الأصْنام في تاريخ بني إسرائيل
1 وَ فِي يَوْم عَشَرَةْ هَنَا الشَّهَرْ الْخَامِسْ هَنَا السَّنَةْ السَّابْعَةْ مِنْ وَدَّوْنَا فِي الْغُرْبَةْ، وَاحِدِينْ مِنْ شُيُوخْ بَنِي إِسْرَائِيلْ جَوْا لَيِّ لِيَسْأَلَوْا اللّٰهْ. وَ وَكِتْ جَوْا وَ قَعَدَوْا قِدَّامِي، 2 اللّٰهْ حَجَّى لَيِّ وَ قَالْ: 3 «يَا إِبْن آدَمْ، حَجِّي لِشُيُوخْ بَنِي إِسْرَائِيلْ وَ قُولْ لَيْهُمْ: ‹دَاهُو اللّٰهْ الرَّبّ قَالْ: ”جِيتُوا لِتَسْأَلَوْنِي وَلَّا؟ نَحْلِفْ بِأُسْمِي الْحَيّ، أَنَا مَا نَرْضَى إِنْتُو تَسْأَلَوْنِي.“›» وَ دَا كَلَامْ اللّٰهْ الرَّبّ.
4 «يَا إِبْن آدَمْ، مَالَا مَا تِحَاكِمْهُمْ؟ أَيْوَى، حَاكِمْهُمْ وَ عَرِّفْهُمْ مُحَرَّمَاتْ جُدُودْهُمْ. 5 وَ قُولْ لَيْهُمْ: دَاهُو اللّٰهْ الرَّبّ قَالْ: ‹فِي يَوْم أَنَا عَزَلْت بَنِي إِسْرَائِيلْ، أَنَا حَلَفْت لِذُرِّيَّةْ يَعْقُوبْ وَ عَرَّفْت نَفْسِي لَيْهُمْ فِي بَلَدْ مَصِرْ. وَ حَلَفْت لَيْهُمْ وَ قُلْت: ”أَنَا اللّٰهْ إِلٰـهْكُو.“ 6 وَ فِي الْيَوْم دَا، أَنَا حَلَفْت لَيْهُمْ كَدَرْ نَمْرُقْهُمْ مِنْ بَلَدْ مَصِرْ وَ نِوَدِّيهُمْ عَلَيْ الْبَلَدْ الْأَنَا عَزَلْتَهَا لَيْهُمْ. وَ الْبَلَدْ دِي مَلَانَةْ بِاللَّبَنْ وَ الْعَسَلْ وَ جَمِيلَةْ مِنْ كُلَّ الْبُلْدَانْ. 7 وَ قُلْت لَيْهُمْ: ”خَلِّي أَيِّ نَادُمْ يَزْقُلْ الْأَصْنَامْ الْمُحَرَّمَاتْ هَنَا مَصِرْ الْيَعَجُبُوهْ وَ مَا يِنَّجَّسْ بَيْهُمْ أَشَانْ أَنَا بَسْ اللّٰهْ إِلٰـهْكُو.“
8 «‹وَ لَاكِنْ جُدُودْكُو عِصَوْنِي وَ مَا دَوَّرَوْا يَسْمَعَوْنِي. وَ مَا فِي نَادُمْ مِنْهُمْ الزَّقَلْ الْأَصْنَامْ الْمُحَرَّمَاتْ هَنَا مَصِرْ الْيَعَجُبُوهْ وَ لَا خَلَّاهُمْ. وَ أَنَا قُلْت: ”نِنَزِّلْ غَضَبِي فَوْقهُمْ مِنْ بِدَايْتَهْ لَحَدِّي نِهَايْتَهْ فِي أُسُطْ بَلَدْ مَصِرْ.“ 9 وَ لَاكِنْ فِي شَانْ إِحْتِرَامْ أُسْمِي قِدَّامْ الْأُمَمْ الْهُمَّنْ سَاكْنِينْ فِي أُسُطْهُمْ، أَنَا مَا نَزَّلْت غَضَبِي فَوْقهُمْ. وَ أَنَا عَرَّفْت لَيْهُمْ نَفْسِي قِدَّامْ الْأُمَمْ دَوْل وَكِتْ مَرَقْتُهُمْ مِنْ بَلَدْ مَصِرْ.
10 «‹أَيْوَى، أَنَا مَرَقْتُهُمْ مِنْ بَلَدْ مَصِرْ وَ وَدَّيْتهُمْ فِي الصَّحَرَاءْ. 11 وَ أَنْطَيْتهُمْ شُرُوطِي وَ عَرَّفْتُهُمْ قَوَانِينِي الْبَيْهُمْ يَلْقَوْا الْحَيَاةْ كَنْ يِطَبُّقُوهُمْ. 12 وَ بَتَّانْ أَنْطَيْتهُمْ يَوْمِي هَنَا السَّبْت لِيَبْقَى عَلَامَةْ بَيْنِي وَ بَيْنهُمْ. وَ بَيْدَا، يَعَرْفُوا كَدَرْ أَنَا اللّٰهْ بَسْ خَصَّصْتُهُمْ. 13 وَ لَاكِنْ بَنِي إِسْرَائِيلْ عِصَوْنِي فِي الصَّحَرَاءْ. وَ هُمَّنْ مَا تَابَعَوْا شُرُوطِي وَ أَبَوْا قَوَانِينِي الْبَيْهُمْ يَلْقَوْا الْحَيَاةْ كَنْ يِطَبُّقُوهُمْ. وَ دَايْماً مَا أَحْتَرَمَوْا يَوْمِي هَنَا السَّبْت. وَ بَتَّانْ أَنَا قُلْت: ”نِنَزِّلْ فَوْقهُمْ غَضَبِي فِي الصَّحَرَاءْ وَ نِكَمِّلْهُمْ.“ 14 وَ لَاكِنْ فِي شَانْ إِحْتِرَامْ أُسْمِي قِدَّامْ الْأُمَمْ، أَنَا مَا نَزَّلْت غَضَبِي فَوْقهُمْ. وَ أَنَا مَرَقْتُهُمْ مِنْ بَلَدْ مَصِرْ قِدَّامْ الْأُمَمْ دَوْل. 15 وَ لَاكِنْ أَنَا حَلَفْت لَيْهُمْ فِي الصَّحَرَاءْ كَدَرْ مَا نِوَدِّيهُمْ فِي الْبَلَدْ الْأَنَا عَزَلْتَهَا لَيْهُمْ. وَ الْبَلَدْ دِي مَلَانَةْ بِاللَّبَنْ وَ الْعَسَلْ وَ جَمِيلَةْ مِنْ كُلَّ الْبُلْدَانْ. 16 أَشَانْ هُمَّنْ أَبَوْا قَوَانِينِي وَ مَا تَابَعَوْا شُرُوطِي وَ مَا أَحْتَرَمَوْا يَوْمِي هَنَا السَّبْت أَشَانْ قُلُوبْهُمْ تَابَعَوْا أَصْنَامْهُمْ. 17 وَ بَيْدَا كُلَ، أَنَا شِفْتُهُمْ بِعَيْن الرَّحْمَةْ وَ مَا هَلَكْتُهُمْ وَ لَا دَمَّرْتُهُمْ فِي الصَّحَرَاءْ.
18 «‹وَ فِي الصَّحَرَاءْ، أَنَا قُلْت لِعِيَالْهُمْ: ”مَا تَمْشُوا حَسَبْ وَصِيَّةْ أَبَّهَاتْكُو وَ لَا تَحْفَضَوْا قَوَانِينْهُمْ وَ لَا تِنَجُّسُوا نُفُوسْكُو بِأَصْنَامْهُمْ. 19 أَنَا بَسْ اللّٰهْ إِلٰـهْكُو! تَابُعُوا شُرُوطِي وَ أَحْفَضَوْا قَوَانِينِي وَ طَبُّقُوهُمْ. 20 وَ أَجْعَلَوْا يَوْمِي هَنَا السَّبْت مُقَدَّسْ أَشَانْ هُو عَلَامَةْ بَيْنِي وَ بَيْنكُو. وَ بَيْدَا، تَعَرْفُوا كَدَرْ أَنَا بَسْ اللّٰهْ إِلٰـهْكُو.“
21 «‹وَ لَاكِنْ عِيَالْهُمْ عِصَوْنِي وَ مَا تَابَعَوْا شُرُوطِي وَ لَا حَفَضَوْا قَوَانِينِي الْبَيْهُمْ يَلْقَوْا الْحَيَاةْ كَنْ يِطَبُّقُوهُمْ. وَ هُمَّنْ مَا أَحْتَرَمَوْا يَوْمِي هَنَا السَّبْت. وَ فِي شَانْ دَا، أَنَا قُلْت: ”نِنَزِّلْ فَوْقهُمْ غَضَبِي فِي الصَّحَرَاءْ وَ نِكَمِّلْهُمْ.“ 22 وَ لَاكِنْ فِي شَانْ إِحْتِرَامْ أُسْمِي قِدَّامْ الْأُمَمْ، أَنَا مَا نَزَّلْت غَضَبِي فَوْقهُمْ. وَ أَنَا مَرَقْتُهُمْ مِنْ بَلَدْ مَصِرْ قِدَّامْ الْأُمَمْ دَوْل. 23 وَ بَتَّانْ أَنَا حَلَفْت لَيْهُمْ فِي الصَّحَرَاءْ كَدَرْ نِشَتِّتْهُمْ بَيْن الْأُمَمْ وَ نِفَرِّقْهُمْ فِي أُسْط الْبُلْدَانْ. 24 أَشَانْ هُمَّنْ مَا طَبَّقَوْا قَوَانِينِي وَ أَبَوْا شُرُوطِي وَ مَا أَحْتَرَمَوْا يَوْمِي هَنَا السَّبْت أَشَانْ خَطَّوْا عُيُونْهُمْ فِي أَصْنَامْ أَبَّهَاتْهُمْ. 25 وَ بِسَبَبْ دَا، أَنَا ذَاتِي أَنْطَيْتهُمْ شُرُوطْ الْمَا عَدِيلِينْ وَ قَوَانِينْ الْبَيْهُمْ النَّادُمْ مَا يَلْقَى الْحَيَاةْ. 26 وَ خَلَّيْتهُمْ أَنَّجَّسَوْا بِقَدِّمِينْ ضَحَايَاهُمْ هَنَا كُلَّ أَوْلَادْ الْبِكِرْ. وَ دَا لِيِنْبَهْتُوا وَ يَعَرْفُوا كَدَرْ أَنَا بَسْ اللّٰهْ.›
مُحاكمة في شان الأصْنام
27 «وَ فِي شَانْ دَا، يَا إِبْن آدَمْ، حَجِّي لِبَنِي إِسْرَائِيلْ وَ قُولْ لَيْهُمْ: دَاهُو اللّٰهْ الرَّبّ قَالْ: ‹دَايْماً جُدُودْكُو عَيَّرَوْنِي بِسَبَبْ خِيَانِتْهُمْ لَيِّ. 28 أَنَا وَدَّيْتهُمْ فِي الْبَلَدْ الْحَلَفْت وَ قُلْت نَنْطِيهَا لَيْهُمْ. وَ وَكِتْ هُمَّنْ شَافَوْا أَيِّ جَبَلْ عَالِي وَ أَيِّ شَدَرَةْ خَضْرَةْ، قَدَّمَوْا فِي الْبَكَانْ دَا ضَحَايَاهُمْ. وَ غَضَّبَوْنِي بِهَدَايَاهُمْ وَ بِالْبَخُورْ الرِّيحْتَهْ تَعَجِبْ وَ بِهَدَايَاهُمْ هَنَا الشَّرَابْ الْقَدَّمَوْهُمْ فِي الْبَكَانْ دَا. 29 وَ أَنَا قُلْت لَيْهُمْ: ”شُنُو الْبَكَانْ الْعَالِي التَّمْشُوا لَيَّهْ دَا؟“ وَ سَمَّوْه الْبَكَانْ دَا، الْبَكَانْ الْعَالِي هَنَا الْعِبَادَةْ لَحَدِّي الْيَوْم.›
30 «وَ فِي شَانْ دَا، قُولْ لِبَنِي إِسْرَائِيلْ: ‹دَاهُو اللّٰهْ الرَّبّ قَالْ: ”إِنْتُو نَجَّسْتُوا نُفُوسْكُو وَكِتْ تَابَعْتُوا دَرِبْ جُدُودْكُو وَ أَشَّرْمَطْتُوا وَرَاءْ مُحَرَّمَاتْهُمْ وَ عِصِيتُوا. 31 وَ وَكِتْ إِنْتُو تِجِيبُوا هَدَايَاكُو وَ وَكِتْ تِحَرُّقُوا عِيَالْكُو فِي النَّارْ، إِنْتُو قَاعِدِينْ تِنَجُّسُوا نُفُوسْكُو بِكُلَّ أَصْنَامْكُو لَحَدِّي الْيَوْم. وَ بَيْدَا، أَنَا مَا نَرْضَى تَسْأَلَوْنِي، يَا بَنِي إِسْرَائِيلْ! نَحْلِفْ بِأُسْمِي الْحَيّ، أَنَا مَا نَرْضَى إِنْتُو تَسْأَلَوْنِي.“ وَ دَا كَلَامْ اللّٰهْ الرَّبّ.
32 «‹إِنْتُو فَكَّرْتُوا وَ قُلْتُوا: ”أَنِحْنَ نِدَوْرُوا نَبْقَوْا مِثِلْ أُمَمْ وَ قَبَايِلْ هَنَا بُلْدَانْ آخَرِينْ. نِدَوْرُوا نَعَبُدُوا لَيْنَا أَصْنَامْ هَنَا حَطَبْ وَ حَجَرْ مِثِلْهُمْ.“ وَ لَاكِنْ دَا مَا يَبْقَى! 33 نَحْلِفْ بِأُسْمِي الْحَيّ، أَنَا نَحْكِمْكُو بِإِيدْ شَدِيدَةْ وَ بِدُرَاعْ قَوِي وَ نِنَزِّلْ غَضَبِي فَوْقكُو. وَ دَا كَلَامْ اللّٰهْ الرَّبّ. 34 وَ بِإِيدْ شَدِيدَةْ وَ دُرَاعْ قَوِي وَ نَزِّلِينْ غَضَبِي، أَنَا نَمْرُقْكُو مِنْ أُسْط الْأُمَمْ وَ نِلِمُّكُو مِنْ الْبُلْدَانْ الْإِنْتُو مُشَتَّتِينْ فَوْقهُمْ. 35 وَ أَنَا نِوَدِّيكُو فِي الصَّحَرَاءْ طَرَفْ مِنْ الْأُمَمْ الْآخَرِينْ. وَ هِنَاكْ نِقَابِلْكُو وِجِهْ بِوِجِهْ وَ نِحَاكِمْكُو. 36 مِثِلْ أَنَا حَاكَمْت جُدُودْكُو فِي صَحَرَاءْ بَلَدْ مَصِرْ، بِمِثِلْ دَا بَسْ نِحَاكِمْكُو إِنْتُو كُلَ. وَ دَا كَلَامْ اللّٰهْ الرَّبّ. 37 وَ أَنَا نُخُطُّكُو تِحِتْ عَصَاتِي وَ تِكَرُّمُوا الْمُعَاهَدَةْ التَّرْبُطْنِي مَعَاكُو. 38 وَ نَفْرُقْ مِنْكُو النَّاسْ الْقَمَّوْا ضِدِّي وَ عِصَوْنِي. نَمْرُقْهُمْ مِنْ الْبَلَدْ الْهُمَّنْ قَاعِدِينْ فَوْقهَا أَجَانِبْ وَ لَاكِنْ مَا يَدْخُلُوا فِي بَلَدْ إِسْرَائِيلْ. وَ بَيْدَا، تَعَرْفُوا كَدَرْ أَنَا بَسْ اللّٰهْ.›
39 «وَ لَيْكُو إِنْتُو، يَا بَنِي إِسْرَائِيلْ، دَاهُو اللّٰهْ الرَّبّ قَالْ: ‹خَلِّي أَيِّ نَادُمْ يَمْشِي يَعَبُدْ أَصْنَامَهْ! وَ لَاكِنْ بَعَدْ دَا، خَلِّي أَيِّ نَادُمْ يَسْمَعْنِي. وَ تِحْتَرُمُوا أُسْمِي الْمُقَدَّسْ وَ بَتَّانْ مَا تِقَدُّمُوا هَدَايَاكُو لِأَصْنَامْكُو. 40 أَشَانْ فِي جَبَلِي الْمُقَدَّسْ وَ دَا جَبَلْ إِسْرَائِيلْ الْعَالِي، كُلُّكُو بَنِي إِسْرَائِيلْ وَ كُلَّ نَاسْ الْبَلَدْ تَعَبُدُونِي. وَ فِي الْبَكَانْ دَا بَسْ، أَنَا نَقْبَلْ زَكَاتْكُو وَ أَحْسَنْ هَدَايَاكُو وَ كُلَّ شَيّءْ التِّخَصُّصُوهْ لَيِّ. وَ دَا كَلَامْ اللّٰهْ الرَّبّ. 41 وَ وَكِتْ نَمْرُقْكُو مِنْ أُسْط الْأُمَمْ وَ نِلِمُّكُو مِنْ الْبُلْدَانْ الْإِنْتُو مُشَتَّتِينْ فَوْقهُمْ، تَبْقَوْا مِثِلْ رِيحَةْ حَلُوَّةْ الْأَنَا نَرْضَى بَيْهَا. وَ بَيْكُو إِنْتُو، أَنَا نِوَصِّفْ قَدَاسْتِي قِدَّامْ الْأُمَمْ. 42 وَ وَكِتْ نِقَبِّلْكُو فِي بَلَدْ إِسْرَائِيلْ، فِي الْبَلَدْ الْأَنَا حَلَفْت وَ قُلْت نَنْطِيهَا لِجُدُودْكُو، خَلَاصْ تَعَرْفُوا كَدَرْ أَنَا بَسْ اللّٰهْ. 43 وَ هِنَاكْ، تِذَّكَّرَوْا دُرُوبْكُو وَ كُلَّ عَمَلْكُو النَّجَّسْتُوا بَيْهُمْ نُفُوسْكُو. وَ الْعَيْب يَكْرُبْكُو بِسَبَبْ كُلَّ الْفَسَالَةْ السَّوَّيْتُوهَا. 44 يَا بَنِي إِسْرَائِيلْ! أَنَا نِسَوِّي الشَّيّءْ دَا مَا فِي شَانْ دَرِبْكُو وَ عَمَلْكُو الْفَسْلِينْ وَ لَاكِنْ فِي شَانْ شَرَفْ أُسْمِي. وَ بَيْدَا، تَعَرْفُوا كَدَرْ أَنَا بَسْ اللّٰهْ.›» وَ دَا كَلَامْ اللّٰهْ الرَّبّ.
مُحاكمة ضِدّ وطي أرْض إسرائيل
45 وَ اللّٰهْ حَجَّى لَيِّ وَ قَالْ: 46 «يَا إِبْن آدَمْ، وَجِّهْ عَلَيْ الْوَطِي وَ كَلِّمْ ضِدَّهْ وَ أَتْنَبَّأْ ضِدّ غَابَةْ الْوَطِي. 47 وَ قُولْ لِغَابَةْ الْوَطِي: ‹أَسْمَعَيْ كَلَامْ اللّٰهْ! دَاهُو اللّٰهْ الرَّبّ قَالْ: ”أَكِيدْ نِقَبِّضْ نَارْ فِي لُبِّكِ التَّاكُلْ كُلَّ الشَّدَرْ، الْأَخْضَرْ وَ الْيَابِسْ كُلَ. وَ أَمْ بَلْبَالِتْهَا حَامِيَةْ، أَبَداً مَا تُمُوتْ. وَ تَاكُلْ أَيِّ شَيّءْ مِنْ الْوَطِي لَحَدِّي الْمُنْشَاقْ. 48 وَ بَيْدَا، كُلَّ النَّاسْ يَعَرْفُوا كَدَرْ أَنَا اللّٰهْ بَسْ قَبَّضْت النَّارْ دِي وَ هِي أَبَداً مَا تُمُوتْ.“›»
49 وَ أَنَا حِزْقِيَالْ قُلْت: «يَا اللّٰهْ رَبِّي! هُمَّنْ يِحَجُّوا فَوْقِي وَ يُقُولُوا: ‹هُو يِحَجِّي بِأَمْثَالْ بَسْ!›»
© La Bible en arabe tchadien © Alliance biblique du Tchad, 2019
