1 أَنَا مِثِلْ نُوَّارْ الْقَشّ فِي سَهَلَةْ شَارُونْ
وَ مِثِلْ زَهْرَةْ جَمِيلَةْ فِي الْوَادِي.
كلام المحْبوب
2 حَبِيبْتِي فِي أُسْط الْبَنَاتْ
مِثِلْ زَهْرَةْ جَمِيلَةْ فِي لُبّ الشَّوْك.
كلام المحْبوبة
3 حَبِيبِي فِي أُسْط الصُّبْيَانْ
مِثِلْ شَدَرَةْ التُّفَّاحْ فِي لُبّ شَدَرْ الْغَابَةْ.
فِي ضُلَّهْ، نِرِيدْ نِنْجَمَّ
وَ هُو حَلُو لَيِّ مِثِلْ فَوَاكِهْ فِي لِسَانِي.
4 هُو وَدَّانِي فِي بَيْت الْعَازُومَةْ
وَ غَطَّانِي بِحُبَّهْ.
5 أَكُّلُونِي بِكَعَكْ الْعِنَبْ
وَ أَزْقُونِي بِعَصِيرْ التُّفَّاحْ
أَشَانْ أَنَا مِرِضْت مِنْ كَتَرَةْ الشَّهْوَةْ.
6 إِيدَهْ الْإِسْرَةْ قَاعِدَةْ تِحِتْ رَاسِي
وَ إِيدَهْ الزَّيْنَةْ حَضَنَتْنِي.
7 يَا بَنَاتْ مَدِينَةْ الْقُدُسْ،
نَحَلِّفْكَنْ بِجَمَالْ الْغُزْلَانْ
وَ أَرَايِلْ الْكَدَادَةْ
كَدَرْ مَا تِقَوِّمَنْ
وَ لَا تِوَعَّنْ الْحُبّ قَبُلْ وَكْتَهْ.
كلام المحْبوبة
8 أَسْمَعَنْ، دَاهُو حَبِيبِي جَايِ.
يُنُطّ مِنْ جَبَلْ لِجَبَلْ
وَ مِنْ حَجَرْ لِحَجَرْ.
9 حَبِيبِي مِثِلْ الْغَزَالْ
وَ مِثِلْ جِدِي الْأَرْيَلْ.
دَاهُو وَاقِفْ وَرَاءْ دُرْدُرْنَا.
يِشِيفْنِي بِالشُّبَّاكْ
وَ يِتَاوِقْنِي بِالْقُدُودْ.
10 هُو شَالْ الْكَلَامْ وَ قَالْ لَيِّ:
«قُمِّي، يَا حَبِيبْتِي الْجَمِيلَةْ،
وَ تَعَالِي لَيِّ.
11 أَشَانْ وَكْت الصَّيْف كَمَّلْ
وَ الْمَطَرْ بَدَا وَ الْخَرِيفْ جَاءْ.
12 وَ فِي كُلَّ الْبَلَدْ، النُّوَّارْ بَانْ
وَ وَكْت الْغِنَيْ جَاءْ.
وَ حِسّ الْقِمْرِيْ أَنْسَمَعْ
فِي كُلَّ الْبَلَدْ.
13 شَدَرْ التِّينْ رَمَى عِيَالَهْ
وَ نُوَّارْ الْعِنَبْ أَنْشَمَّ.
قُمِّي، يَا حَبِيبْتِي الْجَمِيلَةْ،
وَ تَعَالِي لَيِّ.
14 «يَا حَمَامْتِي، الْمُلَّبِّدَةْ
فِي كَرَاكِيرْ الْجِبَالْ
وَ فِي جُرُوفْ الْحُجَارْ.
وَصِّفِي لَيِّ وِجِهْكِ
وَ خَلِّي نَسْمَعْ حِسِّكِ
أَشَانْ حِسِّكِ حَلُو
وَ وِجِهْكِ جَمِيلْ.
15 «أَطُرْدُوا لَيْنَا الْبَعَاشِيمْ،
أَيْوَى، الْبَعَاشِيمْ الْيِتَلُّفُوا الْعِنَبْ
أَشَانْ شَدَرْ عِنَبْنَا نَوَّرْ.»
16 حَبِيبِي، أَنَا لَيَّهْ هُو وَ هُو لَيِّ أَنَا.
وَ هُو سَارِحْ بِغَنَمَهْ فِي النُّوَّارْ.
17 وَ قَبُلْ بُرُودَةْ اللَّيْل
وَ وَكِتْ الضَّلَامْ يِسِدّ،
قَبِّلْ، يَا حَبِيبِي،
وَ تَعَالْ لَيِّ.
أَبْقَى مِثِلْ الْغَزَالْ
وَ مِثِلْ جِدِي الْأَرْيَلْ
فِي جُرُوفْ الْجِبَالْ.
© La Bible en arabe tchadien © Alliance biblique du Tchad, 2019
