غُرف لرجال الدين
1 وَ بَعَدْ دَا، الرَّاجِلْ مَرَقَانِي بِالدَّرِبْ الْمُنْشَاقْ عَلَيْ الْفَضَايْ الْبَرَّانِيَّةْ. وَ وَدَّانِي عَلَيْ الْغُرَفْ الْمُقَابِلِينْ الْفَضَايْ وَ مُقَابِلِينْ الْبَيْت الْمُقَدَّسْ بِنُصَّهْ الْمُنْشَاقِي. 2 وَ الْغُرَفْ فِي الْمُنْشَاقْ دَوْل، طُولْهُمْ 100 دُرَاعْ وَ عُرْضُهُمْ 50 دُرَاعْ. 3 وَ الْغُرَفْ دَوْل قَاعِدِينْ أَمْبَيْن الدَّرِبْ الطُّولَهْ 20 دُرَاعْ وَ الْحُجَارْ الْمُلُسْ الطَّلَّسَوْا بَيْهُمْ الْفَضَايْ الْبَرَّانِيَّةْ. وَ الْغُرَفْ دَوْل قَاعِدِينْ جَنْب الْقَصِرْ الْعِنْدَهْ تَلَاتَةْ دَرَجَاتْ. 4 وَ جَنْب الْغُرَفْ دَوْل، فِيَّهْ دَرِبْ الطُّولَهْ 100 دُرَاعْ وَ عُرْضَهْ 10 دُرَاعْ وَ مُوَجِّهْ عَلَيْ دَاخَلْ. وَ بِيبَانْ الْغُرَفْ دَوْل فَاتْحِينْ مُنْشَاقْ. 5 وَ الْغُرَفْ فِي الدَّرَجَةْ الْفَوْق ضَيْقِينْ زِيَادَةْ مِنْ الْغُرَفْ الْفِي الدَّرَجَةْ هَنَا الْأُسُطْ وَ التِّحِتْ أَشَانْ الدَّرِبْ شَالْ مِنْهُمْ. 6 وَ الْغُرَفْ دَوْل قَاعِدِينْ فِي قَصِرْ الْعِنْدَهْ تَلَاتَةْ دَرَجَاتْ وَ لَاكِنْ مَا عِنْدُهُمْ عَمَدْ مِثِلْ الْبُيُوتْ الْآخَرِينْ. وَ فِي شَانْ دَا، الْغُرَفْ فِي الدَّرَجَةْ الْفَوْق ضَيْقِينْ زِيَادَةْ مِنْ الْغُرَفْ الْفِي الدَّرَجَةْ هَنَا الْأُسُطْ وَ التِّحِتْ. 7 وَ فِيَّهْ دُرْدُرْ بَرَّا مِنْ الْغُرَفْ فِي لُبّ الْفَضَايْ الْبَرَّانِيَّةْ وَ قِدَّامْ الْغُرَفْ دَوْل. وَ طُولْ الدُّرْدُرْ دَا 50 دُرَاعْ. 8 الْغُرَفْ الْمُوَجِّهِينْ عَلَيْ الْفَضَايْ الْبَرَّانِيَّةْ، طُولْهُمْ 50 دُرَاعْ. وَ الْغُرَفْ الْمُوَجِّهِينْ عَلَيْ الْبَيْت الْمُقَدَّسْ كَمَانْ، طُولْهُمْ 100 دُرَاعْ. 9 وَ فِي الدَّرَجَةْ الْأَوَّلَانِيَّةْ، فِيَّهْ مَدَخَلْ بِنُصّ الصَّبَاحْ وَ النَّاسْ الْيَجُوا مِنْ الْفَضَايْ الْبَرَّانِيَّةْ يِنْدَسَّوْا بَيَّهْ. 10 وَ الْمَدَخَلْ دَا قَاعِدْ فِي آخِرْ الدُّرْدُرْ الْقَاعِدْ قِدَّامْ الْغُرَفْ.
فِي جِيهَةْ الْوَطِي، غُرَفْ آخَرِينْ قَاعِدِينْ أَمْبَيْن الْفَضَايْ الْبَرَّانِيَّةْ وَ الْبَيْت الْكَبِيرْ الْقَاعِدْ غَرِبْ مِنْ الْبَيْت الْمُقَدَّسْ. 11 وَ قِدَّامْ الْغُرَفْ دَوْل، فِيَّهْ دَرِبْ مِثِلْ الدَّرِبْ هَنَا الْغُرَفْ فِي الْمُنْشَاقْ. الْغُرَفْ فِي الْوَطِي وَ الْغُرَفْ فِي الْمُنْشَاقْ، طُولْهُمْ وَ عُرْضُهُمْ سَوَا سَوَا وَ كُلَّ بِيبَانْهُمْ هَنَا الْمَرِقِينْ وَ الدَّخِلِينْ نِظَامْهُمْ وَاحِدْ. 12 بِيبَانْهُمْ يِنْفَتْحُوا عَلَيْ الْوَطِي وَ فِيَّهْ دَرِبْ أَمْبَيْن الْغُرَفْ وَ الدُّرْدُرْ الْقِدَّامْهُمْ. وَ فِيَّهْ مَدَخَلْ الْقَاعِدْ بِصَبَاحْ فِي آخِرْ الدُّرْدُرْ وَ النَّاسْ يِنْدَسَّوْا بَيَّهْ.
13 وَ الرَّاجِلْ قَالْ لَيِّ: «الْغُرَفْ فِي الْمُنْشَاقْ وَ الْغُرَفْ فِي الْوَطِي مُقَابِلِينْ الْفَضَايْ هَنَا الْبَيْت الْمُقَدَّسْ وَ بَيْدَا، هُمَّنْ مُخَصَّصِينْ. وَ فِي الْغُرَفْ دَوْل بَسْ، رُجَالْ الدِّينْ الْيِقَرُّبُوا لِلّٰهْ وَاجِبْ يَاكُلُوا الْهَدَايَا الْمُخَصَّصِينْ مَرَّةْ وَاحِدْ. وَ فِي الْغُرَفْ دَوْل بَسْ، وَاجِبْ يُضُمُّوا الْهَدَايَا الْمُخَصَّصِينْ مَرَّةْ وَاحِدْ وَ دَوْل الْهَدَايَا هَنَا الدَّقِيقْ وَ الضَّحَايَا لِكَفَّارَةْ الذَّنِبْ وَ الضَّحَايَا لِكَفَّارَةْ الْخَطَا أَشَانْ الْبَكَانْ دَا مُقَدَّسْ. 14 وَ وَكِتْ رُجَالْ الدِّينْ يَمُرْقُوا مِنْ الْبَكَانْ الْمُقَدَّسْ، مَا يَمُرْقُوا طَوَّالِي عَلَيْ الْفَضَايْ الْبَرَّانِيَّةْ. وَاجِبْ هُمَّنْ يَمْشُوا فِي الْغُرَفْ دَوْل وَ يِسِلُّوا خُلْقَانْهُمْ هَنَا الْخِدْمَةْ وَ يُضُمُّوهُمْ هِنَاكْ أَشَانْ الْخُلْقَانْ دَوْل مُخَصَّصِينْ. وَ هُمَّنْ يَلْبَسَوْا خُلْقَانْ الْعَادِيِّينْ وَ بَعَدْ دَا، يَقْدَرَوْا يِقَرُّبُوا لِلْبَكَانَاتْ الْقَاعِدِينْ فَوْقهُمْ الشَّعَبْ.»
مقاس حَوْش بيت اللّه
15 وَكِتْ الرَّاجِلْ كَمَّلْ مِنْ مَقَاسْ الْبَيْت الْمُقَدَّسْ دَاخَلْ، هُو مَرَقَانِي بِبَيْت الْمَدَخَلْ الصَّبْحَانِي بَرَّا لِيِكِيل كُلَّ دَايِرْ الْحَوْش. 16 وَ كَالْ طُولْ الْحَوْش بِنُصَّهْ الصَّبْحَانِي بِعُودْ الْكِيَالْ وَ لِقِيهْ 500 عُودْ حَسَبْ عُودْ الْكِيَالْ. 17 وَ كَالْ طُولْ الْحَوْش بِنُصَّهْ الْمُنْشَاقِي بِعُودْ الْكِيَالْ وَ لِقِيهْ 500 عُودْ. 18 وَ كَالْ طُولْ الْحَوْش بِنُصَّهْ الْوَطِيَانِي بِعُودْ الْكِيَالْ وَ لِقِيهْ 500 عُودْ. 19 وَ هُو كَمَّلْ بِالنُّصّ الْغَرْبَانِي. هُو كَالْ طُولْ النُّصّ دَا وَ لِقِيهْ 500 عُودْ حَسَبْ عُودْ الْكِيَالْ. 20 وَ بَيْدَا، هُو كَالْ دَايِرَةْ دُرْدُرْ الْحَوْش بِالْجِيهَاتْ الْأَرْبَعَةْ وَ لِقِيهْ طُولَهْ وَ عُرْضَهْ كُلَ 500 عُودْ. وَ دُرْدُرْ الْحَوْش دَا يَفْصُلْ أَمْبَيْن الْبَكَانْ الْمُقَدَّسْ وَ الْبَكَانْ الْمَا مُقَدَّسْ.
© La Bible en arabe tchadien © Alliance biblique du Tchad, 2019
