أيُّوب يقول هو صالِح
1 وَ خَلَاصْ، أَيُّوبْ شَالْ الْكَلَامْ وَ قَالْ:
2 أَكِيدْ، إِنْتُو بَسْ تِمَثُّلُوا جُدُودْنَا!
وَ الْحِكْمَةْ تُمُوتْ مَعَاكُو وَكِتْ تُمُوتُوا.
3 لَاكِنْ أَنَا كُلَ عِنْدِي عَقُلْ مِثِلْكُو إِنْتُو
وَ أَنَا كُلَ مَا نَاقِصْ مِنْكُو!
يَاتُو مَا عِنْدَهْ مَعْرَفَةْ مِثِلْكُو؟
4 أَنَا بِقِيتْ مَضْحَكَةْ لِرُفْقَانِي
حَتَّى كَانْ نَرْجَى الرَّدّ مِنْ الرَّبّ.
أَيْوَى، بِقِيتْ مَضْحَكَةْ،
أَنَا الصَّالِحْ وَ التَّمَامْ!
5 الْمُرْتَاحِينْ يَحْقُرُوا التَّعْبَانِينْ
وَ دَا مِثِلْ ضَرْبَةْ فِي رِجِلْ الْيِتَّرْتَعَوْا!
6 وَ خِيَمْ الْمُخَرِّبِينْ
قَاعِدِينْ بِهُدُوءْ
وَ النَّاسْ الْيِغَضُّبُوا الرَّبّ
قَاعِدِينْ بِأَمَانْ.
وَ قُدْرِتْهُمْ بَسْ إِلٰـهُّمْ.
7 وَ لَاكِنْ أَسْأَلْ الْحَيْوَانَاتْ
وَ هُمَّنْ يِوَصُّفُوكْ
وَ طُيُورْ السَّمَاءْ يِأَوْرُوكْ.
8 حَجِّي مَعَ الْأَرْض وَ هِي تِوَصِّفَكْ
وَ حُوتْ الْبَحَرْ يِبَلِّغَكْ.
9 يَاتُو مِنْهُمْ كُلُّهُمْ مَا يَعَرِفْ
كَدَرْ إِيدْ اللّٰهْ سَوَّتْ الشَّيّءْ دَا؟
10 وَ فِي إِيدَهْ هُو، نَفَسْ كُلَّ الْحَيِّينْ
وَ رُوحْ كُلَّ الْمَخْلُوقِينْ.
11 بُقُولُوا: «الْأَدَانْ تِفَصِّلْ الْكَلَامْ
مِثِلْ اللِّسَانْ يِفَرِّقْ الطَّعَامْ.
12 فِي الشَّيْب،
تِنْلَقِي الْحِكْمَةْ
وَ فِي الْعُمُرْ الطَّوِيلْ،
يِنْلَقِي الْفِهِمْ.»
13 وَ لَاكِنْ الْحِكْمَةْ وَ الْقُوَّةْ
وَ الْقَرَارْ وَ الْعِلِمْ، كُلُّهُمْ مِنْ الرَّبّ.
الربّ يقْدر يدمِّر
14 الْيِهَدِّمَهْ الرَّبّ
مَا يِنْبَنِي بَتَّانْ
وَ النَّادُمْ الْهُو يَسْجِنَهْ،
مَا فِي الْيَطِلْقَهْ.
15 وَ كَنْ هُو يِوَقِّفْ الْأَلْمِي،
يَجِي الْيَبَاسْ
وَ كَنْ يِخَلِّي الْأَلْمِي يُصُبّ،
يَاكُلْ الْأَرْض.
16 الْقُدْرَةْ وَ الْحِكْمَةْ هِنَيْه هُو
وَ الْيِوَدِّرْ وَ الْمُوَدِّرْ كُلَ فِي إِيدَهْ هُو.
17 هُو يِوَدِّي الْمُسْتَشَارِينْ بَلَا نِعْلَيْ
وَ يِوَدِّرْ رَاسْ الْقُضْيَاءْ.
18 هُو يَمْرُقْ كَدْمُولْ الْمُلُوكْ
وَ يِحَزِّمْهُمْ بِفِرَادْ.
19 هُو يِوَدِّي رُجَالْ الدِّينْ بَلَا نِعْلَيْ
وَ يَرْمِي الْقَوِيِّينْ.
20 هُو يِبَرْجِلْ كَلَامْ الْأَمِينِينْ
وَ يَضْرُبْ عَقُلْ الْعَاقْلِينْ.
21 هُو يِجِيبْ الْحُقْرَةْ لِلْمَسَائِيلْ
وَ يَرْخِي حِزَامْ الْكُبَارَاتْ.
22 هُو يِبَيِّنْ الضَّلَامْ الْغَرِيقْ
وَ يِجِيبْ الضَّلَامْ الْهَالِكْ فِي النُّورْ.
23 هُو يِكَبِّرْ الْأُمَمْ
وَ يِدَمِّرْهُمْ
وَ يِشَتِّتْ الشُّعُوبْ
وَ يِوَدِّيهُمْ فِي الْغُرْبَةْ.
24 هُو يِبَرْجِلْ عُقُولْ كُبَارَاتْ الشُّعُوبْ
وَ يِخَلِّيهُمْ يِشِتُّوا فِي الصَّحَرَاء بَلَا دَرِبْ.
25 هُمَّنْ يِدَّقَّشَوْا
فِي الضَّلَامْ بَلَا نُورْ
أَيْوَى، هُو يِوَدِّرْهُمْ
مِثِلْ السَّكَّارَى.
© La Bible en arabe tchadien © Alliance biblique du Tchad, 2019
