السفر القاسي بالبحر
1 فَسْتُسْ قَرَّرْ أَشَانْ نَمْشُوا فِي بَلَدْ إِيطَالِيَا بِالْبَحَرْ. وَ نَادَى مَسْؤُولْ عَسْكَرِي وَاحِدْ أُسْمَهْ يُولِيُسْ مِنْ الْقِسِمْ السُّلْطَانِي وَ أَمَرَهْ أَشَانْ يَحْرِسْ بُولُسْ وَ الْمَسَاجِينْ الْآخَرِينْ فِي السَّفَرْ. 2 وَ رِكِبْنَا فِي سَفِينَةْ هَنَا حِلَّةْ أَدْرَامِيتْ التِّدَوْر تَمْشِي لِحِلَّالْ وَاحِدِينْ فِي خَشُمْ الْبَحَرْ هَنَا بَلَدْ آسِيَا وَ خَلَاصْ مَشَيْنَا. وَ أَرِسْتَارْكُسْ الْمَقِدُونِي مِنْ مَدِينَةْ تَسَلُونِيكِي كُلَ سَافَرْ مَعَانَا.
3 وَ أَمْبَاكِرْ، لِحِقْنَا حِلَّةْ صَيْدَا وَ قَعَدْنَا شِيَّةْ. وَ يُولِيُسْ سَوَّى زَيْن لِبُولُسْ وَ أَنْطَاهْ إِذِنْ أَشَانْ يَمْشِي فِي الْحِلَّةْ وَ يِسَلِّمْ رُفْقَانَهْ وَ يَلْقَى مِنْهُمْ الشَّيّءْ الْبِدَوْرَهْ. 4 وَ رِكِبْنَا بَتَّانْ وَ السَّفِينَةْ قَمَّتْ مِنْ صَيْدَا. وَ الرِّيحْ قَاعِدَةْ تُسُوقْ مِنْ الْغَرِبْ وَ وَجَّهَوْا السَّفِينَةْ فِي الْجَانِبْ الصَّبْحَانِي هَنَا جَزِيرَةْ قُبْرُصْ أَشَانْ الْجَزِيرَةْ تِدَارِقْنَا مِنْ الرِّيحْ. 5 وَ وَكِتْ شَقَّيْنَا الْبَحَرْ الْقَاعِدْ جَنْب كِلِكِيَّةْ وَ بَمْفِيلِيَةْ، وِصِلْنَا فِي حِلَّةْ مِيرَا الْقَاعِدَةْ فِي بَلَدْ لَيْكِيَّةْ. 6 وَ هِنَاكْ مَسْؤُولْ الْعَسْكَرْ لِقِي سَفِينَةْ جَايَةْ مِنْ الْإِسْكَنْدَرِيَّةْ وَ تِدَوْر تَمْشِي فِي إِيطَالِيَا وَ رَكَّبَانَا فَوْقهَا.
7 وَ مُدَّةْ أَيَّامْ، مَا قِدِرْنَا نَمْشُوا عَجَلَةْ أَشَانْ الدَّرِبْ بِقِي قَاسِي لِلسَّفِينَةْ. قَرَّبْنَا لِحِلَّةْ كِنِيدُسْ وَ لَاكِنْ الرِّيحْ تُسُوقْ شَدِيدْ مِنْ الْغَرِبْ وَ مَا خَلَّتْنَا نَنْزُلُوا فَوْقهَا. وَ خَلَاصْ وَجَّهَوْا السَّفِينَةْ فِي الْجَانِبْ الْجُنُوبِي هَنَا جَزِيرَةْ كِرِيتْ أَشَانْ الْجَزِيرَةْ تِدَارِقْنَا مِنْ الرِّيحْ. وَ مَشَيْنَا جَنْب حَجَرْ أُسْمَهْ رَاسْ سَلْمُونِي. 8 وَ بِتَعَبْ، لِحِقْنَا الْبَكَانْ الْأُسْمَهْ الْمُوَانِئ الْجَمِيلَةْ الْقَاعِدْ قَرِيبْ لِحِلَّةْ لِسَايَةْ. 9 وَ مِنْ قَمَّيْنَا لَحَدِّي الْبَكَانْ دَا، السَّفَرْ طَوَّلْ بِلْحَيْن وَ بِقِي الْوَكِتْ الْقَاسِي لِلسَّفَرْ بِالْبَحَرْ وَ يَوْم صِيَامْ هَنَا الْيَهُودْ كُلَ فَاتْ خَلَاصْ. وَ بُولُسْ قَمَّ حَجَّى لِنَاسْ السَّفِينَةْ. 10 وَ قَالْ: «يَا الْأَخْوَانْ، أَنَا شِفْت حَالِتْنَا. وَ فِي فِكْرِي أَنَا، كَنْ نَمْشُوا قِدَّامْ، أَكِيدْ السَّفَرْ يَبْقَى لَيْنَا قَاسِي مَرَّةْ وَاحِدْ. مَا تِوَدُّرُوا السَّفِينَةْ وَ شُحْنِتْهَا بَسْ لَاكِنْ أَنِحْنَ كُلِّنَا نُمُوتُوا.»
11 لَاكِنْ مَسْؤُولْ الْعَسْكَرْ سِمِعْ كَلَامْ السَّوَّاقْ وَ كَلَامْ سِيدْ السَّفِينَةْ وَ مَا سِمِعْ كَلَامْ بُولُسْ. 12 وَ دَوَّرَوْا يَلْقَوْا بَكَانْ هَادِي أَشَانْ يَقْعُدُوا فَوْقَهْ لَحَدِّي الشِّتَاءْ يِكَمِّلْ وَ الْبَكَانْ السَّفِينَةْ قَاعِدَةْ فَوْقَهْ مَا مُوَافِقْ. وَ نَاسْ كَتِيرِينْ قَالَوْا يَبْقَى لَيْهُمْ أَخَيْر كَنْ يَمْشُوا قِدَّامْ وَ يِجَاهُدُوا أَشَانْ يَلْحَقَوْا حِلَّةْ فِينِكْس وَ يَقْعُدُوا فَوْقهَا. فِينِكْس قَاعِدَةْ فِي جَزِيرَةْ كِرِيتْ وَ عِنْدَهَا خَشُمْ بَحَرْ عَدِيلْ مَا فَاتِحْ لِلرِّيحْ، إِلَّا فِي قَرْن الْمُنْشَاقْ لِلْغَرِبْ وَ فِي قَرْن الْوَطِي لِلْغَرِبْ.
13 وَ وَكِتْ رِيحْ خَفِيفَةْ بَدَتْ تُسُوقْ مِنْ الْوَطِي، نَاسْ السَّفِينَةْ قَالَوْا يَقْدَرَوْا يَمْشُوا قِدَّامْ مِثِلْ دَوَّرَوْا. وَ جَبَدَوْا فَوْق وِتِدْ هَنَا السَّفِينَةْ وَ مَشَوْا قِدَّامْ. وَ مَا مَشَوْا فِي أُسْط الْبَحَرْ لَاكِنْ تَابَعَوْا طَرَفْ الْجَزِيرَةْ. 14 لَاكِنْ بَعَدْ شِيَّةْ بَسْ، رِيحْ شَدِيدَةْ بِلْحَيْن قَمَّتْ عَجَلَةْ وَ سَاقَتْ فَوْقنَا مِنْ الْجَزِيرَةْ مِنْ قَرْن الْمُنْشَاقْ لِلصَّبَاحْ. 15 وَ الرِّيحْ شَالَتْ السَّفِينَةْ وَ مَا قِدْرَوْا يِقَبُّلُوهَا. وَ خَلَاصْ خَلَّوْا الرِّيحْ وَدَّتْ السَّفِينَةْ قِدَّامْ.
16 الرِّيحْ لَزَّتْنَا قَرِيبْ لِلْجَانِبْ الْوَطِي هَنَا جَزِيرَةْ صَغَيْرَةْ أُسُمْهَا كُودَا الدَّارَقَتْنَا شِيَّةْ مِنْ الرِّيحْ. وَ فِي الْبَكَانْ دَا، بِتَعَبْ شَدِيدْ قِدِرْنَا نِثَبُّتُوا الْمَرْكَبَةْ. 17 وَ جَبَدَوْهَا وَ دَسَّوْهَا فِي السَّفِينَةْ وَ بَعَدْ دَا، قَمَّوْا لَوْلَوَوْا السَّفِينَةْ بِحَبِلْ قَوِي أَشَانْ مَا تِنْشَقَّ. وَ هُمَّنْ خَايْفِينْ كَدَرْ الرِّيحْ تِدَوْر تِلِزَّهَا لَحَدِّي تُطُقّ فِي الْبَكَانْ الْعَالِي الْقَاعِدْ قَرِيبْ لِبَلَدْ لِيبِيَا وَ جَاهَدَوْا أَشَانْ يِخَفُّفُوا جَرِي هَنَا السَّفِينَةْ. لَاكِنْ الرِّيحْ قَاعِدَةْ تِوَدِّيهَا قِدَّامْ عَجَلَةْ.
18 وَ أَمْبَاكِرْ، الرِّيحْ وَ الشَّلَّالْ قَاعِدِينْ يِهِزُّوا السَّفِينَةْ شَدِيدْ وَ خَدَّامِينْ السَّفِينَةْ قَمَّوْا يِدَفُّقُوا الشُّحْنَةْ فِي الْبَحَرْ أَشَانْ السَّفِينَةْ تَبْقَى خَفِيفَةْ. 19 وَ الْيَوْم التَّالِتْ، هُمَّنْ ذَاتْهُمْ شَالَوْا خُمَامْهُمْ الْبَخْدُمُوا بَيَّهْ فِي السَّفِينَةْ وَ دَفَّقَوْه فِي الْبَحَرْ. 20 وَ مِنْ مُدَّةْ أَيَّامْ، مَا شِفْنَا الْحَرَّايْ وَ لَا النُّجُومْ وَ الرِّيحْ تُسُوقْ بِشِدَّةْ لَحَدِّي وَدَّرْنَا عَشَمْنَا فِي الْحَيَاةْ.
21 مِنْ مُدَّةْ طَوِيلَةْ، النَّاسْ الْفِي السَّفِينَةْ مَا أَكَلَوْا. وَ يَوْم وَاحِدْ، بُولُسْ قَمَّ حَجَّى لَيْهُمْ وَ قَالْ: «يَا الْأَخْوَانْ، كَنْ أَوَّلْ سِمِعْتُوا كَلَامِي وَ قَعَدْتُوا فِي كِرِيتْ، مَا فِي شَيّءْ يَتْلَفْ وَ لَا يِوَدِّرْ لَيْكُو. 22 لَاكِنْ هَسَّعْ نُقُولْ لَيْكُو شِدُّوا حَيْلكُو! نَادُمْ وَاحِدْ مِنْكُو مَا يِوَدِّرْ إِلَّا السَّفِينَةْ وِحَيْدهَا تِوَدِّرْ. 23 فِي لَيْلَةْ دِي، اللّٰهْ الْأَنَا نَعَبُدَهْ وَ أَنَا هَنَايَهْ هُو بَسْ، هُو رَسَّلْ لَيِّ وَاحِدْ مِنْ مَلَائِكَتَهْ. وَ الْمَلَكْ جَاءْ وَقَفْ فِي جَنْبِي 24 وَ قَالْ: ‹يَا بُولُسْ، مَا تَخَافْ. لَابُدَّ تَقِيفْ قِدَّامْ سُلْطَانْ الرَّوْمَانِيِّينْ. وَ اللّٰهْ أَنْطَاكْ الشَّيّءْ الطَّلَبْتَهْ مِنَّهْ. مَا فِي نَادُمْ مِنْ النَّاسْ الْمُسَافِرِينْ مَعَاكْ يُمُوتْ.› 25 أَشَانْ دَا، يَا الْأَخْوَانْ، شِدُّوا حَيْلكُو. أَنَا مُؤمِنْ بِاللّٰهْ وَ كَلَامَهْ وَ كُلَّ شَيّءْ الْقَالَهْ لَيِّ يَبْقَى. 26 لَاكِنْ السَّفِينَةْ وَاجِبْ تُطُقّ فِي تُرَابْ هَنَا جَزِيرَةْ وَاحِدَةْ.»
27 وَ أُسْبُوعَيْن مِنْ فُتْنَا مِنْ جَزِيرَةْ كِرِيتْ، الرِّيحْ قَاعِدَةْ تِلِزِّنَا قِدَّامْ فِي أُسْط الْبَحَرْ الْأَبْيَضْ. وَ فِي أُسْط اللَّيْل، خَدَّامِينْ السَّفِينَةْ عِرْفَوْا قَرَّبْنَا لِلتُّرَابْ. 28 وَ قَاوَسَوْا الْأَلْمِي بِحَبِلْ وَ لِقَوْه 20 رَاجِلْ. وَ بَعَدَيْن بَتَّانْ قَاوَسَوْه وَ لِقَوْه 15 رَاجِلْ. 29 وَ الْخَدَّامِينْ خَايْفِينْ أَشَانْ فِي فِكِرْهُمْ، الرِّيحْ تِلِزّ السَّفِينَةْ فِي الْحُجَارْ الْقَاعِدِينْ فِي طَرَفْ الْجَزِيرَةْ وَ تِكَسِّرْهَا مَرَّةْ وَاحِدْ. أَشَانْ دَا، نَزَّلَوْا أَرْبَعَةْ وُتَادْ وَرَاءْ لِمَا نَمْشُوا قِدَّامْ عَجَلَةْ. وَ قُلُوبْهُمْ مُعَلَّقِينْ وَ قَاعِدِينْ يَرْجَوْا الْوَطَاةْ تَصْبِحْ أَشَانْ يِشِيفُوا الْبَكَانْ الْقَاعِدِينْ فَوْقَهْ.
30 وَ الْخَدَّامِينْ دَوَّرَوْا يِنْبَلْصُوا مِنْ السَّفِينَةْ وَ دَلَّوْا الْمَرْكَبَةْ فِي رَاسْ الْأَلْمِي. وَ قَالَوْا لَيْنَا هُمَّنْ يِدَوْرُوا يَرْبُطُوا السَّفِينَةْ بِوِتِدْ قِدَّامْ. 31 لَاكِنْ بُولُسْ حَجَّى لِلْعَسْكَرْ وَ لِمَسْؤُولْهُمْ وَ قَالْ: «كَنْ الرُّجَالْ دَوْل مَا يَقْعُدُوا مَعَانَا فِي السَّفِينَةْ، إِنْتُو مَا تَنْجَوْا.»
32 وَ طَوَّالِي، الْعَسْكَرْ قَطَعَوْا حُبَالْ هَنَا الْمَرْكَبَةْ وَ خَلَّوْهَا فَاتَتْ مِنْ السَّفِينَةْ. 33 وَ قَرِيبْ الصَّبَاحْ، بُولُسْ طَلَبْ مِنْهُمْ كُلُّهُمْ يَاكُلُوا وَ قَالْ: «مِنْ 14 يَوْم، إِنْتُو تَعْبَانِينْ وَ مَا أَكَلْتُوا. 34 وَ هَسَّعْ نَطْلُبْ مِنْكُو تَاكُلُوا وَ تَلْقَوْا قُدْرَةْ أَشَانْ تَنْجَوْا. كُلُّكُو تَنْجَوْا وَ صُوفَايْ وَاحِدَةْ مِنْ رَاسْ وَاحِدْ مِنْكُو كُلَ مَا تِوَدِّرْ!»
35 وَ بَعَدْ هُو قَالْ الْكَلَامْ دَا، هُو شَالْ خُبْزَةْ وَ شَكَرْ اللّٰهْ قِدَّامْ كُلَّ النَّاسْ وَ كَسَرَاهَا وَ قَمَّ أَكَلْ مِنْهَا. 36 وَ قُلُوبْهُمْ رَقَدَوْا وَ كُلُّهُمْ قَمَّوْا أَكَلَوْا. 37 وَ عَدَدْ النَّاسْ الْقَاعِدِينْ فِي السَّفِينَةْ 276. 38 وَ وَكِتْ شِبْعَوْا، دَفَّقَوْا فِي الْبَحَرْ الْقَمَحْ الْقَاعِدْ فِي لُبّ السَّفِينَةْ أَشَانْ تَبْقَى خَفِيفَةْ.
39 وَ وَكِتْ الْوَطَاةْ أَصْبَحَتْ، شَافَوْا الْبَكَانْ الْوِصْلَوْا فَوْقَهْ لَاكِنْ مَا عِرْفَوْه. وَ شَافَوْا خَشُمْ الْبَحَرْ عِنْدَهْ رَمْلَةْ. وَ قَرَّرَوْا يِوَجُّهُوا السَّفِينَةْ عَلَيْ الرَّمْلَةْ دِي أَشَانْ يِوَقُّفُوهَا. 40 وَ قَطَعَوْا حُبَالْ الْوُتَادْ وَ الْوُتَادْ دَفَّقَوْا فِي الْبَحَرْ. وَ فَرْتَقَوْا الْعِيدَانْ الْيِوَدُّوا السَّفِينَةْ فِي دَرِبْهَا وَ فَرْتَقَوْا الشِّرَاعْ الْقِدَّامِي أَشَانْ الرِّيحْ تِلِزّ السَّفِينَةْ فِي رَمْلَةْ هَنَا خَشُمْ الْبَحَرْ. 41 لَاكِنْ السَّفِينَةْ أَنْطَقَّتْ فِي بَكَانْ عَالِي، تِحِتْ الْأَلْمِي. وَ نُصَّهَا الْقِدَّامِي وِحِلْ مَرَّةْ وَاحِدْ فِي الرَّمْلَةْ. وَ الشَّلَّالْ الشَّدِيدْ قَاعِدْ يُدُقّ النُّصّ الْوَرَّانِي وَ بَدَا يِكَسِّرْهَا.
42 الْعَسْكَرْ دَوَّرَوْا يَكْتُلُوا الْمَسَاجِينْ أَشَانْ نَادُمْ مِنْهُمْ مَا يِعَرِّدْ فِي الْأَلْمِي. 43 لَاكِنْ مَسْؤُولْ الْعَسْكَرْ دَوَّرْ يِنَجِّي بُولُسْ مِنْهُمْ وَ دَحَرْ الْعَسْكَرْ مَا يَكْتُلُوا نَادُمْ. وَ أَنْطَى إِذِنْ لِأَيِّ نَادُمْ الْيَقْدَرْ يُعُومْ أَشَانْ يُنُطّ فِي الْبَحَرْ وَ يَلْحَقْ خَشُمْ الْبَحَرْ. 44 وَ بَعَدَيْن، أَنْطَى إِذِنْ لِلنَّاسْ الْآخَرِينْ أَشَانْ يَمْسُكُوا خَشَبْ وَلَّا عُودْ مِنْ حَطَبْ السَّفِينَةْ الْقَاعِدَةْ تِنْكَسِرْ وَ يُعُومُوا بَيَّهْ وَرَاهُمْ. وَ خَلَاصْ، أَيِّ نَادُمْ مِنِّنَا وِصِلْ فِي الْجَزِيرَةْ بِالْعَافَيْ.
© La Bible en arabe tchadien © Alliance biblique du Tchad, 2019
