اللّه يبدِّل الرُعْيان الهوانين
1 وَ دَاهُو كَلَامْ اللّٰهْ: «الْعَذَابْ لِكُبَارَاتْ شَعَبِي الْمِثِلْ رُعْيَانْ هَوَانِينْ. يِشَتُّتُوا وَ يِدَمُّرُوا شَعَبِي الْمِثِلْ غَنَمْ.» 2 وَ فِي شَانْ دَا، دَاهُو اللّٰهْ إِلٰـهْ بَنِي إِسْرَائِيلْ حَجَّى كَلَامْ بُخُصّ كُبَارَاتْ شَعَبَهْ الْيَسْرَحَوْا بَيْهُمْ. هُو قَالْ: «يَا الْكُبَارَاتْ! إِنْتُو بَسْ طَرَدْتُوا شَعَبِي وَ شَتَّتُّوهُمْ وَ مَا خَطَّيْتُوا بَالْكُو فَوْقهُمْ. وَ فِي شَانْ دَا، أَنَا نُخُطّ بَالِي فَوْقكُو وَ نِعَاقِبْكُو بِعَمَلْكُو الْفَسِلْ. وَ دَا كَلَامْ اللّٰهْ. 3 وَ أَنَا ذَاتِي نِلِمّ شَعَبِي الْفَضَّلَوْا وَ نِجِيبْهُمْ مِنْ كُلَّ الْبُلْدَانْ الْأَنَا شَتَّتُّهُمْ فَوْقهُمْ. وَ مِثِلْ الْغَنَمْ، نِجِيبْهُمْ فِي مَرْعَاهُمْ وَ هُمَّنْ يَلْدَوْا وَ يَبْقَوْا كَتِيرِينْ. 4 وَ أَنَا نُخُطّ فَوْقهُمْ رُعْيَانْ عَدِيلِينْ الْيَسْرَحَوْا بَيْهُمْ عَدِيلْ. وَ هُمَّنْ مَا يَخَافَوْا بَتَّانْ وَ لَا يِبَرْجُلُوا وَ وَاحِدْ مِنْهُمْ كُلَ مَا يِوَدِّرْ.» وَ دَا كَلَامْ اللّٰهْ.
5 وَ دَاهُو كَلَامْ اللّٰهْ:
«أَكِيدْ يَجِي يَوْم وَاحِدْ،
أَنَا نِقَوِّمْ نَادُمْ صَالِحْ مِنْ ذُرِّيَّةْ دَاوُدْ
مِثِلْ بِذْرَةْ.
وَ النَّادُمْ دَا،
أَنَا بَسْ نِدَرِّجَهْ مَلِكْ
وَ هُو يَحْكِمْ بِحِكْمَةْ
وَ يِجِيبْ الْحَقّ وَ الْعَدَالَةْ فِي الْبَلَدْ.
6 وَ فِي وَكِتْ حُكْمَهْ،
بَنِي يَهُوذَا يَلْقَوْا النَّجَاةْ
وَ بَنِي إِسْرَائِيلْ يَسْكُنُوا بِأَمَانْ.
وَ دَاهُو الْأُسُمْ الْيِسَمُّوهْ بَيَّهْ،
اللّٰهْ هُو بَسْ الْيِجِيبْ لَيْنَا الْعَدَالَةْ.»
7 وَ دَاهُو كَلَامْ اللّٰهْ: «زَمَانْ النَّاسْ قَاعِدِينْ يَحَلْفُوا بِاللّٰهْ الْحَيّ، هُو الْمَرَقْ بَنِي إِسْرَائِيلْ مِنْ مَصِرْ. وَ لَاكِنْ يَجِي يَوْم وَاحِدْ، 8 هُمَّنْ يِبَدُّلُوا حَلِيفِتْهُمْ وَ يَحَلْفُوا بِاللّٰهْ الْحَيّ، هُو الْمَرَقْ ذُرِّيَّةْ بَنِي إِسْرَائِيلْ مِنْ بَلَدْ الْمُنْشَاقْ وَ مِنْ كُلَّ الْبُلْدَانْ الْهُو شَتَّتَاهُمْ فَوْقهُمْ. وَ قَبَّلَاهُمْ فِي بَلَدْهُمْ وَ هُمَّنْ يَسْكُنُوا فَوْقهَا بَتَّانْ.»
الأنبياء و رجال الدين أنّجّسوا
9 وَ فِي الْأَنْبِيَاء دَوْل، إِرْمِيَا قَالْ:
«قَلْبِي أَنْقَطَعْ فِي دَاخِلِي
وَ كُلَّ عُضَامِي مَاعَوْا.
وَ بِقِيتْ مِثِلْ السَّكْرَانْ
أَوْ مِثِلْ نَادُمْ الْمَرِيسَةْ فَاتَتْ قُدُرْتَهْ.
وَ دَا فِي شَانْ اللّٰهْ
وَ فِي شَانْ كَلَامَهْ الْمُقَدَّسْ.
10 أَشَانْ الْبَلَدْ مَلَانَةْ
بِنَاسْ الْيِسَوُّوا الزِّنَى.
وَ الْبَلَدْ بِقَتْ جَفَافْ بِسَبَبْ اللَّعَنَةْ
وَ بَكَانَاتْ السَّرْحَةْ يِبْسَوْا.
وَ نِيِّتْهُمْ إِلَّا يِسَوُّوا الْفَسَالَةْ
وَ عِنْدُهُمْ الْقُدْرَةْ لِيِسَوُّوا الظُّلُمْ بَسْ.»
11 وَ دَاهُو كَلَامْ اللّٰهْ:
«الْأَنْبِيَاء وَ رُجَالْ الدِّينْ
كُلُّهُمْ أَنَّجَّسَوْا
لَحَدِّي فِي بَيْتِي الْمُقَدَّسْ كُلَ
أَنَا لِقِيتْ عَلَامَةْ فَسَالِتْهُمْ.
12 وَ خَلَاصْ بَيْدَا، دَرِبْهُمْ يَبْقَى أَمْ ظَحَلَوْطَةْ
وَ هُمَّنْ يِدَّقَّشَوْا فِي الضَّلَامْ وَ يَقَعَوْا.
وَ أَنَا نِجِيبْ فَوْقهُمْ الْفَسَالَةْ
فِي يَوْم عِقَابْهُمْ.»
وَ دَا كَلَامْ اللّٰهْ.
13 زَمَانْ، فِي أَنْبِيَاء مَدِينَةْ السَّامِرَةْ،
أَنَا شِفْت شَيّءْ مَكْرُوهْ.
هُمَّنْ أَتْنَبَّأَوْا بِإِلٰـهْ بَعَلْ
وَ لِشَعَبِي بَنِي إِسْرَائِيلْ،
مَرَقَوْهُمْ مِنْ الدَّرِبْ الْعَدِيلْ.
14 وَ لَاكِنْ فِي أَنْبِيَاء مَدِينَةْ الْقُدُسْ،
أَنَا شِفْت شَيّءْ مُحَرَّمْ زِيَادَةْ.
هُمَّنْ قَاعِدِينْ يِسَوُّوا الزِّنَى
وَ حَيَاتْهُمْ كُلَّهَا غَشّ.
وَ يِشَجُّعُوا النَّاسْ
الْيِسَوُّوا الْفَسَالَةْ
أَشَانْ وَاحِدْ مِنْهُمْ كُلَ
مَا يِقَبِّلْ مِنْ فَسَالْتَهْ.
وَ كُلُّهُمْ نِشِيفْهُمْ
مِثِلْ نَاسْ سَدُومْ الْفَسْلِينْ.
وَ سُكَّانْ مَدِينَةْ الْقُدُسْ نِشِيفْهُمْ
مِثِلْ نَاسْ عَمُورَةْ الْهَوَانِينْ.
15 وَ فِي شَانْ دَا، دَاهُو اللّٰهْ الْقَادِرْ حَجَّى كَلَامْ بُخُصّ الْأَنْبِيَاء دَوْل. هُو قَالْ:
«أَكِيدْ أَنَا نِأَكِّلْهُمْ الْحَمْضَلْ
وَ نَزْقِيهُمْ أَلْمِي مُسَمَّمْ.
أَشَانْ بِأَنْبِيَاء مَدِينَةْ الْقُدُسْ دَوْل بَسْ
النَّجَاسَةْ دَخَلَتْ فِي الْبَلَدْ دِي وَ مَلَتْهَا.»
زعل اللّه ضِدّ الأنبياء
16 وَ دَاهُو اللّٰهْ الْقَادِرْ قَالْ:
«مَا تَسْمَعَوْا كَلَامْ الْأَنْبِيَاء
الْيِتْنَبَّأَوْا لَيْكُو.
هُمَّنْ يُغُشُّوكُو
وَ يِبَلُّغُوا لَيْكُو رُؤْيَةْ الْجَايَةْ مِنْ نُفُوسْهُمْ
وَ لَاكِنْ مَا جَايَةْ مِنِّي أَنَا اللّٰهْ.
17 بِكِدِبْ، هُمَّنْ يُقُولُوا لِلنَّاسْ الْيَنْكُرُونِي:
‹اللّٰهْ قَالْ إِنْتُو تَلْقَوْا السَّلَامْ.›
وَ بِغَشّ، يُقُولُوا لِأَيِّ وَاحِدْ الْيِقَوِّي رَاسَهْ:
‹الْفَسَالَةْ دِي مَا تَجِي لَيْك.›
18 وَ الْأَنْبِيَاء دَوْل، مَا فِي نَادُمْ مِنْهُمْ
الْحِضِرْ فِي مَجْلَسِي فِي السَّمَاءْ
لِيِشِيفْ وَ يَسْمَعْ كَلَامِي أَنَا اللّٰهْ
وَ يَحْفَضْ الْكَلَامْ الْهُو سِمْعَهْ.»
19 وَ إِرْمِيَا قَالْ:
«دَاهُو غَضَبْ اللّٰهْ قَمَّتْ
مِثِلْ أَمْ زَوْبَعَانَةْ.
وَ رِيحْ شَدِيدَةْ هَجَّتْ
وَ تُدُورْ فِي رُوسَيْ الْعَاصِيِينْ.
20 وَ غَضَبْ اللّٰهْ مَا يَقِيفْ
لَحَدِّي يِحَقِّقْ نِيّتَهْ الْهُو شَالْهَا.
وَ فِي الأَخِيرْ،
تَفْهَمَوْا الشَّيّءْ دَا عَدِيلْ.»
21 وَ اللّٰهْ قَالْ:
«الْأَنْبِيَاء دَوْل، أَنَا مَا رَسَّلْتُهُمْ
وَ لَاكِنْ هُمَّنْ جَرَوْا لَيْكُو.
وَ أَنَا مَا حَجَّيْت لَيْهُمْ كُلَ
وَ لَاكِنْ هُمَّنْ قَاعِدِينْ يِتْنَبَّأَوْا.
22 وَ كَنْ أَوَّلْ حِضْرَوْا فِي مَجْلَسِي،
هُمَّنْ يَقْدَرَوْا يِخَبُّرُوا شَعَبِي بِكَلَامِي.
وَ يِقَبُّلُوهُمْ
مِنْ دَرِبْهُمْ الْهَوَانْ
وَ يِرَجُّعُوهُمْ
مِنْ عَمَلْهُمْ الْفَسِلْ.»
اللّه قاعد في كل بكان
23 «أَنَا مَا الْإِلٰـهْ الْيِشِيفْ قَرِيبْ بَسْ
وَ لَاكِنْ أَنَا الْإِلٰـهْ الْيِشِيفْ بَعِيدْ كُلَ.
وَ دَا كَلَامْ اللّٰهْ.24 وَ هَلْ فِي إِنْسَانْ الْيِلَّبَّدْ فِي بَكَانْ
وَ أَنَا مَا نِشِيفَهْ وَلَّا؟
وَ دَا كَلَامْ اللّٰهْ.هَلْ أَنَا مَا نَمْلَا
السَّمَاوَاتْ وَ الْأَرْض وَلَّا؟»
وَ دَا كَلَامْ اللّٰهْ.
اللّه يقُمّ ضِدّ الأنبياء
25 «أَنَا نَسْمَعْ كَلَامْ الْأَنْبِيَاء دَوْل الْيِتْنَبَّأَوْا بِكِدِبْ بِأُسْمِي وَ يُقُولُوا: ‹أَنَا رِئِيتْ! أَنَا رِئِيتْ!› 26 وَ الْأَنْبِيَاء الْكَدَّابِينْ دَوْل يِتْنَبَّأَوْا لِمَتَى؟ وَ هَلْ هُمَّنْ عِنْدُهُمْ نِيَّةْ فَسْلَةْ فِي قُلُوبْهُمْ وَلَّا؟ أَيْوَى، الْكِدِبْ دَا جَايِ مِنْ فِكِرْهُمْ الْغَشَّاشْ بَسْ. 27 وَ بِرُؤْيِتْهُمْ الْيِحَجُّوا بَيْهَا أَمْبَيْنَاتْهُمْ، هُمَّنْ يَحْسُبُوا لِشَعَبِي يِنَسُّوهُمْ أُسْمِي. وَ دَا، مِثِلْ جُدُودْهُمْ التَّابَعَوْا إِلٰـهْ بَعَلْ وَ نِسَوْا أُسْمِي. 28 خَلِّي النَّبِي الْعِنْدَهْ رُؤْيَةْ يِحَجِّي بِرُؤْيِتَهْ. وَ لَاكِنْ الْعِنْدَهْ كَلَامِي أَنَا، خَلِّي يِحَجِّي كَلَامِي بِأَمَانْ. أَشَانْ الْقَشّ وَ الْقَنَادِيلْ مَا سَوَا.» وَ دَا كَلَامْ اللّٰهْ.
29 «وَ كَلَامِي هُو مِثِلْ نَارْ
وَ مِثِلْ مِطْرَقَةْ التِّكَسِّرْ الْحَجَرْ.»
وَ دَا كَلَامْ اللّٰهْ.
30 وَ دَاهُو كَلَامْ اللّٰهْ: «هَسَّعْ دَا، نُقُمّ ضِدّ الْأَنْبِيَاء الْيَسُرْقُوا الْكَلَامْ الْوَاحِدْ مِنْ الْآخَرْ وَ يُقُولُوا دَا كَلَامِي أَنَا اللّٰهْ. 31 وَ نُقُمّ ضِدّ الْأَنْبِيَاء اللِّسَانْهُمْ يُقُولْ كَلَامْ كِدِبْ وَ يُقُولُوا الْكَلَامْ دَا جَايِ مِنِّي أَنَا. وَ دَا كَلَامْ اللّٰهْ. 32 وَ نُقُمّ ضِدّ الْأَنْبِيَاء الْيِحَجُّوا بِرُؤْيَةْ كِدِبْ لِيِوَدُّرُوا شَعَبِي بِغَشُّهُمْ وَ كِدِبْهُمْ. وَ دَا كَلَامْ اللّٰهْ. أَنَا مَا رَسَّلْتُهُمْ وَ لَا أَمَرْتُهُمْ بِشَيّءْ. وَ هُمَّنْ أَبَداً مَا يَنْفَعَوْا الشَّعَبْ دَا.» وَ دَا كَلَامْ اللّٰهْ.
كلام اللّه بِقي تقيل للشعب
33 اللّٰهْ حَجَّى لِإِرْمِيَا وَ قَالْ: «أَكُونْ نَبِي أَوْ رَاجِلْ دِينْ أَوْ نَادُمْ مِنْ الشَّعَبْ يَسْأَلَكْ وَ يُقُولْ: ‹شُنُو بَتَّانْ التَّقَلَةْ الْيُخُطَّهَا فَوْقنَا اللّٰهْ؟› خَلَاصْ، إِنْتَ رُدّ لَيَّهْ وَ قُولْ: ‹دَاهُو كَلَامْ اللّٰهْ: ”إِنْتُو بَسْ التَّقَلَةْ وَ أَنَا اللّٰهْ نَزْقُلْكُو!“› 34 وَ أَكُونْ نَبِي أَوْ رَاجِلْ دِينْ أَوْ نَادُمْ مِنْ الشَّعَبْ يَشْكِي وَ يُقُولْ: ‹تَقَلَةْ اللّٰهْ فَوْقنَا!› خَلَاصْ، أَنَا نِعَاقِبْ النَّادُمْ دَا وَ عَايِلْتَهْ. 35 وَ دَاهُو الْكَلَامْ الْوَاجِبْ تُقُولُوهْ أَمْبَيْنَاتْكُو الْوَاحِدْ لِلْآخَرْ: ‹شُنُو رَدّ اللّٰهْ؟ شُنُو اللّٰهْ كَلَّمْ؟› 36 وَ لَاكِنْ أَبَداً مَا تَشْكُوا وَ تُقُولُوا: ‹تَقَلَةْ اللّٰهْ فَوْقنَا.› وَ هَلْ كَلَامْ اللّٰهْ تَقِيلْ لِلنَّاسْ وَلَّا؟ لَا! إِنْتُو بَسْ قَاعِدِينْ تِغَيُّرُوا كَلَامْ الْإِلٰـهْ الْحَيّ، اللّٰهْ الْقَادِرْ، إِلٰـهْنَا.
37 «وَ دَاهُو الْكَلَامْ الْوَاجِبْ تُقُولَهْ لِلنَّبِي: ‹شُنُو رَدّ اللّٰهْ؟ شُنُو اللّٰهْ كَلَّمْ؟› 38 وَ لَاكِنْ إِنْتُو قُلْتُوا: ‹تَقَلَةْ اللّٰهْ فَوْقنَا› وَ دَا الْكَلَامْ الْأَنَا دَحَرْتُكُو مَا تُقُولُوهْ. وَ فِي شَانْ دَا، دَاهُو أَنَا اللّٰهْ قُلْت: 39 ‹إِنْتُو بَسْ التَّقَلَةْ. وَ أَكِيدْ أَنَا نِشِيلْكُو وَ نَزْقُلْكُو بَعِيدْ مِنِّي، إِنْتُو وَ الْمَدِينَةْ الْأَنْطَيْتهَا لَيْكُو إِنْتُو وَ لِجُدُودْكُو. 40 وَ نِجِيبْ الْعَيْب الْيَقْعُدْ فَوْقكُو دَايْماً وَ قِلَّةْ الشَّرَفْ الْمَا تِنَّسِي إِلَى الْأَبَدْ.›»
© La Bible en arabe tchadien © Alliance biblique du Tchad, 2019
