دُرْدُر أَرِيحَا وقع
1 وَ أَرِيحَا مَسْدُودَةْ قَوِي مِنْ بَنِي إِسْرَائِيلْ وَ نَادُمْ مَا مَرَقْ وَ لَا دَخَلْ. 2 وَ اللّٰهْ قَالْ لِيَشُوعْ: «شِيفْ، أَنَا نِسَلِّمْ لَيْك أَرِيحَا وَ مَلِكْهَا وَ رُجَالْهَا الْفُرَّاسْ. 3 وَ شِيلْ كُلَّ الرُّجَالْ الْمُحَارِبِينْ وَ رُوغُوا حَوُّقُوا الْحِلَّةْ دِي. وَ حَوُّقُوا الْحِلَّةْ دِي مَرَّةْ وَاحِدَةْ أَيِّ يَوْم لَحَدِّي سِتَّةْ يَوْم. 4 وَ سَبْعَةْ رُجَالْ دِينْ يُرُوغُوا قِدَّامْ صَنْدُوقْ اللّٰهْ وَ أَيِّ وَاحِدْ مِنْهُمْ يِشِيلْ بُوقْ هَنَا قَرِنْ كَبِشْ. وَ فِي الْيَوْم السَّابِعْ، رُوغُوا وَ حَوُّقُوا الْحِلَّةْ سَبْعَةْ مَرَّاتْ وَ رُجَالْ الدِّينْ يَضُرْبُوا الْبُوقْ. 5 وَ وَكِتْ تَسْمَعَوْا رُجَالْ الدِّينْ يَضُرْبُوا حِسّ طَوِيلْ فِي الْبُوقْ، خَلِّي كُلَّ الشَّعَبْ يِعِيطُوا. وَ الدُّرْدُرْ الْمُحَوِّقْ الْحِلَّةْ يَقَعْ وَ خَلَاصْ، كُلُّكُو تَهْجُمُوا الْحِلَّةْ، أَيِّ وَاحِدْ بِالْفَرَقَةْ الْقِدَّامَهْ.»
6 وَ بَعَدْ دَا، يَشُوعْ وِلَيْد نُونْ نَادَى رُجَالْ الدِّينْ وَ قَالْ لَيْهُمْ: «شِيلُوا صَنْدُوقْ الْمُعَاهَدَةْ وَ خَلِّي سَبْعَةْ رُجَالْ دِينْ يَمْشُوا قِدَّامْ صَنْدُوقْ اللّٰهْ وَ أَيِّ وَاحِدْ مِنْهُمْ يِشِيلْ بُوقْ هَنَا قَرِنْ كَبِشْ.» 7 وَ هُو قَالْ لِلشَّعَبْ: «أَمْشُوا وَ حَوُّقُوا الْحِلَّةْ وَ الرُّجَالْ الْمُسَلَّحِينْ خَلِّي يَمْشُوا قِدَّامْ صَنْدُوقْ اللّٰهْ.»
8 وَ كُلَّ شَيّءْ بِقِي مِثِلْ يَشُوعْ قَالَهْ لِلشَّعَبْ. وَ رُجَالْ الدِّينْ السَّبْعَةْ مَشَوْا قِدَّامْ صَنْدُوقْ اللّٰهْ وَ أَيِّ وَاحِدْ مِنْهُمْ شَالْ بُوقْ وَ يَضُرْبَهْ. وَ صَنْدُوقْ مُعَاهَدَةْ اللّٰهْ كَمَانْ مَاشِي وَرَاهُمْ. 9 وَ الرُّجَالْ الْمُسَلَّحِينْ مَاشِينْ قِدَّامْ رُجَالْ الدِّينْ الْيَضُرْبُوا الْبُوقْ وَ رُجَالْ مُسَلَّحِينْ آخَرِينْ مَاشِينْ وَرَاءْ الصَّنْدُوقْ. وَكِتْ هُمَّنْ مَاشِينْ رُجَالْ الدِّينْ قَاعِدِينْ يَضُرْبُوا الْبُوقْ. 10 وَ يَشُوعْ أَمَرَاهُمْ لِلشَّعَبْ وَ قَالْ لَيْهُمْ: «أَبَداً مَا تِعِيطُوا وَ حِسُّكُو مَا يِنْسَمِعْ وَ خُشُومْكُو مَا يُقُولْ أَيِّ كَلَامْ لَحَدِّي يَوْم أَنَا نُقُولْ لَيْكُو عِيطُوا.» 11 وَ هُمَّنْ حَوَّقَوْا الْحِلَّةْ مَرَّةْ وَاحِدَةْ بِصَنْدُوقْ اللّٰهْ وَ قَبَّلَوْا نَامَوْا فِي الْفَرِيقْ.
12 وَ يَشُوعْ قَمَّ بِفَجُرْ بَدْرِي وَ رُجَالْ الدِّينْ شَالَوْا صَنْدُوقْ اللّٰهْ. 13 وَ رُجَالْ الدِّينْ السَّبْعَةْ مَشَوْا قِدَّامْ صَنْدُوقْ اللّٰهْ وَ أَيِّ وَاحِدْ شَالْ بُوقْ وَ يَضُرْبَهْ. وَ الرُّجَالْ الْمُسَلَّحِينْ مَاشِينْ قِدَّامْهُمْ وَ رُجَالْ مُسَلَّحِينْ آخَرِينْ مَاشِينْ وَرَاءْ صَنْدُوقْ اللّٰهْ. وَكِتْ هُمَّنْ مَاشِينْ، رُجَالْ الدِّينْ قَاعِدِينْ يَضُرْبُوا الْبُوقْ. 14 وَ هُمَّنْ حَوَّقَوْا الْحِلَّةْ مَرَّةْ وَاحِدَةْ فِي الْيَوْم التَّانِي وَ بَعَدْ دَا، قَبَّلَوْا فِي الْفَرِيقْ. وَ هُمَّنْ سَوَّوْا مِثِلْ دَا لَحَدِّي سِتَّةْ يَوْم.
15 وَ فِي الْيَوْم السَّابِعْ، هُمَّنْ قَمَّوْا بِفَجُرْ بَدْرِي حَوَّقَوْا الْحِلَّةْ مِثِلْ فِي الْعَادَةْ. وَ لَاكِنْ فِي الْيَوْم دَا بَسْ، هُمَّنْ حَوَّقَوْا الْحِلَّةْ سَبْعَةْ مَرَّاتْ. 16 وَ فِي الْمَرَّةْ السَّابْعَةْ، رُجَالْ الدِّينْ ضَرَبَوْا الْبُوقْ وَ يَشُوعْ قَالْ لِلشَّعَبْ: «عِيطُوا أَشَانْ اللّٰهْ أَنْطَاكُو الْحِلَّةْ! 17 دَمُّرُوا الْحِلَّةْ وَ كُلَّ الْخُمَامْ الْحَرَامْ. دَمُّرُوهَا أَشَانْ هِي هِنْت اللّٰهْ. وَ إِلَّا رَاحَابْ الشَّرْمُوطَةْ وَ كُلَّ النَّاسْ الْمَعَاهَا فِي بَيْتهَا، مَا تَكْتُلُوهُمْ أَشَانْ هِي لَبَّدَتْ النَّاسْ الرَّسَّلْنَاهُمْ يُرُوغُوا الْبَلَدْ. 18 وَ كَنْ لَيْكُو إِنْتُو، أَنْقَرْعُوا مِنْ الْحَرَامْ. مَا تَطْمَعَوْا وَ تِشِيلُوا الْخُمَامْ الْحَرَامْ أَشَانْ تِنَجُّسُوا بَيَّهْ فَرِيقْ بَنِي إِسْرَائِيلْ وَ تِجِيبُوا فَوْقَهْ الْمَصِيبَةْ. 19 الْفُضَّةْ وَ الدَّهَبْ وَ كُلَّ الْمُعِدَّاتْ هَنَا النَّحَاسْ وَ الْحَدِيدْ، هُمَّنْ دَوْل مُخَصَّصِينْ لِلّٰهْ. خُطُّوهُمْ فِي مَخَازِنْ اللّٰهْ.»
20 وَ ضَرَبَوْا الْبُوقْ وَ وَكِتْ الشَّعَبْ سِمْعَوْا ضَرِبِينْ الْبُوقْ، عَاطَوْا بِشِدَّةْ. وَ طَوَّالِي، دُرْدُرْ الْحِلَّةْ وَقَعْ وَ بَنِي إِسْرَائِيلْ هَجَمَوْا الْحِلَّةْ أَيِّ وَاحِدْ بِالْفَرَقَةْ الْقِدَّامَهْ وَ شَالَوْا الْحِلَّةْ. 21 وَ هُمَّنْ دَمَّرَوْا كُلَّ شَيّءْ فِي الْحِلَّةْ. كَتَلَوْا بِالْسَّيْف كُلَّ الرُّجَالْ وَ الْعَوِينْ وَ الْعِيَالْ وَ الشِّيَّابْ وَ الْبَقَرْ وَ الْغَنَمْ وَ الْحَمِيرْ.
يَشُوع نجّى رَاحَاب و عايِلِتها
22 وَ يَشُوعْ قَالْ لِلْجَوَاسِيسْ الْإِتْنَيْن الرَّسَّلَوْهُمْ يِأَكُّدُوا الْبَلَدْ: «أَمْشُوا فِي بَيْت الْمَرَةْ الشَّرْمُوطَةْ وَ أَمُرْقُوهَا وَ أَمُرْقُوا كُلَّ عَايِلِتْهَا مِثِلْ إِنْتُو حَلَفْتُوا لَيْهَا.» 23 وَ الْجَوَاسِيسْ دَوْل دَخَلَوْا فِي الْبَيْت وَ مَرَقَوْا رَاحَابْ وَ أَبُوهَا وَ أَمَّهَا وَ أَخْوَانْهَا وَ كُلَّ عَايِلِتْهَا. وَ هُمَّنْ مَرَقَوْا كُلَّ نَاسْ بَيْتهَا وَ خَطَّوْهُمْ بَرَّا مِنْ فَرِيقْ بَنِي إِسْرَائِيلْ.
24 وَ الْحِلَّةْ كَمَانْ حَرَقَوْهَا بِكُلَّ شَيّءْ الْفِيهَا وَ إِلَّا الدَّهَبْ وَ الْفُضَّةْ وَ الْمُعِدَّاتْ هَنَا النَّحَاسْ وَ الْحَدِيدْ خَطَّوْهُمْ فِي مَخَازِنْ هَنَا بَيْت اللّٰهْ. 25 وَ يَشُوعْ خَلَّى رَاحَابْ الشَّرْمُوطَةْ وَ عَايِلِتْهَا وَ كُلَّ نَاسْهَا حَيِّينْ أَشَانْ هِي لَبَّدَتْ الْجَوَاسِيسْ الرَّسَّلَاهُمْ يَشُوعْ يِأَكُّدُوا أَرِيحَا. وَ هِي وَ ذُرِّيِّتْهَا سَاكْنِينْ فِي أُسُطْ بَنِي إِسْرَائِيلْ لَحَدِّي الْيَوْم.
26 وَ فِي الْوَكِتْ دَا، يَشُوعْ حَلَفْ وَ قَالْ: «اللّٰهْ يَلْعَنْ النَّادُمْ الْيُقُمّ وَ يَبْنِي بَتَّانْ حِلَّةْ أَرِيحَا. خَلِّي عِيَالَهْ يُمُوتُوا! الْبِكِرْ يُمُوتْ وَكِتْ يُخُطّ أَسَاسْهَا وَ طَرِيدَهْ يُمُوتْ وَكِتْ يِرَكِّبْ بِيبَانْهَا.»
27 وَ اللّٰهْ كَانْ مَعَ يَشُوعْ وَ كُلَّ نَاسْ الْبَلَدْ سِمْعَوْا بَيَّهْ.
© La Bible en arabe tchadien © Alliance biblique du Tchad, 2019
