1 يَارَيْت، إِنْتَ بِقِيتْ مِثِلْ أَخُويِ
الرَّضَّعَتَكْ أَمِّي فِي دَيْدهَا.
بَيْدَا، كَنْ أَنَا نَلْقَاكْ فِي الشَّارِعْ،
نِحِبَّكْ وَ النَّاسْ مَا يِعَيُّرُونِي.
2 أَنَا نُقُودَكْ وَ نِدِسَّكْ فِي بَيْت أَمِّي
وَ إِنْتَ تِعَلِّمْنِي الْحُبّ.
وَ أَنَا نَزْقِيكْ عَصِيرْ الْعِنَبْ بِحَرَارَهْ
وَ عَصِيرِي هَنَا الرُّمَّانْ.
3 وَ إِيدَهْ الْإِسْرَةْ قَاعِدَةْ تِحِتْ رَاسِي
وَ إِيدَهْ الزَّيْنَةْ حَضَنَتْنِي.
4 يَا بَنَاتْ مَدِينَةْ الْقُدُسْ،
نَحَلِّفْكَنْ مَا تِقَوِّمَنْ
وَ لَا تِوَعَّنْ الْحُبّ قَبُلْ وَكْتَهْ.
كلام البنات
5 يَاتِي الْجَايَةْ مِنْ الصَّحَرَاءْ
مُرَّكِّزَةْ فِي حَبِيبْهَا؟
كلام المحْبوبة
يَا حَبِيبِي، أَنَا قَوَّمْتَكْ
تِحِتْ شَدَرَةْ التُّفَّاحْ.
وَ دَا بَسْ الْبَكَانْ الْأَمَّكْ طَالَقَتْ بَيْك،
الْبَكَانْ الْوِلْدَتَكْ فَوْقَهْ.
6 خُطِّنِي فِي قَلْبَكْ وَ أَخْتِمْ فَوْقَهْ
وَ دِسِّنِي مِثِلْ خَاتِمْ فِي أُصْبَعَكْ.
أَشَانْ الْحُبّ شَدِيدْ مِثِلْ الْمَوْت
وَ الرَّيْدَةْ شَدِيدَةْ مِثِلْ الْقَبُرْ.
وَ نَارْ الْحُبّ
مِثِلْ نَارْ ضَرِبِينْ الرَّعَدْ
وَ لَهِيبْهَا
مِثِلْ أَمْ بَلْبَالَةْ الْجَايَةْ مِنْ اللّٰهْ.
7 نَارْ الْحُبّ،
أَلْمِي الْوُدْيَانْ مَا يَكْتُلْهَا
وَ أَلْمِي السَّيْل مَا يَاكُلْهَا.
الْيَحْسِبْ يِبِيعْ الْحُبّ بِكُلَّ غُنَايَهْ،
يَلْقَى إِلَّا الْعَيْب وَ الْإِهَانَةْ.
كلام الآخرين
8 أَنِحْنَ عِنْدِنَا أَخُتْ صَغَيْرَةْ
وَ دَيْدهَا لِسَّاعْ مَا قَمَّ.
نِسَوُّوا شُنُو لِأَخُتْنَا
قَبُلْ مَا يِشِيلُوهَا عَرُوسْ؟
9 كَنْ هِي مِثِلْ دُرْدُرْ،
نِقَوُّوهَا بِبُيُوتْ مُرَاقَبَةْ هَنَا فُضَّةْ.
وَ كَنْ مِثِلْ بَابْ،
نِقَوُّوهَا بِحَطَبْ الْأَرْز.
كلام المحْبوبة
10 أَنَا مِثِلْ دُرْدُرْ
وَ دُيُودِي مِثِلْ بُيُوتْ الْمُرَاقَبَةْ.
وَ فِي عُيُونْ حَبِيبِي،
أَنَا بَسْ نَبْقَى لَيَّهْ بَكَانْ سَلَامْ.
كلام المحْبوب
11 سُلَيْمَانْ عِنْدَهْ جِنَيْنَةْ عِنَبْ
فِي بَعَلْ هَمُونْ
وَ هُو أَجَّرْهَا لِلتُّجَّارْ
لِيَحْفَضَوْهَا.
وَ هُمَّنْ يِكَفُّوا لَيَّهْ
تَمَنْ فَوَاكِهَّا أَلِفْ حَجَرْ فُضَّةْ.
12 وَ لَيْك إِنْتَ، يَا سُلَيْمَانْ،
الْأَلِفْ حَجَرْ فُضَّةْ.
وَ مِيتَيْن حَجَرْ كَمَانْ،
نَفَاقْ لِتُجَّارْ عِنَبْ جِنَيْنِتَكْ.
وَ لَاكِنْ جِنَيْنِتِي أَنَا،
أَنَا بَسْ نَحْفَضْهَا.
13 إِنْتِ التَّسْكُنِي فِي الْجِنَيْنَةْ،
رَفِيقَاتْكِ سِمْعَنْ حِسِّكِ.
وَ أَنَا كُلَ،
خَلِّينِي نَسْمَعَهْ.
كلام المحْبوبة
14 أَجْرِي تَعَالْ عَجَلَةْ، يَا حَبِيبِي،
وَ أَبْقَى مِثِلْ الْغَزَالْ
وَ مِثِلْ جِدِي الْأَرْيَلْ
فِي جِبَالْ الدُّخَّانْ.
© La Bible en arabe tchadien © Alliance biblique du Tchad, 2019
