قدِّمين السلام
1 نِقَدِّمْ لَيْكُو أَخُتْنَا فِيبَةْ. هِي خَدَّامَةْ فِي جَمَاعَةْ الْمُؤمِنِينْ الْقَاعِدِينْ فِي حِلَّةْ كَنْخِرِيَّةْ. 2 أَقْبَلَوْهَا بِأُسُمْ الرَّبّ وَ ضَيُّفُوهَا بِالضِّيفَةْ الْوَاجْبَةْ لِلنَّاسْ الصَّالِحِينْ. سَاعُدُوهَا فِي أَيِّ شَيّءْ الْهِي تِدَوْرَهْ مِنْكُو أَشَانْ هِي ذَاتْهَا سَاعَدَتْ نَاسْ كَتِيرِينْ وَ سَاعَدَتْنِي أَنَا كُلَ.
3 وَ سَلُّمُوا بِرِسْكِيلَةْ وَ أَكِيلَا الْخَدَمَوْا مَعَايِ سَوَا لِلْمَسِيحْ عِيسَى. 4 وَ هُمَّنْ دَخَلَوْا فِي خُطُورَةْ شَدِيدَةْ أَشَانْ يِنَجُّونِي مِنْ الْمَوْت. وَ كُلَّ جَمَاعَاتْ الْمُؤمِنِينْ الْقَاعِدِينْ فِي أُسْط النَّاسْ الْمَا يَهُودْ قَاعِدِينْ يَشْكُرُوهُمْ مَعَايِ. 5 وَ سَلُّمُوا جَمَاعَةْ الْمُؤمِنِينْ الْيِلِمُّوا فِي بَيْتهُمْ. وَ سَلُّمُوا حَبِيبِي أَبِنَاتُسْ. هُو أَوَّلْ نَادُمْ الْآمَنْ بِالْمَسِيحْ فِي بَلَدْ آسِيَا.
6 وَ سَلُّمُوا مَرْيَمْ الْخَدَمَتْ لَيْكُو كَتِيرْ. 7 وَ سَلُّمُوا أَهَلِي أَنْدَرُونِكِي وَ يُونِيَةْ الْقَعَدْنَا سَوَا مَعَاهُمْ فِي السِّجِنْ. كُلَّ الرُّسُلْ يَعَرْفُوهُمْ وَ يِكَرُّمُوهُمْ. هُمَّنْ مُؤمِنِينْ بِالْمَسِيحْ قُبَّالِي أَنَا. 8 وَ سَلُّمُوا أَمْفِلَاوُسْ، هُو حَبِيبِي فِي الرَّبّ. 9 وَ سَلُّمُوا أُرْبَانْ الْيَخْدِمْ مِثِلْنَا لِلْمَسِيحْ وَ حَبِيبِي إِسْتَخِي.
10 وَ سَلُّمُوا أَفَلِيسْ الْوَصَّفْ ثَبَاتَهْ فِي الْمَسِيحْ. وَ سَلُّمُوا الْأَخْوَانْ فِي بَيْت أَرِسْتُبُولْ. 11 وَ سَلُّمُوا أَخُويِ هِرُودِيُنْ. وَ سَلُّمُوا نَاسْ رَبِّنَا الْقَاعِدِينْ فِي بَيْت نَرْكِيسْ. 12 وَ سَلُّمُوا الْأَخْوَاتْ تَرْفِينَةْ وَ تَرْفُوسَةْ الْيَخْدِمَنْ كَتِيرْ لِلرَّبّ. وَ سَلُّمُوا أَخْتِي النِّرِيدْهَا فَرْسِيَّةْ الْخَدَمَتْ كَتِيرْ بِلْحَيْن لِلرَّبّ. 13 وَ سَلُّمُوا رُوفُسْ، هُو الْعَزَلَهْ الرَّبّ. وَ سَلُّمُوا أَمَّهْ. هِي بِقَتْ مِثِلْ أَمِّي.
14 وَ سَلُّمُوا سِنْكِرَاطْ وَ فِلِغُونْ وَ هَرْمِيسْ وَ بَتْرُوبْ وَ هَرْمَاسْ وَ كُلَّ الْأَخْوَانْ الْمَعَاهُمْ. 15 وَ سَلُّمُوا فِلُلُوغْ وَ جُولِيَةْ وَ نِيرِي وَ أَخْتَهْ وَ أُلُومْبَا وَ كُلَّ الصَّالِحِينْ الْقَاعِدِينْ مَعَاهُمْ. 16 وَ أَسَّالَمَوْا أَمْبَيْنَاتْكُو بِسَلَامْ الصَّالِحِينْ. كُلَّ جَمَاعَاتْ الْمُؤمِنِينْ بِالْمَسِيحْ يِسَلُّمُوكُو.
نِهاية الجواب
17 يَا أَخْوَانِي، نِوَصِّيكُو بِشَيّءْ وَاحِدْ. أَنْقَرْعُوا مِنْ النَّاسْ الْيِعَلُّمُوكُو بِتَعْلِيمْ شِقْ مِنْ التَّعْلِيمْ السِّمِعْتُوهْ أَوَّلْ. النَّاسْ دَوْل يِفَرُّقُوا الْمُؤمِنِينْ بِكَلَامْهُمْ وَ يِتَلُّفُوا إِيمَانْهُمْ. كِسُّوا مِنْهُمْ بَعِيدْ. 18 النَّاسْ الْمِثِلْ دَوْل مَا يَخْدُمُوا لِرَبِّنَا الْمَسِيحْ لَاكِنْ يَخْدُمُوا لِبُطُونْهُمْ بَسْ. يِحَجُّوا لِلنَّاسْ بِكَلَامْ حَلُو وَ يَشْكُرُوهُمْ كَتِيرْ أَشَانْ يُغُشُّوا النَّاسْ الْعِنْدُهُمْ عِلِمْ شِيَّةْ بَسْ. 19 وَ لَيْكُو إِنْتُو، كُلَّ النَّاسْ يَعَرْفُوا إِنْتُو سِمِعْتُوا بِشَارَةْ الْمَسِيحْ وَ تَابَعْتُوهَا. وَ فِي شَانْكُو، أَنَا فَرْحَانْ لَاكِنْ نِدَوْر إِنْتُو تَبْقَوْا فَاهِمِينْ فِي الْخَيْر وَ بَرِيِّينْ مِنْ الشَّرّ. 20 وَ اللّٰهْ رَبّ السَّلَامْ مَا يِأَخِّرْ يَرْحَكْ إِبْلِيسْ تِحِتْ رِجْلَيْكُو.
عَلَيْكُمْ رَحْمَةْ رَبِّنَا عِيسَى.
21 وَ أَخُويِ تِمُوتَاوُسْ الْيَخْدِمْ مَعَايِ سَوَا يِسَلِّمْكُو. وَ أَهَلِي لُوكِيُسْ وَ يَاسُونْ وَ سُوبَاتَرْ كُلَ يِسَلُّمُوكُو. 22 وَ أَنَا تَرْتِيُّسْ الْقَاعِدْ نَكْتِبْ كَلَامْ بُولُسْ فِي الْجَوَابْ دَا، نِسَلِّمْكُو بِأُسُمْ الرَّبّ. 23 وَ غَايُسْ يِسَلِّمْكُو. هُو سِيدْ الْبَيْت الْأَنَا مُضَّيِّفْ فَوْقَهْ. وَ بَيْتَهْ هُو الْبَكَانْ الْيِلِمُّوا فَوْقَهْ جَمَاعَةْ الْمُؤمِنِينْ. وَ رَسْطُسْ وَكِيلْ صَنْدُوقْ هَنَا مَالْ الْحِلَّةْ وَ أَخُونَا كَوَارْتُسْ يِسَلُّمُوكُو.
24 عَلَيْكُو كُلُّكُو نِعْمَةْ رَبِّنَا عِيسَى الْمَسِيحْ. آمِينْ. 25 وَ خَلَاصْ نَشْكُرُوا اللّٰهْ! أَشَانْ هُو يَقْدَرْ يِقَوِّيكُو فِي الْإِيمَانْ بِبِشَارَةْ الْمَسِيحْ النِّجِيبْهَا لَيْكُو وَكِتْ نِبَلِّغْ بِعِيسَى الْمَسِيحْ. وَ بِالْبِشَارَةْ دِي، اللّٰهْ يِعَرِّفْ السِّرّ الْمُلَبَّدْ مِنْ الزَّمَنْ الْفَاتْ. 26 وَ لَاكِنْ هَسَّعْ بَيَّنَهْ خَلَاصْ بِكُتُبْ الْأَنْبِيَاء لِكُلَّ الْأُمَمْ الْمَا يَهُودْ. وَ اللّٰهْ الْحَيّ إِلَى الْأَبَدْ أَنْطَى الْأَمُرْ دَا أَشَانْ كُلَّ الشَّعَبْ يِآمُنُوا بَيَّهْ وَ يِتَابُعُوا كَلَامَهْ. 27 وَ الْحَمْد وَاجِبْ لِلّٰهْ الْوَاحِدْ الْحَكِيمْ، بِأُسُمْ عِيسَى الْمَسِيحْ إِلَى الْأَبَدْ. آمِينْ.
© La Bible en arabe tchadien © Alliance biblique du Tchad, 2019
