بُولُس يلْفشّر بضُعُفه
1 الْفَشَارْ دَا مَا عِنْدَهْ فَايْدَةْ لَاكِنْ كَنْ لَابُدَّ نِلْفَشَّرْ، نِحَجِّي بِالرُّؤْيَةْ وَ الْأَسْرَارْ الْاللّٰهْ كَشَفَاهُمْ لَيِّ. 2 أَنَا نَعَرِفْ مُؤمِنْ وَاحِدْ بِالْمَسِيحْ وَ يَوْم وَاحِدْ، قَبُلْ 14 سَنَةْ، هُو أَنْرَفَعْ لَحَدِّي السَّمَاءْ فِي الْعَالِي. كَنْ أَنْرَفَعْ بِجِسْمَهْ وَلَّا بَلَا جِسْمَهْ، دَا مَا نَعَرْفَهْ. إِلَّا اللّٰهْ وِحَيْدَهْ بَسْ يَعَرْفَهْ. 3-4 وَ أَنَا نَعَرِفْ كَدَرْ النَّادُمْ دَا أَنْرَفَعْ فِي الْجَنَّةْ. كَنْ بِجِسْمَهْ وَلَّا بَلَا جِسْمَهْ، دَا مَا نَعَرْفَهْ. إِلَّا اللّٰهْ وِحَيْدَهْ بَسْ يَعَرْفَهْ. وَ هُو سِمِعْ أَسْرَارْ فَايْتِينْ فِكِرْ النَّاسْ وَ مَا فِي إِنْسَانْ عِنْدَهْ إِذِنْ يِحَجِّي بَيْهُمْ.
5 وَ فِي شَانْ نَادُمْ مِثِلْ دَا، نِلْفَشَّرْ لَاكِنْ فِي شَانِي أَنَا، مَا نِلْفَشَّرْ إِلَّا نِحَجِّي بِضُعُفِي. 6 وَ كَنْ نِلْفَشَّرْ كُلَ، أَنَا مَا نَادُمْ الْمَا عِنْدَهْ فِكِرْ أَشَانْ كَلَامِي صَحِيحْ. لَاكِنْ نَابَى مَا نِلْفَشَّرْ أَشَانْ مَا نِدَوْر أَيِّ نَادُمْ يِفَكِّرْ فَوْقِي شَيّءْ زِيَادَةْ مِنْ الشَّافَهْ فِي خِدِمْتِي بِعَيْنَهْ وَ سِمْعَهْ مِنِّي بِأَدَانَهْ.
7 أَكِيدْ، أَنَا شِفْت رُؤْيَةْ عَجِيبَةْ بِلْحَيْن وَ اللّٰهْ مَا يِدَوْر أَنَا نِسْتَكْبَرْ بِسَبَبْهَا. وَ أَشَانْ دَا، اللّٰهْ أَنْطَانِي شَيّءْ وَاحِدْ الْقَاعِدْ يِتَعِّبْنِي مِثِلْ شَوْك فِي لَحَمِي وَ مِثِلْ مُرْسَالْ هَنَا الشَّيْطَانْ الْقَاعِدْ يُدُقِّنِي. وَ أَنْطَانِي التَّعَبْ دَا أَشَانْ مَا نِسْتَكْبَرْ. 8 وَ تَلَاتَةْ مَرَّاتْ، أَنَا دَعَيْت رَبِّنَا عِيسَى وَ شَحَدْتَهْ أَشَانْ يَرْفَعَهْ مِنِّي. 9 وَ لَاكِنْ هُو رَدَّ لَيِّ وَ قَالْ: «رَحْمَتِي تَكْفِي لَيْك. قُدُرْتِي تَبْقَى كَامِلَةْ فِي النَّادُمْ الضَّعِيفْ.» أَشَانْ دَا، نِلْفَشَّرْ بِفَرَحْ زِيَادَةْ وَكِتْ أَنَا ضَعِيفْ أَشَانْ قُدْرَةْ الْمَسِيحْ تَثْبِتْ فَوْقِي. 10 أَشَانْ دَا، أَنَا نَفْرَحْ وَكِتْ أَنَا ضَعِيفْ وَ وَكِتْ يِعَيُّرُونِي وَ يِتَعُّبُونِي وَ يِعَذُّبُونِي وَ يِضَايُقُونِي فِي شَانْ أَنَا قَاعِدْ نِتَابِعْ الْمَسِيحْ. أَشَانْ وَكِتْ مَا عِنْدِي قُدْرَةْ، فِي الْبَكَانْ دَا بَسْ، الْقُدْرَةْ تَقْعُدْ فَوْقِي.
11 خَلَاصْ، أَنَا حَجَّيْت لَيْكُو مِثِلْ نَادُمْ الْمَا عِنْدَهْ فِكِرْ. إِنْتُو لَزَّيْتُونِي أَشَانْ نُقُولْ الْكَلَامْ دَا. وَ إِنْتُو بَسْ النَّاسْ الْوَاجِبْ يِكَرُّمُونِي أَشَانْ أَنَا مَا صَغَيَّرْ بِأَيِّ شَيّءْ مِنْ الرُّسُلْ الْإِنْتُو تُقُولُوا هُمَّنْ كُبَارْ، كَنْ أَنَا نَادُمْ مَا نَافِعْ كُلَ. 12 إِنْتُو شِفْتُوا الدَّلِيلْ الْيِثَبِّتْ كَدَرْ أَنَا رَسُولْ وَكِتْ خَدَمْت فِي أُسُطْكُو. شِفْتُوا الصَّبُرْ الْقَوِي وَ الْعَلَامَاتْ وَ الْعَجَايِبْ وَ عَمَلْ اللّٰهْ. 13 هَلْ لِقِيتُوا مِنِّي فَايْدَةْ شِيَّةْ نَاقْصَةْ مِنْ الْفَايْدَةْ اللِّقَوْهَا مِنِّي جَمَاعَاتْ الْمُؤمِنِينْ الْفِي بَكَانَاتْ الْآخَرِينْ؟ دَاهُو شَيّءْ وَاحِدْ بَسْ أَنَا مَا سَوَّيْتَهْ وَ هُو، أَنَا مَا كَلَّفْتُكُو بِكُلَّ شَيّءْ النِّحْتَاجْ لَيَّهْ. وَ دَا جَرِيمَةْ. سَامُحُونِي!
الزيارة التالْتة
14 خَلَاصْ، دَاهُونِي جَاهِزْ نَمْشِي لَيْكُو تَالِتْ مَرَّةْ. وَ أَنَا مَا نَبْقَى لَيْكُو تَقِيلْ أَشَانْ النِّدَوْرَهْ مَا مَالْكُو، نِدَوْركُو إِنْتُو. أَشَانْ الْعِيَالْ مَا يُضُمُّوا مَالْ فِي شَانْ وَالْدَيْنهُمْ. الْوَالْدَيْن بَسْ وَاجِبْ يُضُمُّوا مَالْ فِي شَانْ عِيَالْهُمْ. 15 وَ فِي شَانْكُو إِنْتُو، نَنْطِي بِفَرَحْ كُلَّ شَيّءْ الْعِنْدِي وَ نَنْطِي نَفْسِي فِي شَانْكُو بَتَّانْ. كَنْ نِحِبُّكُو كَتِيرْ، هَلْ إِنْتُو تِحِبُّونِي شِيَّةْ وَلَّا؟
16 خَلَاصْ، تُقُولُوا صَحِيحْ أَنَا مَا كَلَّفْتُكُو بِكُلِّ شَيّءْ النِّحْتَاجْ لَيَّهْ. لَاكِنْ وَاحِدِينْ يُقُولُوا أَنَا نَجِيضْ وَ أَكَلْتُكُو بِنَجَاضَةْ. 17 وَ هَلْ شِلْت مِنْكُو شَيّءْ بِوَاسِطَةْ الْأَخْوَانْ الْأَنَا رَسَّلْتُهُمْ لَيْكُو وَلَّا؟ 18 أَنَا طَلَبْت مِنْ تِيطُسْ أَشَانْ يَمْشِي لَيْكُو وَ رَسَّلْت مَعَايَهْ الْأَخُو الْآخَرْ. وَ هَلْ تِيطُسْ شَالْ شَيّءْ مِنْكُو بِغَشّ وَلَّا؟ لَا! حَالَهْ وَ حَالِي سَوَا وَ أَنِحْنَ خَدَمْنَا بِنَفْس الطَّرِيقَةْ.
19 أَكُونْ إِنْتُو تُقُولُوا فِي قُلُوبْكُو فِي طُولْ الْوَكِتْ دَا أَنِحْنَ نِدَافُعُوا لِنُفُوسْنَا قِدَّامْكُو. لَا! مَا كَيْ. نِحَجُّوا لَيْكُو بِأُسُمْ الْمَسِيحْ قِدَّامْ اللّٰهْ. يَا أَخْوَانِي النِّحِبُّوكُو، كُلَّ شَيّءْ السَّوَّيْنَاهْ دَا، هُو فِي شَانْكُو بَسْ أَشَانْ إِيمَانْكُو يَبْقَى قَوِي. 20 وَ هَسَّعْ أَنَا خَايِفْ أَشَانْ وَكِتْ نَجِيكُو، إِنْتُو مَا تُكُونُوا مِثِلْ أَنَا نِدَوْرَهْ وَ أَنَا كَمَانْ مَا نُكُونْ مِثِلْ إِنْتُو تِدَوْرُوهْ. أَكُونْ نَلْقَى أَمْبَيْنَاتْكُو الْهُرَاجْ وَ الْحُسُدْ وَ الزَّعَلْ وَ الْمُخَاصَمَةْ وَ الْبَغَاضَةْ وَ الْقُوَالَةْ وَ الْإِسْتِكْبَارْ وَ الْبَرْجَالْ. 21 أَكُونْ وَكِتْ نَجِيكُو، اللّٰهْ يِجِيبْ لَيِّ بَتَّانْ الْعَيْب قِدَّامْكُو. وَ نَحْزَنْ فِي شَانْ النَّاسْ الْكَتِيرِينْ الْأَوَّلْ أَذْنَبَوْا وَ مَا تَابَوْا مِنْ الْحَالْ الْخَبِيثَةْ وَ الزِّنَى وَ الْفَسَادْ الْأَوَّلْ سَوَّوْهُمْ.
© La Bible en arabe tchadien © Alliance biblique du Tchad, 2019
