الصلاة الربّانيّة
1 وَ عِيسَى قَاعِدْ يِصَلِّي فِي بَكَانْ وَاحِدْ. وَ وَكِتْ هُو كَمَّلْ صَلَاتَهْ، وَاحِدْ مِنْ تَلَامِيذَهْ حَجَّى لَيَّهْ وَ قَالْ: «سَيِّدْنَا، عَلِّمْنَا نِصَلُّوا مِثِلْ يَحْيَى عَلَّمْ تَلَامِيذَهْ يِصَلُّوا.» 2 وَ عِيسَى قَالْ لَيْهُمْ: «وَكِتْ تِصَلُّوا، قُولُوا:
‹يَا أَبُونَا، خَلِّي يَعَرْفُوا كَدَرْ أُسْمَكْ قُدُّوسْ.
خَلِّي مَمْلَكَتَكْ تَجِي.
3 أَنْطِينَا الْأَكِلْ
الْيِتِمِّنَا كُلَّ يَوْم.
4 سَامِحْ لَيْنَا ذُنُوبْنَا
مِثِلْ أَنِحْنَ قَاعِدِينْ نِسَامُحُوا
كُلَّ النَّاسْ الْخِطَوْا فَوْقنَا.
مَا تِدِسِّنَا فِي التَّجْرِبَةْ.›»
مَثَل الضَيْف الجاء في اللَيْل
5 وَ عِيسَى حَجَّى لَيْهُمْ بِمَثَلْ وَ قَالْ: «نَسْأَلْكُو شَيّءْ وَاحِدْ. كَنْ نَادُمْ مِنْكُو عِنْدَهْ رَفِيقْ وَ هُو يَمْشِي لَيَّهْ فِي أُسْط اللَّيْل، يِنَادِيهْ وَ يُقُولْ: ‹يَا أَخُويِ، أَنْطِينِي تَلَاتَةْ خُبْزَةْ. 6 نِدَوْرهُمْ أَشَانْ رَفِيقْ وَاحِدْ مُسَافِرْ جَانِي وَ مَا عِنْدِي شَيّءْ نِضَيِّفَهْ بَيَّهْ.› 7 هَلْ أَخُوكْ السَّأَلْتَهْ دَا يُرُدّ لَيْك مِنْ دَاخَلْ وَ يُقُولْ: ‹خَلِّينِي نُنُومْ! الْبَابْ مَسْدُودْ وَ عِيَالِي مَعَايِ نَايْمِينْ. مَا نَقْدَرْ نُقُمّ لَيْك وَ لَا نَنْطِيكْ شَيّءْ.› دَا يَبْقَى وَلَّا؟ 8 وَ نُقُولْ لَيْكُو كَنْ أَخُوكْ دَا مَا يِدَوْر يُقُمّ يَنْطِيكْ شَيّءْ فِي شَانْ إِنْتَ رَفِيقَهْ كُلَ، أَكِيدْ هُو يُقُمّ يَنْطِيكْ كُلَّ شَيّءْ التِّدَوْرَهْ فِي شَانْ إِنْتَ بَشْتَنْتَهْ.
9 «وَ نُقُولْ لَيْكُو أَسْأَلَوْا اللّٰهْ وَ هُو يَنْطِيكُو. فَتُّشُوا وَ تَلْقَوْا. دُقُّوا بَابْ اللّٰهْ وَ يِنْفَتِحْ لَيْكُو. 10 أَشَانْ كُلَّ نَادُمْ الْيَسْأَلْ دَا، اللّٰهْ يَنْطِيهْ. وَ أَيِّ نَادُمْ الْيِفَتِّشْ، يَلْقَى. وَ أَيِّ نَادُمْ الْيُدُقّ بَابْ اللّٰهْ، الْبَابْ يِنْفَتِحْ لَيَّهْ.
11 «وَ كَنْ نَادُمْ مِنْكُو أَبُو عِيَالْ وَ وِلَيْدَهْ يَطْلُبْ مِنَّهْ حُوتَايْ، يَنْطِيهْ دَابِي فِي بَدَلْ الْحُوتَايْ وَلَّا؟ 12 وَلَّا كَنْ يَطْلُبْ مِنَّهْ بَيْض جِدَادْ، يَنْطِيهْ عَقْرَبْ وَلَّا؟ أَبَداً. 13 إِنْتُو الْمُذْنِبِينْ كُلَ تَعَرْفُوا كِكَّيْف تَنْطُوا شُغُلْ سَمَحْ لِعِيَالْكُو. وَ لَاكِنْ أَبُوكُو اللّٰهْ أَخَيْر زِيَادَةْ مِنْكُو. وَ هُو يَنْطِي الرُّوحْ الْقُدُّوسْ لِلنَّاسْ الْيَسْأَلَوْه.»
قالوا قُدْرة المسيح من إِبْلِيس
14 وَ يَوْم وَاحِدْ، عِيسَى يِدَوْر يَطْرُدْ شَيْطَانْ مِنْ نَادُمْ وَاحِدْ الْبِقِي أَبْكَمْ بِسَبَبْ الشَّيْطَانْ دَا. وَ الشَّيْطَانْ مَرَقْ وَ الْأَبْكَمْ حَجَّى. وَ كُلَّ النَّاسْ أَلْعَجَّبَوْا بِلْحَيْن. 15 لَاكِنْ نَاسْ وَاحِدِينْ قَالَوْا: «النَّادُمْ دَا يَطْرُدْ الشَّوَاطِينْ بِقُدْرَةْ إِبْلِيسْ كَبِيرْ الشَّوَاطِينْ.» 16 وَ نَاسْ آخَرِينْ دَوَّرَوْا يِجَرُّبُوهْ وَ طَلَبَوْا مِنَّهْ يَنْطِيهُمْ دَلِيلْ الْيِوَصِّفْ كَدَرْ قُدُرْتَهْ دِي جَايَةْ مِنْ السَّمَاءْ.
17 وَ هُو عِرِفْ فِكِرْهُمْ وَ قَالْ لَيْهُمْ: «أَيِّ مَمْلَكَةْ كَنْ نَاسْهَا يِدَّاوَسَوْا أَمْبَيْنَاتْهُمْ تَخْرَبْ. وَ بُيُوتْهَا يِدَفُّقُوا الْوَاحِدْ فِي الْآخَرْ. 18 وَ تُقُولُوا أَنَا نَطْرُدْ الشَّوَاطِينْ بِقُدْرَةْ إِبْلِيسْ. وَ لَاكِنْ كَنْ إِبْلِيسْ يِدَاوِسْ نَفْسَهْ، كِكَّيْف مَمْلَكَتَهْ تَقْدَرْ تَقْعُدْ ثَابْتَةْ؟ 19 وَ كَنْ صَحِيحْ أَنَا قَاعِدْ نَطْرُدْ الشَّوَاطِينْ بِقُدْرَةْ إِبْلِيسْ، نَاسْكُو يَطُرْدُوهُمْ بِقُدْرَةْ يَاتُو؟ وَ مِثِلْ دَا، نَاسْكُو بَسْ الْيِثَبُّتُوا فَوْقكُو التُّهْمَةْ. 20 وَ كَنْ أَنَا طَرَدْت الشَّوَاطِينْ بِقُدْرَةْ اللّٰهْ ذَاتَهْ، خَلَاصْ مَمْلَكَةْ اللّٰهْ قَابَلَتْكُو. 21 كَنْ رَاجِلْ قَوِي قَاعِدْ يَحْرِسْ قَصْرَهْ بِسِلَاحَهْ كُلَّ كَيْ، مِثِلْ دَا كُلَّ خُمَامَهْ قَاعِدْ بِالسَّلَامْ. 22 لَاكِنْ كَنْ نَادُمْ قَوِي مِنَّهْ يَجِي يَهْجِمَهْ، هُو يَغْلِبَهْ وَ يِشِيلْ مِنَّهْ سِلَاحَهْ الْأَوَّلْ كُلَّ عَشَمَهْ قَاعِدْ فَوْقَهْ. وَ خَلَاصْ يِقَسِّمْ الْخُمَامْ لِجَمَاعْتَهْ.
23 «أَيِّ نَادُمْ الْمَا مَعَايِ، عَدُويِ. وَ أَيِّ نَادُمْ الْمَا يِلِمّ النَّاسْ مَعَايِ، يِشَتِّتْهُمْ.»
الشَيْطان اليقبِّل
24 وَ عِيسَى قَالْ بَتَّانْ: «وَكِتْ شَيْطَانْ يَمْرُقْ مِنْ نَادُمْ مُشَوْطِنْ، الشَّيْطَانْ دَا يَمْشِي مِثِلْ نَادُمْ مُوَدِّرْ فِي الصَّحَرَاء. وَ يِفَتِّشْ بَكَانْ يِنْجَمَّ فَوْقَهْ وَ مَا يَلْقَاهْ. وَ يُقُولْ: ‹خَلَاصْ، نِقَبِّلْ فِي الْبَيْت الْمَرَقْت مِنَّهْ.› 25 وَ يِقَبِّلْ لِلنَّادُمْ دَا وَ يَلْقَاهْ مِثِلْ بَيْت نَضِيفْ وَ مُفَرَّشْ. 26 وَ الشَّيْطَانْ يَمْشِي يِجِيبْ مَعَايَهْ سَبْعَةْ شَوَاطِينْ فَسْلِينْ مِنَّهْ زِيَادَةْ وَ كُلُّهُمْ يِنْدَسَّوْا وَ يَسْكُنُوا فِي النَّادُمْ دَا وَ خَلَاصْ، حَالَةْ النَّادُمْ دَا تَبْقَى هَوَانَةْ مِنْ أَوَّلْ.»
27 وَ وَكِتْ هُو قَاعِدْ يِحَجِّي لِلنَّاسْ، مَرَةْ وَاحِدَةْ فِي أُسُطْهُمْ نَادَتْ وَ قَالَتْ: «مَبْرُوكْ لِلْمَرَةْ الْوِلْدَتَكْ وَ رَبَّتَكْ.» 28 لَاكِنْ عِيسَى قَالْ: «أَخَيْر تُقُولِي مَبْرُوكْ لِلنَّاسْ الْيَسْمَعَوْا كَلَامْ اللّٰهْ وَ يِتَابُعُوهْ.»
طلبوا من عِيسَى علامة
29 وَ عَدَدْ النَّاسْ الْيِدَوْرُوا يَسْمَعَوْا كَلَامْ عِيسَى قَاعِدْ يِزِيدْ. وَ هُو بَدَا يُقُولْ: «نَاسْ الْوَكِتْ دَا فَسْلِينْ وَ يَطُلْبُوا مِنِّي دَلِيلْ أَشَانْ يِآمُنُوا بَيِّ. وَ اللّٰهْ مَا يَنْطِيهُمْ دَلِيلْ إِلَّا الدَّلِيلْ هَنَا النَّبِي يُونُسْ. 30 مِثِلْ يُونُسْ بِقِي عَلَامَةْ لِنَاسْ مَدِينَةْ نِينَوَى، أَنَا إِبْن الْإِنْسَانْ كُلَ نَبْقَى عَلَامَةْ لِلنَّاسْ الْفِي وَكِتْنَا دَا. 31 وَ فِي يَوْم الْحِسَابْ، مَلِكَةْ الْوَطِي تُقُمّ سَوَا مَعَ النَّاسْ الْفِي وَكِتْنَا دَا. وَ هِي تِثَبِّتْ فَوْقهُمْ التُّهْمَةْ أَشَانْ جَاتْ مِنْ آخِرْ الْأَرْض لِتَسْمَعْ كَلَامْ الْمَلِكْ سُلَيْمَانْ الْحَكِيمْ. وَ الْيِحَجِّي لَيْكُو هَسَّعْ أَكْبَرْ مِنْ سُلَيْمَانْ وَ لَاكِنْ إِنْتُو مَا تُبْتُوا. 32 فِي يَوْم الْحِسَابْ، نَاسْ نِينَوَى يُقُمُّوا سَوَا مَعَ النَّاسْ الْفِي وَكِتْنَا دَا وَ يِثَبُّتُوا فَوْقهُمْ تُهْمَةْ أَشَانْ نَاسْ نِينَوَى تَابَوْا مِنْ ذُنُوبْهُمْ وَكِتْ يُونُسْ بَلَّغْ لَيْهُمْ كَلَامْ اللّٰهْ. وَ الْيِحَجِّي لَيْكُو هَسَّعْ أَكْبَرْ مِنْ يُونُسْ وَ لَاكِنْ إِنْتُو مَا تُبْتُوا.
مَثَل نور الفانوس
33 «وَ مَا فِي نَادُمْ الْيِأَوْقِدْ فَانُوسْ وَ يِلَبِّدَهْ وَلَّا يِغَطِّيهْ بِمَاعُونْ. هُو يُخُطَّهْ فِي بَكَانْ فَوْق أَشَانْ النَّاسْ الْيَدْخُلُوا فِي الْبَيْت يِشِيفُوا الضَّيّ.
34 «وَ الْعَيْن هِي مِثِلْ فَانُوسْ جِلْدَكْ. كَنْ عَيْنَكْ طَيْبَةْ، كُلَّ جِلْدَكْ قَاعِدْ فِي النُّورْ. وَ لَاكِنْ كَنْ عَيْنَكْ تَلْفَانَةْ، جِلْدَكْ يِنْمَلِي ضَلَامْ. 35 أَشَانْ دَا، خُطّ بَالَكْ. مَا تِخَلِّي النُّورْ الْعِنْدَكْ يَبْقَى أَضْلَمْ. 36 كَنْ كُلَّ جِلْدَكْ أَنْمَلَى نُورْ وَ مَا عِنْدَهْ ضَلَامْ فِي أَيِّ بَكَانْ، يَبْقَى لَيْك مِثِلْ فَانُوسْ يِضَوِّي ضَيّ تَمَامْ.»
المسيح هرج العُلماء
37 وَ وَكِتْ عِيسَى كَمَّلْ الْكَلَامْ دَا، فَرِيزِي وَاحِدْ عَزَمَهْ أَشَانْ يَاكُلْ فِي بَيْتَهْ. وَ عِيسَى مَشَى فِي بَيْتَهْ وَ قَعَدْ لِلْأَكِلْ. 38 وَ عِيسَى مَا غَسَّلْ إِيدَيْنَهْ لِيَبْقَوْا طَاهِرِينْ قُبَّالْ مَا يَاكُلْ وَ الْفَرِيزِي شَافَهْ وَ أَلْعَجَّبْ مِنَّهْ بِلْحَيْن. 39 وَ الرَّبّ عِيسَى قَالْ لَيَّهْ: «إِنْتُو الْفَرِيزِيِّينْ وَكِتْ تِلْوَضَّوْا، دَا يَبْقَى مِثِلْ تِغَسُّلُوا الْكَاسْ وَ الصُّفْرَةْ مِنْ بَرَّا بَسْ. لَاكِنْ فِي قُلُوبْكُو دَاخَلْ إِنْتُو مَلَانِينْ مِنْ السِّرْقَةْ وَ الْفَسَالَةْ. 40 يَا الْجُهَّالْ، إِنْتُو مَا تَعَرْفُوا كَدَرْ اللّٰهْ الْخَلَقْ النُّصّ الْبَرَّانِي خَلَقْ النُّصّ الدَّخْلَانِي كُلَ؟ 41 أَنْطُوا الْخُمَامْ الْقَاعِدْ دَاخَلْ فِي صُفْرِتْكُو وَ خَلِّي يَبْقَى صَدَقَةْ لِلْمَسَاكِينْ وَ كُلَّ شَيّءْ يَبْقَى لَيْكُو طَاهِرْ.
42 «يَا الْفَرِيزِيِّينْ، الْعَذَابْ يَرْجَاكُو أَشَانْ إِنْتُو مُنْكَرِبِينْ فِي الْعُشُرْ لَحَدِّي تَنْطُوا لِلّٰهْ مِنْ النَّعْنَاعْ وَ الْكَمُّونْ وَ أَيِّ نَبَاتْ هَنَا الْحَرَارْ الْيُقُمّ فِي حَوْشكُو. وَ لَاكِنْ إِنْتُو نِسِيتُوا الْعَدَالَةْ وَ مَحَبَّةْ اللّٰهْ! أَوَّلْ شَيّءْ، وَاجِبْ تِسَوُّوا الْأَشْيَاءْ الْمُهِمِّينْ دَوْل وَ بَتَّانْ مَا تَنْسَوْا كَلَامْ الْعُشُرْ.
43 «يَا الْفَرِيزِيِّينْ، الْعَذَابْ يَرْجَاكُو أَشَانْ تِرِيدُوا تَقْعُدُوا فِي الصَّفّ الْأَوَّلْ فِي بُيُوتْ الصَّلَاةْ وَ إِنْتُو فَرْحَانِينْ كَنْ النَّاسْ يِسَلُّمُوكُو بِإِحْتِرَامْ فِي السُّوقْ. 44 الْعَذَابْ يَرْجَاكُو أَشَانْ إِنْتُو مِثِلْ الْقُبُورْ الْمَا عِنْدُهُمْ وَسِمْ وَ النَّاسْ رَايْغِينْ فَوْقهُمْ وَ مَا يَعَرْفُوا كَدَرْ هُمَّنْ قُبُورْ. النَّجَاسَةْ الْقَاعِدَةْ فِيكُو دَاخَلْ النَّاسْ مَا يَعَرْفُوهَا.»
45 وَ وَاحِدْ مِنْ عُلَمَاءْ التَّوْرَاةْ رَدَّ لَيَّهْ وَ قَالْ: «يَا السَّيِّدْ، بِكَلَامَكْ دَا عَيَّرْتِنَا أَنِحْنَ كُلَ.»
46 وَ عِيسَى قَالْ: «الْعَذَابْ يَرْجَاكُو إِنْتُو الْعُلَمَاءْ كُلَ! بِتَعْلِيمْكُو تِسَوُّوا الدِّينْ تَقِيلْ لِلنَّاسْ لَحَدِّي بُفُوتْ رَاسْهُمْ وَ أَبَداً مَا تِدَوْرُوا تِعَاوُنُوهُمْ حَتَّى بِشَيّءْ صَغَيَّرْ كُلَ. 47 الْعَذَابْ يَرْجَاكُو أَشَانْ إِنْتُو قَاعِدِينْ تَبْنُوا قُبُورْ الْأَنْبِيَاء الْجُدُودْكُو أَبَوْهُمْ وَ كَتَلَوْهُمْ. 48 وَ مِثِلْ دَا، إِنْتُو قَاعِدِينْ تَشْهَدَوْا كَدَرْ تِقَصُّدُوا بِالشَّيّءْ الْجُدُودْكُو سَوَّوْه. أَيْوَى، أَشَانْ هُمَّنْ بَسْ الْكَتَلَوْهُمْ وَ إِنْتُو بَسْ التَّبْنُوا قُبُورْهُمْ. 49 وَ فِي شَانْ دَا، اللّٰهْ وَصَّفْ حِكْمَتَهْ وَكِتْ قَالْ: ‹نِرَسِّلْ لَيْهُمْ أَنْبِيَاء وَ رُسُلْ. وَاحِدِينْ مِنْهُمْ يَكْتُلُوهُمْ وَ وَاحِدِينْ مِنْهُمْ يِتَعُّبُوهُمْ.› 50 وَ خَلَاصْ كُلَّ الْأَنْبِيَاء الْكَتَلَوْهُمْ فِي أَيِّ زَمَنْ، دِمِّتْهُمْ تَجِي فِي رَاسْ هَنَا النَّاسْ الْفِي وَكِتْنَا دَا. 51 أَيْوَى، نُقُولْ لَيْكُو مِنْ دِمَّةْ هَابِيلْ وِلَيْد آدَمْ لَحَدِّي دِمَّةْ زَكَرِيَّا الْكَتَلَوْه بَيْن بَيْت اللّٰهْ وَ الْمَدْبَحْ، دِمِّتْهُمْ كُلُّهُمْ تَجِي فِي رَاسْ النَّاسْ الْفِي وَكِتْنَا دَا.
52 «يَا إِنْتُو الْعُلَمَاءْ، الْعَذَابْ يَرْجَاكُو أَشَانْ شِلْتُوا مُفْتَاحْ الْعِلِمْ. إِنْتُو ذَاتْكُو مَا أَنْدَسَّيْتُوا وَ بَتَّانْ النَّاسْ الْيِدَوْرُوا يِنْدَسَّوْا، إِنْتُو دَحَرْتُوهُمْ مِنَّهْ.»
53 وَكِتْ عِيسَى قَمَّ مَشَى مِنْ هِنَاكْ، الْعُلَمَاءْ وَ الْفَرِيزِيِّينْ بَدَوْا يِخَالُفُوهْ بِشِدَّةْ وَ يَسْأَلَوْه سُؤَالْ كَتِيرْ 54 أَشَانْ يَلْقَوْا فُرْصَةْ لِيَكُرْبُوهْ بِكَلَامَهْ الْيُقُولَهْ.
© La Bible en arabe tchadien © Alliance biblique du Tchad, 2019
