بَنْهَدَاد حاصر السَامِرَة
1 وَ بَنْهَدَادْ مَلِكْ أَرَامْ لَمَّ كُلَّ عَسْكَرَهْ وَ مَعَايَهْ 32 مُلُوكْ وَ سِيَادْ خَيْل وَ عَرَبَاتْ حَرِبْ. وَ هُمَّنْ مَشَوْا حَاصَرَوْا مَدِينَةْ السَّامِرَةْ لِيِحَارُبُوهَا. 2 وَ بَنْهَدَادْ رَسَّلْ نَاسْ فِي الْمَدِينَةْ لِأَخَابْ مَلِكْ مَمْلَكَةْ إِسْرَائِيلْ 3 وَ قَالَوْا لَيَّهْ: «دَاهُو كَلَامْ بَنْهَدَادْ، هُو بُقُولْ: ‹فُضِّتَكْ وَ دَهَبَكْ هُمَّنْ هِنَيّ وَ عَوِينَكْ وَ عِيَالَكْ السَّمْحِينْ كُلَ هِنَيّ.›» 4 وَ مَلِكْ مَمْلَكَةْ إِسْرَائِيلْ رَدَّ لَيَّهْ وَ قَالْ: «مِثِلْ إِنْتَ قُلْتَهْ، يَا سِيدِي الْمَلِكْ، أَنَا وَ كُلَّ شَيّءْ الْعِنْدِي هَنَاكْ إِنْتَ.»
5 وَ النَّاسْ دَوْل قَبَّلَوْا تَانِي مَرَّةْ لِأَخَابْ وَ قَالَوْا لَيَّهْ: «دَاهُو كَلَامْ بَنْهَدَادْ، هُو بُقُولْ: ‹أَنَا رَسَّلْت لَيْك وَ قُلْت كَدَرْ فُضِّتَكْ وَ دَهَبَكْ هِنَيّ وَ عَوِينَكْ وَ عِيَالَكْ كُلَ تَنْطِيهُمْ لَيِّ. 6 وَ زِيَادَةْ مِنْ دَا، أَعَرِفْ كَدَرْ لِأَمْبَاكِرْ فَجُرْ فِي نَفْس الْوَكِتْ، نِرَسِّلْ لَيْك مَسَائِيلِي وَ هُمَّنْ يِفَتُّشُوا بَيْتَكْ وَ بُيُوتْ مَسَائِيلَكْ. وَ كُلَّ شَيّءْ التِّشِيفَهْ غَالِي لَيْك، هُمَّنْ يِشِيلُوهْ.›»
7 وَ مَلِكْ مَمْلَكَةْ إِسْرَائِيلْ لَمَّ كُلَّ شُيُوخْ الْبَلَدْ وَ قَالْ لَيْهُمْ: «شِيفُوا الرَّاجِلْ دَا يِدَوْر يِسَوِّي لَيِّ شَيّءْ فَسِلْ. وَكِتْ دَوَّرْ مِنِّي عَوِينِي وَ عِيَالِي وَ فُضِّتِي وَ دَهَبِي، أَنَا مَا أَبَيْت لَيَّهْ.» 8 وَ كُلَّ الشُّيُوخْ وَ كُلَّ الشَّعَبْ قَالَوْا لَيَّهْ: «مَا تَسْمَعْ كَلَامَهْ وَ لَا تَرْضَى بَيَّهْ.» 9 وَ بَيْدَا، أَخَابْ قَالْ لِنَاسْ بَنْهَدَادْ: «أَمْشُوا قُولُوا لِسِيدِي الْمَلِكْ: ‹كُلَّ شَيّءْ الطَّلَبَهْ مِنِّي فِي الْمَرَّةْ الْأَوَّلْ، أَنَا قَصَّدْت بَيَّهْ نِسَوِّيهْ. لَاكِنْ طَلَبَهْ التَّانِي دَا، أَنَا مَا نَقْدَرْ نِطَبِّقَهْ.›» وَ خَلَاصْ، النَّاسْ دَوْل قَبَّلَوْا وَ وَدَّوْا الرَّدّ دَا لِسِيدْهُمْ.
10 وَ بَنْهَدَادْ رَسَّلْ لِتَالِتْ مَرَّةْ وَ قَالْ: «خَلِّي الْإِلٰـهَاتْ يِعَاقُبُونِي عِقَابْ شَدِيدْ كَنْ أَرْض السَّامِرَةْ تَمَّتْ مَلْيَةْ إِيدْ لِكُلَّ عَسْكَرِي الْمَاشِينْ مَعَايِ.» 11 وَ لَاكِنْ مَلِكْ مَمْلَكَةْ إِسْرَائِيلْ رَدَّ لَيَّهْ وَ قَالْ: «أَمْشُوا قُولُوا لَيَّهْ الْمَثَلْ دَا: ‹مَا تَشْكُرْ نَفْسَكْ قَبُلْ الْحَرِبْ!›» 12 وَ وَكِتْ بَنْهَدَادْ سِمِعْ الْكَلَامْ دَا، هُو قَاعِدْ يَشْرَبْ مَعَ مُلُوكْ آخَرِينْ فِي لُبّ الْخَيْمَةْ وَ قَالْ لِعَسْكَرَهْ: «يَلَّا جَهُّزُوا!» وَ خَلَاصْ، هُمَّنْ جَهَّزَوْا لِيِحَارُبُوا الْمَدِينَةْ.
بني إسرائيل أنّصروا في ملك أَرَام
13 وَ لَاكِنْ نَبِي وَاحِدْ جَاءْ لِأَخَابْ مَلِكْ مَمْلَكَةْ إِسْرَائِيلْ وَ قَالْ لَيَّهْ: «دَاهُو اللّٰهْ قَالْ: ‹هَلْ شِفْت الدَّيْش الْكَبِيرْ دَا وَلَّا؟ دَاهُو أَنَا نِسَلِّمْهُمْ لَيْك فِي إِيدَكْ. وَ فِي الْيَوْم دَا، إِنْتَ تَعَرِفْ كَدَرْ أَنَا بَسْ اللّٰهْ.›» 14 وَ أَخَابْ سَأَلْ النَّبِي وَ قَالْ: «بِمُسَاعَدَةْ يَاتُو إِنْتَ تِسَلِّمْهُمْ لَيِّ؟» وَ النَّبِي قَالْ: «دَاهُو اللّٰهْ قَالْ: ‹بِمُسَاعَدَةْ عَسْكَرْ مَسَائِيلْ الْوُلَايَاتْ.›» وَ أَخَابْ قَالْ: «يَاتُو الْيَمْشِي يِقَوِّمْ الْحَرِبْ؟» وَ النَّبِي رَدَّ لَيَّهْ وَ قَالْ: «إِنْتَ بَسْ.»
15 وَ خَلَاصْ، أَخَابْ لَمَّ كُلَّ عَسْكَرْ مَسَائِيلْ الْوُلَايَاتْ وَ عَدَدْهُمْ 232. وَ لَمَّ بَتَّانْ كُلَّ نَاسْ مَمْلَكَةْ إِسْرَائِيلْ وَ لِقِي عَدَدْهُمْ 7 000 عَسْكَرِي. 16 وَ هُمَّنْ مَشَوْا هَجَمَوْا بِقَايْلَةْ. وَ بَنْهَدَادْ وَ الْمُلُوكْ التَّلَاتِينْ وَ تِنَيْن الْجَوْا لَيَّهْ فَزَعْ قَاعِدِينْ يَسْكَرَوْا فِي لُبّ الْخَيْمَةْ. 17 وَ أَوَّلاً كَيْ، عَسْكَرْ مَسَائِيلْ الْوُلَايَاتْ مَرَقَوْا. وَ بَنْهَدَادْ رَسَّلْ وَ أَكَّدْ وَ قَالَوْا لَيَّهْ: «رُجَالْ مَرَقَوْا مِنْ السَّامِرَةْ.» 18 وَ هُو قَالْ لَيْهُمْ: «كَنْ هُمَّنْ جَايِينْ يِدَوْرُوا السَّلَامَةْ، كَرُّبُوهُمْ حَيِّينْ. وَ كَنْ جَايِينْ لِلْحَرِبْ كُلَ، كَرُّبُوهُمْ حَيِّينْ.»
19 وَ عَسْكَرْ مَسَائِيلْ الْوُلَايَاتْ وَ الْعَسْكَرْ الْآخَرِينْ الْمَاشِينْ وَرَاهُمْ مَرَقَوْا مِنْ الْمَدِينَةْ. 20 وَ أَيِّ وَاحِدْ ضَرَبْ قَبِيلَهْ. وَ الْأَرَامِيَّيْن عَرَّدَوْا وَ عَسْكَرْ مَمْلَكَةْ إِسْرَائِيلْ طَارَدَوْهُمْ. وَ بَنْهَدَادْ مَلِكْ أَرَامْ رِكِبْ فِي جُوَادْ وَ عَرَّدْ مَعَ سِيَادْ خَيْل وَاحِدِينْ. 21 وَ مَلِكْ مَمْلَكَةْ إِسْرَائِيلْ مَشَى مَعَ عَسْكَرَهْ الْمَعَايَهْ وَ كَتَلْ الْخَيْل وَ دَمَّرْ عَرَبَاتْ الْحَرِبْ. وَ بِمِثِلْ دَا، هُو أَنَّصَرْ فِي الْأَرَامِيَّيْن نَصُرْ كَبِيرْ. 22 وَ فِي الْبَكَانْ دَا، النَّبِي جَاءْ لِمَلِكْ مَمْلَكَةْ إِسْرَائِيلْ وَ قَالْ لَيَّهْ: «شِدّ حَيْلَكْ وَ فَكِّرْ فِي الشَّيّءْ الْوَاجِبْ تِسَوِّيهْ. أَشَانْ فِي السَّنَةْ الْجَدِيدَةْ، مَلِكْ أَرَامْ يَجِي يَهْجِمَكْ بَتَّانْ.»
مملكة إسرائيل أنّصرت بتان
23 وَ مَسَائِيلْ مَلِكْ أَرَامْ قَالَوْا لَيَّهْ: «إِلٰـهْ بَنِي إِسْرَائِيلْ هُو إِلٰـهْ هَنَا جِبَالْ وَ فِي شَانْ دَا بَسْ، هُمَّنْ بِقَوْا قَوِيِّينْ مِنِّنَا. لَاكِنْ خَلِّي نِحَارُبُوهُمْ فِي السَّهَلَةْ وَ أَكِيدْ أَنِحْنَ نَبْقَوْا قَوِيِّينْ مِنْهُمْ. 24 وَ هَسَّعْ، دَاهُو الشَّيّءْ التِّسَوِّيهْ. نَزِّلْ كُلَّ الْمُلُوكْ دَوْل وَ بَدِّلْهُمْ بِحُكَّامْ. 25 وَ إِنْتَ ذَاتَكْ شِيلْ لَيْك عَسْكَرْ قَوِيِّينْ مِثِلْ الْعَسْكَرْ الْأَوَّلْ إِنْتَ وَدَّرْتُهُمْ وَ شِيلْ نَفْس الْعَدَدْ هَنَا الْخَيْل وَ عَرَبَاتْ الْحَرِبْ. وَ بَعَدْ دَا، أَنِحْنَ نِحَارُبُوا عَسْكَرْ بَنِي إِسْرَائِيلْ فِي السَّهَلَةْ. وَ أَكِيدْ أَنِحْنَ نَبْقَوْا قَوِيِّينْ مِنْهُمْ.» وَ الْمَلِكْ سِمِعْ كَلَامْهُمْ وَ سَوَّى الشَّيّءْ الْقَالَوْه لَيَّهْ.
26 وَ فِي السَّنَةْ الْجَدِيدَةْ، بَنْهَدَادْ وَ كُلَّ عَسْكَرْ الْأَرَامِيَّيْن مَشَوْا وَ لَمَّوْا فِي حِلَّةْ أَفِيقْ لِيِحَارُبُوا مَمْلَكَةْ إِسْرَائِيلْ. 27 وَ نَاسْ مَمْلَكَةْ إِسْرَائِيلْ كُلَ لَمَّوْا عَسْكَرْهُمْ وَ أَنْطَوْهُمْ مَعَاشْ وَ مَشَوْا لِيَوَاجُهُوا الْأَرَامِيَّيْن. وَ عَسْكَرْ مَمْلَكَةْ إِسْرَائِيلْ خَطَّوْا مُعَسْكَرْهُمْ مُقَابِلْ الْأَرَامِيَّيْن. وَ لَاكِنْ هُمَّنْ شِيَّةْ، بِشَّابَهَوْا مِثِلْ دَوْر إِتْنَيْن هَنَا غَنَمْ جَنْب الْأَرَامِيَّيْن الْمَلَوْا كُلَّ الْبَلَدْ.
28 وَ فِي الْبَكَانْ دَا، النَّبِي جَاءْ لِمَلِكْ مَمْلَكَةْ إِسْرَائِيلْ وَ قَالْ لَيَّهْ: «دَاهُو اللّٰهْ قَالْ: ‹الْأَرَامِيَّيْن قَالَوْا: ”اللّٰهْ هُو إِلٰـهْ هَنَا جِبَالْ وَ مَا إِلٰـهْ هَنَا وُدْيَانْ.“ وَ فِي شَانْ دَا، أَنَا نِسَلِّمْ لَيْك كُلَّ الدَّيْش الْكَبِيرْ دَا فِي إِيدَكْ. وَ بَيْدَا، تَعَرْفُوا كَدَرْ أَنَا بَسْ اللّٰهْ.›»
29 وَ الدُّيُوشْ الْإِتْنَيْن دَوْل قَعَدَوْا مُلْقَابِلِينْ مُدَّةْ سَبْعَةْ يَوْم. وَ فِي الْيَوْم السَّابِعْ، الدُّوَاسْ بَدَا. وَ فِي يَوْم وَاحِدْ، عَسْكَرْ مَمْلَكَةْ إِسْرَائِيلْ كَتَلَوْا مِنْ الْأَرَامِيَّيْن 100 000 عَسْكَرْ الْمَاشِينْ بِرِجْلَيْهُمْ. 30 وَ 27 000 عَسْكَرْ الْفَضَّلَوْا عَرَّدَوْا وَ دَخَلَوْا فِي حِلَّةْ أَفِيقْ وَ لَاكِنْ الدُّرْدُرْ وَقَعْ فَوْقهُمْ كُلُّهُمْ. وَ بَنْهَدَادْ كُلَ عَرَّدْ وَ مَشَى دَخَلْ فِي الْحِلَّةْ وَ قَاعِدْ يِلَّبَّدْ مِنْ غُرْفَةْ لِغُرْفَةْ.
علاقة أَخَاب مع ملك أَرَام
31 وَ مَسَائِيلْ بَنْهَدَادْ جَوْا وَ قَالَوْا لَيَّهْ: «أَنِحْنَ سِمِعْنَا كَدَرْ مُلُوكْ بَنِي إِسْرَائِيلْ عِنْدُهُمْ رَحْمَةْ. هَسَّعْ دَا، خَلِّي نَرْبُطُوا شُوَالَاتْ فِي صَلَبَانَا وَ حُبَالْ فِي رُوسَيْنَا وَ نَمْشُوا لِمَلِكْ مَمْلَكَةْ إِسْرَائِيلْ. وَ بَيْدَا، أَكُونْ يِخَلِّيكْ مَا يَكْتُلَكْ.»
32 وَ خَلَاصْ، هُمَّنْ رَبَطَوْا شُوَالَاتْ فِي صَلَبَاهُمْ وَ حُبَالْ فِي رُوسَيْهُمْ وَ مَشَوْا لِمَلِكْ مَمْلَكَةْ إِسْرَائِيلْ وَ قَالَوْا لَيَّهْ: «عَبْدَكْ بَنْهَدَادْ بُقُولْ: ‹مِنْ فَضْلَكْ، خَلِّينِي نِعِيشْ!›» وَ أَخَابْ قَالْ: «هُو قَاعِدْ حَيّ وَلَّا؟ هُو أَخُويِ!» 33 وَ الْكَلَامْ دَا بِقِي لَيْهُمْ حَلُو لِلنَّاسْ دَوْل وَ طَوَّالِي قَالَوْا لَيَّهْ: «بَنْهَدَادْ دَا أَخُوكْ!» وَ أَخَابْ قَالْ لَيْهُمْ: «أَيْوَى، جِيبُوهْ لَيِّ!» وَ خَلَاصْ، بَنْهَدَادْ مَرَقْ جَاءْ لِأَخَابْ وَ هُو رَكَّبَهْ فِي عَرَبَتَهْ هُو ذَاتَهْ.
34 وَ بَنْهَدَادْ قَالْ لِأَخَابْ: «أَنَا نِقَبِّلْ لَيْك الْمُدُنْ الْأَبُويِ شَالَاهُمْ مِنْ أَبُوكْ. وَ إِنْتَ تَقْدَرْ تَمْشِي تِسَاوِقْ خُمَامَكْ فِي مَدِينَةْ دِمَشْق مِثِلْ أَوَّلْ أَبُويِ سَاوَقْ فِي السَّامِرَةْ.» وَ أَخَابْ قَالْ لِبَنْهَدَادْ: «أَنَا نِسَوِّي عَلَاقَةْ مَعَاكْ وَ نِخَلِّيكْ تَمْشِي.» وَ خَلَاصْ، هُو سَوَّى مَعَايَهْ عَلَاقَةْ وَ خَلَّاهْ مَشَى.
اللّه عاقب أَخَاب
35 وَ نَبِي وَاحِدْ مِنْ مَجْمُوعَةْ الْأَنْبِيَاء قَالْ لِرَفِيقَهْ بِأَمُرْ اللّٰهْ: «مِنْ فَضْلَكْ، أَضْرُبْنِي!» وَ لَاكِنْ رَفِيقَهْ دَا أَبَى. 36 وَ النَّبِي قَالْ لَيَّهْ: «إِنْتَ أَبَيْت مَا طَبَّقْت أَمُرْ اللّٰهْ. وَ فِي شَانْ دَا، وَكِتْ تُقُمّ مِنْ هِنِي وَ تَمْشِي، دُودْ يَضُرْبَكْ.» وَ خَلَاصْ، وَكِتْ رَفِيقَهْ قَمَّ مِنَّهْ وَ مَاشِي، دُودْ وَاحِدْ لِقَاهْ وَ ضَرَبَهْ وَ كَتَلَهْ. 37 وَ النَّبِي دَا لِقِي نَادُمْ آخَرْ وَ قَالْ لَيَّهْ: «مِنْ فَضْلَكْ، أَضْرُبْنِي!» وَ خَلَاصْ، النَّادُمْ دَا ضَرَبَهْ وَ جَرَحَهْ.
38 وَ خَلَاصْ، النَّبِي مَشَى قَعَدْ فِي دَرِبْ الْيُفُوتْ بَيَّهْ الْمَلِكْ وَ غَطَّى وِجْهَهْ بِغِطَاءْ أَشَانْ مَا يَعَرْفُوهْ. 39 وَ وَكِتْ الْمَلِكْ جَاءْ فَايِتْ بِالدَّرِبْ دَا، النَّبِي قَمَّ نَادَاهْ وَ قَالْ: «يَا الْمَلِكْ، وَكِتْ أَنَا عَبْدَكْ قَاعِدْ فِي الدُّوَاسْ، نَادُمْ وَاحِدْ جَابْ لَيِّ مَسْجُونْ وَاحِدْ وَ قَالْ: ‹أَحْفَضْ النَّادُمْ دَا. كَنْ خَلَّيْتَهْ عَرَّدْ كَمَانْ، حَيَاتَكْ إِنْتَ تُكُونْ فِي بَدَلَهْ أَوْ تِكَفِّي 34 كِيلَوْ فُضَّةْ.› 40 وَ وَكِتْ أَنَا عَبْدَكْ أَنْشَغَلْت بِشَيّءْ آخَرْ، الْمَسْجُونْ دَا عَرَّدْ.» وَ مَلِكْ مَمْلَكَةْ إِسْرَائِيلْ قَالْ لَيَّهْ: «وَ دَا إِنْتَ بِنَفْسَكْ بَسْ قَطَعْت الشَّرِيعَةْ.»
41 وَ طَوَّالِي، النَّبِي فَتَحْ الْغِطَاءْ مِنْ وِجْهَهْ وَ مَلِكْ مَمْلَكَةْ إِسْرَائِيلْ عِرِفَهْ كَدَرْ هُو وَاحِدْ مِنْ الْأَنْبِيَاء. 42 وَ هُو قَالْ لِلْمَلِكْ: «دَاهُو اللّٰهْ قَالْ: ‹أَشَانْ إِنْتَ خَلَّيْت الرَّاجِلْ الْوَاجِبْ تِدَمِّرَهْ عَرَّدْ مِنْ إِيدَيْنَكْ، هَسَّعْ حَيَاتَكْ إِنْتَ تُكُونْ فِي بَدَلْ حَيَاتَهْ وَ حَيَاةْ شَعَبَكْ فِي بَدَلْ حَيَاةْ شَعَبَهْ.›»
43 وَ مَلِكْ مَمْلَكَةْ إِسْرَائِيلْ قَبَّلْ بَيْتَهْ فِي السَّامِرَةْ زَعْلَانْ وَ عِنْدَهْ هَمّ.
© La Bible en arabe tchadien © Alliance biblique du Tchad, 2019
