1 وَ بَلْعَامْ قَالْ لِبَلَاقْ: «أَبْنِي لَيِّ هِنِي سَبْعَةْ مَدْبَحْ وَ جِيبْ لَيِّ سَبْعَةْ تِيرَانْ وَ سَبْعَةْ كُبْشَانْ.» 2 وَ بَلَاقْ سَوَّى مِثِلْ بَلْعَامْ قَالَهْ لَيَّهْ. وَ هُمَّنْ الْإِتْنَيْن قَدَّمَوْا ضَحِيَّةْ هَنَا تَوْر وَ كَبِشْ فِي أَيِّ مَدْبَحْ. 3 وَ بَلْعَامْ قَالْ لِبَلَاقْ: «أَقِيفْ جَنْب ضَحِيّتَكْ الْمُحَرَّقَةْ وَ أَنَا كَمَانْ نَمْشِي هِنَاكْ. أَكُونْ اللّٰهْ يَجِي وَ يِحَجِّي لَيِّ وَ أَيِّ كَلَامْ الْيُقُولَهْ لَيِّ أَنَا نُقُولَهْ لَيْك.»
وَ مَشَى فِي رَاسْ الْجَبَلْ. 4 وَ الرَّبّ بَانْ وَ بَلْعَامْ قَالْ لَيَّهْ: «أَنَا بَنَيْت سَبْعَةْ مَدْبَحْ وَ قَدَّمْت ضَحِيَّةْ فِي أَيِّ وَاحِدْ تَوْر وَ كَبِشْ.» 5 وَ اللّٰهْ كَلَّمْ لِبَلْعَامْ وَ قَالْ لَيَّهْ: «قَبِّلْ أَمْشِي لِبَلَاقْ وَ قُولْ لَيَّهْ الْكَلَامْ دَا.»
6 وَ بَلْعَامْ قَبَّلْ لِبَلَاقْ وَ لِقِيهْ وَاقِفْ جَنْب ضَحِيّتَهْ الْمُحَرَّقَةْ وَ كُلَّ كُبَارَاتْ مُوَابْ وَاقْفِينْ مَعَايَهْ. 7 وَ خَلَاصْ، بَدَا بِالشِّعِرْ وَ قَالْ:
«مِنْ أَرَامْ،
بَلَاقْ مَلِكْ مُوَابْ جَابَانِي
وَ مِنْ جِبَالْ الصَّبَاحْ،
نَادَانِي وَ قَالْ:
‹تَعَالْ لِيَعْقُوبْ أَلْعَنَهْ لَيِّ
وَ تَعَالْ عَيِّرْ إِسْرَائِيلْ عَدُويِ.›
8 وَ كِكَّيْف نَلْعَنْ نَادُمْ
الْإِلٰـهْ مَا لَعَنَهْ؟
وَ كِكَّيْف نِهَدِّدْ نَادُمْ
الْاللّٰهْ مَا هَدَّدَهْ؟
9 وَ وَكِتْ نِشِيفْهُمْ
مِنْ رَاسْ الْحَجَرْ
وَ وَكِتْ نِرَاقِبْهُمْ
مِنْ رَاسْ الْجَبَلْ،
أَنَا نِشِيفْهُمْ شَعَبْ يَسْكُنْ مَعْزُولْ
وَ مَا مَحْسُوبِينْ مَعَ بَاقِي الْأُمَمْ.
10 ذُرِّيَّةْ يَعْقُوبْ مِثِلْ التُّرَابْ.
يَاتُو يَقْدَرْ يَحْسِبْهُمْ؟
وَ بَنِي إِسْرَائِيلْ مِثِلْ الرَّمْلَةْ.
يَاتُو يَلْقَى عَدَدْهُمْ؟
خَلِّي أَنَا نُمُوتْ فِي مَوْت الصَّالِحِينْ
وَ نِنْتَهِي مِثِلْ هُمَّنْ أَنْتَهَوْا.»
11 وَ بَلَاقْ قَالْ لِبَلْعَامْ: «شُنُو السَّوَّيْتَهْ لَيِّ دَا؟ أَنَا نَادَيْتَكْ لِتَلْعَنْ لَيِّ عَدُويِ وَ دَاهُو إِنْتَ بَارَكْتُهُمْ خَلَاصْ!» 12 وَ بَلْعَامْ رَدَّ لَيَّهْ وَ قَالْ: «أَنَا مَا نِكَلِّمْ الْكَلَامْ الْاللّٰهْ قَالَهْ لَيِّ وَلَّا؟»
تاني بركة لبني إسرائيل
13 وَ بَلَاقْ قَالْ بَتَّانْ: «تَعَالْ مَعَايِ فِي بَكَانْ آخَرْ وَ مِنْ هِنَاكْ، تِشِيفْ الشَّعَبْ دَا. وَ إِنْتَ تِشِيفْ نُصُّهُمْ بَسْ مَا كُلُّهُمْ كَيْ. وَ مِنْ الْبَكَانْ دَا، أَلْعَنْهُمْ لَيِّ.»
14 وَ وَدَّى بَلْعَامْ فَوْق فِي رَاسْ جَبَلْ الْفِسْقَةْ وَ دَا الْبَكَانْ الْيِرَاقُبُوا مِنَّهْ. وَ بَنَى سَبْعَةْ مَدْبَحْ وَ قَدَّمْ ضَحِيَّةْ هَنَا تَوْر وَ كَبِشْ فِي أَيِّ مَدْبَحْ. 15 وَ بَلْعَامْ قَالْ لِبَلَاقْ: «أَقِيفْ جَنْب ضَحِيّتَكْ الْمُحَرَّقَةْ وَ أَنَا كَمَانْ نَمْشِي هِنَاكْ نَرْجَى اللّٰهْ يَجِي لَيِّ.»
16 وَ خَلَاصْ، اللّٰهْ جَاءْ لِبَلْعَامْ وَ كَلَّمَهْ. وَ قَالْ لَيَّهْ: «قَبِّلْ أَمْشِي لِبَلَاقْ وَ قُولْ لَيَّهْ الْكَلَامْ دَا.» 17 وَ بَلْعَامْ قَبَّلْ لِبَلَاقْ وَ لِقِيهْ وَاقِفْ جَنْب ضَحِيّتَهْ الْمُحَرَّقَةْ وَ كُلَّ كُبَارَاتْ مُوَابْ وَاقْفِينْ مَعَايَهْ. وَ بَلَاقْ سَأَلَهْ وَ قَالْ لَيَّهْ: «اللّٰهْ قَالْ لَيْك شُنُو؟» 18 وَ خَلَاصْ، بَلْعَامْ بَدَا بِالشِّعِرْ وَ قَالْ:
«قُمّ، يَا بَلَاقْ، وَ أَسْمَعْ
وَ خُطّ أَدَانَكْ لَيِّ،
يَا وِلَيْد صِفُّورْ.
19 الْإِلٰـهْ مَا مِثِلْ الْإِنْسَانْ يَكْدِبْ
وَ لَا مِثِلْ بَنِي آدَم يَنْدَمْ.
كُلَّ شَيّءْ الْيُقُولَهْ، هُو يِسَوِّيهْ
وَ يِحَقِّقْ كَلَامَهْ الْيِحَجِّيهْ.
20 أَنَا لِقِيتْ أَمُرْ نِبَارِكْ
أَشَانْ هُو بَارَكَاهُمْ خَلَاصْ.
وَ بَتَّانْ أَنَا مَا نَقْدَرْ نِسَوِّي
شَيّءْ آخَرْ.
21 مَا فِي ذَنِبْ فِي ذُرِّيَّةْ يَعْقُوبْ
وَ لَا ظُلُمْ فِي بَنِي إِسْرَائِيلْ.
اللّٰهْ إِلٰـهُّمْ يُكُونْ مَعَاهُمْ
وَ هُمَّنْ يَحْمُدُوا اللّٰهْ مَلِكْهُمْ.
22 اللّٰهْ مَرَقَاهُمْ مِنْ بَلَدْ مَصِرْ
وَ عِنْدُهُمْ قُدْرَةْ
مِثِلْ قُدْرَةْ الْجَامُوسْ.
23 مَا فِي الْيِكَلِّمْ بِعِلِمْ الْغَيْب
فِي ذُرِّيَّةْ يَعْقُوبْ
وَ مَا فِي الْيِشَوِّفْ
فِي بَنِي إِسْرَائِيلْ.
وَ فِي وَكِتْ مُوَافِقْ،
ذُرِّيَّةْ يَعْقُوبْ وَ بَنِي إِسْرَائِيلْ
يَعَرْفُوا كُلَّ شَيّءْ الْاللّٰهْ يِسَوِّيهْ.
24 دَاهُو الشَّعَبْ
قَمَّ مِثِلْ النِّمِرْ
وَ وَقَفْ مِثِلْ الدُّودْ.
مَا يُنُومْ كَنْ مَا أَكَلْ
صَيْدَةْ الْهُو صَادَاهَا
وَ لَا يَرْقُدْ كَنْ مَا شِرِبْ
دَمّ الصَّيْدَةْ الْهُو كَتَلَاهَا.»
25 وَ بَلَاقْ قَالْ لِبَلْعَامْ: «كَنْ مَا تَلْعَنْهُمْ دَا، مَا تِبَارِكْهُمْ كُلَ!» 26 وَ بَلْعَامْ رَدَّ لَيَّهْ وَ قَالْ: «أَنَا مَا قُلْت لَيْك؟ أَنَا نِحَجِّي كُلَّ الْكَلَامْ الْاللّٰهْ يُقُولَهْ لَيِّ.»
تالِت بركة لبني إسرائيل
27 وَ بَلَاقْ قَالْ لِبَلْعَامْ: «تَعَالْ نِوَدِّيكْ بَكَانْ آخَرْ. أَكُونْ مِنْ الْبَكَانْ دَاكْ الرَّبّ يَرْضَى إِنْتَ تَلْعَنْ لَيِّ الشَّعَبْ دَا.» 28 وَ بَلَاقْ وَدَّى بَلْعَامْ فِي رَاسْ جَبَلْ فَعُورْ وَ مِنْ الْبَكَانْ دَا، تِنْشَافْ الصَّحَرَاء. 29 وَ بَلْعَامْ قَالْ لِبَلَاقْ: «أَبْنِي لَيِّ هِنِي سَبْعَةْ مَدْبَحْ وَ جِيبْ لَيِّ سَبْعَةْ تِيرَانْ وَ سَبْعَةْ كُبْشَانْ.» 30 وَ بَلَاقْ سَوَّى مِثِلْ بَلْعَامْ قَالَهْ لَيَّهْ وَ قَدَّمْ ضَحِيَّةْ هَنَا تَوْر وَ كَبِشْ فِي أَيِّ مَدْبَحْ.
© La Bible en arabe tchadien © Alliance biblique du Tchad, 2019
