يَعْقُوب ماشي مَصِر
1 وَ يَعْقُوبْ قَمَّ مَاشِي مَعَ عَايِلْتَهْ وَ شَالْ كُلَّ خُمَامَهْ. وَ وَكِتْ وِصِلْ فِي حِلَّةْ بِيرْ سَبْعَةْ، قَدَّمْ ضَحِيَّةْ لِلّٰهْ رَبّ أَبُوهْ إِسْحَاقْ. 2 وَ بِاللَّيْل الرَّبّ حَجَّى لِإِسْرَائِيلْ، الْمَعْرُوفْ بِيَعْقُوبْ، فِي رُؤْيَةْ وَ قَالْ: «يَعْقُوبْ، يَعْقُوبْ!» وَ يَعْقُوبْ قَالْ: «نَعَمْ.» 3 وَ الرَّبّ قَالْ: «أَنَا اللّٰهْ رَبّ أَبُوكْ. مَا تَخَافْ مِنْ الْمَشِي فِي مَصِرْ أَشَانْ هِنَاكْ أَنَا نِسَوِّيكْ أَبُو هَنَا أُمَّةْ كَبِيرَةْ. 4 أَنَا بَسْ نِوَدِّيكْ فِي مَصِرْ وَ نِقَبِّلَكْ كُلَ. وَ فِي مَوْتَكْ يُوسُفْ بَسْ يِسِدّ عُيُونَكْ.»
5 وَ خَلَاصْ، يَعْقُوبْ قَمَّ مِنْ حِلَّةْ بِيرْ سَبْعَةْ. وَ عِيَالَهْ رَكَّبَوْه هُو وَ عِيَالْهُمْ وَ عَوِينْهُمْ فِي الْعَرَبَاتْ الْفِرْعَوْن مَلِكْ مَصِرْ رَسَّلَاهُمْ لَيْهُمْ، لِيِسَافُرُوا بَيْهُمْ. 6 وَ وَدَّوْا مَعَاهُمْ بَهَايِمْهُمْ وَ خُمَامْهُمْ اللِّقَوْهُمْ فِي بَلَدْ كَنْعَانْ. وَ يَعْقُوبْ مَشَى فِي مَصِرْ مَعَ كُلَّ ذُرِّيّتَهْ. 7 هُو وَصَّلْ فِي مَصِرْ مَعَ أَوْلَادَهْ وَ أَوْلَادْ عِيَالَهْ وَ بَنَاتَهْ وَ بَنَاتْ عِيَالَهْ وَ كُلَّ ذُرِّيّتَهْ.
عيال لَيْئَة
8 دَاهُو أَسَامَيْ هَنَا عِيَالْ إِسْرَائِيلْ الْمَعْرُوفْ بِيَعْقُوبْ، الْمَشَوْا فِي مَصِرْ.
رَأُوبِينْ هُو بِكِرْ هَنَا يَعْقُوبْ. 9 وَ أَوْلَادْ رَأُوبِينْ هُمَّنْ حَنُوكْ وَ فَلُّو وَ حَصْرُونْ وَ كَرْمِي.10 وَ أَوْلَادْ شِمْعُونْ هُمَّنْ يَمُوِيلْ وَ يَامِينْ وَ أُهَدْ وَ يَاكِينْ وَ صُوحَرْ وَ شَاوُولْ. وَ شَاوُولْ دَا، وِلَيْد يَعْقُوبْ الْوِلْدَتَهْ مَرْتَهْ الْكَنْعَانِيَّةْ.11 وَ أَوْلَادْ لَاوِي هُمَّنْ قِرْشُونْ وَ قَهَاتْ وَ مَرَارِي.12 وَ أَوْلَادْ يَهُوذَا هُمَّنْ عِيرْ وَ أُنَانْ وَ شِيلَى وَ فَارِصْ وَ زَارَحْ. لَاكِنْ عِيرْ وَ أُنَانْ مَاتَوْا فِي بَلَدْ كَنْعَانْ. وَ أَوْلَادْ فَارِصْ هُمَّنْ حَصْرُونْ وَ حَامُلْ.13 وَ أَوْلَادْ يَسَّاكَرْ هُمَّنْ تُولَعْ وَ فُوَّى وَ يُوبْ وَ شِمْرُونْ.14 وَ أَوْلَادْ زَبُلُونْ هُمَّنْ سَارَدْ وَ إِيلُونْ وَ يَحَلِيلْ.15 وَ هُمَّنْ دَوْل ذُرِّيَّةْ يَعْقُوبْ الْجَابَتْهُمْ لَيَّهْ مَرْتَهْ لَيْئَةْ فِي فَدَّانْ أَرَامْ، مَعَ أَخُتْهُمْ دِينَةْ. وَ عَدَدْ أَوْلَادَهْ وَ بَنَاتَهْ كُلُّهُمْ كَيْ 33 نَفِسْ.
عيال زِلْفَة
16 وَ أَوْلَادْ قَادْ هُمَّنْ صِفْيُونْ وَ حَقِّي وَ شُونِي وَ أَصْبُونْ وَ عِيرِي وَ أَرُودِي وَ أَرِيلِي.17 وَ أَوْلَادْ أَشِيرْ هُمَّنْ يِمْنَى وَ يِشْوَا وَ يِشْوِي وَ بَرِيعَا مَعَ أَخُتْهُمْ سَارَحْ. وَ أَوْلَادْ بَرِيعَا هُمَّنْ حَابَرْ وَ مَلْكِيِيلْ.18 وَ هُمَّنْ دَوْل ذُرِّيَّةْ يَعْقُوبْ الْجَابَتْهُمْ لَيَّهْ زِلْفَةْ. وَ عَدَدْهُمْ 16 مَعَ عِيَالْهُمْ. وَ زِلْفَةْ هِي الْخَدَّامَةْ اللَّابَانْ أَنْطَاهَا لِبِنْتَهْ لَيْئَةْ مَرِةْ يَعْقُوبْ.
عيال رَاحِيل
19 وَ أَوْلَادْ رَاحِيلْ مَرِةْ يَعْقُوبْ هُمَّنْ يُوسُفْ وَ بَنْيَامِينْ.20 وَ فِي مَصِرْ، أَسْنَاتْ مَرِةْ يُوسُفْ جَابَتْ لَيَّهْ أَوْلَادْ إِتْنَيْن، هُمَّنْ مَنَسَّى وَ أَفْرَايِمْ. وَ أَسْنَاتْ هِي بِنَيَّةْ فُوطِي فَارَعْ وَ هُو دَا رَاجِلْ الدِّينْ فِي حِلَّةْ أُونْ.21 وَ أَوْلَادْ بَنْيَامِينْ هُمَّنْ بَالَعْ وَ بَاكَرْ وَ أَشْبِيلْ وَ قِيرَا وَ نَعَمَانْ وَ إِيحِي وَ رُوشْ وَ مُفِّيمْ وَ حُفِّيمْ وَ أَرَدْ.22 وَ هُمَّنْ دَوْل ذُرِّيَّةْ يَعْقُوبْ الْجَابَتْهُمْ لَيَّهْ مَرْتَهْ رَاحِيلْ. وَ عَدَدْهُمْ 14 مَعَ عِيَالْهُمْ.
عيال بِلْهَة
23 وَ وِلَيْد دَانْ، هُو حُشِيمْ.24 وَ أَوْلَادْ نَفْتَالِي هُمَّنْ يَحْصِيلْ وَ قُونِي وَ يِصَرْ وَ شِلِّيمْ.25 وَ دَوْل ذُرِّيَّةْ يَعْقُوبْ الْجَابَتْهُمْ لَيَّهْ بِلْهَةْ. وَ عَدَدْهُمْ 7 مَعَ عِيَالْهُمْ. وَ بِلْهَةْ هِي خَدَّامَةْ اللَّابَانْ أَنْطَاهَا لِبِنْتَهْ رَاحِيلْ.
26 وَ عِيَالْ يَعْقُوبْ مَعَ عِيَالْهُمْ الْمَشَوْا مَعَايَهْ فِي مَصِرْ، عَدَدْهُمْ 66 بَلَا عَوِينْهُمْ. 27 وَ بِالْأَوْلَادْ الْإِتْنَيْن هَنَا يُوسُفْ الْوِلْدَوْهُمْ فِي مَصِرْ، عَدَدْ هَنَا عَايِلَةْ يَعْقُوبْ الْمَشَوْا فِي مَصِرْ بِقِي 70.
يَعْقُوب وِصِل في مَصِر
28 وَ يَعْقُوبْ رَسَّلْ يَهُوذَا قِدَّامَهْ لِيِخَبِّرْ يُوسُفْ أَشَانْ يِلَاقِيهْ فِي تُرَابْ قَوْشَنْ. 29 وَ وَكِتْ يَعْقُوبْ وَ عَايِلْتَهْ وَصَّلَوْا فِي قَوْشَنْ، يُوسُفْ جَهَّزْ عَرَبَتَهْ رِكِبْ فَوْقهَا وَ مَشَى لِيِلَاقِي أَبُوهْ. وَ مِنْ يُوسُفْ شَافْ أَبُوهْ، جَرَى حَضَنَهْ وَ بَكَى فَوْقَهْ طَوَّلْ. 30 وَ يَعْقُوبْ قَالْ لَيَّهْ: «هَسَّعْ دَا، مِنْ شِفْتَكْ إِنْتَ لِسَّاعَكْ قَاعِدْ حَيّ دَا، كَنْ أَنَا مُتّْ كُلَ خَلَاصْ!»
31 وَ يُوسُفْ قَالْ لِأَخْوَانَهْ وَ لِنَاسْ بَيْت أَبُوهْ: «نَمْشِي نِخَبِّرْ الْمَلِكْ فِرْعَوْن وَ نُقُولْ لَيَّهْ: ‹أَخْوَانِي وَ كُلَّ عَايِلَةْ أَبُويِ الْقَاعِدِينْ فِي بَلَدْ كَنْعَانْ جَوْا لَيِّ. 32 وَ هُمَّنْ سِيَادْ بَقَرْ وَ غَنَمْ. وَ جَابَوْا بَقَرْهُمْ وَ غَنَمْهُمْ وَ كُلَّ خُمَامْهُمْ.› 33 وَ كَنْ يَوْم وَاحِدْ فِرْعَوْن نَادَاكُو وَ سَأَلَاكُو قَالْ لَيْكُو: ‹إِنْتُو خِدْمِتْكُو شُنُو؟› 34 وَاجِبْ تُقُولُوا لَيَّهْ: ‹أَنِحْنَ عَبِيدَكْ سِيَادْ الْبَهَايِمْ مِنْ أَنِحْنَ دُقَاقْ لَحَدِّي هَسَّعْ، مِثِلْ جُدُودْنَا.› بِمِثِلْ دَا، فِرْعَوْن يِخَلِّيكُو تَسْكُنُوا فِي تُرَابْ قَوْشَنْ أَشَانْ الْمَصْرِيِّينْ يَكْرَهَوْا سِيَادْ الْغَنَمْ.»
© La Bible en arabe tchadien © Alliance biblique du Tchad, 2019
