَشَانْ تِفَتِّشْ كُتُبْ الْمُلُوكْ الْقُبَّالَكْ. وَ فِي الْكُتُبْ دَوْل، تَلْقَى وَ تَعَرِفْ كَدَرْ الْمَدِينَةْ دِي مُعَارِضَةْ وَ عِنْدَهَا ضَرَرْ لِلْمَلِكْ وَ لِمَنَاطْقَهْ وَ مِنْ زَمَانْ كُلَ سُكَّانْهَا مُعَارِضِينْ بَسْ. وَ أَشَانْ دَا بَسْ، مَدِينِتْهُمْ أَلْهَدَّمَتْ.16 يَا الْمَلِكْ، أَنِحْنَ نِخَبُّرُوكْ! كَنْ الْيَهُودْ بَنَوْا مَدِينِتْهُمْ دِي وَ دُرْدُرْهَا كُلَ كَمَّلَوْه، إِنْتَ بَتَّانْ مَا عِنْدَكْ حَقّ فِي الْمَنْطَقَةْ الْغَرِبْ لِبَحَرْ الْفُرَاتْ.الملك ردّ في جوابهم
17 وَ بِمِثِلْ دَا، الْمَلِكْ رَدَّ فِي جَوَابْهُمْ وَ قَالْ:
لِرَحُومْ الْوَالِي وَ لِشِمْشَايْ كَاتِبْ الْوَالِي وَ لِرُفْقَانْهُمْ الْآخَرِينْ السَّاكْنِينْ فِي بَلَدْ سَامِرَةْ وَ فِي الْمَنْطَقَةْ الْغَرِبْ لِبَحَرْ الْفُرَاتْ.18 الْجَوَابْ الرَّسَّلْتُوهْ لَيْنَا دَا قَرَوْه وَ تَرْجَمَوْه لَيِّ. 19 أَمَرْنَا نَاسْ لِيِفَتُّشُوا فِي كُتُبْ الْمُلُوكْ وَ هُمَّنْ لِقَوْا كَدَرْ صَحِيحْ كَيْ، الْمَدِينَةْ دِي مِنْ زَمَانْ كُلَ مُعَارِضَةْ ضِدّ الْمُلُوكْ وَ سُكَّانْهَا مُعَارِضِينْ. 20 وَ الْمَدِينَةْ دِي زَمَانْ عِنْدَهَا مُلُوكْ قَوِيِّينْ الْحَكَمَوْا كُلَّ الْمَنْطَقَةْ الْغَرِبْ لِبَحَرْ الْفُرَاتْ وَ النَّاسْ كَفَّوْا لَيْهُمْ الْمِيرِي وَ الزَّكَاةْ وَ أَيِّ شَيّءْ الْوَاجِبْ يِكَفُّوهْ لِلْمَلِكْ. 21 وَ مِثِلْ دَا، أَوْرُوهُمْ لِلنَّاسْ الْقَاعِدِينْ يَبْنُوا أَشَانْ يِخَلُّوا الْبُنَى وَ الْمَدِينَةْ دِي مَا تِنْبَنِي إِلَّا بِإِذْنِي. 22 أَنْقَرْعُوا! مَا تَلْعَبَوْا بِأَمْرِي دَا وَ لَا تِخَلُّوا الْفَسَالَةْ دِي تِزِيدْ وَ تِسَبِّبْ ضَرَرْ فِي صَنْدُوقْ الْمَلِكْ.23 وَ مِنْ قَرَوْا لَيْهُمْ كَلَامْ الْجَوَابْ هَنَا الْمَلِكْ أَرْتَحَشْتَا، رَحُومْ وَ شِمْشَايْ الْكَاتِبْ وَ رُفْقَانْهُمْ مَشَوْا عَجَلَةْ كَيْ لِلْيَهُودْ فِي مَدِينَةْ الْقُدُسْ وَ بِقُوءْ، وَقَّفَوْهُمْ مِنْ الْبُنَى.
24 وَ مِثِلْ دَا، خِدْمَةْ بُنَى بَيْت اللّٰهْ فِي مَدِينَةْ الْقُدُسْ وَقَفَتْ وَ قَاعِدَةْ وَاقْفَةْ لَحَدِّي فِي السَّنَةْ التَّانِيَةْ هَنَا دَارِيُوسْ مَلِكْ بَلَدْ فَارِسْ.
© La Bible en arabe tchadien © Alliance biblique du Tchad, 2019
