ذنِب الناس فرقاهم من اللّه
1 دَاهُو! إِيدْ اللّٰهْ مَا قِصَيْرَةْ لِتِنَجِّيكُو
وَ أَدَانَهْ مَا تَقِيلَةْ لِتَسْمَعْكُو!
2 وَ لَاكِنْ دَا خَطَاكُو بَسْ
الْفَرَقَاكُو مِنْ إِلٰـهْكُو.
وَ بِسَبَبْ ذُنُوبْكُو بَسْ،
هُو مَا وَجَّهْ عَلَيْكُو
وَ خَلَاصْ، هُو مَا يَسْمَعْكُو.
3 أَشَانْ إِيدَيْكُو مُلَطَّخِينْ بِالدَّمّ
وَ أَصَابِعْكُو بِالْخَطَا.
خُشُومْكُو يِكَلُّمُوا بِالْكِدِبْ
وَ لِسْنَيْكُو يِخَالُوا بِالْغَشّ.
4 مَا فِي نَادُمْ يَشْكِي بِعَدَالَةْ
وَ مَا فِي نَادُمْ الْيَحْكِمْ بِالْحَقّ.
لَاكِنْ يِتْوَكَّلَوْا عَلَيْ الْفَاضِي
وَ يِحَجُّوا بِكِدِبْ
وَ يَحْمَلَوْا بِالْفَسَالَةْ
وَ يَلْدَوْا الشَّرّ.
5 يِفَقَّعَوْا بَيْض أَبُنْ دَرَقْ
وَ يِتِرُّوا حُبَالْ أَبُنْ شَبَشْ.
النَّادُمْ الْيَاكُلْ مِنْ بَيْضهُمْ يُمُوتْ
وَ الْبَيْضَايْ التِّنْكَسِرْ، طَوَّالِي تَمْرُقْ مِنْهَا أَمْ شِدَيْقَاتْ.
6 حُبَالْ أَبُنْ شَبَشْ دَوْل مَا يَقْدَرَوْا يِلَبُّسُوهُمْ
وَ خِدْمِتْهُمْ دِي مَا تِغَطِّيهُمْ.
وَ خِدْمِتْهُمْ دِي، خِدْمَةْ شَرّ
وَ عَمَلْ الْعُنُفْ فِي كَفَافَيْهُمْ.
7 رِجْلَيْهُمْ يَجْرُوا لِلشَّرّ
وَ يِسَّعْجَلَوْا لِدَفِّقِينْ دَمّ الْبَرِي.
فِكِرْهُمْ فِكِرْ هَنَا فَسَالَةْ
وَ الدَّمَارْ وَ الْخَرَابْ فِي دَرِبْهُمْ.
8 وَ مَا يَعَرْفُوا دَرِبْ السَّلَامْ
وَ عَمَلْهُمْ مَا عَدِيلْ.
دُرُوبْهُمْ السَّوَّوْهُمْ عُوُجْ
وَ أَيِّ نَادُمْ الْيَمْشِي فَوْقهُمْ
مَا يَعَرِفْ السَّلَامْ.
ناس القدس أعْترفوا بذُنوبهم
9 نَاسْ مَدِينَةْ الْقُدُسْ قَالَوْا:
«فِي شَانْ دَا، الْحَقّ بِقِي بَعِيدْ مِنِّنَا
وَ الْعَدَالَةْ مَا لِحْقَتْنَا.
خَطَّيْنَا عَشَمْنَا فِي النُّورْ
وَ دَاهُو لِقِينَا الضَّلَامْ
وَ قَاعِدِينْ نَرْجَوْا النَّهَارْ
وَ لَاكِنْ رُغْنَا فِي الضَّلَامْ.
10 نِدَّقَّشَوْا مِثِلْ عَمْيَانِينْ فِي الدَّرَادِرْ
أَيْوَى، نِدَّقَّشَوْا مِثِلْ الْمَا عِنْدُهُمْ عُيُونْ.
وَ قَايْلَةْ بَسْ، نِتَّرْتَعَوْا مِثِلْ فِي اللَّيْل
وَ فِي لُبّ النَّاسْ الطَّيْبِينْ، بِقِينَا مِثِلْ الْمَيْتِينْ.
11 وَ كُلِّنَا نِكِرُّوا مِثِلْ دِيدَانْ
وَ نَبْكُوا مِنْ الْحِزِنْ مِثِلْ قِمْرِيْ.
خَطَّيْنَا عَشَمْنَا فِي الْعَدَالَةْ
لَاكِنْ مَا فِي شَيّءْ
وَ خَطَّيْنَا عَشَمْنَا فِي النَّجَاةْ
لَاكِنْ بَعِيدْ مِنِّنَا.
12 يَا رَبّ، عِصْيَانَّا بِقِي كَتِيرْ قِدَّامَكْ
وَ ذُنُوبْنَا شَهَدَوْا فَوْقنَا.
نِفَكُّرُوا دَايْماً فِي عِصْيَانَّا
وَ خَطَانَا كُلَ نَعَرْفُوهْ.
13 كَدَبْنَا وَ عِصِينَا اللّٰهْ
وَ أَبَيْنَا مَا تَابَعْنَا إِلٰـهْنَا.
حَجَّيْنَا إِلَّا بِظُلُمْ وَ مُؤآمَرَةْ ضِدّ الْآخَرِينْ
وَ قُلُوبْنَا مَلَانِينْ بِكَلَامْ كِدِبْ.
14 بَيْدَا، الْحَقّ كَسْكَسْ وَرَاءْ
وَ الْعَدَالَةْ وَقَفَتْ بَعِيدْ.
الصَّحِيحْ يِتَّرْتَعْ فِي الشَّوَارِعْ
وَ الْأَمَانْ مَا يَقْدَرْ يَجِي.
15 الْحَقّ بِقِي مَا فِيهْ
وَ الْيِبَعِّدْ مِنْ الْفَسَالَةْ يَبْقَى غَنِيمَةْ!»
دُراع اللّه يجيب النجاة
اللّٰهْ شَافْ الْعَدَالَةْ وَدَّرَتْ
وَ هُو غِضِبْ.
16 هُو شَافْ كَدَرْ مَا فِي نَادُمْ
وَ آسِفْ مَا فِي نَادُمْ أَدَّخَّلْ.
وَ خَلَاصْ، هُو ذَاتَهْ قَمَّ رَفَعْ دُرَاعَهْ
وَ جَابْ النَّجَاةْ
وَ عَدَالْتَهْ أَنْطَتَهْ قُدْرَةْ.
17 هُو لِبِسْ الْعَدَالَةْ مِثِلْ دِرِعْ
وَ خَطَّ طَاقِيَّةْ النَّجَاةْ فِي رَاسَهْ.
هُو لِبِسْ خَلَقْ التَّارْ مِثِلْ عِبَايَةْ
وَ أَنْكَسَى بِالْغِيرَةْ مِثِلْ جَلَّابِيَّةْ.
18 خَلَاصْ، اللّٰهْ يِكَافِي أَيِّ نَادُمْ حَسَبْ عَمَلَهْ
وَ يَغْضَبْ لِخُصْمَانَهْ وَ يِجَازِي عُدْوَانَهْ
وَ يِكَافِي سُكَّانْ الْجَزَايِرْ حَسَبْ عَمَلْهُمْ.
19 مِنْ بَكَانْ طَلُوعْ الْحَرَّايْ،
يَخَافَوْا مِنْ أُسُمْ اللّٰهْ
وَ مِنْ بَكَانْ وَقُوعْهَا،
يَخَافَوْا مِنْ مَجْدَهْ.
أَشَانْ هُو يَجِي بِشِدَّةْ مِثِلْ سَيْل
التِّلِزَّهْ نَفْخَةْ اللّٰهْ.
20 «خَلَاصْ، الْيَفْدَاهُمْ يَجِي لِصَهْيُون،
لِذُرِّيَّةْ يَعْقُوبْ الْيِقَبُّلُوا مِنْ عِصْيَانْهُمْ.»
وَ دَا كَلَامْ اللّٰهْ.
21 وَ اللّٰهْ قَالْ: «كَنْ لَيِّ أَنَا، دِي مُعَاهَدَتِي مَعَاهُمْ. رُوحِي قَاعِدْ فَوْقَكْ وَ خَطَّيْت كَلَامِي فِي خَشْمَكْ. وَ أَبَداً مَا نِشِيلْهُمْ مِنْ خَشْمَكْ وَ لَا مِنْ خُشُومْ ذُرِّيّتَكْ وَ لَا مِنْ خُشُومْ ذُرِّيَّةْ ذُرِّيّتَكْ، مِنْ هَسَّعْ وَ إِلَى الْأَبَدْ.»
© La Bible en arabe tchadien © Alliance biblique du Tchad, 2019
