يُوشِيَّا بِقي ملك في يَهُوذَا
1 وَ يُوشِيَّا عِنْدَهْ 8 سَنَةْ وَكِتْ بِقِي مَلِكْ وَ حَكَمْ 31 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا يَدِيدَةْ بِنَيَّةْ عَدَايَا مِنْ حِلَّةْ بُصْقَتْ. 2 وَ يُوشِيَّا سَوَّى الْعَدِيلْ قِدَّامْ اللّٰهْ. هُو تَابَعْ الدَّرِبْ الْعَدِيلْ هَنَا جِدَّهْ دَاوُدْ وَ مَا بَارَى مِنَّهْ وَ لَا عَلَيْ الزَّيْنَةْ وَ لَا عَلَيْ الْإِسْرَةْ.
3 وَ فِي سَنِةْ 18 هَنَا حُكْمَهْ، الْمَلِكْ يُوشِيَّا رَسَّلْ الْكَاتِبْ شَافَانْ وِلَيْد أَصَلْيَا وِلَيْد مَشُلَّامْ لِبَيْت اللّٰهْ وَ قَالْ لَيَّهْ: 4 «أَمْشِي بَكَانْ حِلْقِيَّا كَبِيرْ رُجَالْ الدِّينْ وَ قُولْ لَيَّهْ خَلِّي يَحْسِبْ جُمْلَةْ الْفُضَّةْ اللَّمَّوْهَا حُرَّاسْ مَدَخَلْ بَيْت اللّٰهْ مِنْ الشَّعَبْ وَ جَابَوْهَا فِي بَيْت اللّٰهْ. 5 وَ الْفُضَّةْ دِي، يَنْطُوهَا لِلنَّاسْ الْمُكَلَّفِينْ بِخِدْمَةْ عَدِيلِينْ بَيْت اللّٰهْ. وَ يِكَفُّوا بَيْهَا الْخَدَّامِينْ الْيِعَدُّلُوا الشُّقُوقْ هَنَا بَيْت اللّٰهْ 6 وَ يِكَفُّوا بَيْهَا الْخَشَّابِينْ وَ الْبَنَّايِينْ وَ الْعَدَّالِينْ. وَ يَشْرُوا بَيْهَا مَرَادِيسْ وَ حُجَارْ مَقْطُوعِينْ لِيِعَدُّلُوا بَيْهُمْ الْبَيْت. 7 وَ مَا يَسْأَلَوْهُمْ مِنْ الْفُضَّةْ الْأَنْطَوْهَا لَيْهُمْ دِي أَشَانْ هُمَّنْ نَاسْ الْعِنْدُهُمْ أَمَانْ.»
كتاب التَوْراة لِقوه في بيت اللّه
8 وَ حِلْقِيَّا كَبِيرْ رُجَالْ الدِّينْ قَالْ لِشَافَانْ الْكَاتِبْ: «أَنَا لِقِيتْ كِتَابْ التَّوْرَاةْ فِي بَيْت اللّٰهْ.» وَ حِلْقِيَّا أَنْطَى الْكِتَابْ دَا لِشَافَانْ وَ هُو قَرَاهْ. 9 وَ شَافَانْ الْكَاتِبْ جَاءْ لِلْمَلِكْ وَ حَجَّى لَيَّهْ وَ قَالْ: «مَسَائِيلَكْ سَلَّمَوْا الْفُضَّةْ اللِّقَوْهَا فِي مَخَزَنْ بَيْت اللّٰهْ لِلْمُكَلَّفِينْ بِخِدْمَةْ عَدِيلِينْ بَيْت اللّٰهْ.» 10 وَ شَافَانْ الْكَاتِبْ قَالْ بَتَّانْ لِلْمَلِكْ: «حِلْقِيَّا رَاجِلْ الدِّينْ أَنْطَانِي كِتَابْ وَاحِدْ.» وَ شَافَانْ قَرَى الْكِتَابْ دَا قِدَّامْ الْمَلِكْ. 11 وَ وَكِتْ الْمَلِكْ سِمِعْ كَلَامْ كِتَابْ التَّوْرَاةْ دَا، قَمَّ شَرَّطْ خُلْقَانَهْ مِنْ الْحِزِنْ.
يُوشِيَّا رسّل لحُلْدَة النبيّة
12 وَ بَعَدْ دَا، الْمَلِكْ أَمَرْ حِلْقِيَّا رَاجِلْ الدِّينْ وَ أَخِقَامْ وِلَيْد شَافَانْ وَ عَكْبُورْ وِلَيْد مِيكَا وَ شَافَانْ الْكَاتِبْ وَ عَسَايَا وَاحِدْ مِنْ مَسَائِيلْ الْمَلِكْ وَ قَالْ لَيْهُمْ: 13 «أَمْشُوا أَسْأَلَوْا اللّٰهْ لَيِّ وَ لِلشَّعَبْ وَ لِكُلَّ نَاسْ مَمْلَكَةْ يَهُوذَا بِسَبَبْ الْكَلَامْ الْمَكْتُوبْ فِي الْكِتَابْ اللِّقَوْه. غَضَبْ اللّٰهْ شَدِيدْ بِلْحَيْن فَوْقنَا أَشَانْ جُدُودْنَا مَا سِمْعَوْا الْكَلَامْ الْفِي الْكِتَابْ دَا وَ مَا طَبَّقَوْا كُلَّ شَيّءْ الْمَكْتُوبْ فَوْقَهْ.»
14 وَ خَلَاصْ، حِلْقِيَّا رَاجِلْ الدِّينْ وَ أَخِقَامْ وَ عَكْبُورْ وَ شَافَانْ وَ عَسَايَا مَشَوْا بَكَانْ حُلْدَةْ النَّبِيَّةْ مَرِةْ الْحَارِسْ هَنَا خُلْقَانْ رُجَالْ الدِّينْ الْأُسْمَهْ شَلُّومْ وِلَيْد تِقْوَى وِلَيْد حَرْحَسْ. وَ هِي سَاكْنَةْ فِي الْحَارَةْ الْجَدِيدَةْ هَنَا مَدِينَةْ الْقُدُسْ. وَ وَكِتْ هُمَّنْ وَصَّلَوْا، حَجَّوْا لَيْهَا بِالْكَلَامْ دَا.
15 وَ حُلْدَةْ النَّبِيَّةْ قَالَتْ لَيْهُمْ: «دَاهُو اللّٰهْ إِلٰـهْ بَنِي إِسْرَائِيلْ قَالْ تَمْشُوا تُقُولُوا لِلرَّاجِلْ الرَّسَّلَاكُو لَيِّ: 16 ‹دَاهُو اللّٰهْ قَالْ: ”أَكِيدْ أَنَا نِجِيبْ مَصِيبَةْ فِي مَدِينَةْ الْقُدُسْ وَ فِي سُكَّانْهَا. وَ دَا يِحَقِّقْ كُلَّ الْكَلَامْ الْمَكْتُوبْ فِي الْكِتَابْ الْقَرَاهْ مَلِكْ مَمْلَكَةْ يَهُوذَا. 17 وَ دَا بِسَبَبْ هُمَّنْ أَبَوْنِي وَ حَرَّقَوْا بَخُورْ لِإِلٰـهَاتْ آخَرِينْ وَ غَضَّبَوْنِي بِكُلَّ عَمَلْهُمْ السَّوَّوْه. وَ غَضَبِي يَنْزِلْ فِي الْمَدِينَةْ دِي وَ أَنَا مَا نِوَقِّفَهْ.“›
18 «وَ هَسَّعْ دَا، أَمْشُوا قُولُوا الْكَلَامْ دَا لِمَلِكْ مَمْلَكَةْ يَهُوذَا الرَّسَّلَاكُو تَسْأَلَوْا لَيَّهْ اللّٰهْ. وَ قُولُوا لَيَّهْ دَاهُو اللّٰهْ إِلٰـهْ بَنِي إِسْرَائِيلْ قَالْ: ‹إِنْتَ سِمِعْت كَلَامْ الْكِتَابْ دَا 19 وَ قَلْبَكْ خَافْ وَ إِنْتَ أَلْمَسْكَنْت قِدَّامِي أَنَا اللّٰهْ وَكِتْ إِنْتَ سِمِعْت الْكَلَامْ الْأَنَا قُلْتَهْ ضِدّ مَدِينَةْ الْقُدُسْ وَ سُكَّانْهَا. وَ الْكَلَامْ دَا بُقُولْ: ”الْبَكَانْ دَا يَبْقَى خَرَابْ وَ مَلْعُونْ.“ وَ إِنْتَ شَرَّطْت خُلْقَانَكْ مِنْ الْحِزِنْ وَ بَكَيْت قِدَّامِي وَ أَنَا كُلَ سِمِعْتَكْ. وَ دَا كَلَامْ اللّٰهْ. 20 وَ بِسَبَبْ دَا، نِخَلِّيكْ تَلْحَقْ أَبَّهَاتَكْ بِالسَّلَامَةْ وَ يَدْفُنُوكْ فِي قَبُرَكْ وَ مَا تِشِيفْ الْمَصِيبَةْ الْأَنَا نِنَزِّلْهَا فِي مَدِينَةْ الْقُدُسْ.›»
وَ خَلَاصْ الْمُرَسَّلِينْ مَشَوْا وَ كَلَّمَوْا الْكَلَامْ دَا لِلْمَلِكْ.
© La Bible en arabe tchadien © Alliance biblique du Tchad, 2019
