عِقاب الشعب البعّدوا من اللّه
1 يَا بَنِي إِسْرَائِيلْ، مَا تَفْرَحَوْا وَ تِنْبَسْطُوا
مِثِلْ الشُّعُوبْ الْآخَرِينْ.
أَشَانْ إِنْتُو بَعَّدْتُوا مِنْ إِلٰـهْكُو وَ أَشَّرْمَطْتُوا
وَ حَبَّيْتُوا أُجْرَةْ الشَّرْمَطَةْ
اللِّقِيتُوهَا فِي كُلَّ مَدَقَّاتْ الْقَمَحْ.
2 لَاكِنْ الْمَدَقّ وَ الْعَصَّارَةْ مَا يِرَبُّوكُو
وَ كَنْ تُخُطُّوا عَشَمْكُو فِي الْخَمَرْ كُلَ، مَا تَلْقَوْه.
3 نَاسْ أَفْرَايِمْ مَا يَسْكُنُوا بَتَّانْ
فِي بَلَدْ اللّٰهْ.
هُمَّنْ يِقَبُّلُوا مَصِرْ
وَ فِي بَلَدْ أَشُورْ كُلَ، يَاكُلُوا أَكِلْ نِجِسْ.
4 بَتَّانْ مَا يِقَدُّمُوا خَمَرْ هَدِيَّةْ شَرَابْ لِلّٰهْ
وَ هُو مَا يَقْبَلْ ضَحَايَاهُمْ.
وَ دَا يَبْقَى لَيْهُمْ مِثِلْ أَكِلْ هَنَا حِزِنْ
وَ الْيَاكُلُوهْ، كُلُّهُمْ يَبْقَوْا نِجْسِينْ.
أَكِلْهُمْ يَمْلَا بُطُونْهُمْ بَسْ
وَ لَاكِنْ مَا يَقْدَرَوْا يِقَدُّمُوهْ فِي بَيْت اللّٰهْ.
5 وَ يِسَوُّوا شُنُو
فِي الْيَوْم الْمُحَدَّدْ،
فِي يَوْم عِيدْ اللّٰهْ؟
6 حَتَّى كَانْ عَرَّدَوْا مِنْ الدَّمَارْ كُلَ،
بَلَدْ مَصِرْ تَجْمَعْهُمْ
وَ حِلَّةْ مَمْفِيسْ تَدْفِنْهُمْ.
الشَّوْك يِسِدّ كَنْزُهُمْ هَنَا الْفُضَّةْ
وَ الْحَسْكَنِيتْ يُقُمّ فِي خِيَمْهُمْ.
7 يَوْم الْعِقَابْ جَاءْ
وَ يَوْم الْحِسَابْ وَصَّلْ.
خَلِّي بَنِي إِسْرَائِيلْ يَعَرْفُوهْ!
هُمَّنْ قَالَوْا: «النَّبِي مُنَافِقْ
وَ النَّادُمْ النَّزَلْ فَوْقَهْ رُوحْ اللّٰهْ دَا، مُشَوْطِنْ.»
خَطَايَاهُمْ بِقَوْا كَتِيرِينْ
وَ عَدَاوِتْهُمْ بِقَتْ شَدِيدَةْ.
8 النَّبِي الْقَاعِدْ مَعَ إِلٰـهِي،
هُو مِثِلْ مُرَاقِبْ فِي نَاسْ أَفْرَايِمْ.
وَ لَاكِنْ يُكُجُّوا لَيَّهْ شَرَكْ فِي كُلَّ دُرُوبَهْ
وَ يِوَجُّهُوهْ بِالْعَدَاوَةْ فِي بَيْت إِلٰـهَهْ.
9 وَ هُمَّنْ سَوَّوْا الْفَسَادْ
مِثِلْ زَمَانْ نَاسْ قِبَيْعَةْ سَوَّوْه.
وَ اللّٰهْ يِذَّكَّرْ خَطَاهُمْ
وَ يِعَاقِبْهُمْ بِسَبَبْ ذُنُوبْهُمْ.
اللّه دحر الوالودة لشعبه
10 «زَمَانْ، أَنَا لِقِيتْ بَنِي إِسْرَائِيلْ
مِثِلْ عِنَبْ لَذِيذْ فِي الصَّحَرَاءْ.
وَ شِفْت جُدُودْهُمْ حَلُوِينْ
مِثِلْ فَوَاكِهْ الْأَوَّلْ فِي شَدَرَةْ التِّينْ.
وَ لَاكِنْ وَكِتْ هُمَّنْ وِصْلَوْا فِي بَعَلْ فَعُورْ،
عَبَدَوْا الصَّنَمْ الْيِجِيبْ الْعَيْب.
وَ بِقَوْا مَكْرُوهِينْ
مِثِلْ الصَّنَمْ الْمُحَرَّمْ الْعَبَدَوْه.
11 وَ شَرَفْ أَفْرَايِمْ
يَبْقَى مِثِلْ طَيْر وَ يِطِيرْ.
مَا فِي بَتَّانْ وَالُودَةْ
وَ لَا غَلَبَةْ وَ لَا حِمِلْ.
12 وَ كَنْ رَبَّوْا عِيَالْ كُلَ،
أَنَا نَكْتُلْهُمْ قَبُلْ مَا يَبْقَوْا كُبَارْ.
أَيْوَى، الْعَذَابْ لَيْهُمْ
وَكِتْ نِبَعِّدْ مِنْهُمْ!
13 زَمَانْ وَكِتْ شِفْت قَبِيلَةْ أَفْرَايِمْ،
هِي تِشَابِهْ نَخَلَايْ الْمَقَّنَوْهَا فِي مَرْعَى أَخْضَرْ.
وَ لَاكِنْ هَسَّعْ،
قَبِيلَةْ أَفْرَايِمْ تَمْرُقْ عِيَالْهَا لِلْكَتِلْ.»
14 يَا اللّٰهْ، تَنْطِيهُمْ شُنُو؟
أَنْطِيهُمْ رِحِمْ الْمَا يَكْرُبْ
وَ دُيُودْ الْمَا يِرَضُّعُوا!
15 «كُلَّ فَسَالِتْهُمْ بَانَتْ فِي حِلَّةْ قِلْقَالْ
وَ فِي الْبَكَانْ دَا بَسْ، أَنَا كِرِهْتُهُمْ.
وَ بِسَبَبْ عَمَلْهُمْ الْفَسِلْ،
أَنَا نَطْرُدْهُمْ مِنْ بَيْتِي.
وَ بَتَّانْ مَا نِحِبُّهُمْ
أَشَانْ كُلَّ كُبَارَاتْهُمْ حَرَامِيِّينْ.
16 نَاسْ أَفْرَايِمْ كَتَلَوْهُمْ
وَ عُرُوقْهُمْ يِبْسَوْا خَلَاصْ
وَ بَتَّانْ مَا يِجِيبُوا عِيَالْ.
وَ كَنْ وِلْدَوْا كُلَ،
أَنَا نَكْتُلْ عِيَالْهُمْ الْغَالِيِّينْ لَيْهُمْ.»
17 إِلٰـهِي يَرْفُضْهُمْ
أَشَانْ هُمَّنْ مَا سِمْعَوْه
وَ يِعِيرُوا فِي أُسْط الْأُمَمْ.
© La Bible en arabe tchadien © Alliance biblique du Tchad, 2019
