الجود
1 يَا أَخْوَانِي، نِدَوْر نِأَوْرِيكُو بِالرَّحْمَةْ الْاللّٰهْ أَنْطَاهَا لِجَمَاعَاتْ الْمُؤمِنِينْ الْقَاعِدِينْ هِنِي فِي بَلَدْ مَقِدُونِيَةْ. 2 صُعُوبَةْ شَدِيدَةْ قَاعِدَةْ تِجَرِّبْ إِيمَانْهُمْ لَاكِنْ هُمَّنْ فَرْحَانِينْ فَرْحَةْ شَدِيدَةْ. وَ حَتَّى كَانْ هُمَّنْ فَقْرَانِينْ فَقُرْ شَدِيدْ كُلَ، أَنْطَوْا بِجُودْ.
3 وَ نَشْهَدْ لَيْهُمْ كَدَرْ هُمَّنْ أَنْطَوْا حَسَبْ قُدْرِتْهُمْ وَ أَنْطَوْا زِيَادَةْ مِنْ قُدْرِتْهُمْ كُلَ بِنِيِّتْهُمْ. 4 وَ طَلَبَوْا مِنِّنَا بِشِدَّةْ أَشَانْ نَنْطُوهُمْ فُرْصَةْ لِيِشَارُكُوا فِي الْمُسَاعَدَةْ لِلْأَخْوَانْ الصَّالِحِينْ. 5 وَ هُمَّنْ سَوَّوْا زِيَادَةْ مِنْ الدَّوَّرْنَاهْ مِنْهُمْ. شَالَوْا نِيَّةْ أَشَانْ يِتَابُعُوا الشَّيّءْ الْيِدَوْرَهْ رَبِّنَا وَ بَتَّانْ شَالَوْا نِيَّةْ أَشَانْ يِتَابُعُوا عَدِيلْ كَلَامْنَا مِثِلْ اللّٰهْ يِدَوْرَهْ.
6 وَ أَوَّلْ تِيطُسْ بَدَا خِدْمَةْ الرَّحْمَةْ أَمْبَيْنَاتْكُو وَ أَشَانْ دَا، طَلَبْنَا مِنَّهْ يِكَمِّلْ الْخِدْمَةْ دِي مَعَاكُو. 7 أَكِيدْ إِنْتُو بِقِيتُوا شُدَادْ فِي كُلِّ شَيّءْ. إِنْتُو شُدَادْ فِي الْإِيمَانْ وَ الْكَلَامْ وَ الْعِلِمْ وَ نِيِّتْكُو شَدِيدَةْ وَ مَحَبِّتْكُو اللِّقِيتُوهَا مِنِّنَا شَدِيدَةْ. وَ هَسَّعْ أَبْقَوْا شُدَادْ فِي خِدْمَةْ الرَّحْمَةْ دِي كُلَ.
8 وَ فِي الشَّيّءْ الْبُخُصّ الْمُسَاعَدَةْ، مَا نَامُرْكُو بَيَّهْ. أَنَا قَاعِدْ نِأَوْرِيكُو بِخَبَرْ النِّيَّةْ الشَّدِيدَةْ هَنَا الْأَخْوَانْ الْآخَرِينْ. نَنْطِيكُو فُرْصَةْ أَشَانْ تِوَصُّفُوا كَدَرْ مَحَبِّتْكُو صَحِيحَةْ. 9 أَشَانْ رَحْمَةْ رَبِّنَا عِيسَى الْمَسِيحْ تَعَرْفُوهَا. هُو غَنِيْ وَ لَاكِنْ فِي شَانْكُو إِنْتُو، هُو بِقِي فَقْرِي أَشَانْ بِفَقْرَهْ دَا، إِنْتُو تَبْقَوْا غَنِيِّينْ.
10 وَ فِي الشَّيّءْ الْبُخُصّ الْكَلَامْ دَا، نِأَوْرِيكُو بِفِكْرِي. أَخَيْر تِكَمُّلُوا هَسَّعْ الْخِدْمَةْ الْبَدَيْتُوهَا السَّنَةْ الْفَاتَتْ أَشَانْ إِنْتُو بَسْ الْأَوَّلَانِيِّينْ فِي الْخِدْمَةْ دِي. وَ زِيَادَةْ مِنْ دَا، إِنْتُو الْأَوَّلَانِيِّينْ الْعِنْدُكُو نِيَّةْ أَشَانْ تِسَوُّوا الْخِدْمَةْ دِي. 11 وَ خَلَاصْ كَمُّلُوهَا. وَ كَمُّلُوهَا بِنَفْس النِّيَّةْ الشَّدِيدَةْ الْبَدَيْتُوهَا بَيْهَا. وَاجِبْ تَنْطُوا حَسَبْ قُدْرِتْكُو. 12 كَنْ نِيِّتْكُو عَدِيلَةْ، اللّٰهْ يَرْضَى بِالشَّيّءْ التَّنْطُوهْ. الْمَا فِي مَا بِنْلَقِي. هُو يِدَوْر إِنْتُو تَنْطُوا مِنْ الْمَالْ الْعِنْدُكُو بَسْ. 13 مَا تِفَكُّرُوا أَنَا نِدَوْر كَدَرْ يَبْقَى قَاسِي لَيْكُو وَ هَيِّنْ لِنَاسْ آخَرِينْ. نِدَوْر يَبْقَى لَيْنَا كُلِّنَا سَوَا سَوَا. 14 فِي الْوَكِتْ الْحَالِي، إِنْتُو عِنْدُكُو كَتِيرْ وَ هُمَّنْ حَوْجَانِينْ وَ خَلَاصْ سَاعُدُوهُمْ. وَ بَعَدَيْن، كَنْ هُمَّنْ عِنْدُهُمْ كَتِيرْ وَ إِنْتُو حَوْجَانِينْ، هُمَّنْ كُلَ يِسَاعُدُوكُو وَ يَبْقَى لَيْنَا كُلِّنَا سَوَا سَوَا. 15 وَ دَا يِفَكِّرْنَا بِالْكَلَامْ الْمَكْتُوبْ فِي الْكِتَابْ الْبُقُولْ: <الْعِنْدُهُمْ كَتِيرْ مَا فَضَّلْ لَيْهُمْ. وَ الْعِنْدُهُمْ شِيَّةْ كُلَ، مَا قَصَّرْ لَيْهُمْ.>
بُولُس يشْهد لتِيطُس
16 وَ نُقُولْ الْحَمْدُ للّٰهْ أَشَانْ اللّٰهْ أَنْطَى تِيطُسْ نِيَّةْ شَدِيدَةْ مِثِلْ نِيّتِي أَنَا أَشَانْ يِعَاوِنْكُو. 17 وَ تِيطُسْ قِبِلْ طَلَبْنَا وَ زِيَادَةْ مِنْ دَا، هُو بِنَفْسَهْ شَالْ نِيَّةْ شَدِيدَةْ وَ دَوَّرْ يَمْشِي لَيْكُو. 18 وَ الْأَخُو النِّرَسُّلُوهْ مَعَايَهْ مَعْرُوفْ. جَمَاعَاتْ الْمُؤمِنِينْ فِي أَيِّ بَكَانْ يَشْكُرُوهْ بِسَبَبْ خِدِمْتَهْ فِي بَلِّغِينْ بِشَارَةْ الْمَسِيحْ. 19 وَ زِيَادَةْ مِنْ دَا، هُو وَاحِدْ مِنْ الْأَخْوَانْ الْعَزَلَوْهُمْ جَمَاعَاتْ الْمُؤمِنِينْ لِيِسَافُرُوا مَعَانَا وَكِتْ أَنِحْنَ مَسْؤُولِينْ فِي شَيْلِينْ الْعَطِيَّةْ دِي. وَ نِسَوُّوا الْخِدْمَةْ دِي أَشَانْ نِمَجُّدُوا بَيْهَا رَبِّنَا عِيسَى وَ نِوَصُّفُوا نِيِّتْنَا الْمُخْلِصَةْ.
20 وَ خَطَّيْنَا بَالْنَا أَشَانْ نِكَمُّلُوا عَدِيلْ مَسْؤُولِيِّتْنَا فِي الْعَطِيَّةْ الْكَبِيرَةْ دِي، فِي شَانْ مَا نِجِيبُوا فَوْقنَا شَكَكْ مِنْ أَيِّ نَادُمْ. 21 وَ شِلْنَا نِيَّةْ لِنِسَوُّوا الْعَدِيلْ قِدَّامْ اللّٰهْ وَ قِدَّامْ النَّاسْ كُلَ.
22 وَ مَعَ الْأَخْوَانْ الْإِتْنَيْن دَوْل، نِرَسُّلُوا لَيْكُو أَخُو آخَرْ. وَ هُو نَادُمْ جَرَّبْنَاهْ بِخِدْمَةْ كَتِيرَةْ. نَعَرْفُوا هُو عِنْدَهْ نِيَّةْ لِلْخِدْمَةْ. وَ هَسَّعْ نِيّتَهْ زَادَتْ بِلْحَيْن أَشَانْ عِنْدَهْ عَشَمْ قَوِي فَوْقكُو إِنْتُو. 23 وَ تِيطُسْ دَا، هُو رَفِيقِي وَ يَخْدِمْ مَعَايِ أَشَانْ يِعَاوِنْكُو. وَ أَخْوَانَّا الْمَعَايَهْ دَوْل، هُمَّنْ مُمَثِّلِينْ هَنَا جَمَاعَاتْ الْمُؤمِنِينْ. وَ حَالْهُمْ عَدِيلَةْ تَنْطِي مَجْد لِلْمَسِيحْ. 24 خَلَاصْ، وَصُّفُوهُمْ مَحَبِّتْكُو أَشَانْ جَمَاعَاتْ الْمُؤمِنِينْ فِي أَيِّ بَكَانْ يَعَرْفُوهَا وَ يَعَرْفُوا مَالَا حَجَّيْنَا بَيْكُو بِرَاسْ مَرْفُوعْ.
© La Bible en arabe tchadien © Alliance biblique du Tchad, 2019
