مطرة الخراب في السَامِرَة
1 الْعَذَابْ لِمَدِينَةْ السَّامِرَةْ،
هِي مِثِلْ تَاجْ الْإِسْتِكْبَارْ
هَنَا سَكَّارَى أَفْرَايِمْ.
الْعَذَابْ لَيْهَا هِي،
الْجَمَالْهَا وَ زِينِتْهَا
مِثِلْ زُهُورْ الْيَابْسِينْ.
الْمَدِينَةْ دِي فِي رَاسْ الْوَادِي الْأَخْضَرْ،
وَ دَا بَكَانْكُو إِنْتُو الْغِمِرْتُوا مِنْ الْخَمَرْ.
2 دَاهُو يَجِي رَاجِلْ قَادِرْ وَ شَدِيدْ مِنْ الرَّبّ
الْبِشَابِهْ مَطَرَةْ بَرَدْ
وَ رِيحْ شَدِيدَةْ التِّدَمِّرْ.
وَ هُو مِثِلْ مَطَرَةْ الْعِنْدَهَا أَلْمِي شَدِيدْ الْيَغْرِقْ
وَ بِشِدَّةْ، كُلَّ شَيّءْ يِرَقِّدَهْ فِي الْأَرْض.
3 وَ الْمَدِينَةْ الْمِثِلْ تَاجْ الْإِسْتِكْبَارْ
هَنَا سَكَّارَى أَفْرَايِمْ،
هُو يِفَجِّقْهَا تِحِتْ رِجِلَيْنَهْ.
4 وَ الْمَدِينَةْ الْقَاعِدَةْ
فِي رَاسْ الْوَادِي الْأَخْضَرْ،
هِي الْجَمَالْهَا وَ زِينِتْهَا
مِثِلْ زُهُورْ الْيَابْسِينْ،
هِي تَبْقَى مِثِلْ التِّينْ الْيَلْدَ عَجَلَةْ
وَ يَنْجَضْ قُبَّالْ وَكْتَهْ.
الْيِشِيفْهُمْ يِشِيلْهُمْ
وَ يَزْرُطْهُمْ تُشتّ!
5 وَ فِي الْيَوْم دَا، اللّٰهْ الْقَادِرْ
يَبْقَى مِثِلْ تَاجْ جَمِيلْ
وَ كَدْمُولْ هَنَا شَرَفْ
لِلْفَضَّلَوْا مِنْ شَعَبَهْ.
6 وَ اللّٰهْ يَنْطِي رُوحْ الْعَدَالَةْ
لِلْيِسَوُّوا الشَّرِيعَةْ.
وَ يَنْطِي الْقُدْرَةْ لِلْيِحَارُبُوا الْعَدُو
وَ يَدْحَرَوْه مِنْ بِيبَانْ الْمَدِينَةْ.
كلام السكّارى
7 وَ لَاكِنْ النَّاسْ دَوْل،
هُمَّنْ كُلَ يِتَّرْتَعَوْا بِسَبَبْ الْخَمَرْ
وَ يِوَدُّرُوا بِسَبَبْ الْمَرِيسَةْ.
وَ رُجَالْ الدِّينْ وَ الْأَنْبِيَاء
يِتَّرْتَعَوْا بِسَبَبْ الْمَرِيسَةْ
وَ يِبَرْجُلُوا بِسَبَبْ الْخَمَرْ.
وَ يِوَدُّرُوا بِسَبَبْ الْمَرِيسَةْ
وَ يِخَلْبُطُوا الرُّؤْيَةْ
وَ يِتَّرْتَعَوْا فِي الشَّرِيعَةْ.
8 أَيْوَى، كُلَّ الطَّرَابِيزْ مَلَانِينْ
بِالْقَدِيفْ وَ الْوَسَاخَةْ
وَ مَا فِي بَكَانْ وَاحِدْ نَضِيفْ.
9 وَ هُمَّنْ يُقُولُوا:
«لِيَاتُو
إِشَعْيَا يِدَوْر يِوَصِّفْ الْمَعْرَفَةْ؟
وَ لِيَاتُو
يِفَهِّمْ كَلَامَهْ السِّمْعَهْ؟
لِلْأَطْفَالْ الْمَفْرُودِينْ وَلَّا؟
أَيْوَى، لِلْأَطْفَالْ الْخَلَّوْا الرِّضَاعَةْ وَلَّا؟
10 أَسْمَعَوْا، هُو بُقُولْ كَلَامْ بَلَا مَعَنَى:
‹لَا لَا لَا لَا لَا،
دَا دَا دَا دَا دَا،
كَيْ كَيْ كَيْ كَيْ كَيْ.›»
11 تَمَامْ! بِكَلَامْ مَا مَفْهُومْ
وَ بِلِسَانْ مَا مَعْرُوفْ،
الرَّبّ يِحَجِّي لِشَعَبَهْ.
12 هُو قَالْ لَيْهُمْ:
«دَاهُو بَكَانْ الْجُمَّةْ، جُمُّوا الْعَيَّانْ!
وَ دَاهُو بَكَانْ الرَّاحَةْ!»
وَ لَاكِنْ هُمَّنْ
مَا دَوَّرَوْا يَسْمَعَوْه.
13 وَ بَيْدَا، كَلَامْ اللّٰهْ يَبْقَى لَيْهُمْ:
«لَا لَا لَا لَا لَا،
دَا دَا دَا دَا دَا،
كَيْ كَيْ كَيْ كَيْ كَيْ.»
خَلَاصْ وَكِتْ مَاشِينْ،
يَقَعَوْا بِقَفَاهُمْ
وَ يِكَسُّرُوا صَلَبَاهُمْ
وَ يَقَعَوْا فِي شَرَكْ وَ يَكُرْبُوهُمْ.
اللّه خطّ حجر الزاوية
14 وَ فِي شَانْ دَا، أَسْمَعَوْا كَلَامْ اللّٰهْ،
يَا الشَّمَّاتِينْ،
إِنْتُو الْقَاعِدِينْ تَحْكُمُوا فِي الشَّعَبْ دَا فِي مَدِينَةْ الْقُدُسْ.
15 تُقُولُوا: «أَنِحْنَ سَوَّيْنَا عَلَاقَةْ مَعَ الْمَوْت
وَ إِسْتِفَاقْ مَعَ الْقُبُورْ.
وَكِتْ الْوَبَاءْ يِلْوَسَّعْ كُلَ،
مَا يَلْحَقْنَا.
أَشَانْ بِالْكِدِبْ،
سَوَّيْنَا بَكَانْ الْيَحْمِينَا
وَ بِالْغَشّ،
سَوَّيْنَا بَكَانْ الْيِلَبِّدْنَا.»
16 وَ فِي شَانْ دَا، دَاهُو اللّٰهْ الرَّبّ قَالْ:
أَنَا خَطَّيْت حَجَرْ فِي صَهْيُون
وَ دَا حَجَرْ زَاوِيَةْ غَالِي وَ مُجَرَّبْ
لِيِسَوِّي الْأَسَاسْ قَوِي.
وَ أَيِّ نَادُمْ الْيِآمِنْ بَيَّهْ
أَبَداً مَا يَقَعْ.
17 وَ نِسَوِّي الْعَدَالَةْ مِثِلْ مِيزَانْ
وَ الْحَقّ مِثِلْ مِكْيَالْ.
وَ لَاكِنْ الْبَرَدْ يُقُشّ
الْبَكَانْ الْيَحْمِي الْكِدِبْ
وَ أَلْمِي يَغْرِقْ
الْبَكَانْ الْمُلَّبِّدْ فَوْقَهْ الْغَشّ.
18 وَ عَلَاقِتْكُو مَعَ الْمَوْت تَفْشُلْ
وَ إِسْتِفَاقْ مَعَ الْقُبُورْ كُلَ يَبْقَى مَا فِيهْ.
وَ وَكِتْ الْوَبَاءْ يِلْوَسَّعْ،
يَخْرِبْكُو.
19 فِي أَيِّ وَكِتْ هُو يُفُوتْ،
يَكْرُبْكُو
أَشَانْ الْوَبَاءْ يُفُوتْ كُلَّ يَوْم،
فَجُرْ وَ عَشِيَّةْ.
وَ وَكِتْ تَسْمَعَوْا بِخَبَرَهْ،
خَوْف شَدِيدْ يَكْرُبْكُو.
20 وَ دَا مِثِلْ الْمَثَلْ الْبُقُولْ:
«السَّرِيرْ يَبْقَى قِصَيِّرْ لِلْمَطِّطِينْ
وَ الْغَطَّايْ تَبْقَى ضَيْقَةْ لِلْغِطَاءْ.»
تحْذير للشمّاتين
21 بِأَكِيدْ، اللّٰهْ يُقُمّ
مِثِلْ قَمَّ فِي جَبَلْ فَرَاصِيمْ
وَ يَغْضَبْ
مِثِلْ غِضِبْ فِي وَادِي قِبْعُونْ.
وَ دَا لِيِسَوِّي خِدِمْتَهْ
وَ هِي خِدِمْتَهْ الْعَجِيبَةْ
وَ يِحَقِّقْ عَمَلَهْ
وَ هُو عَمَلَهْ الْغَرِيبْ.
22 وَ هَسَّعْ، مَا تِشَّمَّتَوْا
أَشَانْ مَا تِضَايُقُوا فَوْقكُو قُيُودْكُو.
أَشَانْ دَمَارْ كُلَّ الْبَلَدْ
أَلْقَرَّرْ خَلَاصْ.
أَنَا سِمِعْتَهْ
مِنْ اللّٰهْ الرَّبّ الْقَادِرْ.
التَيْراب و القطِع
23 أَفْتَحَوْا أُدْنَيْكُو وَ أَسْمَعَوْا كَلَامِي!
خُطُّوا بَالْكُو وَ أَسْمَعَوْا النُّقُولَهْ!
24 وَكِتْ الْحَرَّاتِي يِدَوْر يِتَيْرِبْ،
مَا يِشَقْلِبْ الْأَرْض أَيِّ وَكِتْ
وَ يِسَاوِيهَا وَلَّا؟
وَ كُلَّ يَوْم يِسَوِّي لَيْهَا
مَجَارِي وَلَّا؟
25 لَا! بَعَدْ سَاوَى الْأَرْض بَسْ،
يِشَتِّتْ حَبّ الْكُسُّبَرَّةْ وَ الْكَمُّونْ
وَ يِمَقِّنْ الْقَمَحْ الْأَحْمَرْ بِصُفُوفْ
وَ الْقَمَحْ الْأَبْيَضْ فِي بَكَانَهْ
وَ قَمَحْ الْكَدَادَةْ فِي خَشُمْ الزَّرَعْ.
26 رَبَّهْ بَسْ عَلَّمَهْ الْخِدْمَةْ دِي
وَ وَصَّفَهْ كِكَّيْف يِسَوِّيهَا.
27 وَ الْكُسُّبَرَّةْ مَا يُدُقُّوهْ
بِمُدْقَاقَةْ هَنَا حَدِيدْ
وَ الْكَمُّونْ مَا يِفَجُّقُوهْ
بِرِجْلَيْ الْعَرَبَةْ.
لَاكِنْ بِعَصَاةْ بَسْ
يُدُقُّوا الْكُسُّبَرَّةْ
وَ بِمِطْرَقَةْ
يُدُقُّوا الْكَمُّونْ.
28 الْقَمَحْ يَرْحَكَوْه
لَاكِنْ مَا يُدُقُّوهْ كَتِيرْ.
يِفَجُّقُوهْ بِرِجْلَيْ الْعَرَبَةْ وَ الْكَارَّوْ
لَاكِنْ مَا لَحَدِّي يَرْحَكَوْه مَرَّةْ وَاحِدْ.
29 وَ دَا كُلَ، جَايِ مِنْ اللّٰهْ الْقَادِرْ
هُو سِيدْ الشَّوْرَةْ الْعَجِيبَةْ
وَ الْحِكْمَةْ الْكَبِيرَةْ.
© La Bible en arabe tchadien © Alliance biblique du Tchad, 2019
