الملك حِزْقِيَّا مِرِض و لِقي العافَي
1 وَ فِي الْوَكِتْ دَا، حِزْقِيَّا مِرِضْ مَرَضْ شَدِيدْ لَحَدِّي قَرِيبْ يُمُوتْ. وَ النَّبِي إِشَعْيَا وِلَيْد أَمُّوصْ جَاءْ لَيَّهْ وَ قَالْ: «دَاهُو اللّٰهْ قَالْ: ‹وَصِّي عَايِلْتَكْ أَشَانْ إِنْتَ تُمُوتْ. مَا تَلْقَى الْعَافَيْ.›» 2 وَ حِزْقِيَّا وَجَّهْ عَلَيْ الدُّرْدُرْ وَ سَأَلْ اللّٰهْ. 3 وَ قَالْ: «يَا اللّٰهْ، فَكِّرْ فَوْقِي أَنَا التَّابَعْت دَرْبَكْ بِصِدِقْ وَ بِقَلِبْ مُخْلِصْ وَ سَوَّيْت كُلَّ شَيّءْ الْإِنْتَ تِدَوْرَهْ!» وَ حِزْقِيَّا بَكَى بَكِي شَدِيدْ.
4 وَ خَلَاصْ، اللّٰهْ حَجَّى لِإِشَعْيَا وَ قَالْ: 5 «أَمْشِي قُولْ لِحِزْقِيَّا: ‹دَاهُو اللّٰهْ إِلٰـهْ جِدَّكْ دَاوُدْ قَالْ: ”أَنَا سِمِعْت سُؤَالَكْ وَ شِفْت دُمُوعَكْ الدَّفَّقَوْا. وَ دَاهُو أَنَا نِزِيدْ لَيْك 15 سَنَةْ فِي عُمْرَكْ. 6 وَ نِنَجِّيكْ إِنْتَ وَ الْمَدِينَةْ دِي مِنْ إِيدْ مَلِكْ بَلَدْ أَشُورْ. أَيْوَى، نَحْمِي الْمَدِينَةْ دِي. 7 وَ دَاهُو نَنْطِيكْ عَلَامَةْ مِنْ اللّٰهْ، التِّوَصِّفْ كَدَرْ هُو يِتِمّ الْكَلَامْ الْقَالَهْ لَيْك. 8 وَ نِكَسْكِسْ الضُّلّ بِعَشَرَةْ دَرَجَاتْ فِي دَرَجَاتْ عَتَبَةْ أَحَازْ.“›»
وَ خَلَاصْ، الْحَرَّايْ قَبَّلَتْ وَرَاءْ بِعَشَرَةْ دَرَجَاتْ مِنْ الدَّرَجَاتْ الْأَوَّلْ نَزَلَتْ فَوْقَهْ.
صلاة حِزْقِيَّا بعد لِقي العافَي
9 دَاهُو الْكَلَامْ الْكَتَبَهْ حِزْقِيَّا مَلِكْ مَمْلَكَةْ يَهُوذَا وَكِتْ هُو مَرْضَانْ وَ لِقِي الْعَافَيْ مِنْ مَرَضَهْ.
10 «أَنَا قُلْت: ‹بِقُدُرْتِي بَسْ،
نَمْشِي لِلْمَوْت
وَ الْبَاقِي مِنْ عُمْرِي،
نَقْعُدْ مَعَ الْمَيْتِينْ.›
11 وَ قُلْت: ‹بَتَّانْ مَا نِشِيفْ اللّٰهْ
فِي أَرْض الْحَيِّينْ.
وَ بَتَّانْ مَا نِشِيفْ وِجِهْ إِنْسَانْ
مِنْ سُكَّانْ الدُّنْيَا.›
12 وَ حَيَاتِي مَرَقَوْهَا وَ وَدَّوْهَا بَعِيدْ مِنِّي
مِثِلْ خَيْمَةْ الرَّاعِي.
وَ مِثِلْ تَرَّارْ التَّشاكَةْ،
حَيَاتِي كَمَّلَتْ وَ جَاتْ فِي آخِرْهَا
وَ خُيُوطْهَا أَلْقَطَّعَوْا.
مِنْ يَوْم لِآخَرْ،
تِنْتَهِي مِنِّي.
13 لَحَدِّي الصَّبَاحْ،
أَنَا فَكَّرْت فِي حَالْتِي.
مِثِلْ دُودْ، الرَّبّ كَسَّرْ
كُلَّ عُضَامِي.
يَا رَبّ، مِنْ يَوْم لِآخَرْ،
تِنْتَهِي مِنِّي.
14 وَ مِثِلْ أَبُنْ جَرَارِي، أَنَا نَبْكِي
وَ مِثِلْ قِمْرِيَّةْ، أَنَا نِزَقِّي.
وَ عُيُونِي ضِعْفَوْا
وَ يِصَنْقُعُوا عَلَيْك.
يَا رَبّ، أَضَّايَقْت!
قُمّ وَ أَضْمَنِّي!
15 «وَ هَسَّعْ، نُقُولْ شُنُو لِلرَّبّ؟
أَشَانْ هُو بَسْ كَلَّمْ لَيِّ
وَ هُو بَسْ سَوَّى كُلَّ الْأَشْيَاءْ دَوْل.
وَ نِعِيشْ وَ نِمَسْكِنْ نَفْسِي مُدَّةْ كُلَّ سِنِينِي
بِسَبَبْ الْمُرّ الْفَوْقِي.
16 «يَا رَبّ! بِسَبَبْ كَلَامَكْ، النَّاسْ عَايْشِينْ
وَ بَيَّهْ هُو، أَنَا عَايِشْ بَتَّانْ
وَ إِنْتَ ثَبَّتِّنِي وَ حَيَّيْتنِي.
17 مُرِّي أَلْبَدَّلْ بِالسَّلَامْ!
إِنْتَ نَجَّيْت حَيَاتِي
وَ سَلَّمْتِنِي مِنْ الْمَوْت.
أَيْوَى، إِنْتَ زَقَلْت
كُلَّ ذُنُوبِي وَرَاكْ.
18 أَشَانْ فِي الْقُبُورْ،
النَّاسْ مَا يِمَجُّدُوكْ
وَ الْمَيْتِينْ مَا يَشْكُرُوكْ!
أَيْوَى، الْيَنْزُلُوا فِي الْقُبُورْ
مَا عِنْدُهُمْ عَشَمْ فِي أَمَانَكْ.
19 وَ لَاكِنْ الْحَيّ بَسْ يِمَجِّدَكْ
مِثْلِي أَنَا الْيَوْم
وَ الْأَبُو يِعَرِّفْ عِيَالَهْ
بِأَمَانَكْ.
20 اللّٰهْ نَجَّانِي.
وَ أَنِحْنَ نَضُرْبُوا آلَاتْنَا هَنَا الْمُسِيقَى
فِي كُلَّ مُدَّةْ حَيَاتْنَا فِي بَيْت اللّٰهْ.»
21 أَشَانْ أَوَّلْ إِشَعْيَا قَالْ: «خَلِّي يِجِيبُوا عَبُّودْ هَنَا تِينْ وَ يِعَجُّنُوهْ وَ يَمْسَحَوْه فِي الْحُبُونْ وَ الْمَلِكْ حِزْقِيَّا يَلْقَى الْعَافَيْ.» 22 وَ فِي الْوَكِتْ دَا، حِزْقِيَّا قَالْ: «شُنُو الْعَلَامَةْ التِّوَصِّفْ لَيِّ كَدَرْ أَنَا نَمْشِي بَتَّانْ لِبَيْت اللّٰهْ؟»
© La Bible en arabe tchadien © Alliance biblique du Tchad, 2019
