مَوْت شَاوُول و يُونَتَان
1 وَ دَاوُدْ حَارَبْ الْعَمَالِقْ وَ أَنَّصَرْ فَوْقهُمْ وَ قَبَّلْ قَعَدْ فِي حِلَّةْ صِقْلَاقْ يَوْمَيْن. وَ دَا بَعَدْ شَاوُولْ مَاتْ خَلَاصْ. 2 وَ فِي الْيَوْم التَّالِتْ، جَاءْ صَبِي وَاحِدْ مِنْ مُعَسْكَرْ شَاوُولْ، خُلْقَانَهْ مُشَرَّطِينْ وَ عِنْدَهْ تُرَابْ فِي رَاسَهْ لِيِوَصِّفْ حِزْنَهْ. وَ وَكِتْ قَرَّبْ لِدَاوُدْ، وَقَعْ فِي الْأَرْض وَ سَجَدْ قِدَّامَهْ. 3 وَ دَاوُدْ سَأَلَهْ وَ قَالْ: «إِنْتَ جَايِ مِنْ وَيْن؟» هُو رَدَّ لَيَّهْ وَ قَالْ: «أَنَا مِنْ مُعَسْكَرْ بَنِي إِسْرَائِيلْ وَ عَرَّدْت مِنْ الْحَرِبْ.» 4 وَ دَاوُدْ قَالْ لَيَّهْ: «شُنُو الْكَانْ هِنَاكْ؟ مِنْ فَضْلَكْ، حَجِّينِي بَيَّهْ.» وَ الصَّبِي رَدَّ لَيَّهْ وَ قَالْ: «عَسْكَرْ بَنِي إِسْرَائِيلْ عَرَّدَوْا مِنْ الْحَرِبْ وَ كَتِيرِينْ مِنْهُمْ مَاتَوْا. وَ شَاوُولْ وَ وِلَيْدَهْ يُونَتَانْ كُلَ مَاتَوْا.»
5 وَ دَاوُدْ قَالْ لِلصَّبِي الْجَابْ لَيَّهْ الْخَبَرْ دَا: «كِكَّيْف إِنْتَ عِرِفْت كَدَرْ شَاوُولْ وَ وِلَيْدَهْ يُونَتَانْ مَاتَوْا؟» 6 وَ الصَّبِي قَالْ: «وَكِتْ أَنَا قَاعِدْ فِي رَاسْ جَبَلْ قِلْبُوعَةْ، شِفْت شَاوُولْ قَاعِدْ يِرَّكَّزْ فِي حَرِبْتَهْ وَ الْعَدُو حَاصَرَهْ بِخَيْل وَ بِعَرَبَاتْ الْحَرِبْ. 7 وَ وَكِتْ شَاوُولْ أَنْلَفَتْ، شَافَانِي وَ نَادَانِي وَ أَنَا قُلْت: ‹نَعَمْ، يَا سِيدِي.› 8 وَ هُو سَأَلَانِي قَالْ: ‹إِنْتَ يَاتُو؟› وَ أَنَا قُلْت: ‹أَنَا عَمَالِقِي.› 9 وَ هُو قَالْ لَيِّ: ‹تَعَالْ قَرِيبْ لَيِّ وَ أَكْتُلْنِي كَنْ رُوحِي مَا مَرَقَتْ كُلَ أَشَانْ أَنَا قَرِيبْ نُمُوتْ.› 10 وَ خَلَاصْ، أَنَا قَرَّبْت لَيَّهْ وَ كَتَلْتَهْ أَشَانْ عِرِفْت كَدَرْ مِنْ وَقَعْ دَا، هُو مَا يِعِيشْ. وَ بَيْدَا، دَاهُو شِلْت التَّاجْ الْفِي رَاسَهْ وَ دِمْلِجْ الْمُلُكْ الْفِي إِيدَهْ وَ جِبْتُهُمْ لَيْك، إِنْتَ سِيدِي.»
11 وَ طَوَّالِي، مِنْ الْحِزِنْ دَاوُدْ قَمَّ شَرَّطْ خَلَقَهْ وَ النَّاسْ الْمَعَايَهْ كُلَ شَرَّطَوْا خُلْقَانْهُمْ. 12 وَ هُمَّنْ بَكَوْا وَ نَاحَوْا وَ صَامَوْا لَحَدِّي الْعَشِيَّةْ فِي شَانْ شَاوُولْ وَ وِلَيْدَهْ يُونَتَانْ وَ شَعَبْ اللّٰهْ وَ كُلَّ بَنِي إِسْرَائِيلْ الْمَاتَوْا فِي الْحَرِبْ.
13 وَ دَاوُدْ قَالْ لِلصَّبِي الْجَابْ لَيَّهْ الْخَبَرْ: «إِنْتَ مِنْ وَيْن؟» وَ هُو رَدَّ وَ قَالْ: «أَنَا وِلَيْد أَجْنَبِي وَاحِدْ عَمَالِقِي.» 14 وَ دَاوُدْ قَالْ لَيَّهْ: «كِكَّيْف إِنْتَ مَا خُفْت وَ رَفَعْت إِيدَكْ وَ كَتَلْت الرَّاجِلْ الْاللّٰهْ مَسَحَهْ وَ دَرَّجَهْ مَلِكْ؟» 15 وَ خَلَاصْ، دَاوُدْ نَادَى وَاحِدْ مِنْ عَسْكَرَهْ وَ قَالْ لَيَّهْ: «أَكْتُلَهْ!»
وَ الْعَسْكَرِي ضَرَبْ الْعَمَالِقِي وَ كَتَلَهْ. 16 وَ وَكِتْ رُوحَهْ قَاعِدَةْ تَمْرُقْ، دَاوُدْ قَالْ لَيَّهْ: «خَلِّي دِمِّتَكْ تَقَعْ فِي رَاسَكْ أَشَانْ إِنْتَ قُلْت بِخَشْمَكْ كَدَرْ إِنْتَ بَسْ كَتَلْت الرَّاجِلْ الْاللّٰهْ مَسَحَهْ وَ دَرَّجَهْ مَلِكْ.»
دَاوُد حِزِن و غنّى
17 وَ خَلَاصْ، دَاوُدْ غَنَّى غِنَيْ هَنَا حِزِنْ لِشَاوُولْ وَ وِلَيْدَهْ يُونَتَانْ. 18 وَ أَمَرْ يِعَلُّمُوهْ لِبَنِي يَهُوذَا. وَ الْغِنَيْ دَا سَمَّوْه غِنَيْ النُّبَّالْ. وَ هُو مَكْتُوبْ فِي كِتَابْ الصَّالِحْ.
19 يَا بَنِي إِسْرَائِيلْ،
مَجْدُكُو دَبَحَوْه فِي رَاسْ الْحَجَرْ.
مَالَا الْفُرَّاسْ دَبَحَوْهُمْ؟
20 مَا تِخَبُّرُوا نَاسْ حِلَّةْ قَاتْ
وَ مَا تِبَلُّغُوهْ فِي شَوَارِعْ حِلَّةْ أَشْقَلُونْ
أَشَانْ بَنَاتْ الْفِلِسْطِيِّينْ مَا يَفْرَحَنْ
وَ لَا بَنَاتْ الْمَا مُطَهَّرِينْ يِفَاشِرَنْ.
21 يَا جَبَلْ قِلْبُوعَةْ،
مَا يَنْزِلْ فَوْقَكْ مَطَرْ
وَ لَا يِبِلَّكْ كَرَنْج
وَ زِرَاعْتَكْ أَبَداً مَا تُقُمّ.
أَشَانْ هِنَاكْ وَسَّخَوْا
دَرَقَةْ الْفُرَّاسْ
وَ دَرَقَةْ شَاوُولْ،
بِدِهِنْ مَا يَمْسَحَوْهَا بَتَّانْ
22 إِلَّا بِدَمّ الدَّبَحَوْهُمْ
وَ بِشَحَمْ فُرَّاسْهُمْ.
نُشَّابْ يُونَتَانْ مَا خِطِي أَبَداً
وَ سَيْف شَاوُولْ أَبَداً مَا رَحَمْ.
23 شَاوُولْ وَ يُونَتَانْ
مَرْيُودِينْ وَ مَحْبُوبِينْ فِي حَيَاتْهُمْ
وَ هُمَّنْ مَا أَنْفَرَقَوْا فِي مَوْتهُمْ.
هُمَّنْ عَجِيلِينْ مِنْ الصُّقُورَةْ
وَ شُدَادْ مِنْ الدِّيدَانْ.
24 يَا بَنَاتْ بَنِي إِسْرَائِيلْ،
أَبْكَنْ لِشَاوُولْ
أَشَانْ هُو لَبَّسَاكَنْ خُلْقَانْ سَمْحِينْ وَ غَالِيِّينْ
وَ مُجَمَّلِينْ بِدَهَبْ.
25 مَالَا الْفُرَّاسْ دَبَحَوْهُمْ فِي الْحَرِبْ؟
وَ مَالَا يُونَتَانْ دَبَحَوْه فِي رَاسْ الْحَجَرْ؟
26 أَنَا حَزْنَانْ لَيْك،
يَا أَخُويِ يُونَتَانْ!
رِدْتَكْ مِنْ كُلَّ قَلْبِي
وَ رَفَقَكْ عَجَبْنِي زِيَادَةْ مِنْ حُبّ الْعَوِينْ.
27 مَالَا الْفُرَّاسْ دَبَحَوْهُمْ؟
وَ مَالَا سِلَاحْهُمْ دَفَّقْ؟
© La Bible en arabe tchadien © Alliance biblique du Tchad, 2019
