الحُكّام تُولَع و يَيِير
1 وَ بَعَدْ مَوْت أَبِيمَلِكْ، تُولَعْ وِلَيْد فُوَّى وِلَيْد دُودُو الْمِنْ قَبِيلَةْ يَسَّاكَرْ قَمَّ لِيِنَجِّي بَنِي إِسْرَائِيلْ. وَ هُو سَاكِنْ فِي شَمِيرْ فِي جِبَالْ أَفْرَايِمْ. 2 هُو حَكَمْ فِي بَنِي إِسْرَائِيلْ 23 سَنَةْ. وَ بَعَدْ دَا، مَاتْ وَ دَفَنَوْه فِي شَمِيرْ.
3 وَ بَعَدَهْ قَمَّ يَيِيرْ الْمِنْ تُرَابْ قِلْعَادْ وَ حَكَمْ فِي بَنِي إِسْرَائِيلْ 22 سَنَةْ. 4 وَ هُو عِنْدَهْ 30 أَوْلَادْ رَاكْبِينْ فِي 30 دُحُوشْ وَ عِنْدُهُمْ 30 حِلَّالْ الْبِسَمُّوهُمْ لَحَدِّي الْيَوْم فُرْقَانْ يَيِيرْ فِي تُرَابْ قِلْعَادْ. 5 وَ يَيِيرْ مَاتْ وَ دَفَنَوْه فِي قَامُونْ.
بني عَمُّون هجموا بني إسرائيل
6 وَ بَنِي إِسْرَائِيلْ قَمَّوْا بَتَّانْ يِسَوُّوا الْفَسَالَةْ قِدَّامْ اللّٰهْ. وَ عَبَدَوْا أَصْنَامْ بَعَلْ وَ عَشْتَرُوتْ وَ إِلٰـهَاتْ هَنَا بُلْدَانْ آخَرِينْ، مِثِلْ أَرَامْ وَ صَيْدَا وَ مُوَابْ وَ بَنِي عَمُّونْ وَ الْفِلِسْطِيِّينْ. وَ هُمَّنْ أَبَوْا اللّٰهْ وَ بَتَّانْ مَا عَبَدَوْه. 7 وَ اللّٰهْ غِضِبْ غَضَبْ شَدِيدْ ضِدّ بَنِي إِسْرَائِيلْ وَ سَلَّمَاهُمْ لِلْفِلِسْطِيِّينْ وَ بَنِي عَمُّونْ. 8 وَ مِنْ الْوَكِتْ دَا، هُمَّنْ رِحْكَوْا بَنِي إِسْرَائِيلْ وَ ظَلَمَوْهُمْ فِي مُدَّةْ 18 سَنَةْ لَحَدِّي كُلَّ بَنِي إِسْرَائِيلْ الْقَاعِدِينْ صَبَاحْ لِبَحَرْ الْأُرْدُنْ فِي بَلَدْ الْأَمُورِيِّينْ فِي تُرَابْ قِلْعَادْ. 9 وَ بَنِي عَمُّونْ قَطَعَوْا بَحَرْ الْأُرْدُنْ أَشَانْ يِحَارُبُوا قَبَايِلْ يَهُوذَا وَ بَنْيَامِينْ وَ أَفْرَايِمْ. وَ بَنِي إِسْرَائِيلْ أَضَّايَقَوْا مُضَايَقَةْ شَدِيدَةْ.
10 وَ خَلَاصْ، بَنِي إِسْرَائِيلْ صَرَخَوْا لِلّٰهْ وَ قَالَوْا: «صَحِيحْ، أَنِحْنَ أَذْنَبْنَا أَشَانْ أَبَيْنَاكْ إِنْتَ إِلٰـهْنَا وَ عَبَدْنَا أَصْنَامْ بَعَلْ.» 11 وَ اللّٰهْ قَالْ لِبَنِي إِسْرَائِيلْ: «وَكِتْ الْمَصْرِيِّينْ وَ الْأَمُورِيِّينْ وَ بَنِي عَمُّونْ وَ الْفِلِسْطِيِّينْ 12 وَ الصَّيْدُونِيِّينْ وَ الْعَمَالِقْ وَ الْمَاعَوْنِيِّينْ ظَلَمَوْكُو وَ وَكِتْ صَرَخْتُوا لَيِّ، أَنَا مَا نَجَّيْتكُو مِنْهُمْ وَلَّا؟ 13 وَ لَاكِنْ إِنْتُو أَبَيْتُونِي وَ عَبَدْتُوا لَيْكُو إِلٰـهَاتْ آخَرِينْ وَ فِي شَانْ دَا، أَنَا مَا نِنَجِّيكُو بَتَّانْ. 14 يَلَّا! أَمْشُوا أَصْرَخَوْا لِإِلٰـهَاتْكُو الْإِنْتُو عَزَلْتُوهُمْ. خَلِّي هُمَّنْ بَسْ يَفْزَعَوْكُو وَكِتْ تَتْعَبَوْا!» 15 وَ بَنِي إِسْرَائِيلْ قَالَوْا لِلّٰهْ: «صَحِيحْ، أَنِحْنَ أَذْنَبْنَا. سَوِّي فَوْقنَا كُلَّ شَيّءْ التِّدَوْرَهْ وَ لَاكِنْ نَجِّينَا الْيَوْم.» 16 وَ هُمَّنْ بَعَّدَوْا مِنْهُمْ الْإِلٰـهَاتْ الْأَجْنَبِيِّينْ وَ عَبَدَوْا اللّٰهْ. وَ هُو حَنَّ فَوْقهُمْ فِي شَانْ تَعَبْهُمْ.
17 وَ دَيْش بَنِي عَمُّونْ لَمَّوْا وَ خَطَّوْا مُعَسْكَرْهُمْ فِي قِلْعَادْ. وَ بَنِي إِسْرَائِيلْ لَمَّوْا وَ خَطَّوْا مُعَسْكَرْهُمْ فِي مِصْفَةْ. 18 الشَّعَبْ وَ كُلَّ كُبَارَاتْ قِلْعَادْ قَالَوْا أَمْبَيْنَاتْهُمْ: «الرَّاجِلْ الْيَبْدَا الْحَرِبْ مَعَ بَنِي عَمُّونْ، هُو دَا بَسْ يَبْقَى كَبِيرْ فِي كُلَّ سُكَّانْ قِلْعَادْ.»
© La Bible en arabe tchadien © Alliance biblique du Tchad, 2019
