اللّه يكْتُل لُيَاتَان
1 وَ فِي الْيَوْم دَا، اللّٰهْ يِعَاقِبْ
لُيَاتَانْ الدَّابِي الْمُعَرِّدْ
بِسَيْفَهْ الطَّرِينْ وَ كَبِيرْ وَ شَدِيدْ.
وَ هُو لُيَاتَانْ الدَّابِي الْأَعْوَجْ
أَيْوَى، هُو يَكْتُلْ الْغُولْ الْفِي الْبَحَرْ.
الربّ و جِنَيْنِته هنا العِنب
2 وَ فِي الْيَوْم دَا، غَنُّوا
لِجِنَيْنَةْ الْعِنَبْ اللَّذِيذَةْ.
3 أَنَا اللّٰهْ بَسْ حَارِسْهَا
وَ نَزْقِيهَا فِي كُلَّ وَكِتْ.
وَ فِي شَانْ مَا يَدْخُلُوا فَوْقهَا،
أَنَا قَاعِدْ نَحْرِسْهَا لَيْل وَ نَهَارْ.
4 أَنَا بَتَّانْ مَا عِنْدِي
أَيِّ غَضَبْ ضِدَّهَا.
لَاكِنْ كَنْ لِقِيتْ شَوْك
وَ أَنْدِرَيْسَةْ قَاعِدِينْ يَوَاجُهُونِي،
أَنَا نُرُوغْ فَوْقهُمْ
وَ نَحْرِقْهُمْ كُلُّهُمْ.
5 كَنْ يِدَوْرُوا يِسَوُّونِي مَلْجَئْهُمْ،
خَلِّي يِسَوُّوا مَعَايِ سَلَامْ
أَيْوَى، يِسَوُّوا مَعَايِ سَلَامْ.
اللّه يمْحا خطا شعبه
6 وَ فِي الْمُسْتَقْبَلْ، ذُرِّيَّةْ يَعْقُوبْ
يِسَوُّوا عُرُوقْ.
بَنِي إِسْرَائِيلْ يَبْقَوْا مِثِلْ شَدَرَةْ،
يِخَضُّرُوا وَ يِنَوُّرُوا
وَ يَمْلَوْا الْعَالَمْ بِفَوَاكِهُّمْ.
7 وَ اللّٰهْ مَا ضَرَبَاهُمْ
مِثِلْ ضَرَبْ النَّاسْ الضَّرَبَوْهُمْ.
وَ مَا كَتَلَاهُمْ
مِثِلْ كَتَلْ النَّاسْ الْكَتَلَوْهُمْ.
8 وَ لَاكِنْ وَكِتْ اللّٰهْ عَاقَبَاهُمْ،
هُو طَرَدَاهُمْ وَ مَرَقَاهُمْ
وَ قَشَّاهُمْ بِنَفْخَةْ شَدِيدَةْ
فِي يَوْم هَنَا رِيحْ الْجَايَةْ مِنْ صَبَاحْ.
9 وَ بِمِثِلْ دَا، يِنْقَشَّ خَطَا يَعْقُوبْ
وَ دَاهُو نَتِيجَةْ غُفْرَانْ ذَنْبَهْ.
يَعْقُوبْ يِكَسِّرْ حُجَارْ الْمَدْبَحْ
وَ يِسَوِّيهُمْ مِثِلْ الدَّقِيقْ الْمَرْحُوكْ.
وَ الْعِيدَانْ الْغَزَّوْهُمْ لِعِبَادَةْ أَشِيرَةْ
وَ مَخَابِرْ الْبَخُورْ،
كُلُّهُمْ يَبْقَوْا مَا فِيهُمْ.
10 الْمَدِينَةْ الْقَوِيَّةْ بِقَتْ مَعْزُولَةْ
وَ بِقَتْ مِثِلْ الْمَرْعَى الْأَبَوْه
وَ خَلَّوْه مِثِلْ كَدَادَةْ.
الْعَجَّالْ يَجُوا يَسْرَحَوْا فَوْقهَا
وَ يَاكُلُوا وَرَقْ شَدَرْهَا
وَ يِنْجَمَّوْا فَوْقهَا.
11 وَ وَكِتْ الْفُرُوعْ يَبْقَوْا يَابْسِينْ،
الْعَوِينْ يِكَسِّرَنْهُمْ
وَ يِأَوْقِدَنْهُمْ نَارْ.
أَشَانْ الشَّعَبْ دَوْل مَا عِنْدُهُمْ مَعْرَفَةْ
وَ الْخَلَقَاهُمْ مَا رَحَمَاهُمْ
وَ الْكَوَّنَاهُمْ مَا حَنَّ فَوْقهُمْ.
القبِّلين في مدينة القدس
12 وَ فِي الْيَوْم دَا، اللّٰهْ يِحِتّ الشَّدَرْ
مِنْ بَحَرْ الْفُرَاتْ لَحَدِّي وَادِي مَصِرْ.
وَ يِلَقُّطُوكُو الْوَاحِدْ بَعَدْ الْآخَرْ،
يَا بَنِي إِسْرَائِيلْ!
13 وَ فِي الْيَوْم دَا،
يَضُرْبُوا الْبُوقْ الْكَبِيرْ.
وَ خَلَاصْ، يَجُوا الْوَدَّرَوْا فِي بَلَدْ أَشُورْ
وَ الْمُشَتَّتِينْ فِي بَلَدْ مَصِرْ.
وَ هُمَّنْ يَسْجُدُوا قِدَّامْ اللّٰهْ
فِي الْجَبَلْ الْمُقَدَّسْ،
فِي مَدِينَةْ الْقُدُسْ.
© La Bible en arabe tchadien © Alliance biblique du Tchad, 2019
